Nyau nyilu bulu bala pengayau kabukai ninga pemalat panjung Jeniah,empai lama udahnya alu sida burung kenyalang naka pemaioh terebai musin langit ba senentang Jeniah bediri ba perabung alu didinga ia ngengang bisi tujuh kali alu musin menua rumah panjai Batang Mandai bisi ngelapan kali alu terebai pambar nitih pengemai burung kenyalang nya tadi.Alu nyeraoh Dumbang ari tanju nanda kitai dayak bulih pemujur maia ngayau jemah ila.Alu sida ketuai alu madah reti burung Kenyalang tu bisi manah bisi enda ba jemaah ila.Ari pansik sida lemambang kelia nya tanda kitai ka pambar ka bekerakar enggau pangan diri.Amai kitai ngayau menang ila ulih ngemambar ke munsuh tang enti kitai sejalai segulai sigi mujur tang enti enda sejalai segulai kitai bulih penusah ke jemah ila.Bepun ari pansik Lemambang kelia diak Dumbang ngasuh kitai dayak naka ulih serakup ngica jemah ila kitai ulih ngetan menua ari munsuh ke datai.Pengudah nya Jeniah alu megai antu pala Dillai alu disagu ia ke langit alu manjung baru alu didinga ujan nyala ke pagi ari alu memunyi pukang ninting pagi.Pengudahnya baru Jeniah nurun ari perabung rumah panjai.Datai ditanju ia alu dasuh Dumbang duduk ngimbai ia alu Jeniah diberi bakuk sigup enggau ilum pinang alu disua ke ia ilang tuai dibai ari Tembawai Bajuah alu dasuh diketup ia dulu nya baru sida kabukai ngetup ilang tempa niang manang Mengga ari Gunung Berapi ba Langit Tinggi Nunga Mua Ari Mati.Sigup enggau ilum pinang alu disadung agai sida kabukai ngica ulih meri ati chelap.
Sida ngetup alu nunga mua agai mua ari idup ngica seput panjai agi alu gayu guru gerai nyamai lantang senang nguan menua.Udah miring ditanju bala penngabang dambat keruai diri empu alu duduk diruai diri empu alu nganti sida orang ketuai lama pengayau pansut miring ke sida.Alu antu pala dengkah ba tengah ruai alu bala lemambang ngunsai ai pencelap ba senentang antu pala nya tadi.Kenu ko orang tuai enti salah intu,antu pala nya sigi ngangat ke menua alu ulih meri sakit lengit agai orang ke ngempu antu pala nya tadi.Enya meh kelia penncelap ti bisa aja ulih meri menua enda angat enda diregau antu jai alu enda sakit lengit.Tudah Jeniah ngenuduk kediri ngimbai akak ia Guntur alu maioh ulun Dillai suba ti nitih ke sida pulai agai Batang Mandai enyau bepajak pajak ka nyadi ulun sida Kisuh laban sida nyepi nyamai amai agi nyadi ulun Kisuh laban anak ia Jeniah ulih nyaga sida ia.Agi pen Jeniah sereta Kisuh tu mentas amai enggau sida ia suba nya meh kabuah sida ka agi nyadi ulun Kisuh.Ba jerita tuai kelia Jeniah tu meh ti maioh ngembuan ulun.Ia tau dikumbai Raja Iban laban pemaioh ulun ia nyau bisi bilik pemanjai 40 pintu kenya keno ko orang tuai nusi suba.Semina pintu bilik sitik aja tang besai pintu nya laban nya tanda bilik ketuai pematak kayau suba.Pulai agai pun jerita tadi diak bala ulun Dillai nyau bebagi tubuh nitih penyamai ati sida ka nyadi ulun sapa laban Dumbang ngasuh sida ulun Dillai suba nitih penyamai ati sida empu alu sida maioh agi ka nyadi ulun Jeniah.
No comments:
Post a Comment