Ensera Tugau Pau Papau Anak Bunsu Nabau.

Nyadi menya bisi dua iku melaki bini ti nadai anak nyau ka punas meh ko ensera tuai nusi.Nyadi pemuas nadai diak saduai ka nampuk agai Bukit Kub Kedaup tauka Bukit Aub kediato.Lebuh malam nya saduai bermimpi dipadah ke orang tuai ngasuh saduai nampok agai Bukit Kub Kedaup ianya Bukit Aub.Nyadi menya Bukit nya amai bisi Batu Kub Kedaup tang diatu udah nyadi batu bejantil pengudah pemarai Tugau tu menya.Sebedau bejurai panjai agi.Aku pen agi mit ditusi  niang aki ensera Tugau tu.Tugau tu kenu jerita tuai asal peturun nabau  Ansie enggau Kumang Bira Bidang Bunsu Nabau ti atai ari Bukit Tibang peturun iban ti dulu nyadi nabau.Tang meda pemendar dua iku melaki bini bangsa madik kitai Tanjung tu nadai purih diak Berindin tauka Tugau tu diberi ka saduai laban sinu ke saduai ia kin kia nampuk ba Bukit minta anak lelaki.Pengudah saduai minta diak bisi takah bulan diak saduai melaki bini nurun nyala agai tasik ba Pasai.Enda mukai mukai ai begelemang(berombak) balat maia tak nadai ribut tak tasik bergelemang tauka bisi lelanggan tauka lenggang ai tasik.Malik saduai ke tengah tasik nadai ga meda utai.Diak ati saduai alit alu enda mukai mukai ari ujan nyala ngujung saduai berkayuh ba pantai jejampat.Datai ba tebing pantai diak saduai alu ngenduh diri ba baruh kayu.Ngujung ujan nyala nyau badu.Pengudah badu diak saduai ka nyala ke tasik tang ia ke indu madah diri takut meda gelemang ai tasik balat agi nyadi ngujung saduai ia ba tebing pantai.Nyadi lebuh saduai ba tikuk(corner) tebing pantai diak saduai ninga anak mit nyabak alu saduai berumban ngiga anak mit nya ngujung saduai tetemu ke telo ti burak sereta telo nya besai pah kitai meh,diak saduai ninga penatai sabak anak mit nya ari telo nya tadi,meda utai nyelai diak saduai ia alu mungkus telo nya enggau kain sereta alu ditaban saduai pulai agai rumah panjai tadi.Datai dirumah panjai diak sekayu rumah alu begau ninga anak mit ti balat nyabak ngenyarih(inggar) nya.Alu puas sida sarumah ngintu telo nya tadi ngujung nyau ka malam ke tujuhnya diak telu nya netas ngemansut ke anak mit ti sigat.Diak ari pen kudik enda lama,kilat kapa pia berdegum ngujung sekayu rumah panjai nya minta tuah minta limpah lebuh pengada Tugau ke dunya.Tugau tu asal amai bunsu nabau Berindin tang diberi apai indai ngambu ia benama Tugau nitih penyelai pengawa digaga ia.Maia mit Tugau empai diberi nama laban puas diberi nama tang Tugau tu nyabak belama ngujung saduai ngaga piring kena begiga ke nama Tugau tu ngujung saduai ia bermimpi betemu ngau Bunsu Nabau ti madah ke nama ia benama Berindin tang saduai ia enggai,enti piak nitih ko saduai meh ka meri nama anak nya ko bunsu nabau tang ia ka parai ngelaban bala Iban ila ketegal saduai meri bukai nama ngujung saduai ia meri nama Tugau nitih mimpi nitih piring saduai.Agi mit Tugau tu diberi penama Berindin udah besai nemu mereti utai diak saduai majak ngangau ke nama Tugau nadai Berindin agi.Jerita tu ku tampung ari bala katuai KP suba laban jerita Tugau tu sigi kering sigi pintar sereta berkuasa ba menua pesisir tebing pantai enggau ia tu meh enti nyelam tasik ba pasai diak suba ulih berminggu ia dalam ai tasik.Pengudah Berindin bado dikanggau alu diganti ngena penama Tugau diak Bunsu Nabau nyau jauh ati ngujung ia ninggal ke rajut aja dikena Tugau udah besai ila.Ba kenang Nirau enggau Encharang suba diak Tugau tu maia biak puas ngayau bala orang Ulu sereta suah betekup enggau bala Ukit belah Kanowit belah Katibas,pengering Tugau tu lebuh ia nyerauh ka dini menua sigi didinga.Lebuh ia batuk,begelemang(berombak) ai tasik ngalun besai,enti ia nempap tanah sigi berenyang bergoncang.Nya meh orang tuai suba ka amai nusi enti batuk balat didinga dikumbai BAKA BATUK AKI TUGAU ENTI BATUK BERGELEMANG AI TASIK ko orang tuai bersema kelia.Tugau tu siku katuai bansa Tanjung ti kering sereta pintar enda ulih dikerakar tang pemati ia ba anak ia empu ketegal ia ka munuh menantu ia.Nya sigi sumpah ia ari peturun apai ia Nabau Ansie enti ia agi ngena nama Berindin angka ia enda mati ngapa.Pemarai Tugau tu nyelai amai ia nyadi nelunsur ari pendam alu nyadi nabau ti ngemai diri ke tasik besai.Nyadi menya suah mega nabau Tugau tu nulung bansa Iban lebuh bekayau lebuh mulau,pengambis ia ayan pengudah jeman dunya bebaik.Nabau Tugau tu suah nulung Kana enggau Munan agi menya suba.Nabau Tugau tu kala  dipeda Nirau ngayan kediri ba Pasai Siong alu keno ko orang tuai nusi ia ngabas purih pantih ia.Nabau Tugau bisi dipeda ayan ba jambatan Lanang kediato alu nabau ia kala ngaram ke kapal Rajah Brooke lebuh Brooke ka  ngemunas bansa Tanjung enngau Iban ba Bintangor enggau Durin.Nabau Tugau tu bisi tisik mirah ba belakang ia alu ba peguk ia bechurak mansau tauka mirah.Nya jerita Tugau ditemu aku ke malam tu ku nusi utai ditusi bala tuai KP suba.Enti nyelai ari ditusi ba pengingat tuai suba ku enda nemu ga laban jerita tu ditusi ujung ujung nyau nyelai ensera nya tadi laban menya maioh dilangkung jerita nya tang aku enggai bakanya nusi laban aku nitih info ari katuai bala KP ke dulu suba ti nusi ti aku tulis ba bup story empu.

Adat basa kediato enggau kediato.

Anak biak penatai ari rumah panjai tau temegah ati enti nemu merau,besual,enggau maioh agi penemu nya.Kemeran meh penemu nya ba ucu icit kitak jemah ila ngica penemu asal kitai enda tebuai jauh ari kitai.Diatu maioh ku meda bansa aku kelalu ngasi ke anak diri ngujung anak diato nyau niki pala apai indai lebuh bejako enda baka kami kelia.Kelia...nadai salah ti maioh penemu tang anang jai enggau apai indai,bejako pen bebasa ke orang tuai.Diato kitai ulih meda ulah nembiak rebak baru,bejako sebubu enda sebulu enggau apai indai.Bisi keduak ia balat enjoy ngujung apai indai nyadi tusah laban ulah bakanya.Laban aku sigi enggai meda anak nyau seredah sigi style menya sida bala anak aku dajar aku.Diato,nyahhh sapa nyamai enda sida bala anak ga.Bala anak dah besai dah bulih ijazah bulih master ari apai indai ti enda kelalu manja ke anak.Kingat madik semua,makin kitak manja ke anak makin tusah sida ia beridup kediri jemah ila ba dunya tu pengudah kitai dibai petara jemah ila.Diato kitai senang tang ba ucu ila angka tusah nya alai kitai anang sesekali bejai pangan diri.Aku ngajar bansa diri laban bansa diri suah nyadi pak turut bala anak nyau tanah dijual ketegal senurut jako anak,baka anak aku suba tak ku anjung agai Ulu Skrang kin kaling bala petunggal ia ngumpul buah engkabang awak nyepi asai ka amai maioh utai pinta,nya lapa deh udah besai pulai ari Auckland kediato ia nemu nyau beterima kasih laban ngajar ia merinsa.Diato aku baru ga nyadi perintis bala ucu.Ahkaiiii...Diato ku nesau bala anak aku enti anak kitak maioh utai pinta anjung agai aku awak ku ngasak ngajar sida idup merinsa tang bala ucu aku nyau gaga pulai laban rindu makai rindu bergumpul ke buah engkabang.Buah engkabang digaga nyadi tapik engkabang selalu dijual aku ba Kuching enggau bisi keduak ia dibeli restoran ga kediato.Bala ucu aku  mereti laban cara dispilin aku ngajar agai anak ku suba dipraktis gai bala ucu.Tau enda salah ka manja ke anak tang belebuh ga,tau meli utai dikingin ia tang nma utai perlu nya dulu dibeli anang sampai berambis duit nyau bejual tanah ketegal senurut jako anak nya kira kelalu.Gidan ati meda nembiak kediato maioh utai pinta.Nasib bala ucu enda bakanya ketegal bala anak nitih dispilin apai sida tu ngajar.Diato bala anak temera aja ba luar negeri bekuli,bersyukur tudah aku laban semua anak genap setaun bisi meniga kali pulai nganjung bala ucu lebuh maia cuti panjai.Lebuh cuti semua bala ucu ngenyapuh ke kebun lada kami duai inek ia ba Kuching.Gaga ati laban bisii ucu bakanya.

Jerita Sulai Penganchau Giling Bidai.

Maia munya kelia ba Sungai Engkarie sebedau pemindah bala Iban kabukai kia suba bisi siku orang bujang ti kering sereta berani.Penama Sulai tu sigi dikelala bala dayak bukai maianya.Suah sida ka ngayau rumah panjai sida Sulai tang sida ambis lenyau pala laban bulu Sulai ninggang sida belama.Nyadi bisi sekali tudah Sulai ngemai nyerang ngayau mulau agai Sungai Skrang kediato.Nyadi kabuah Sulai ngemai ngayau kia laban madi ia ke indu ditaban bansa Ukit ke ulu sungai nya menya.Diak tudah Sulai nyau pedis ati diak ia nyikap kediri alu ngemai ngayau kin.Pemulai sida ngayau naka pemulih nya antu pala ngujung sida berami meniga ari ngempat malam labaan pengaga ati madi ia ke indu ulih dibai pulai ari rumah panjai munsuh.

Nyau berapa minggu udahnya sida sarumah alu bepun bumai alu pia mega Sulai tu tadi tang enda mukai mukai tudah Sulai kena pisa(bisul) ba pah,ba betis enggau ba ciak ngujung tudah tuai enda dapat enggau orang turun kumai maianya.Nyadi orang ke pungka lelaki sigi ambis lengis nurun ke umai alu nembiak redak sereta ke tuai ke enda dapat aja tinggal maia nya.Nyau ka tengahari diak Sulai dipadah siku anembiak  ia bisi meda bala munsuh ba sapiak bukit ari rumah panjai tadi laban ia ngabas panjok apai ia tadi ko ia nusi agai Sulai.Diak Sulai ngenung alu ngasuh sida katuai enggau nembiak belalai ba kampung puang ba belakang rumah panjai.Nama agi deh sida kabukai terudus nurun belalai agai kampung puang mina Sulai enggau nembiak mit siku ti benama Mering.Dasuh Sulai lari tudah Mering tang Mering enggai ka ngetan meenua ka nulung dik aya ko ia madah ke Sulai.Nama agi saduai alu nyikap diri.Ambis sangkoh diperantar saduai genap ruai genap tanju rumah panjai laban kena ngerejang munsuh.Lebuh ka tengahari diak munsuh alu niki alu  manjung kekalau nyerang rumah panjai sida Sulai,seretai nya Mering enggau Sulai nikau ke sangkoh,sekali nikau peda tekesepur buluh enggau sangkoh terengkah ba tubuh munsuh,laban keno jerita tuai Sulai tu enti ngereja pengawa ngena jari sigi jampat nya kabuah buluh enggau sangkoh ulih ditikau bisi bepuluh iti ba seminit ko tusi asal niang Mering agai Encharang alu diripih kami kediato ngena jako minit.Sebedau menya tanju sigi maioh geregar buluh lebuh orang rumah panjai ka nganti geregar buluh nya kabuah buluh maioh diengkah ba tanju ko jerita ditusi sida katuai.Diak Sulai majak nikau,ni kena tumbuk sangkoh enggau buluh sigi mati enti nadai kebal.Tudah Mering pen bakanya meh,lebuh munsuh ngampir ke rumah panjai diak saduai alu bepun numbuk munsuh ngena sangkoh,amai kena sakit laban pisa tang Sulai majak semajak agi ngelaban munsuh tudah Mering nadai dipeda ia tang maioh orang ngelumu Mering tang nya meh,peda Sulai ari jauh peda ia kaki munsuh ambis putus pantap Mering dahnya disimpung Mering nadai kekakang ati.Sulai enggau panjung panjung ngelaban munsuh,ni ka ngampir sigi putus pala,sumpit bala munsuh enda ga sumpit nya tama agai tubuh saduai ia.Ngujung kira ngalih mua panas ke lemai kira pukul 3 bakanya meh kediato ngujung munsuh ambis mati.Udahnya saduai sama bejalai mumpung pala munsuh alu tubuh bala munsuh dengkah Sulai ba Giling Bidai ngujung tubuh mensia nyau bedunjung bisi sembilan itek giling bidai penuh enggau tubuh munsuh.Sulai meda Mering tak nadai rusek ba tubub mina ia meda Mering baka nembiak ti bisi penemu ti bisa.Mering megai pala katuai munsuh ti ulih ia tadi.Mering ngambi pala tuai bala munsuh aja alu Mering enggau Sulai alu mandi alu makai.Nyadi kira ka lelemai ari dinga bala pungka lelaki enggau sida ke indu pulai ari umai.Datai di ba laman rumah panjai sida terkenyit meda bangkai mensia nadai pala enyau betugung ba mua rumah panjai.Nyau tacoh sida tadi alu niki jejampat ke rumah panjai dinga orang rumah panjai benung richah betusi pengering Mering enggau Sulai munuh munsuh nya tadi.Nyau rerangap sida ia laban ngelamatu tudah Mering dikumbai bisi ngembuan sakit ampus tau terulih munuh munsuh ngemaioh nya.Nyadi selemai lemai nya meh sida bekenang jeriita nya ngujung Sulai diberi penjuluk Sulai Pengancau Kayau Giling Bidai.Pengudahnya Sulai ngemai bala Iban pindah agai Skrang,ngujung bala Iban kabukai nitih pindah kia.Sulai meh perumpang menua Skrang agi munya suba.Ba pengingat tuai lain ga jerita ia.Nya meh aku enda nemu laban ketemu aku tu meh ia.Baka kitai Iban ba Johor meh,maioh madah diri diau lama ba Johor din.Ngujung orang asal ke ngempu nama nyau nadai ditemu agi.Kekadang jako ditampung salah info ari tulisan.Nya aku bantai ditu.

Ensera Munan Orang Kaya Padi.

Ba Sungai Kapuas,menua nya penuh ngau kitai iban enggau memaloh agi menya suba.Nyadi bisi siku indai tuai orang benama Nanti ti beridup merinsa enggau ucu ia ba langkau umai alu kediri ari orang rumah panjai.Nyadi ucu Nanti bisi ngempat iku alu ucu ia ke tuai benama Munan.Nyadi Munan tu sigi manah ati sereta rurus pendiau.Nyadi sari sitik lebuh sida sebilik nadai berau agi diak inik Nanti ngasuh Munan nyanda berau besilih ke pua kumbu enggau beras.Nama agi deh,nurun meh tudah Munan ngemai pua kumbu nuju rumah panjai agai tuai rumah.Lebuh datai pemendai rumah panjai diak Munan tepeda ke tuai rumah benung ka nating ukoi ia ti kaka,siku indu siku lelaki ukoi ka ditating ia.Laban ke sinu ke jelu tupi diak Munan ngemai tuai rumah besilik,nyadi dua iku nya dempu ia alu pua kumbu nya dempu tuai rumah nya tadi.Naka meh pengaga ati tuai rumah nya tadi alu Munan ngemai ukoi nya pulai tadi ngujung datai ba langkau sida meinik diak inik ia  nanya ni berau disanda ia tadi ngena pua kumbu ngujung Munan nunjuk ukoi dua iku nya  tadi.Tak ngilik pala aja meh inik ia tadi,alu inik ia nurun ke tanah alu numbak ngiga buah ubi ke diipakai kelemai nya.Pagi sitik diak inik ia ngasuh Munan baru agai rumah panjai bala memaloh kulu ngasuh ia nyanda berau disilik ngena pua kumbu baru.Nurun ga  Munan kulu ngemai pua kumbu,datai ba pemendai rumah panjai tadi diak ia meda tuai rumah bansa memaloh tadi ka nating anak mayau  dua iku,siku indu siko lelaki laban anak mayau nya maioh ko tuai rumah nusi agai Munan.Diak laban Munan ke kasih jelu tupi alu ngemai tuai rumah nya besilik mayau enggau pua kumbu mega ngujung tuai rumah nya gaga ati besilik bakanya.Udah besilik tadi diakk Munan ngemai anak mayau nya pulai gai langkau sida ia tadi ngujung inik ia nanya diak Munan nunjuk ke anak mayau nya disilik ia enggau pua kumbu.Laban inik ia ke mentas diak inik ia berumban nurun kediri empu nyanda beras agai rumah panjai sereta pulai ngemai  beras kelemainya.Nyadi lebuh ukoi enggau mayau nya  dintu Munan enggau manah ngujung ukoi nya badu kaka agi alu mayau nya mega makin ari makin besai alu pia mega tudah Munan.Nyadi lebuh maia musim bumai diak inik ia pen bumai,alu Munan suuah ngemai uduk bejalai alu suah mega bulih jelu kediri Munan enggau ukoi ia mega ti ngasuh sida sebilik belauk belama maia makai sereta maioh minyak inyak jani dikena ngoreng kue empasa agi menya.Lebuh musim ngetau maioh siida sarumah sebana,padi ammbis diempa jelu enggau cit tang enda nyadi ba sida Munan sebilik,jelu enggau cit enda berani negu palan umai inik ia Nanti laban mayau enggau uko enda pulai ke langkau tembu bemain ba umai enti enda dikanggau makai sigi enda pulai ke langkau.

Inik ia Nanti tak alit ati meda ukoi enggau mayau nya baka ke ngibun umai sida nyentuk ukoi ke indu beranak pen ukoi nya tak sebaka magang nitih ke jako Munan sereta mayau nya pen bakanya.Nyadi taunnya padi sida sarumah panjai enggau bala memaloh ba ulu din nyau mimit aja diketau tang enggi sida Munan tak penuh langkau laban pemulih padi.Enyau begaga  ke langkau baru Munan enggau inik ia laban padi enda cukup ba tibang.Ba taun kabukai bakanya  ga asil padi diketau Munan enggau inik ia ngujung Munan berangkat bujang amai alu madik Munan pen bujang alu ke indu pen dara.Munan enggau inik ia nyau nyadi kaya padi kaya bulih utai ari penyinu Munan ke jelu tupi.Manok naka pemaioh,jani enggau itit naka pemaioh,ukoi ia suah diasu ke Munan alu mayau nyaga tibang nyaga umai ia lebuh Munan bisi pejalai.Nyentuk inik ia lesi diak inik ia meri jako agai Munan sebeedau inik ia Nanti lesi,pemanah penyinu nuan ucu ke mensia ti merinsa enggau penyinu agai jelu tu meh ngasuh nuan bulih utai ba dunya tu,berterima kasih kitai agai orang ngenyai ke kitai laban antu badas nasit sida ke manah ila pulai agai kitai ba jemah ila,anang malas pengenyai orang enggau pengenyai kitai.Entii kitai jai ka bakani pen badas sigi kitai dikumbai jai belama,ka bakani kitai badas enti kitai jai ba ati petara sigi enda ngemana ke pengidup kitai jemah ila,anang kitai kekakang ati lebuh nulung orang ti merinsa,kitai makin disumpah dipejai enti kitai enda jai enggau orang utai nya tepulai  baru gai ia laban nasit tauka antu badas ari ia sigi ka nulung kitai jemah ila.

Pengudah inik ia Nanti dibai petara pulai diak Munan makin ari makin tampak rita ari pengaya bulih padi naka pemaiohnya genap taun.Nyentuk tuai rumah panjai iban enggau tuai rumah memalohnya suah nyanda beras enggau ia sereta pia mega sekayu menua Kapuas ti ukai munsuh sida sigi bekuli ngetau padi sida Munan sebilik.Munan mega siku katuai kitai Iban ti berani,kempang ati enggau munsuh sereta Munan tu meh bisi batu penau jelu.Enti jelu ninga munyi kensung ia sigi nunduk ke ia pengudah Munan pindah agai Batang Engkarie agi menya suba.Bilik Munan dibun madi ia ba Kapuas din alu rita madi Munan benama Antau tu sigi beberita bulih padi agi menya suba.Munan pindah nitih madi indu belaki nguai ke Engkarie menya suba.Munan tu meh kitai iban ti kaya enggau padi menya suba.Keno ko jerita tuai bisi seratus pintu langkau padi ia aja ba kapuas menya suba alu bakanya ba Batang Engkarie.Ambis jerita aku tak naka tu aja au madi.

Jerita Jeniah Bepangak Dilah part 41.

Meda menua urung nya tak petang tegayam,alu didinga kebab burung garuda naka pengingar nya nyentuk munyi burung garuda naka penyarihnya diak Jeniah alu ngasuh bala pengayau tama lubang digaga sida ia suba,Jeniah alu tama ke lubang alu sida bepun nyumpit alu ngacuk burung garuda nya lebuh burung garuda nya ngerimbas tanah lebuh terebai laban ka nangkap anak mensia.Diak Jeniah pen bakanya,ni penemu ditemu alu dibantai magang tang enya meh tak enda ngasi endar laban burung garuda nya bisi bulu ninggang ia.Meda bakanya diak Jeniah nyeru Bunsu Nabau datai nulung tak berenyang tanah laban kerantar nabau ari atas bukit.Kenu jerita tuai Bunsu Nabau tu pen kering,dua iku burung garuda ka alah mimit dak tang nya meh laban Bunsu Nabau pandak seput enti lama lama ba udara ngujung Jeniah nyeru mangkong tawak ngasuh Bunsu Gerasi Langit datai nulung,dinga panjung Bunsu Gerasi Langit kekalau panjung madah diri nurun nulung tudah Jeniah datai ba dunya ia alu nyekak burung garuda dua iku nya ngena jari ngjung burung garuda enyau nyabak deduie minta kasih anang munuh saduai ia melaki bini.Diak Jeniah alu mansang ngampir damping agi alu ka munuh burung garuda ti ulih ditangkap Bunsu Gerasi Langit.Jeniah alu ka munuh burung garuda nya tang burung garuda minta kasih gai Jeniah tang laban maioh mensia udah mati dilaban saduai ia diak Jeniah ka ngerar rekung saduai sampai mati tang enya meh laban burung garuda ti nemu bejako madah ia ka ngelua tulang mensia dipakai nya alu ia minta ampun ba mua maioh,alu ia ka nyadi ulun Jeniah enti Jeniah ka berulun ka  saduai ia.Meda bakanya diak Jeniah nanya pengayau dayak kabukai sereta orang ke ngempu menua nya,bakani sida enggau burung garuda nya diak maioh madah ka munuh burung nya.Diak Jeniah ngajar sida ia,anang munuh burung garuda nya,sida tau ngulun burung garuda nya ngaga pengawa utai ke berat ba menua nya.Nyadi Jeniah bebagi burung garuda,ia ke lelaki dempu Jeniah alu ke indu dempu sida kabukai.

Pengudah udah bebagi diak bala sida kabukai ngasuh ngelua ke bangkai sida semenua tadi.Nama agi deh tak lua burung garuda nya tadi ngujung berdunjung tulang mensia alu disapu disepu disampi burung garuda ngasuh sida ia empikap tanah ba genap tulang mensia nya tadi.Peda bisi nujuh minit diak tulang mensia nya nyadi bisi isik alu sida ia udah nyadi mensia tang berantu ngujung sida ia nitih jako Jeniah.Pemaioh tubuh sida ia bisi bepuluh ribu iku ngujung sida dibai Jeniah ngayau agai menua Raja Bugal ti ngempu menua tasik.Nyadi sida ia begaga ke kapal naka pemesai bisi sepuluh itik.Pemaioh mensia idup ari tanah nya tadi nyembah Jeniah alu madah taat setia agai Jeniah siku aja.Mina Jeniah aja ulih ngarah sida ia laban Jeniah nemu kunci munuh sida ari burung garuda tadi.Keno ko jerita tuai Jeniah tu meh Raja Iban ti dikumbai Tuai Menua Mensia laban bepuluh ribu iku mensia ari tanah tunduk gai ia.Mensia di idup burung garuda tu agi idup tang nadai siku ulih ngangkat ke sida ia ke udah tinduk dasuh Jeniah sebedau Jeniah mati nangga ari ngejang pegi ditaban ari dibai pulai petara pulai.Udah sida ngaga kapal diak Jeniah ngemai sida ia belayar pengudah semua barang pemakai udah disedia maioh sereta kapal ditambah baru nyadi dua belas kapal ti besai amai.Pengudah udah nyikap diri magang bala alu Jeniah nepan ba peguk burung garuda ke laki alu semoa bala katuai kayau genap bansa dayak nepan burung garuda nya alu burung garuda dua iku ngirit pejalai kapal sida tadi nuju menua Raja Bugal pengempu menua Tasik.Belayar sida ia keno ensera diak bisi nujuh ari nujuh malam baru terengkah ba menua Raja Bugal.Dinga kesiap menua nya petang tegayam laban burung garuda mampul mua ari ngalih ke pagi nya.Dinga gong dipalu ba genap pelusuk menua nya.Pemaioh bansa dayak cukup maioh nyerang menua nya.To meh kayau ti besai ti enda kala kitai peda ba ensera kitai munya.Ila ku nampung baru madi laban aku jarang online kediato laban bisi penanggur ka di adu aku.
Sayau agai bansa aku laban aku lebih sayau agai genap bansa dayak.

Jerita Jeniah Berpangak Dilah part 40.

Pengudah ngangau Bunsu Antu Gerasi Langit,ngangau bala ari Panggau Libau,ari Gelong enggau sida kabukai diak Jeniah ngemai bala ia nurun ngayau.Berjalai naka pengelaju,akar kayu ambis melintang tengah jalai enyau pecah laban dindik bala dayak neresa berindik,ni ke enda liat ati,alu entak ke kaki,tanjal akar nyau repek meletek,dinga tabuh bebunuh bebendang nyarih ngica bala ke dudi enda tesat lendat ngica jampat nitih ke dulu.Tanah asai berenyang baka digoncang laban tujah pejalai sida ke besai,kayu ngempang jalai ambis terumpang ketisi dendat sida ia naka pengering.Alu pajak pajak bejalai,maia ka malam sida begaga ke langkau kena ngelelak kediri,pagi ari alu ngejang pegi ninggal langkau peruji.Pajak ke bejalai laban ngerumban ke ari ngerumban utai dituju,utai ngempang sigi ambis ditendang,atai ba sungai alu gaga ke rakit alu semerai,ia ke pama alu ngena penemu diri,nesau bala bunsu baya beratung alu dititi bala maioh ke seberai.Alu kenya belama meh sida bala pengayau dayak bejalai.Ia atai ka lemai ari alu begaga ke langkau,pagi alu ngejang pergi ninggal langkau peruji.Tudah Jeniah sigi semampai dulu belama ngujung sigi katuai kayau.Ujung sida rembus ba menua orang ti sunyi nadai orang dipeda semina rumah panjai menua bisi beratus itik tang nadai siku dipeda.Diak bala maioh ngetu ba diak alu tegenung meda menua nya tak sunyi nadai orang.Alu reraoh sida kabukai nanya penyadi rumah panjai menua nya tang nadai ga disaut orang.Meda utai baka nya diak sida bala maioh nyikap diri angka nya menua munsuh ti ngipa sida ia ba rantau jalai.

Menua nya baka kena biau balai ribut ti kuat,kayu ambis tumbang,atap perabung ambis tekupak sereta tanju rumah panjai ambis sedandang kena keramak kukut besai.Lama kaduak bala pengayau merening abi bekau keramak baka keramak burung lang tang bisi siku apai tuai benama Sulai madah nya meh keramak burung garuda Raja Burung ba dunya.Sulai madah ba pesisir tasik  besai sigi ka alai burung garuda ngiga pemakai alu ia kala meda burung garuda lebuh sida ia lari ke menua Batang Mandai suba nitih bala ia ke pindah kin suba.Alu lama tudah Jeniah merening utai  nya tadi,alu ngasuh bala pengayau dayak meresa genap bilik rumah panjai angka bisi mensia ke bedau idup.Dinga panjung kaduak bisi madah bisi idup ti belalai ba tibang baruh tanah alu sida ia sama ngelawa kin magang.Datai din diak sida meda anak mit enggau sida ke indu ke bedau idup alu sida ia minta kasih anang munuh sida laban sida ia enda nemu utai.Diak bisi meniga lubang tibang ba dalam tanah ti ngelalai bisi berpuluh iku sida ke indu ngau ke anak mit sereta sida ke lelaki tuai gamal.Lebuh Jeniah nama penyadi menua sida ia tadi,diak apai tuai siku alu nyaut alu madah menua sida kena serang burung garuda bisi mendua iku.Pemesai burung garuda bisi mesai empat itek ruai besapit alu kebab burung garuda baka puting beliung alu ulih ngelindap ke ari enti saduai garuda nya besapit terebai.Sida ke lelaki kekering ambis mati dempa burung garuda nya mina anak dara tuai rumah ke bedau tanda menua nya bisi tuai ko apai nya nusi jerita tadi.Ninga munyi nya diak Jeniah alu ka nguji penemu diri ngelaban burung garuda nya tang ditagang bala maioh laban ngerumban tuju kayau sida ia.Jeniah madah enti sida ka dulu pen tau meh tang Jeniah ka munuh burung garuda nya dulu.Nyau ngenung pungka lelaki pengayau dayak kabukai alu sama ka besaup ngelaban burung garuda nya.Diak keda sida ka magang diak Jeniah ngasuh sida ngaga lubang pemesai tubuh siko mensia genap tubuh sida alu ngasuh sida ngena sangkoh berulu panjai alu ngaga lubang nya dalam ngica penatai kukut enggau paruh mulut burung garuda nya enda datai mantuk sida ke dalam tanah.Nama agi deh alu sida ngaga utai baka dipadah Jeniah alu enti tembu Jeniah ka ngaga unggun api ngica burung garuda nemu bisi mensia ba diak alu sida ulih betempuh enggau burung garuda nya ila.Sida pen tembu ngereja pengawa bisi meniga ari kena nyikap ngelaban burung garuda,diak Jeniah ngasuh belelak mendua ari alu udah nya sida ka bertempuh ngelaban burung garuda nya ila.Udah pengambis ari belelak diak sida ke ngempu menua dasuh belalai baru ba dalam tanah alu sida pengayau kabukai berintai nganti penatai burung garuda ba mua lubang kebong dalam ngica burung nya mangah alu ka nyambar sida ia alu sida ulih ngerujak burung nya ngena sangkoh.Enggi sangkoh Jeniah tak mesai meniga jengkal mata sangkoh alu pia enggi akak ia Guntur.Alu Jeniah ngangau ke aki Nabau Langit angka sida ulih nulung.Diak Jeniah alu nunu unggun api,api alu nyadi ngujung menua penuh laban asap.Bisi takah ambis insap derukok ukam diak dinga utai munyi kebab besiuh datai ari tinting bukit,nyau lindap ari laban utai ke datai,dinga panjung mensia nyebut ohaaa naka pemesai nya ngica petara ulih meda ulih nengkila ulih nyeretai datai mantu kitai ko sida ba diak nyeraoh.Aus tu,pagila ku nampung panjai agi jerita tu.Salam sayau nuju kitak pemaca ti rindu maca jerita Jeniah tu.