Memunyi cuie madah ke ari udah pagi,beregam memunyi burung emperagam madah bulan udah ka padam,dipuput ribut bebiu ngeruntu ngeyelap ke pagi ari,kecuai burung ruai di kampung jerung madang melai nanda ari manah alai begawai,alu didinga tawak dipangkung nyau ngebong ngeregau ari berkarung bisi ngenujuh pangkung didinga diak alu nyeraoh Dumbang ari pemendai pengayau diseberai rumah panjai alu nyerais sida kabukai nanda sida datai ngemai antu pala laban kayau menang besai.Alu nyikap sida dirumah muka giling bidai,sida kedara kedengil niti pejalai nganti penatai bala pengayau datai niki ke ruai,sida ke anembiak dasuh duduk ba bilik laban ti mansa pengayau datai sigi entanjar luput.Kabuah kenya laban semengat antu pala tu sigi ka munuh mensia ti alah bulu ari ia,nya alai anak mit ke mancal tauka indu dara datai kain sigi enda tau ngambat penatai pengayau,laban semengat antu pala tu ngiga mensia alah bulu ari ia.Semadi udah di intu enggau piring ading alu ditimang alu diberi kajat pencelap nya baru tau sida ke mit enggau indu ke atai kain nya tau merap tau ngimbai laki diri empu.Nyadi ti indu nya dah tuai enda datai kain nya baru tau ngambat penatai sida pengayau.Maioh kitai kediato enda nemu reti penti pemali ngambat penatai sida pengayau ti pulai ngayau.Pulai agai jerita tadi,lebuh sida ka niki ke rumah panjai diak dipandi enggau ai pencelap,pala bala pengayau dirunsur ari punjung aji ba pala enggau ai pencelap ngica rumah panjai enda angat ngica menua chelap baka selama.
Udah dirunsur enggau penyelap diak sida alu dipiring alu nyengkelan antu pala enggau ai pencelap sereta Dumbang alu mancak 7 kali sepa babi mangkas nemu betepas babi belang tunga matahari terang alu udahnya alu munuh manuk siko sepintu ngica darah manuk nya tanda entara semengat mensia enggau sebayan ngica semengat antu pala munsuh enda ngeregau enda ngacau mensia.Alu pia mega Kisuh,Guntur enggau Jeniah alu dirambat indai ia sida empu ba peniki tangga sebedau niki keruai.Bala pengayau alu dipantil enggau ai ijok alu dibap ngena pua kumbu tubuh pengayau sereta datai ditanju antu pala dulih bala pengayau dayak alu di sambut enggau sintong diselap pua kumbu alu neru sida indu ketuai memunyi timang ngebu ke semengat lama nyadi ke baru.Seretai ditiki ke tanju bala pengayau alu Dumbang ngasuh Jeniah manjung menujuh kali tang ditagang sida ke indu ketuai laban Jeniah nya kumbai sida mina tesat nitih aja tang udah di padah Dumbang agai sida ia.Jeniah nya meh pemumpung pala Dillai diak semua sida ke tinggal ba rumah panjai ti enda ngayau enyau reranggap laban meda pengemit tubuh Jeniah nya ulih terpumpung ke Dillai ti ngemesai nya.Alu di silak Dumbang lanji disan Jeniah tadi alu Jeniah di asuh niki perabung rumah panjai pengudah miring ba tanju.Jeniah alu angkat alu niti tangga penangga mua ari tanju agai perabung rumah panjai.Datai diperabung rumah panjai diak Jeniah alu manjung kekalau negung ke langit.Dinga manuk engkukuk naka pemanjai,jani ambis meruwik naka ulih agi,ukoi merung nyau negung ke langit arung,anak mit ke baru ada ke dunya meraya nyabak kekasak,alu ddinga ari kampung jerung munyi burung ketepai terebai nuju palan bukai sereta nitar pansut di langit mingkai.Pagila aku nampung baru jerita tu madik.
No comments:
Post a Comment