Tumu pagi sitik diak Jeniah ngemai Kuring nurun begagai ba kampung puang laban lama udah Jeniah tetenguk ka makai burung sempidan enggau burung ruai.Nyadi alu engkira meh tudah Kuring alu ngemai perengka baka sumpit,laja ipoh,duku,batu tekih,enggau kabukai.Amai Jeniah agi nembiak tang Kuring meruan bebasa sereta sayau ke Jeniah laban Jeniah tu bisi ngembuan ati ti nelap sereta rindu bebakih enggau bala ulun ia.Nyadi sida Jeniah sebilik sigi di sayau bala ulun sida ia laban sida sebiliknya cukup mentas.Pemanah Kisuh enggau sida ia baka sida ulun nya sebilik enggau sida ia empu.Meda Jeniah nurun bejalai ngenumu pagi nya diak Guntur alu engkecit ari padung tindok enggau jampat alu nawing Jeniah alu madah ka enggau Jeniah.Diak gaga meh ati Jeniah meda akak ia Guntur enggau,alu terkenyit saduai meda Kucai pen ari seberai reraoh madah ka enggau saduai.Nama agi deh alu segulai meh sida empat tadi nurun ke ulu Sungai.Datai din diak Jeniah ngabas bubu ditan ia kemari,tak naka pemaioh ulih bubu nya tadi baka empurau,semah,tengadak,lelabi,enggau utai kabukai meh ulih bubu nya tadi.Naka pengaga ati sida sabuat tadi laban bubu ke udah di abas tadi nyau bulih utai ngemaioh nya nyau chundung tubuh Kuring ngema uyut sereta ribih ikan dulih bubu tadi.Nyau kasih tudah Kucai meda nya tadi alu madah ke Kuring ia ka ngema uyut nya tadi.Tak muntang Kucai ngema uyut nya tadi,ni enda laban Kucai betubuh besai sereta kering enggau tinggi agi.Pengudahnya diak sabuat alu ngintu ikan ba karangan sungai alu begiga ka buluh kena mansuh asi pulut enggau ikan sereta lelabi ke dulih bubu tadi nyadi ke dempa ke tengahari negi.
Sida sabuat ngiga kayu rangkai enggau rumut jurai kayu pansap alu ngiga buk aping kena ngidup ke api.Udah nya alu diak Kuring atai ngemai ai isi pun pajik ti dulih ia tadi.Seretai nekih batu tekih api diak api alu idup mimit alu dipanjah Kuring ngena ai isi pun pajik ba api tadi peda api nyau ngebop besai.Nama agi deh tak ditugung sida sabuat meh kayu ke rangkai tadi alu idup manah api,seretai api idup manah diak pansuh ikan alu dasur ke api,ikan kaduak ditunu,alu Guntur kisuk ngaga tempara dapur kena nyalai ikan.Pengudah pansuh mansau diak sida sabuat alu makai laban ka nyumpit ngiga burung sempidan.Diak ikan disalai pen mansau disalai alu sida sabuat mupuk bejalai ke kampung puang ngiga burung sempidan.Ambis resam ditengah ambis kampung puang diredah,nadai ga terpeda ke siku burung,tak sunyi kampung puang baka nadai jelu ba menua nya.Pemuas sida begiga ke jelu ti nadai ditemu diak sabuat ngetu ba anak sungai alu duduk baru alu makai.Lebuh makai diak Jeniah ngasuh akak ia Guntur,Kucai enggau Kuring nya tadi pulai ke rumah alu Jeniah madah ka bemalam ba kampung puang seagi empai terulih ke burung sempidan nya tadi.Diak dulu Kucai nyaut madah enggai pulai ke rumah panjai alu pia mega timbal Guntur enggau Kuring tadi.Meda sida tiga enggai pulai diak Jeniah tuchum aja laban ia ka ngemai sida sabuat niki bukit ti tinggi pengudah makai tengahari kediato.Diak ninga Jeniah ngemai kenya diak ati Kuring berasai gaga laban nya terubah ia begulai enggau Jeniah jauh begiga ke lauk naka penyauh nya agai kampung puang ti nadai dikembuan mensia.
No comments:
Post a Comment