Udah sida sabuat danjung atai pintu kuta pintu pemisah entara dunya bunian enggau dunya nyata diak sabuat ngelambai jari agai sida Andak Segatak,seretai pintu kuta ditutup diak sida sabuat meda dunya nyata kampung puang tak nadai agi dunya sida Andak Segatak dipeda mata.Sida sabuat alu rerangap aja alu nurun ari emperan tengan bukit tinggi tadi ngemulai kediri agai menua sida ba Batang Mandai.Datai ba pemendai diak sabuat mandi dulu tang terkenyit meda sekayu menua Batang Mandai nyau berlanda nuju sida empat ti benung kisuk mandi ba sungai.Datai sida ari atas tadi alu engkecit tudah Kisuh alu merap Jeniah enggau Guntur,alu pia mega indai Kucai alu merap Kucai sereta Kuring diberap apai ia Mengai ulun sida Jeniah tadi.Meda penyelai utai nyadi diak sida empat tadi sama rerangap meda utai kenya nyadi alu Guntur nanya kabuah apai ia Kisuh enggau indai ia Sulie bangat enda betah sida bakanya.Diak Kisuh madah sida sabuat udah lama nadai ditemu berita bisi 3 bulan ko Kisuh madah.Jeniah,Guntur,Kucai,enggau Kuring nyau rerangap ninga utai dipadah Kisuh tadi.Enda patut ko Kucai bejako,sida ia mina bermalam 3 malam 2 ari aja ba menua Tinting Putus ko Kucai nusi agai bala maioh ba diak.Tang Jeniah nemu reti utai nya laban Jeniah nemu dunya latong dunya bunian sigi baka nya magang ko ati ia din laban ia ulih ngasai utai nya ba din.Semina sida 3 aja enda ngasai utai nya.Nama agi deh sida sabuat dibai orang niki ke rumah panjai.Semalam malam nya meh tudah Guntur,Kucai enggau Kuring nusi jerita penyelai menua ditengah sida empat kemari.Nyadi lebuh malam maioh meh sida ba menua ngerandau bakani menua sida Andak Segatak ngujung nyau ka jauh malam diak semua dayak alu tinduk ninting malam.Lebuh tindok diak Jeniah terkenyap mata alu bermimpi bertemu enggau Andak Segatak.Nyadi ba dalam mimpi nya diak Jeniah bisi meda Guntur,Kucai,enggau Kuring ti sama enggau ia nangkan bejalai nitih Andak Segatak niki Bukit Tinggi ti diuan Bunsu Gerasi.Nyadi ba dalam mimpi diak Jeniah bertemu enggau Tuai Bunsu Gerasi ti madah enti mensia ngapa niki Bukit Tinggi sigi dempa ia,tang ketegal sida dulu Andak Segatak diak ia enggai makai sida ia.Diak Tuai Bunsu Gerasi madah ke mensia baka tu,kami antu nadai bumai baka kitak mensia nya alai penti pemali dajar aku tu anang enda kitak nusi agai mensia baruh ari ngica aku enda saru penemu ka makai kitak.Nyadi Tuai Bunsu Gerasi alu nusi penti pemali kampung puang ti meri sida antu gerasi ringat.Udah dajar penti pemali nya ambis dipadah Tuai Bunsu Gerasi diak Jeniah terdani ari tindok.Diak ngeleda dani alu meda ari udah pagi.Nyadi ke pagi nya diak Jeniah terkenyit ninga Kuring nunga ia ke tindok alu nusi mimpi ti sama baka enggi Jeniah alu pia mega Guntur bisi mgelawa padung Jeniah pen nusi mimpi ti sama aja.
Atai Kucai ba padung Jeniah diak Kucai tucum meda tiga tadi benung berandau ba diak alu Kucai nusi mimpi diri.Nama agi deh chapoh meh sida sabuat tadi berandau ngenang mimpi.Diak madik Jeniah ke benama Imban ngampir enggau sida empat berandau tadi,diak Imban nyimpan ati ka enggau Jeniah ila bejalai laban ka ngulih penemu ari Jeniah ti biak ari ia.Ba kenang orang tuai Imban tu meh nyadi manang ti bisa kelia ti ulih nemu ngira musim ari bintang ngira jam sari semalam alu ngajar kitai dayak reti penti pemali ba rumah panjai.Ba kenang aki tuai Kuling nyadi Imban tu dulu ngepun mungkal kitai damping enggau semengat orang parai ba sebayan alu pia mega Imban tu meh ti dulu nimang dulu nengkebang tiun tawak kuntau enggau tiun gendang taboh.Nyadi Kuring tu mega pemungkal kitai mensia beribun ke jelu tupi baka janik,manuk sabung,enggau nginang burung.Kucai mega ngajar kitai dayak ba senentang ngentak rumah panjai alu Guntur ngajar kitai dayak ngayau ti nadai ditemu bekau ba kampung puang alu Jeniah ngajar reti pengidup ngayau,ngaga perau,sereta pengidup beburung.Alu dahnya ditampung sida kabukai nitih peturun cabang bansa dayak.Nya meh kabuah adat kitai ti dipansik amai ka sama magang laban acuan ia ari 5 iko pengayau tuai kitai dayak ti mungkal nguan Batang Mandai alu dipeturun agai peturun bansa diri agi munya kelia.Nyadi kelia kitai Dayak kemaioh agi beridup sejalai sebedau kitai pambar pengudah pemati Jeniah ensumbar Lidah Bepangga Mela Nyengga Ngerua Enti Ngeludah Sigi Mati Munsuh Aja.
No comments:
Post a Comment