Ninga utai bangat ngingar ke dini pagi diak bala sama begelumu memagang ba ruai sida Jeniah ke paginya.Alu bisi penyampau beratus ratus ribu iku mensia ba tengah laman,ba tanju,ba ruai laban ka nemu jerita nama utai dipanjung Guntur ke pagi nya.Diak sida anakbiak baka ke mereti enda memunyi laban nganti pemansut Jeniah enggau Guntur,diak tama tudah Kisuh ngasuh anak ia ke ruai ngica madah ke bala maioh nama utai dipanjung ke Guntur dini ari,peda mata Dumbang geginau nganti pemansut penatai Guntur alu ka ngukum Guntur enti Guntur nyeraoh ngapa bakanya.Maioh orang menua Batang Mandai datai laban maianya laban sama ngiga dini raoh panjung mensia ngingar ke ari ngingar ke langit ngujung Inik Andan ensugau buntau laban digayap aki Seungkuk demalam.Diak Inik Andan nilik ke baruh dunya ngena batu chemaga geliga penama alu dipeda ia ke nyeraoh nya nemu nya Guntur nunda ke nama guntur empu diak Inik Andan murus dada laban ngumbai Jeniah ka ngayau menua tisi langit berkerawit laban ba batu tilik inek Andan,Jeniah ka ngayau ke langit ngelaban Bunsu Gerasi Langit ila laban peturun Jeniah ka ditaban ke langit ari purih anak madik Kumang Endu Bunsu Langit ia nya Bujang Segala Nandang.Inik Andan irau ati laban enti langit ditiki mensia diak peturun sida nya tadi ka nguasa dunya alu ngenangi dunya ila charut ketegal ulah mensia ti merintah ari langit.Bepun ari ari tu suah kitai iban ke agi ka amai betelai bertundi enti bisi bungai bansu dikumbai bulu utai inek Andan laban Inek Andan nyabut bulu nya suba lebuh mensia enda ulih idup ba atas langit laban nya jako kelesay ulah ngelanyai ke kitai agi menya.Pengudah nya inek Andan bisi enggau bala orang atas langit meh mutus ke tangga Beji Penangga Mua Ari ngica mensia enda nyerang peturun Bunsu Gerasi Langit agi.Nya meh kelia suah kitai dayak madah kitai tu peturun ari bala dewa langit laban bisi kaduak kitai mensia ti ulih nyapai tisi langit agi mengkang ba langit baka sida Gindar,Sundau,Bantan,Entalai,Dungan enggau kabukai ti enda ulih ku sebut ba ditu.Nyadi sida tu agi diau mengkang ba langit alu sida enda pulai ke baruh dunya laban sida udah dibai Inik Andan nampung bilik inik Andan ba langit.Meda bakanya diak orang baruh dunya nemu bala diri bisi diau ba langit lebuh maia ngayau Bunsu Gerasi Langit suba.
Pulai agai pun jerita diak Guntur pansut ke ruai ninga bala ulun dasuh Kisuh madah ke saduai tadi nyenguk ba padong Jeniah ti ngasuh ke ruai laban maioh orang sekayu menua ka nemu nama kabuah Guntur bangat ngemesai nya raoh enggau panjung laban enti kelia kelai besai raoh tauka panjung nya petanda munsuh datai tauka maia pengerami begawai.Enti nyeraoh ngapa ka di ukum laban raoh nya tadi ulih ngeregau menua alu ngasuh orang irau ati.Meda baka nya diak Guntur enggau Jeniah alu pansut keruai alu geguai tudah tuai rumah Dumbang nanya nama kabuah Guntur nyeraoh bakanya.Diak Guntur nusi pengaga ati ia laban udah ninga mimpi madik ia Jeniah ti amai manah didinga alu amai manah ditusi enggau sida ke datai alu Guntur ngasuh Jeniah nusi mimpi ia tadi laban maioh orang ba diak ka ninga mimpi Jeniah.Ka enggai tudah Jeniah nusi mimpi ia tang nadai ko enggau ka pen enda ia nusi mimpi ia laban ngenangi akak ia Guntur ulih kena ukum besai laban ngemegau ke menua laban meri orang kesal ati.Diak Jeniah alu nusi mimpi ia demalam tadi nyentuk pengambis mimpi diak orang kabukai sama ngenung pengudah mimpi nya ambis ditusi alu didinga bala maioh.Diak siku pen nadai engkeretik memunyi,berati ke pengap mimpi nya,indah lunyung terebai pen ulih didinga.Enda memukai alu nempap tikai aki Merom laban nemu reti mimpi Jeniah alu ia angkat nerang mimpi Jeniah nya amai manah.Nya tanda enti sida berpindah ila enda tau ke tunga mua ari tindok laban bulu sida ka alah tinggang bulu bansa ribai alu sida sigi menang seagi sida pindah tunga mua ari idup.Diak aki Merom laban ke lemambang sigi landik nelai mimpi ngeramal utai nyadi ari kira tunga bintang,bulan,ari enggau musim bulan.Nyadi lebuh aki Merom nyawap telai mimpi Jeniah dinga serata menua Batang Mandai tekaoh aja enggau panjung mensia laban nyeraoh gaga ati ulih ngempu tanah ti besai agi ari nya ila.Dinga tekucau ja bala kabukai laban gaga ati ulih beridup semati enggau Jeniah.Diak Jeniah enda memunyi pengambis telai nya tadi laban ia ngadang diri ila jauh ngejang ari menua asal ba Batu Bangar ba Sungai Batang Mandai.Guntur alu ngasuh ulun ia ngauk ke ai tuak ti ba beratus ratus tajau digaga ari tanah alu dasuh sadung agai genap orang ke bisi datai diak laban ngerami mimpi Jeniah ti pemadu manah ditemu.Diak tuai rumah nesau nyadi lusa pun gawai ngintu tuah mimpi Jeniah agai sida ia ngica mimpi nya ngasi nadai ngemai pengerugi.Pengudah tuai rumah Dumbang bejako nama agi deh tak sari sari meh sida ngirup ai tuak laban enya tanda pengerindu enggau basa enggau pangan diri ukai baka jeman kediato mimit palau alu direkak kaban diri empu.Nya tanda kaul orang kelia enggau orang kediato jauh amai beda ia.Orang kelia ngirup ketegal ka bekaul manah sereta nambah peyinu agai pangan diri sereta bertundi begagai bebuti enya lumurt satu ari orang kediato enti ngirup ngesen kediri madah maioh reta tengkira,peturun kaya raja,madah diri kering bebukut,ngiga orang ka aja bebukut laban ngira diri jauh pintar ari orang.Kekadang kitai mensia bisi ga ego ngumbai orang paloi maia enda disukung laban ia nadai ka berusaha nentu nasib diri ngica orang ulih nyukung ia.Maioh kitai kediato bebeda ulah ari orang kelia,amai kelia jeman siga jeman kacau tang orang sama bebasa ke bala diri empu,sitik hal laban kelia bekayau ketegal jako acuk orang menya.Tu meri bansa kitai alah ba senentang tu laban bansa kitai sigi ulih di acuk kin kia.Sapa salah?saut nya ba genap ati kitai ti maca jerita tu.Nyadi pagila ku nampung jerita tu baru ngarap kitak enda leju nemuai agai ruai aku ila.Salam sayau agai kitak ti rindu maca jerita ensera tu ti udah lama ku tusi bepun ari suba nyentuk kediato.Jerita ensera tu ditusi aki tuai Kuling agai kami menyadik agi taun 2002 suba.Selamat malam madik semua.
