Nyadi kemalam nya sida sarumah begawai besai ngintu ngerami penatai bala pengayau dayak ti pulai ngayau enyau menang.Nyadi kemalam nya cukup pengerami bala dara ke bujang nganta enggau bajik laban ka narit ati pangan diri.Nyadi perengka dah di intu magang diak sida belabuh miring tuah ngica sida bulih tuah bulih limpah lebuh ngayau ke jemah ila.Nyadi kemalam nya diak Dumbang meri jako tangkan agai bala pengayau dayak alu pengudah Dumbang meri jako tangkan alu bepun meh sida miring alu bebiau.Pengudah ngintu miring sereta miring penatai antu pala diak sida bepun berami alu bepun ngirup.Pengerami malam nya naka rami,bujang dara sida ketuai begagai enggau manah alu terbantai ulah meri ketawa,pengerami nyau majak nyadi senyadi rami ngujung malam enda berasai enyau pagi.Nyadi tudah Jeniah enda lama enggau rami laban ia rindu agi ka tindok sereta berlelak ari pejalai pemulai ngayau.Enyau pagi dini ari diak bala dayak enyau tindok mabuk semina sida bala ulun enyau nitih diri empu nyadi ulun bala dayak.Nyadi enggi sida Dumbang bisi bepuluh iku ulun ngenama kediri agai bilik ia alu nyadi ulun sumur idup alu pia mega bala ulun kebukai tadi.Nyadi kedulu menya enti bisi bilik ba senentang belakang bilik nya rumah bilik bala ulun.Nyadi bala ulun diketuai Ensiran alu ngenama kediri agai bilik Kisuh alu sida bepun ngaga rumah bilik nampung bilik Kisuh nyadi panjai agi alai sida tindok sereta nyadi ulun Jeniah sebilik.Ensiran tu bisi mimpi ia dasuh siku indai tuai enda tau enda ia mesti nyadi ulun Jeniah enti ia enggai ia ka mati dibunuh nyadi jani sandau ari bala dayak jemah ila.
Pengudah bala ulun udah bebagi nitih penyamai ati sida ia empu nitih ke sida ke nyelamat sida ari nyadi ulun Dillai.Ba jerita tuai enti ulun ka nebus diri bado nyadi ulun sida mesti nyedia tajau 3 tiga iti alu jari kelingking tauka jari mit ba jari mesti diputus nyadi ke tanda sida ulun nebus kediri.Semadi enti tuai sida manah ati diak tuai sida nya enda minta tebus ari sida ti sida bado nyadi ulun alu ngasuh sida nyadi orang baka selama beridup.Semina buk sida dikempat pandak bisi 77 kali bulan kembung ba langit baru sida ulun tu tau berbuk berundai baka orang kabukai.Nyadi enti ulun tu udah merdeka ari bado nyadi ulun diak sida ia enda tau bepantang ba deguk tauka ba dagu.Nya ke tanda sida bebasa ketuai sida ti ngelepas sida ari nyadi ulun agi.Nyadi ba jerita tuai bisi ulun siko ti setia amai agai tuai nyentuk ia parai.Nyadi penama ulun tu Makop ti setia agai tuai ia ti benama Jelang.Nyadi Jelang tu anak Guntur ketuai amai alu Makop tu anak Ensiran tuai ulun sida Jeniah.Nyadi gai pun jerita diak Ensiran ngemai bala madik ia nyadi ulun sida Jeniah laban Ensiran bisi mimpi ngasuh sida sebilik nyadi ulun Jeniah ngica peturun ia ila idup lantang senang nguan menua laban sida nemu Jeniah tu meh Raja Iban ila alu ia dasuh ngintu sida Jeniah sebilik seumur idup sida ia.Lebuh udah semua ulun nyau nemu mimpi Ensiran diak sida maioh agi milih nyadi ulun sida Jeniah alu sida nanya indai Jeniah nama kerja dasuh ia sida ulun magang ngereja ko Ensiran madah gai indai Jeniah tadi.Diak indai Jeniah ngasuh sida berapi enggau ngaga piring ading,enggau pengawa bukai.
Diak ke laki nanya agai Kisuh nama pengawa dasuh Kisuh dikereja ke sida,diak Kisuh laban enda kala bisi ulun ngelamato enyau rerangap ja tudah tuai laban bala ulun maioh ka nyadi ulun sida sebilik maianya.Nyadi laban sida Ensiran tu nemu ngereja pengawa ulun diak Ensiran ngasuh sida ke ulun ke lelaki ngambi kayu ba tanah,alu dasuh ngambi buluh kena mansuh pansuh pulut enggau utai kabukai kena ngeniki antu pala Dillai agai perabung rumah panjai.Pemaioh ulun sida Jeniah bisi beratus iku indu ngau lelaki.Ngelamato sida nadai ulun tak diau jenuh aja meh sida sebilik meda bala ulun ngereja pengawa sida ia.Lebuh bala ulun enda nemu keni ngaga piring kitai iban diak sida nanya Sulie indai Jeniah ga.Enti sida Ensiran enda nemu ngaga anyam simpai bebelit ngerawit buluh piring tauka teresang piring diak sida nanya Kisuh alu sida berajar ari Kisuh laban sida ngereja pengawa dasuh sida Jeniah sebilik ti mentas magang sereta siru ke sida ia.Sekumbang sida sebilik udah bisi maioh ulun diak Kisuh ngemai sida ulun ke lelaki ngaga nambah pemanjai rumah sida ia tadi.Jeniah baka selama selalu aja kediri bermain ba kampung puang lebuh ia nurun ngetan bubu.Tudah Guntur ka ngatur diri bebini pengudah musim ngetau ila.Alu sida Dumbang baka selama rerungguk ba rumah panjai nyau maia sida bisi sekali dua ngasu beburu ke kampung puang.Tudah Chaong enggau sida Dilang nyau ka bebakih ngau Jeniah tang Jeniah suah nyeliah bebakih ngau sida ia laban Jeniah rindu agi kediri diri ja,bisi ga sekali dua ulun sida ia Kuring ngau ia bermain ba kampung din.Pemulai sida ari ngayau suba nyau meri sida sarumah sekayu menua kitai dayak nyau betabi basa amai enggau Jeniah ngujung sida rindu ka begulai enggau Jeniah sereta rindu ninga runding Jeniah ti pintar agi ari sida ketuai.
No comments:
Post a Comment