Bisi nandan bulan ditengan,bisi ari manah penyadi,bisi taka enda meri asa,diak sekayu menua Batang Mandai begerempuru ba rumah rumah panjai sida Dumbang alu duduk ba ruai sida Jeniah bala pengayau ke datai.Nyadi pagi nya sigi endur orang nurun ngayau mulau ke menua jauh mejuh.Sida sama bertanya mimpi ni ke manah diguna alu ke jai ditinggal enda tau nyereta nurun ngayau matak menua.Berindik ari mimpi nitih jako tangkan ari Emperaja Banda,nitih ke mimpi ari Keling Gerasi Nading ti meri tunga kuing kayau mulau.Bepun ari nya diak sekayu menua ninga leka biau Inik Manang Bunang baka munyi tu.
Ohaaaaaaaaa ohaaaaaaa
Sa wa iga pat ma nam Ujuhhhhhhh,
Ni petara Attala ti megai dunya,
Ni petara aki ni petara inik,
Uji kitak nilik ke baruh ari,
Meda kami ti diau ba baruh ari,
Matapanas idup pulai tindok ngalih ari,
Ngiga keresa lebih ninting ari,
Minta berekat kitak petara Attala ngasuh kami,
Bulih rejeki bulih negi ke bansa kami,
Ngayau mulau ngemai pala seladan ditusuk bilak wie,
Ni kitak petara Panggau Libau,petara langit,petara bukit,
petara tanah,petara sebayan petara danjan,
Uji tesau ke bala kitak kabukai sama sampal datai,
Sama ngambi ulih aram meh kitai,
Ngebak dunya mingkai ngemai pala katuai,
Tu kami ti ngangau ke kitak ari Batang Mandai,
Ngemai kitak ngayau ngasuh kitak datai,
Ngulih ke pala ngica nyadi pengingat bansa kitai,
Tu meh menua kitai alai kitai bumai.
Ohaaaaaa.
Alu disaut jako tangkan orang katuai enggau genteran jako ti meri reti ti besai.Nya igat ucu kitak ke baru enggau nurun ngayau mulau anang enda nyimpan reti leka jako aku tu ko Dumbang.
Serarai panas suah ngasuh kitai ransing tau ngetu dulu tau ngirup ai,ai dirup anang maioh negi ngasuh ekak ngasuh lelak ngujung tua tinggal delak tinggal kediri.Bejalai anang terunda negi ketup semada ngujung kitai gegisai gatal labannya,baka entelah nadai berulu lungga lebuh bejalai anang bangat ka nikal pulai ngemai ati asa,ni utai dipeda sigi dipungga enti nya ngeregau tau ngasuh kitak lesi ngapa.Bersundang anang bangat kelalu terang tau diberi rapas ngica enda dipunas,berjako anang baka retih rendai ngenangi bisi dipa utai udah ulih ia kitai,bertelai sigi tau tang anang bangat nitih ke ati majak ngumbai diri pandai enda alah enti kitai aja dasuh kediri nyadi tuai.Ni jako pemangga anang ninga tau dambi mimit ga angka bisi tau diguna nyadi pengingat semaia.Enti ngayau baka tu anak ucu icit kingat ni peninggi langit peninggi bukit ni pemaruh tanah tau ditunda anang ga kelalu negi kumbai orang bangka.Sema siko lesi tau jampat betarit pangan diri ngica tubuh ia ke mati enda disatik peneka sida sambik.Berjalai nitih katuai,tang katuai anang ga bangat ngasuh bala ia ngelanyai negi bala ambis mepar enggai ninga jako tuai.Udahnya bado Dumbang bejako alu semua bertempap jari sereta nyeraoh ohaaaaa memagang alu senaung munyi panjung bala dayak ti nurun ngayau.Udah sida dipiring alu Jeniah dulu nurun ari pala tangga ngemai piring alu neresa bala dayak ke nganti ba baruh tangga,datai ba pala tangga diak ia ditanjah ngena darah janik alu dipanjah ngena ai tujuh benanga,diak Jeniah alu nyeraoh manjung negung baka remaong,semua jelu semak nya kerus kidus lari alu ukoi merung nitih panjung Jeniah,serak tu sida ngemai uduk kebebesai memagang,siko pengayau ngemai ukoi bisi siku kena nambah nyadi perengka nyaga diri,menya ukoi dibun kitai dayak kenu ko orang tuai bisi ka tuntung dada kitai kediato agi menya,ukoi pengasu tu endang besai endang dibun dasuh nyamah munsuh sida ia nya kabuah munya aki inik kitai bisi madah anang makai daging ukoi laban ka sial sereta pandak umur enti makai nya sereta enda bepengerai jemah ila.Nyadi sida nitih ari belakang Jeniah enggau Guntur alu ditangkan sida kabukai.Nyadi Rimang ngapit pejalai Guntur laban ia tu peturun madik kitai bansa Sekapan ti tampak rita agi munya,Rimang diberi orang ensumbar Kemayang Berantu laban ia enti bebunuh ia baka kemayang aja munuh munsuh.Ilmu ia bisi diperajar sida Encharang ari aki tuai the legend pengayau benama Berinau.Nyadi Berinau tu siko kitai iban ti agi idup nyentuk kediato laban ia pengayau 29 iku ti ngelanggar sumpah Attala ba nanga Batang Mandai kediato.Nyau pulai ke pun jerita diak Jeniah alu meri pengaruh kebal enggau bala maioh sereta meri sida ia tali wie(rotan) ti udah digaga nyadi gelang alu sida dasuh masuk ke nya ba betis enggau lengan kena sida bejalai deras laju ngilah tingkah ngerumban ari ngerumban jam.Diak Sendau Batu Anchau ngentak ke sangkoh alu ngira jam nitih kemayang sangkoh ia.Diak sida sama muka tali semaia alu nachang ba pun kayu ensurai ba pemendai kena ninggal semengat sida gerenti datai pulai enggau selamat nadai apa nama lebuh ngayau mulau ila.Tali semaia tu baka pua mit ditanchang ba kayu pemendai ngica lebuh sida pulai bejalai ari ngayau ngambi ia nya baru,enti nadai diambi orang ke kayau suba nya tanda ia udah parai nyelekai.Nyadi pengudahnya diak sida sama nanchang tali semaia pulai selamat diak sida alu nurun.Pemaioh tali semaia enyau penuh kayu ensurai ditancang tadi.Nyadi kabuah nancang tali semaia tadi ba kayu ti tegap sereta pedis tumbang ngica semengat sida ulih baka kayu nya,nyumbuk berari ati berani,enda tumbang baka kayu nya,nya meh munya enti kayu tali tancang semaia tumbang alu jejampat sida katuai ba rumah panjai ngintu nya ngena piring enggai ke semengat pengayau lentur lebuh bekayau.Nyadi penurun kayau Jeniah serak tu endang besai kenu jerita laban maioh orang ngandal Jeniah ngemai pala besai.Kenu ke tusi aki tuai,beratus ribu bansa dayak ti maioh peturun bansa enggau nurun ngayau maianya.Pemaioh sida tu ulih ngalah sitik menua ti besai.Lebuh Jeniah ba luan diak Jeniah maca sampi ngemai bala antu gerasi nurun ngayau ke baruh dunya ari,alu ninga meh Bunsu Gerasi Langit alu ngangau bepadah agai antu gerasi kebukai,sida pen udah nyikap nyedia kediri.Alu Bunsu Gerasi madah ia ka nerejun diri lebuh sida Jeniah nuntung ba menua ka dikayau sida ia.Pagila ku nampung baru jerita to madik.Selamat Hari Buruh Sedunia.
