Jerita Kindau Nyadi Remaong

Jerita to amai nyadi maia taun 1960 an ba area Song din.Menya bisi siko lelaki ti bernama Kindau ti baru bebini tudah tuai alu dikangau tauke ngereja nyelato ba Sarikei laban maia musim kereja nyelato amai famous maianya.Nyadi Kindau nurun ningal tudah bini ia ke ngandung sebulan maia ia nurun.Atai ba Sarikei tudah tuai alu kereja nyelato.Laban maia nya agi maioh orang sama ngereja nyelato nyadi sama berambi ba hutan ti sama ngujung ke kayu nyau ka ambis alu tumu pagi sitek nya diak Kindau kediri aja nurun agai kampung mali ti enda kala dikereja ke orang kebukai.Diak Luat meda ia nurun kediri alu nanya ia kini penunga Kindau tadi,diak ia madah agai kampung mali tang Luat nagang ia laban kampung mali berantu ko Luat madah agai ia tang kindau enda peduli alu Kindau majak aja pejalai ia.Kira lemai peda Luat nadai ga meda Kindau pulai ke langkau ia nyau takah mendua ari diak Luat meda Kindau pulai ari kampung mali.Tang penyelai pemulai Kindau to sigi amai nyelai,maia malam kereja maia siang ari ia tindok pengudah ia pulai ari kampung mali.
Nyau bertakah bulan diak sida ke ngereja nyelato sama ka pulai magang tang Kindau enda kekebut ka pulai.Terima gaji Kindau naka penyampau maia nya bisi seribu lebih dollar(matawang kitai empai ditukar agai RM maia nya)..Diak Luat nanya nama Kindau pulai gawai ke enda tang Kindau madah enda pulai mina ngirum ambis gaji ia bisi 5 ribu dollar ia ba Luat awak bisi dikena bini meli utai.Pemulai Luat alu ngemai 5 ribu dollar tadi alu disua agai bini Kindau alu madah Kindau enda pulai.Bini Kindau nyau belai mata laban meda laki diri nda pulai gawai udah ga ia ngandung besai mina nganti bulan aja ka ngandung.Nyau pengambis gawai diak sida Luat pulai baru ka ngereja nyelato ba Sarikei.Atai di Sarikei alai kem ngereja nyelato diak ia meda Kindau tindok maia tengahari tang penyelai ia dapur ia penuh darah.Tak alit ati Luat meda utai bakanya.Luat alu beguai pulai ke langkau ia empu damping langkau Kindau.Bertaun taun udahnya,sida Luat pulai belama genap taun begawai tang Kindau enda pulai sekali pen ke rumah panjai,ia mina nemu rita bini ia beranak dua iko lelaki.Nyau bisi 5 taun Kindau enda pulai diak bini Kindau temasuk entua Kindau enggau apai indai Kindau empu nitih sida Luat pulai ke kem laban ka meda ka nanya nama kabuah Kindau enggai pulai ke menua agi.Nyadi atai ba kem ngereja nyelato diak sida alu ngangau ke Kindau tang Kindau enda nyaut laban ia tindok jenak maia tengahari.Meda kenya diak sida alu ngerumpang pintu langkau tudah Kindau ti ngujung sida terkenyit meda bilik Kindau nyau baka bekau dikeramak jugam  tang sida enda kibuh utai bakanya agi laban pedis ati meda Kindau lama enda pulai kemenua.Diak sida alu ngerak Kindau ti ngujung Kindau dani maia nya.Gamal tudah Kindau nyau beragum alu kurus dipeda sida ia.Sida alu majak nanya Kindau nama kabuah ia enggai pulai ke menua agi.Tang Kindau sitek leka jako pen nadai bermunyi ngujung entua Kindau alu nimbang tudah Kindau kira sarak nadai laya enggau anak ia,ia nya bini Kindau.Meda kenya diak apai indai Kindau alu mutus ati enggai ngambu Kindau agi anak laban pelaba sida ke diak Kindau to bisi bini kabukai laban takah beberapa tanjung ari kem sida ia bisi rumah panjai.Mesti Kindau bisi buya indu dara ba diak ko ruding bini ia sereta entua ia enggau apai indai Kindau empu berkenang ba diak.Diak Kindau mina neritik ai mata aja meda runding sida bakanya.Nyadi malam nya sida bini ia enggau entua sereta apai indai ia tinduk ba langkau Luat laban langkau Luat besai sereta enggai kiruh ke tudah Kindau.Dikangau Kindau makai sida ia tadi enggai meh bini Kindau,entua ia enggau apai indai Kindau agai langkau Kindau baru dahnya.Tumu pagi sitek diak janda Kindau,ex entua ia enggau apai indai Kindau nurun pulai ke Song kin.Puas tudah Kindau minta ampun agai bini ua sereta entua ia enggau apai indai ia tang sida nadai kiruh jako Kindau ti ngujung Kindau alu bejako baka to."Ooo sulu,Ooo apai Ooo indai ti baka to gaya kitak,mutus ati meh tudah aku kediato,bado meh kitai begulai dah to ila.Ooo suluu jaga manah anak tua naka ulih nuan.Nyadi to laluh duit ba aku to empu nuan,bai nuan pulai kena belanja anak tua jemah ila."udah Kindau alu nyabak beraie ngujung ia merung naka pemesai nyau terguyap pun kayu ti besai.Meda utai kenya diak bini ngambi duit ba uyut ti ka diberi Kindau tadi dengkah ba tisi bandir kayu,tak terkenyit bini Kindau meda pemaioh duit nyau penuh uyut mesai pemerap kitai kebesai enggau duit dulih Kindau ngelamato.Mudik sida bini tadi agai pasar Sarikei alu pulai ke Song.Pulai agai jerita Kindau tadi ba Sarikei.Nyadi pengudah Kindau nyerauh naka pengingar tadi diak Kindau nyabak ba langkau ia.Diak Luat tadi terdinga leka sabak Kindau baka to.
Kasih tudah aku,
Bini aku udah kekebu ningal ke aku,
Kasih meh aku,
Apai indai aku enda beguna ke aku,
Kasih meh aku,
Entua aku enggai nerima aku agi nyadi ke menantu,
Kasih meh aku,
Bangat alah bulu dibai antu,
Ku berpenti bekali beribu,
Sida ia nadai nemu tuju ku baka tu,
Ehhhh apai ehhh indai bangat ku dandai,
Oohhh sida entua dipeda baka temaga,
Ooo ambai ku sayau amai,
Bado meh kitai begulai,
Mutus ati meh aku dah to,
Nyadi bunsu remaong negung merong ngiga narong
batang ukong bersimpai besirong uchong.

Udahnya Kindau alu muka pintu maia nya alu bejalai beguai alu nyabak nyebut leka sabak bakanya tadi.Diak Luat nitih ari belakang ngujung datai ba kampung mali.Datai din Kindau alu ngirup ai burak baka ai susu diak peda Luat ti ngujung Kindau bebali nyadi remaong naka pemesai remaong nya ka mesai gajah siko dipeda ia.Diak Kindau terpeda ke Luat alu ngangau ke Luat semak ia agi tang Luat nyau  takut ngujung Luat enda tepansut ke leka jako.Meda bakanya diak Kindau bejako enggau Luat baka to."Nya unggal to meh meri aku enda ulih pulai kemenua agi laban aku nganti tubuh raja remaong ti mati dibunuh aku suba ba Bukit atas nya.Nyadi diato unggal ku udah nyadi remaong nyegenda enda ulih baka mensia agi,to meh kabuah aku enda ulih kemenua kitai kin laban aku disumpah raja remaong aku sigi munuh anak aku empu enti aku nginsit alu mindah ari menua to enti aku enda nganti penuduk ia nyadi remaong.Nya meh ku enggai pulai nganti anak ku besai baru ulih pulai kin laban sumpah nya ambis.Aku enda tau madah nama kabuah aku enda pulai agai kitak laban nya ngelanggar sumpah raja remaong,ti ku madah,ku alu bebali nyadi remaong alu makai kitak,tang diato ku udah ngirup ai tusu bini raja remaong alu aku nyadi raja remaong aku ulih madah ke kitak tang aku bado begulai agi enggau kitak.Diato unggal Luat enti dik pulai ke rumah panjai ,padah agai bini aku,entua aku,apai indai aku enggau anak aku,aku udah nyadi raja remaong ti nyaga menua Tinting Mengandai Tuai(endur menua mitos ba area Kalimantan),Bukit Bakak(sempadan Srwk enggau Kalimantan),Bukit Batu(Bario),Bukit Tinggi,enggau Gunung Kinabalu.Bado kitai begulai unggal bado meh tua ngasu bejalai beburu agi,bado meh tua ngetan bubu,tak naka aja meh tua begulai unggal."Kindau nyabak alu merap Luat,tang Luat agi rerangap sereta takut meda pemesai tubuh Kindau ti nyadi remaong,seretai Kindau negung diak baka lindap ari alu terebai meh Kindau nuju matahari alu nadai dipeda agi.Sari sitik diak Luat pulai bepadah agai Song kin alu pengudah bini Kindau,entua Kindau sereta apai indai Kindau ninga jerita Luat tadi diak sida sebilik nyabak magang ngenang penyalah diri ngukum Kindau bakanya.Tang nama daya utai udah nyadi ka pen enda tat ke aja meh.Bepun ari nya Kindau selalu ngenatai kediri meda anak lelaki ia tadi maia bulan keleman semina Luat aja nemu penatai Kindau maianya.Kira taun 1970 lbh knya anak Kindau udah besai mimit alu sida bini ia alu pindah ke menua bukai ngujung Kindau bado ngundang sida ia pengudah bini ia belaki baru ba menua bukai.Kindau to keno ko kenang niang inik suba sereta kenang aki tuai Kuling sigi selalu ngayan kediri agi taun 1990 kenya,maioh kitai Iban ditulong ia sesuba agi tang aku enda nemu sapa ditolong ia.Kindau bedau agi nyadi Raja Remaong nomor 6 ari semua Raja Remaong ti nguan menua bukit bukit sereta gunung kitai ba Sarawak din temasuk ba Sabah enggau Kalimantan.Jerita to ukai mitos jerita to ditusi niang inik suba laban niang aki Luat to petunggal sida inik ari aku suba..Penama asal di ubah aku kena aku ngelalai orang ngempu jerita sereta peturun Kindau to.