Jerita Depa Pungka Lelaki Menaga

Beratus taun ti udah,ba menua Sungai Tisa Yong alai pemindah bala Iban ari Tapang Lancham diketuai Jubang ngau Tinggie mindah agai ari ili Nanga Sewong ba sungai Nansang.Ba diak kitai iban berumah panjai naka pemaioh,ambis emperan alai berumah panjai,seberai seberai bisi aja rumah panjai agi kelia.Nyadi bisi apai tuai siko ti bernama Sindau ti ngembuan anak ti bernama Depa Bungai Menaga sereta menantu ke laki ti bernama Sulau.Nyadi kelia bedau agi siga alu suah bansa Ukit ngayau bala Iban ba Ulu Katibas alu sida Ukit pulai agai Bukit Bakak kin agi kelia.Nyadi lebuh maia lebuh bala iban bumai beduruk agi menya suba,nyadi tudah Sadai petunggal Depa tu enggai enggau orang beduruk laban ke ngumbai diri purih berani purih kebal alu ngenati kediri bumai saduai ia melaki bini.Lebuh orang kabukai pulai bumai maia ke tengahari nya diak Sadai enggau bini ia entudi sida ia tang bertakah setanjung ari sida kemaioh nya tadi.Meda kenya bini ia ngemai ia jampat agi nitih ke sida nya tang Sadai ngasuh ia dulu laban Sadai agi tembu nyumpit burung maia pulai lemai tadi.Lebuh Sadai nyumpit diak ia alu bersatup enggau siku bansa Ukit ti naka pemesai nya nyau bisi tubuh ia disema sida niang aki nyau besai mimit ari pintu kitai kediato.Peningi ia nyau juau juau sereta bepala besai.Sadai ulih dibunuh bansa Ukit keno ko niang aki nusi agai aku.Alu bini Sadai alu belalai alu bepadah ke rumah panjai madah ke laki diri mati dipumpung bansa Ukit nya tadi agai sida sarumah tadi.Nama agi deh alu engkecit Depa ke tanah alu berlanda nitih maia lemai nya.Peneras Depa bejalai enda ulih napat peneras pejalai bansa Ukit ko niang aki nusi.Alu disidik Depa pejalai bansa ukit nya ari tadi alu terengkah ba wong sitik wong ti tinggi amai baka dinding wong nya ko niang aki nusi.Datai diak laban bunyi ai betekeraoh labuh diak Depa lama ngetu diak laban bekau kaki bansa Ukit nya nadai ditemu ia agi.Nyau pemuas ia engkening utai diak ia meda asap ba atas punjung wong tinggi tadi.Diak Depa alu begadai gadai nyubuk katas alu tepeda ke bansa Ukit naka pemesai nya ti benung nunu ikan alu makai upa panto nyau rerangah duduk melakang ke tanah seberai alai Depa belalai.Diak Depa alu nurun begadai gadai ari tanah seberai nda mukai mukai sarung ilang ia terpantup ba batu,peda Depa alu dedegi tubuh bansa Ukit nya angkat ari penuduk ia tadi alu pala ia geginau merening utai kin kia,Depa enda engkebut ba bandir kayu ensurai alai belalai tadi.Laban ba atas wong nya pabo diak kecap kecap ai dirup bansa Ukit nya tadi angka berumban ngirup ai dulu laban aus makai empasa tunu,panto tunu enggau ikan tadi.Diak Depa berunding tak pama mensia tu ko ati Depa,ai wong labuh naka pengingar nya tang pending bansa Ukit tu naka ngelansik nya ninga sarung ilang ia terpantup ba batu tadi.Diak Depa berunding,ia nguji nuku bansa Ukit nya ngena batu,alu dituku Depa bansa Ukit ngena batu mesai pah tak ngam amai alu ngena pala ia diak bansa Ukit nya tadi alu ensanyar alu nanam diri ba batu besai tadi,diak alu nyeraoh naka pengingar nya ngalah ke munyi terutu ai wong labuh kebaruh kin.
Meda bakanya alu diak bansa Ukit tu mangkas alu ambis batu ditempalong ia kin kia laban pedis ati ditundi orang bakanya ngujung Depa pansut ari bandir pun kayu ensurai tadi alu besatup seduai alu bamuk naka pemalat nya kenu ko niang aki nusi.Ba atas wong nya kediato agi bedau bekau pantap ilang bansa Ukit ti besai nya.Alu agi bedau bekau jari bansa Ukit nya ba batu ka nampar dada Depa sereta bekau tumbuk ia agi bisi ba batu diak.Alu bejamah alu berpantap sereta berpangka ke pangan diri meh saduai keno ke jerita niang aki suba nyau bisi semalam saduai ia berekak,ari lemai kemari nyentuk ke pagi sitik saduai ia agi berjamah nadai nemu bado berekak laban sama kering sama kebal sama pemberani,tang ke pagi nya Depa nyau lepi laban enda makai tengahari kemari tang ia benasib manah laban ipar ia Sulau bisi ngesah nitih ia kulu kin.Datai ipar Sulau alu engkecit alu nyamah bansa Ukit tadi tang bansa Ukit agi kering nadai rusik nadai lepi semina nyau majak agi kering ari saduai ia.Meda bakanya diak Sulau alu nerajang bansa Ukit nya tadi alu maianya ilang bansa Ukit tebeleka alu berlanda Depa ngambi ilang nya tadi seretai nya ia alu ngamuk bansa Ukit nya tadi nyentuk ka datai ba pengelabuh ai ari wong nya tadi diak Depa alu nyimpung pala bansa Ukit nya tadi ngujung lesi meh tudah asie lesi naban ari nadai agi meda mua ari.Alu putus meh pala bansa Ukit tadi alu tubuh ia ditumpu Depa kebaruh kin ngujung tubuh bansa Ukit tu tadi labuh alu ninggang batu ba baruh wong din tadi.Alu manjung meh Depa meda bulih pala mensia naka pemesai nya,bulih pemesai pala nya mesai sintong dara ko niang aki nusi suba.Pengudahnya bala bansa Ukit alu pindah jauh agi alu badu ngacau kitai Iban ba Ulu Tisa agi kelia.Nyadi bertaun udahnya bisi sekali sida Depa bejalai ngasu kulu kin baru alu terpansa ke wong alai ia munuh bansa Ukit suba diak sida ia meda tubuh Ukit ke labuh merap batu baruh wong din udah nyadi pun kayu ti tinggi sereta sama pemela peninggi enggau wong nya.Nyadi sesuba agi niang aki kala kia ngabas kayu tu.Agi menya kayu tu nyadi cukup manah amai dambi nyadi pencelap bilik.Mina orang nemu ngadu siang kulit kayu tu aja ulih nemu guna nya.Pemindah Iban ari Tisa ketegal penyakit samah ngujung menua Tisa ransi nadai mensia agi ba diak menya suba,berpuluh puluh iku bujang berani,dara bajik tampak rita,pungka lelaki berani,pungka indu chunggai ngaga pengepan lenyau lesi ba menua Tisa tu agi kelia.Beratus ratus kubur orang berani agi nadai ditemu ba menua tu.Agi menya menua Tisa tu dikumbai Rajah Brooke "The Death Forest tauka Land Of Death" laban menua tu kelia penuh enggau orang berani tampak rita agi kelia suba sereta pengudah penyakit Samah tu munas ke Iban berani ba menua tu ngujung menua tu dikumbai madik Rajah Brooke,The Lonely River Of Death.Nyadi pengudahnya bala Iban ke agi idup alu mindah ari nya alu bisi keduak pulai agai menua lama ba Laja Entimau enggau Tapang Lancham alu keduak bisi pindah agai Batu Tinggie ba Ulu Yong,alu melunggang agai Bukit Guram alu bejalai terengkah ba Sut Balleh,ari Sungai Sut bala Iban alu pindah agai Batang Rajang alu mudik ke Mujong kulu alu keduak ia tinggal ba Mujong alu keduak melunggang mindah agai Nanga Enceremin,sebengkah ngulu sungai Sut alu beserara alu keduak melunggang ke Puro Gaat,Balleh.Ba kenang aki tuai aku nusi nyadi Sungai Sut tu diberi penama sungai Sut laban ba ditu bala kitai Iban bisi penyarut ti ngujung kitai Iban alu pambar betuai kediri empu.