Jerita Jeniah Bercabang Lidah part 37.

Diak Sempulang Gana ngemai Jeniah nuju ke entara matahari padam enggau matahari idup alu nunjuk ke Jeniah,ba matahari padam ia meda ambis berasap menua orang nya tadi tang bisi idup ga bala pengayau nitih kayau Jeniah kabukai agi,alu dibai Sempulang Gana agai jauh agi pejalai saduai tama dunya matahari padam,diak ia meda maioh bala pengayau nitih kayau Jeniah bisi maioh mati,mina ia kekering aja agi idup,nya pen ulih ditiap ngena jari.Udahnya diak Sempulang Gana ngemai ia nikal pulai agai matahari idup diak Jeniah meda menua nya tak baka biau balai menua nya nadai mensia, berdunjung antu pala ulih pengayau nitih kayau Jeniah,alu saduai majak agi ke dalam dunya matahari idup diak sida meda nya tak ransi nadai mensia,baka madang bungai antu pala,nyau penuh bukit laban dunjung antu pala ulih sida pengayau ti nitih kayau Jeniah.Udah saduai nikal pulai baru ba entara menua matahari padam enggau matahari idup.Diak Jeniah nanya nama reti utai dipeda ia tadi agai Sempulang Gana.Diak Sempulang Gana madah,enti ia ngayau ke mua matahari mati,ia sigi menang tang enti ia ngayau agai menua ribai kin,sigi maioh sida lesi,amai sida menang tang maioh sida lesi nyengai ari,tang enti purih pantih sida ila enti kering baka Jeniah menua ribai ulih dikayau ulih dijengkau ari ransing ngayau mulau.Alu pia mega enti menua tunga matahari idup sigi ulih dikayau purih pantih Dayak laban penatai kitai dayak ari entara menua mua ari padam enggau mua ari idup,ari jako Sempulang Gana kitai dayak ulih ngayau ribai tang ka lesi enti penemu enda bisa enda betapa ba tunga matahari mati,bepun ari mimpi tu meh kitai katuai menya napat dunya tunga matahari idup laban kelia sigi alah bulu memagang menua tunga kin,suah bala Kedayan kelia ngayau ke Filipina ngujung suku Dayak pen bisi tinggal ba din.Alu pia mega suah kitai dayak ngayau mulau ke Indonesia agi menya suba,nyentuk datai ba menua Bali.Nya meh jerita jako kitai Dayak bisi sama baka jako dayak Filipina ti ngumbai Manuk pen Manuk,sereta bisi campur mimit jako kitai iban, kayan,kenyah,enggau  kabukai.Nyadi bansa Bugis enggau Suluk tu orang laut ukai orang beridup ba bukit ba tanah,sida beridup ngaga rumah ba teluk teluk tebing tasik,nya meh sida nadai menua laban pengidup baka nya,sida suah ngelaban dayak Filipina tang sida dipunas ke sida dayak Filipina empu enti sida niki ke bukit,ba dayak Filipina dikumbai dayak bukit tang cara idup sida ia sebaka enggi kitai dayak borneo ditu.

Pulai agai jerita Jeniah tadi,diak Sempulang Gana madah enti sida ngayau agai tunga mua matahari padam sida tau nagang diri ngayau agai menua ribai laban menua nya menua karung besi.Bisi enda lama dahnya diak Senggalang Burung pansut alu ngimbai saduai ia diak alu madah agai Jeniah enti memunyi menantu ia meragai enda tau diserang enda tau dikayau menua nya laban angka sida Jeniah empai cukup penemu kena ngelaban menua nya.Nyau maioh randau sida tiga diak Sempulang Gana ngasuh Jeniah dani ari mimpi tindok laban ari udah tawas.Jeniah alu tedani ari tindok alu ngenyit dani,tudah alu angkat sereta nuju tajau besai disi ai sungai datai diak alu nuci mua alu nengkurup ai ba mulut kena muai bau pang mulut.Udah nya ia alu ngenuduk kediri ba dapur ti udah denah ai tebu angat sereta buah empasa ti digaga nyadi penganan empasa.Meda mua Jeniah enyau baka layu dipeda diak sida sebilik irau ati sereta sida ulun ia mega tusah ati meda mua Jeniah baka ke tusah ati diak sida alu duduk betungga enggau Jeniah alu nanya nama kabuah mua Jeniah bakanya,diak Jeniah madah mimpi diri,seretai mimpi udah ditusi Jeniah,diak alu manjung gaga tudah Guntur alu enyau begau sida sarumah ninga panjung Guntur,tudah ke laun dani nyau mega tedani enyau terlantak ke dinding laban meda orang begau,ia ke benung birak ba ili lubuk pemendai enyau temepak labuh ke ai,bisi keduak enda sempat nuci burit laban ngerumban ngiga nyawa panjung mensia bangat ngingar ke dunya Batang Mandai,sida ke engkani manuk enyau tebeleka dulang asi bari dempa manuk,sama ngesah ke bilik sida Jeniah kin.Ia benung nginsap enyau muka kuntau laban ke terkenyit puntung insap ninggang pah.Pagila ku nusi ensera tu baru madik.

Jerita Jeniah Bercabang Lidah part 36.

Bisi bebulan udah limpas diak Jeniah madah diri ka ngayau mulau agai menua matahari padam alai menua sida Apai Berangka ti ensumbar Kuta Menua Pengimbau Bentara Kuta.Nyadi Jeniah ngemai ngayau kin laban ka betapat pengering enggau Tupa ti ensumbar Mali Enggai Sigi Enda Pulai.Nyadi lebuh ninga sada Jeniah bebai ngayau diak bala tekerinyik ngeli laban bertaun taun sida empai kala ngemasah empai mandi ke darah,alu nyerais tudah Guntur naka pengaga ati laban ka mandang pengering diri enggau bala bakal entua ia ba langit.Ba runding Guntur ia mantai pengering diri laban ngica entua ia ila meda antu pala penuh dibai ia nanya Kumang Endu Sebara Bintal Peraja ti udah pulai kin pengudah dambi Bunsu Emperaja Gira.Nyadi lebuh Emperaja Gira ngambi anak ia kia maianya Jeniah nadai ba rumah,sereta Emperaja Gira enda niki ke rumah laban beguai ke ari ka nyau ka panas.Nyadi sekayu menua Batang Mandai begelumu bergempuru ba ruai Jeniah laban ka ninga runding Jeniah bebai ngayau kin,diak tudah Kucai dulu ngenuduk kediri ngimbai Jeniah laban ia sigi manuk sabung Jeniah alu dikerimbai Guntur ba sapiak Jeniah,alu ba belakang Jeniah duduk indah tudah Kuring.Peda pansut Dumbang ari bilik alu sida kabukai manjung nanda pemansut tuai kayau besai.Alu duduk minggan tudah sida Pengulu ke tuai alu dirintai sida katuai rumah.Tudah Jeniah duduk ba tengah endang asal kitai Iban kelia enti ngepun kayau sigi duduk ba tengah ngica bala pungka lelaki berani kabukai ninga telai utai dipadah sida katuai.Nyadi pengudah atai magang sida katuai alu didinga ba ujung setak aki Siran pansut,peda beguyap rumah panjai endur pejalai ia,ba jerita tuai ski Siran tu meh manuk sabung Nepok,pengudah Nepok mati diak aki Siran enggai agi ngayau sereta enggai nyadi manuk sabung bala katuai bukai.Laban ia ngenangi tuai kayau enda ulih dijaga ia.Pengudahnya aki Siran enda kala pansut ari tucung meligai ia,indah ulun ia pen enda kala terpeda bakani gamal ia anang agi sida rebak baru sama enggau sida Dumbang,Kisuh enggau sida kabukai lebuh agi mit suba aja ninga pengering aki Siran tu.Aki Siran tu meh pemado kitai Iban bebai pindah ari tebing tasik nuju ke batang Mandai.Suah sida ninga jerita orang katuai ba senentang aki Siran tang tu meh sida nyentuk meda mua aki Siran ti panjai buk berundai,ragum naka pemanjai,buk ia baka duri,pengering ia baka besi ilang,dipeda ari jauh baka kemayang,sekali atai tak nyengala orang.Diak ia alu bejako agai sida sarumah ia,diak ka ngau sida kabukai ngayau kin laban ka malas pemati tudah Nepok ti dibunuh Entajamau ianya apai sida Apai Berangka.Diak sida sarumah bertempap jari laban ia ka enggau.

Pulai agai Jeniah tadi,diak amai nyerengik bulu meda gamal Aki Siran ti bangat mangah sereta berangat mua bakanya,tu meh sumur idup Jeniah bertunga enggau orang lama nyadi pengayau.Nyadi tudah Jeniah gaga ba ati laban aki Siran ka enggau kin,aki Siran alu nusui pejalai kin bisi bebulan laban sida kin nengah bukit,ai sungai ti besai.Diak aki Siran madah ia gaga ati meda katuai kitai dayak tu bisi pejuluk sebaka enggi ia,pemesai aki Siran tu endang amai besai sereta kering.Nyadi malam nya diak berandau alu ngaga danji maia nurun ngayau,diak Jeniah madah sida nyintak tali temeran bisi tujuh iti alu pengambih sintak temeran disimpung baru sida nurun,alu pia mega maia tempuh beranti ke ari nurun ngayau diak sida diberi penti enda tau munuh jani tauka utai idup ti berdarah ba urung tujuh hari ngica kayau sida serak tu sida semenua enda mati ngapa.Diak sida katuai pia mega bepekat bala nembiak anang kelalu inggar laban ngica sida ka nurun ngayau bulih mimpi manah nyentuk ambis mimpi.Berpekat baru sida katuai,enda nyagi sida ke indu enda tau ningal ke dapur ngenangi bala ke nurun ngayau bulih pemedis enyau chelap belama isi lebuh ba rantau jalai,pedilang ba ruai dipadam lebuh malam ngica kayau sida lus ransi menua tang pengudah sida nurun ngayau,pedilang ditungkun enda tau padam laban semengat lebuh tindok bala pengayau berangat enda chelap isi lebuh bekayau.Bepekat orang ka tuai lebuh sida ba rumah panjai enda tau ngambis asi ba periuk lebuh makai ngenangi semengat pengayau ti lapar ngiga pemakai pulai ke rumah panjai sekali ngerebak periuk nemu nya bisi pemakai ia gaga ati alu pengayau ti dani ari tindok enda lembau enda buntau enda lelak tang enti nadai asi ba periuk sigi semengat pengayau ka ringat alu lepi ngujung pagi bala pengayau dani ka lembau,buntau,lelak sereta ringat ngapa.Nyadi tudah Jeniah ninga ajar jako nya,alu Jeniah bebagi berau Bunsu Padi agai sida semenua tadi sama beribun leka berau mesai betis ti diberi Kumang Gerasi Langit agai ia suba.Padi dambi Kumang Gerasi Langit ari Petara Padi Kiharingan ba langit serak ke satu.Bepun ari nya diak bala mensia baruh ari betanam ke padi pun benama Bunsu Padi ba umai tang pemuas dibagi agai mensia kabukai diak leka padi pun mit semit ngujung mesai kediato.
Pengudah bebagi benih padi tadi diak Jeniah alu bejako ngajar bakani nanam padi nya tadi,alu ngajar nyumai berau.Semalam malam nya maioh meh sida sekayu menua nya berajar penemu nanam padi nya.Padi asal ditanam kitai ia nya baka padi sintung padi matahari laban enti dibancak panas ia berupai kuning ngelilin.Udah berajar penemu diak sida alu mupuk mulai ke bilik diri empu memagang,alu sebedau pulai sida pungka lelaki ti ka ngayau enda di asuh ke bejalai jauh laban penti pemali ngenangi sida sesat ila.Enyau jauh malam sida semenua Batang Mandai alu tindok memagang ngujung nadai didinga agi nyawa mensia berandau.Jeniah pen tindok tang sekali mejam ke mata ia alu betemu enggau apai ambu ia Petara Dewa Sempulang Gana.Ila Ku nyambung baru jerita to madik laban line ba kami ditu manah belebuh ga nadai line.Sayau selalu agai kitak.

Jerita Jeniah Bercabang Lidah part 35.

Enyau memenik mua tudah inik Antu Ai meda manuk parai pia laban diludah Jeniah.Alu udah nya Aki Antu Ai ngemai Jeniah betapat mukut batu,sapa ulih mecah ke batu anchau ia meh kering.Diak aki Antu Ai ngasuh Jeniah dulu ngemecah ke batu anchau nya tadi tang Jeniah ngasuh ia dulu agi laban nya menua ko Jeniah.Sida sarumah sama pansut magang alu nitih saduai ia agai terejun ti bisi batu anchau.Alu dibukut aki Antu Ai batu anchau ti nganchau ke ai terejun,dinga terkaoh munyi ai munyi batu anchau anchur lebur laban aki Antu Ai,diak udahnya ia ngasuh Jeniah mukut batu anchau,sekali Jeniah ngentak mukut batu anchau alu enda didinga munyi,diak aki Antu Ai naka pengaga ati meda batu anchau enda memunyi enda pecah,tang lebuh ia ketawa lekekai ngumbai diri menang,dinga semua batu anchau ari ulu ari ili saduai betapat pengering mukut batu anchau tak kemerap semetak memunyi pecan,tak manjung aki Antu Ai meda pemaioh batu anchau pecah ari atas bukit terejun alu labuh magang ngujung enyau alit sungai laban apat batu anchau berdunjung ngalit ke sungai.Diak nyau sebana kaduak sida ikan buntal sida juak madah ke aki Antu Ai nya nya bangka,nama kabuah ia ka napat anak iru Petara Dewa Sempulang Gana.Aki Antu Ai temati kutu,alu ngemai sida ia pulai ke rumah panjai,alu ngemai Jeniah betapat ngiga utai bisa dempa ti meri mulut bepedi,diak aki Antu Ai ngambi buah tubai rangan to pedas sereta mesai pala patung,nyadi Jeniah mina ngambi chabik gerunung ti dibai ia ari menua mina 11 itik aja,alu ketawa lelekai aki Antu Ai meda buah dikena Jeniah ngelaban buah pedas ia.Alu disua ia buah pedas agai Jeniah alu dipangkil dempa Jeniah ngejung ke buah pedas nya ambis dempa ia,sepik Jeniah tak berangat pending ngau dilah ia tang enda lama aja laban bisa dilah Jeniah lebih bisa ari nya.Tang lebuh Jeniah nyua ke chabik gerunung agai aki Antu Ai,alu dikunyah aki Antu Ai,peda mua aki Antu Ai enyau mirah,dirup ia ai majak agi pedas agi ngujung aki Antu Ai nyau nyabak tuai laban pemedas chabik gerunung ngujung ia mulut ia enyau kembai alu mata ia baluk,diak Tuai tapah pen bisi nyengkau sitik tang ia enyau kekalat kin kia ngiga ai,alu ia tepeda ke lia ba temilah Jeniah alu ia ngumbai penawar pemedas chabik tadi alu ia ngelawa temilah Jeniah ti dikait ba tiang,bedau sempat Jeniah ka madah utai nya pedas jari Tuai Tapah udah nyengkau lia alu mapak ke lia ke mulut ia ngejung balat agi pedas ngujung ia tabin chelap angat.Nyadi inik Antu Ai enyau nyabak laban laki diri sakit baka ngujung sida ngambi Tuai udun nyadi manang merubat sida Tuai Tapah enggau Aki Antu Ai.Tudah Jeniah tuchum aja laban ia nemu aki Antu Ai ngalah kediri.Bepun ari tu meh ti tapah ngaban mangka ke telu ia ba tebing,semua mensia ti ka ngulih ke ia maia ngaban mangka telu enda tau makai tauka enda tau ngemai chabik tauka lia laban bala tapah ringat ke tuai sida ia mati ketegal makai chabik enggau lia,nya alai ti mensia makai chabik tauka lia maia ka nangkap tauka munuh sida lebuh mangka telu sigi ka bebadi mensia nya tadi.Sida tapah tu meh enggai amai ensium bau chabik tauka lia maia ia ngaban mangka ke telu,nya alai ku mekat kitak anang sesekali makai chabik enggau lia enti ka ngulih ke ikan tapah lebuh ikan tapah tu ngaban mangka telu.

Pulai agai jerita Jeniah tadi,lebuh aki Antu Ai nya tadi suman kediri empu diak Jeniah ngemai ia baru betapat pengering baru,tang aki Antu Ai madah umbas naka nya aja laban ia takut negi majak agi ia empu bulih penusah.Diak ia ngelepau ke Lelangan ari sangkar kurung ia alu ia minta ampun agai Jeniah ketegal ulah ia ngaga penatai Jeniah bakanya. Alu bepun ari nya ia madah alu ngajar Jeniah baka tu.Enti lemai ari lebuh ari sesilau sida mensia enda tau bermain nebing lubuk,enda tau punik lebuh nyemerai lubuk,alu enti sida mensia meda rau tauka daun daun kering pansut ari dalam lubuk alu bisi ai berenik ba lubuk nya tanda penatai antu ai ka ngasu anak mensia,alu enti lemai ari anak mensia enda tau mandi ba lubuk ti bisi batu ba tengah lubuk laban ba diak meh alai pengipa antu ai ti merening bulan ba langit.Bekau ari tu meh samoa kitai dayak dajar Jeniah nyentuk kediato.Pulai agai Jeniah tadi diak ia diberi aki Antu Ai pengaruh penampung seput ba dalam ai.Bunsu Ikan alu meri ia pengaruh kerubung tekuyung tasik,pengaruh nya dikena Jeniah lebuh maia berikan.Alu lebuh Jeniah pulai ngemai Lelangan diak Lelangan diberi maioh pengaruh ari inik Antu Ai.Udah sida beberap diak aki Antu Ai nganjung saduai ke atas ai sungai,diak saduai ia pansut ari dalam ai.Tak terkenyit sida sarumah meda Jeniah saduai Lelangan pansut ari dalam lubuk,naka meh pengaga sida kabukai tadi alu apai indai Lelangan nyau deduie nyabak laban gaga ati meda anak diri idup meruan nadai apa nadai nama.Diak Guntur alit ati meda Jeniah saduai Lelangan tak nadai basah tubuh lebuh pansut ari dalam ai sungai.Nyadi malam nya sida sarumah bergerumpuru ba ruai Jeniah laban ka ninga jerita ari Jeniah,nyadi semalam malam nya meh Jeniah nyerita utai ke jadi.Ari enyau majak malam semalam ngejung sida bebai tinduk.Alu udah sida pulai agai bilik diri diak tindok meh sida ia,tang mata Lelangan enggai tinduk laban ngenang ke Jeniah.Ka pen enda ila ku nyambung jerita tu baru.Sayau selalu agai kitak ti nemuai agai blog kami sereta datai datai meh agai page kami ba Pematak Kayau Menua ba facebook.

Jerita Jeniah Bercabang Lidah part 34.

Dini pagi ari,udah ari kerebak tawas,diak tudah Jeniah dani ari penindok diri.Udah tembu engkurup mulut alu masu mua diri,diak Jeniah alu denah ulun sida makai laban Jeniah ka bejalai.Udah Jeniah makai pagi alu ia nanya perengka dipinta ia kemari udah ditengkira ke bedau.Diak ulun ia madah udah ditengkira magang perengka baka dipinta Jeniah alu disua agai Jeniah,lebuh Jeniah ka muka pintu ka pansut ka ruai diak aka ia Guntur nawih tengan bahu ia alu madah ka enggau Jeniah tang Jeniah enggai ngemai ia laban Jeniah ngasuh ia ngibun bilik maia ia nadai ba menua sida ia.Lebuh Jeniah nurun ke tanah diak sida sekayu menua nganjung nitih ia.Datai ba Lubuk Dalam ba senentang batu ba tengah alai lubang antu ai,diak Jeniah alu nancang perengka ia ba tubuh alu engekecit alu terejun temepur ke lubuk nya tadi.Pengudah ayas Jeniah tadi ti nyelam enyau nadai dipeda ari tebing diak sida sarumah alu mulai kediri tang bisi ga kaduak ia nganti pemansut tudah Jeniah ari Lubuk Dalam ti ngemai indu dara tampun puji ia nya Lelangan.Apai indai Lelangan seruran nganti ba Lubuk Dalam laban Lelangan tu anak asie anak disayau ia.Pulai again jerita Jeniah ti benung nyelam tadi.Nyadi makin Jeniah majak nyelam makin Jeniah berasai lantang seput ke dalam lubuk kin,lebuh Jeniah terengkah ba mua gua dalam lubuk diak Jeniah alu tama tang Jeniah enyau rerangap meda pengudah ia tama gua diak ia ulih enseput alu rembus ba menua sitik cukup manah,betucung bukit ai terejun dipeda,alu Jeniah kenyap berunding ngumbai menua nya baka menua Panggau Libau.Malik Jeniah kebaruh diak ia meda sitik rumah panjai,Jeniah alu ngelawa rumah panjai nya tadi.Sereta udah atai ba pala tangga diak Jeniah alu ngangau nyadi ke enda rumah panjai tau ditiki mensia.Lebuh ia bado bejako tak seninjik siko apai tuai orang ngasuh ia niki.Lebuh Jeniah niki diak ia meda pemanjai rumah panjai sida tu naka pemanjai tang nadai mensia dipeda Jeniah.Lebuh Jeniah datai ba ruai diak Jeniah meda apai tuai siko ti benung ngaga bubu,alu apai tuai nya ngasuh ia duduk.Diak Jeniah meda tubuh apai tuai nya burak aja tang bisi tisik ba tengan bahu ia.Diak apai tuai alu merap Jeniah alu nyeraoh ngangau ke bini ia ngasuh bini ia pansut laban ucu Remaong ucu peturun ia bisi nemuai kito ko ia ngasuh bini ia pansut.Alu pansut siku indai tuai tadi,diak Jeniah enyau ngapo ba dalam ati meda inek tuai nya enyau betisik burak ba tubuh.Meda Jeniah bedau rerangap diak inek tuai nya alu muka baju tisik ia.Nehhh endang mensia meh nya ko ati Jeniah,diak aki tuai nanya pejalai Jeniah nama kabuah ia ulih ngerembus kediri agai menua sida ia diak Jeniah madah pejalai diri ka ngambi Lelangan pulai ke menua asal sida ia.Diak aki tuai madah kediri nyadi nya Nabau Ngengkang alu orang ke naban Lelangan bala petunggal ia Tujing Antu Ai ti nampung rumah panjai sida ia.Alu aki Nabau ngemai Jeniah nuju bilik Antu Ai ba setak din, Jeniah alu angkat nitih pejalai aki Nabau.Genap pintu rumah panjai tadi diak aki Nabau madah ni bagi bilik tuai Tilan,tuai Tapah,Tuai Labang,Tuai Empurau,Tuai Semah,enggau maioh agi.Nyadi sida tu dijaga antu ai magang alu Aki Nabau ti nyadi katuai sida tu.Enda lama udahnya diak pansut tuai Tapah alu merap Jeniah alu gaga ati meda Jeniah bisi nemuai kia,ia alu nitih pejalai saduai tadi ti nuju ruai Aki Antu Ai.Lebuh sida datai din diak aki Nabau alu mandam pintu bilik Aki Antu Ai.Diak Jeniah nanya nama kabuah aki Nabau baka nya.Diak Aki Nabau madah,aki Antu Ai tu tulik sereta enti tindok maia siang ari alu dani alu pansut lemai ari aja.Sereta pintu tebuka diak Jeniah meda gamal aki Antu Ai tu ngembuan sitik mata aja,diak sida dibai aki Antu Ai tama kebilik alu duduk ba dapur,malik Jeniah ketisi peda ia Lelangan benung dikurung ba kandang kayu.Meda sida datai diak aki Antu Ai nanya pejalai sida ia.

Diak aki Nabau madah ngulu ke Jeniah ngambi Lelangan ti ditaban ia lari kemari.Diak aki Antu Ai alu ngenung,diak alu nyaut enti Jeniah ka ngambi Lelangan,Jeniah mesti belaban penemu enggau ia.Maia nya Jeniah madah au aja tang ngena chara nadai beduku enda tau bejamah tang ari main uti.Meda baka nya diak Aki Antu Ai naka pengaga ati laban ia nemu enti berjamah,berekak enggau bepantap,ia sigi alah laban Jeniah.Diak Aki Antu Ai ngemai betapat makai alu sapa ngempu riur bisa ia meh ngempu Lelangan.Lelangan sigi ka dempa aki Antu Ai lebuh maia atai bulan ia aus darah mensia.Meda baka nya diak Jeniah tucum aja.Diak aki Antu Ai ngemai Jeniah betapat ngirup racun raong enggau tubai akar bisa,Jeniah alu madah au aja.Udah aki Antu Ai ngirup racun ti bisa alu disua agai Jeniah ga.Peda aki Antu Ai nyau kederut majak kentu enyau mandam geregar tudah aki Antu Ai laban racun nya ngerayap dalam tubuh ia peda alu tekemik ba sirat tudah ia muai pemisa racun nya.Meda bakanya diak Jeniah alu ngirup racun ia mega nyau ambis setajau racun dirup Jeniah,udah ngirup racun diak Jeniah alu kentut madah diri kenyang sereta lebuh Jeniah ngeludah mimit ketisi alu tekena ke manuk sabung aki Antu Ai,peda alu bumbus ke sepiak ludah Jeniah.Tak ngapo meh aki Antu Ai meda pengering Jeniah enyau enda ensanyar(terhuyung hayang) kin kia baka ia tadi.Nyau ka belai ai mata tudah inik Antu Ai meda manuk sabung enggau manuk indu ti meram ke telu nyau parai kena ludah Jeniah.Pagila aku nampung baru jerita tu kaban.