Kena taun 70 an kenya agi menya bisi siko apai tuai ti bernama Jenging(nama amai dilalai) enggau Jenang(nama amai dilalai) bisi nurun ke Sabah ngereja kayu tadi.Nyadi maia nya tudah aya aku pen enggau meh kereja kin seretai enggau ia.Ba Sabah din sida tiga tadi sebilik mina pangking aja kediri alu sama sitik bilik segulai semina makai nya tadi sama berapi kediri empu.Nyadi kelia agi sigi bulih duit amai enti kereja deriba lipan laban agi menya mata duit sigi besai agi ngena dollar empai ditukar agai ringgit baka kediato.Nyadi kelia agi enti ba kampung puang sigi digiga lubang indu embum nya(indu utai ti bechurak celum) laban ka ngulih ke tebuk indu embum ti lurus ngica ulih dikena main sekupong laban enti ditemu sigi bulih ja menang duit maia besekupong tauka main holo.Nyadi tudah Jenging tu enda kibuh utai baka nya laban majak ke kerja sereta keja ia mina nyadi tukang kupas menyadik ia Jenang ti tuai gik ari ia.Maia ujung bulan udah orang pekerja dibayar gaji nyadi enggi Jenging tu alu disimpan ja.Kenu ko aya ku nya nusi pengelimat Jenging tu amai bejimat lebuh bebeli utai kelauk.Siko ikan masin enggau telu masin ulih dempa ia seminggu laban ngelimat duit amai pen duit ia maioh tang cukup bejimat.Nyelai gik ga madik ia Jenang(nama amai dilalai) ti ka amai ngirup alu main ka main judi sereta ti dah mabuk alu ka berekak sereta nemu ngaga duit ari keretas enggau ari daun ngena penemu ilmu hitam.Nyadi Jenging tu enda bakanya tang ia cukup kedekut enggau bini anak ia lebuh pulai ke menua.Enggi orang utai baru magang dibeli ti enggi Jenging nadai utai dibeli mina belanja pemakai aja ke dibeli ia.Ti enggi Jenang lain agi,pulai ke rumah panjai,penuh perau laban ke kereja deriba lipan gaji naka penyampau dibai pulai ke menua.Amai Jenging kediri ari bilik tuai ti dibun Jenang,tang ia enggai kia laban udah diburu apai ia ngasuh ia pindah ari bilik nya suba ketegal ia belaya enggau Jenang,laban Jenang bulih duit nya meh kabuah apai seduai ia enggai meda Jenging ti nadai bulih utai.Bepun ari nya Jenging enggai kiruh agi ke apai indai ia ngujung ia ngaga kediri bilik ba ujung rumah panjai. Maia gawai atai tang Jenging mina mantai ai tuak aja nyelai madik ia Jenang mantai beer Stella nyau berpaket paket ba ruai.Tudah Jenging meda aja laban ia menting ke anak bini sebedau bebeli ke utai.Lain anak orang ngena gari baju tang sida sebilik ngena gari udah mendua taun ti udah dibeli.Penelap bini Jenging enggau Jenging sereta nemu juluk ati laki ia ti ngujung bini ia enda minta utai maioh ba laki diri sereta bala anak baka nemu ati apai diri diak sida enda bermunyi aja maia nya meda anak orang kebukai nyau terkiting makai roti sereta ngena gari baru ba belah ruai.Nyadi pengudah kereja ba Sabah bisi bebelas taun diak anak Jennging ambis bulih kerja menyana magang sereta meruan ngibun bilik Jenging.Tang enggi Jenang laban anak ngasai diri senang belama diak nitih ke apai diri bekerja ba belah kem laban gaji besai agi ari keja perintah agi menya suba.Tang pengidup Jenging berubah ngenyit pengudah anak ia siku pulai ari luar negeri belajar alu nyadi Residen Daerah ba perintah menua Sarawak maia nya.Ngujung Jenging dasuh anak ia bado keja kayu agi.Pementas enggau pengelimat Jengging ba senentang duit cukup amai dikingat anak ia ngujung anak ia nunda peengelimat apai sida ti bebeli utai penting aja ba pengidup.Semina enda kedekut meli utai dipakai laban kasih ke anak bini sereta apai indai diri empu.Laban enggai merinsa nyawa makai nadai berlauk baka enggi apai sida ia Jengging nya tadi.Enggi tudah Jenang nyau ambis nunda ulah ia magang bala anak ia,balat bejudi enggau ngirup.Lebuh Jengging ditaban ari alu lesi midang lelang pulai gegendai ke langit mingkai maia taun 2008 diak ia meri jako tangkan agai bala anak baka tu. "Igat enggau kitak endu kingat maia aku suba enggau kitak ti meri kitak makai nadai berlauk maioh,anang balat kitak ngirup laban aku enda ngajar kitak ari mit nyentuk ke besai nyadi pengirup ai bisa belama,kingat maia kitak agi mit bertancut begari utai carik,kingat maia kitak ngumpul buah engkabang enggau narit wie ba belah kampung puang,sereta kingat pemerinsa kitai agi suba,bepun ari pemerinsa kitai senang alu ari penyenang kitai ngingat ke penusah pemerinsa ngica kitai enda merinsa belama ba pengidup.Galau duit sempama baka berau dalam tajau,majak disumbak dipanduk berau puang dalam tajau tang tua enda nyenguk tajau enya laban tua ngumbai berau nya bedau agi,lebuh berau ditemu ambis tuai kiah kiah kin kia nyanda ti orang ka meri secupak segantang dua angka begik ti orang enggai ka pen enda tua pagila nyembi padi ti ke bisi,manah ti ari tadi panas tang enti nyau ujan belama ka pen enda tua nyanda genap ka makai belama ba orang nya aja.Manah enti orang ka meri tua secupak dua ti nyau genap kenya aja aja,orang nya pen nemu meh enggai meri tua berau belama laban orang pen ka meh ngalau berau kena diri empu laban ari agi ujan.Enti ngajar bala ucu anang baka indu engkululut nyau majak malut semalut ba pun tiang tang labit nyau puang laban ai nya tadi nicir tang ditutu baru ti ngasuh indu engkululut eikak,ti begulai melaki bini anang ngaga pangan diri baka gari sirat enggau gari baju ti baju.Maia luya ditempaya alu diganti gari ke baru,baka tikai gulung bidai enti baru dancau ba ruai enti lama alu carik alu digulung alu dibuai ke endur bukai,nyadi anang baka nya ba pengidup.Enti begulai enggau orang bukai tua baka bejalai ba kampung puang,lebuh bejalai tepansa ke akar melintang ba tengah jalai,alu tua pajak tang tua ensuruk alu anang ngedar ke tubuh bediri maia ensuruk akar tadi enda alah bisi duri wie ngujung belakang tua nyau disayat duri.Pengidup kitai baka ai bah,lebuh langkang lubuk nadai penalam tang lebuh ai bah lubuk dalam tang rau enggau apat sigi maioh mansa rarat,tang ti lebuh ai lepong,ko jako ka beratung tang enda nemu ba ili tua tadi bisi wong arung.Kingat anak pesan aku tu ngica kitak ulih nampung jako ajar aku agai bala anak kitak ila".
Udah tembu ngajar bala anak diak Jenging alu narit seput pengambis ia alu lesi bebadi meh tudah tuai.Nyadi diato bilik Jenging dibun anak ia ke nyadi Residen Daerah nya tadi tang anak ia kabukai enyau nitih bala anak sida empu diau ba London din.Tang enggi anak Jenang enyau belaya laban enggai beribun ke apai indai diri empu ngujung Jenang dibun anak Jengging ti nyadi Residen Daerah nya tadi ti ngujung Jenang enggai meri tanah buah agai anak ia empu laban ia pedis ati agai anak diri ti enggai ngibun maia ia udah tuai enda dapat bekerja agi.Nyadi lebuh bala Jenging meresa duit ditinggal apai sida ia ba bank enyau ngapo bala anak sida ia meda penyampau duit digalau apai sida Jengging nyau beratus ribu ti ngujung bala anak ia betabi basa amai ke ulah apai sida ia ti bejimat amai maia agi idup.Meda kenya diak Jenang ngenang diri laban enda nyangka menyadik ia Jenging ti cukup ngelimat duit sampai bakanya.Enti ia nunda baka ulah Jenging maia agi suba sigi berasai nyamai maia tuai.Ba jerita amai tu bisi pengajaran ba kitai,galau meh duit ari majak ngirup bejudi belama alu begulai manah meh enggau orang bukai awak lebuh tua nadai didunya agi tua dikenang orang belama.Alu setia meh enggau bini anak diri ngica ruang bilik kitai likun ngica kitai ulih serekun begulai segulai enggau diri sebilik.Penusah nuntung kitai enda untung tang penyenang atai utai nya ngasuh tua tucum kembai idung tang penyauh pengelama ni penyenang nya nya meri kitai tu untung.
No comments:
Post a Comment