Jerita Jeniah Bercabang Lidah part 33.

Datai Jeniah ba pemendai sida ia diak Jeniah terdinga orang nyabak sereta meda orang ba lubuk dalam ari ulu menua ia,cukup maioh sida semenua ngelilingi lubuk nya tadi.Jeniah ngumbai sida berikan nubai aja,Jeniah alu mandi sereta tembu mandi alu niki ke rumah panjai sida ia tadi.Meda mua Jeniah nyenguk ba mua pintu diak Sandai alu nawih tengan bahu Jeniah alu ngemai Jeniah duduk enda lama laban ka nusi pengerabat diri alu ia madah penatai Jeniah sigi danti sida semenua laban tudah anak dara ia Lelangan dah ditaban antu ai lari ke dalam lubuk lebuh Lelangan mandi kediri kelemai ari tadi.Diak sarumah madah ke Jeniah utai ke nyadi,bisi bebelas iku bujang berani nyelam lubuk nya tadi tang enyau bakal magang.Bisi keduak patah jari,patah kaki,enggau telih baka dikeramak antu ai.Meda bakanya diak Jeniah madah,tumu pagila ia ka nyelam lubuk antu ai nya laban ia agi lelak ko ia madah ke sida ia.Nama agi deh,alu pulai magang meh sida ari pemendai tadi ninga orang ba rumah bepadah nganti Jeniah nyelam lubuk nya pagila.
Nyadi tudah Jeniah alu tama ke bilik pengudah mandi ba sungai tadi alu begari diak akak ia Guntur alu ngelawa ia ti benung tegenung kediri duduk nyandik ba tiang tengah bilik sida ia.Atai diak,Guntur   se Jeniah nama utai meri ia tusah ati alu tudah Jeniah mina tuchum aja.Diak Guntur madah ia ka bebini dulu laban enda tetan ati ka jadi enggau indu dara tampun puji ia nya Jara Kumang Sebara Endu Bintal Peraja anak Emperaja Gira ba langit ringkat e ti ngembuan titi peraja agai dunya baruh ari enggau langit mua ari.Berkenang ke langit ringkat kelapan sigi dikembuan sida Jenang ensumbar Apai Sabit Berkait Nisi Langit.Alu begulai enggau Inek Manang alu diak kunchie pintu kuta dijaga Inek Andan Buban.Penama Inek Andan dikumbai Kumang Kunchie Mua Ari ti megai kunchie nangga mua ari alu ia mega megai kuasa ti besai ngalah orang petara ringkat 8 enggau ringkat 9 alai menua sida Bunsu Gerasi Langit.Amai Bunsu Emperaja Gira tu kediri pendiau tang ia enda ngacau pengidup orang Panggau Libau enggau sida Jenang Apai Sabit Berkait alu ia mega bisi ngembuan tangga emperaja ti selalu dikena antu gerasi langit nurun ke baruh dunya.Baka Inek Andan endang ngembuan kunchie genap ringkat langit laban ia peturun orang di kandal Atalla megai nya.Inek Andan bisi ngembuan daun limba limbi sereta utai tau ajih.Nya alai ia enda tau begulai enggau sida orang petara ba langit alu enda tau nulung mensia.Ia nulung orang Panggau Libau pen ketegal ia berutang nyawa enggau orang Panggau Libau laban peturun ia bisi enggau orang Panggau Libau ke langit ia nya ucu ia benama Ngelai ti malu meda orang indu dara tang Ngelai bebini maia umur dah tuai ketegal pemalu ia dibuai Inek Andan.

Pulai agai pun jerita Jeniah tadi diak pengudah akak ia madah baka nya diak Jeniah alu gaga ati ninga akak ia ka bebini.Kira enda lama dahnya diak saduai ninga Lanja ia ulun tuai sida ia ngangau saduai bebai makai ke bilik makai din.Datai din diak Jeniah meda sida sebilik udah terenah duduk benung ka makai mina nganti penatai saduai aja.Udah Jeniah duduk alu bepun meh sida makai alu pia mega semua ulun sida Jeniah seretai makai magang enggau sida ia.Kenyang amai meh sida makai laban bisi pansuh ikan,pansuh jani,pansuh daun empasa enggau lauk kabukai.Pengudah tembu makai diak Jeniah ngasuh Kuring engkira ke ia berau alu dicampur lia enggau chabie,ai tuak seruas meniga iti,enggau ilang ia.Diak Guntur nanya tudah Jeniah ka kini pejalai ia pagila,diak Jeniah nyaut ia ka bejalai agai Bunsu Antu Ai ti naban Lelangan lemai tadi alu ka ngajar antu ai nya bebasa ke iban ko Jeniah madah agai akak ia.Diak Kisuh ninga alu ngasuh tudah Jeniah bejimat enggau antu ai laban bisi orang katuai dulu ari sida ia udah mati kena tipu antu ai nya suba.Bunsu Antu Ai sigi jai enti lebuh bulan atai nyerarai ba langit ko Kisuh nusi agai Jeniah.Kisuh irau ati meda anak ia Jeniah nyadi orang dikandal sida ba menua Batang Mandai ia ngenangi ke anak ia Jeniah enda tan nanggung orang entabanyak majak ngiga Jeniah minta betulung.Meri Kisuh baka nya laban bisi sekeda mensia sigi sengaja minta tulung utai ke hal mit baka ngangkat padi ari umai tang laki sida tadi tembu ngelimpang gawa enyau nginti enyau ngetan bubu lebuh maia atai berangkut padi ari umai.Lebuh enda berangkut padi ari umai diak sida ke laki sida tadi enyau jejangah duduk diruai,lelakak gegaring ba atas tikai bidai.Enya meh tudah Kisuh kasih meda pementas Jeniah ti lempung tulang nulung sida sarumah tang dikeduan ga pementas nya tadi.Lebuh enyau malam tuai diak sida Jeniah sebilik belabuh ngelelak diri nyau gali ba penindok diri,alu mega dinga ari setak nyin enyau nadai chapoh agi nanda sitak menua nya dah belabuh tindok semina bala penyaga menua ke kekitau dipeda ngemai api ruas kin kia.Alu didinga kuruh mensia tindok angka bisi ke lelak kemari.Alu Jeniah mejam kemata laban mata majak lelanuk ngantuk ngujung tindok.Malam nya naka penyelap ari malam kabukai ngujung enyau melukuk sida ke tindok.Alu jerita kitai bersambung baru ba minggu kedudi.Mupuk aku kaban.Salam sayau agai kitak.

Jerita Jeniah Bercabang Lidah part 32.

Tar menitar guntur dilangit,ari enda ujan,keberu ribut bepuput dinga kesetap semetak pun kayu meragai dindik utai besai, sepik tanah berenyang baka tanah diguncang biau balai.Diak Jeniah alu ngenung alu nyedia ngentap kediri,puas tudah berati ke nisi langit nisi bukit nyepi tanah bangat ngeraya nya berenyang,Kumang Bunsu Nandang ngemai ia lari tang Jeniah madah enggai laban ia ka nemu nama utai bangat ngeraya nya bejalai ba tanah nyau ambos terguyap pun kayu ensurai laban renyang pejalai kaki utai nya tadi.Malik Jeniah ke tuchung pun tapang diak ia meda kaki mensia dua itek peninggi pun pitoh lutut ia alu pah ia ngninggi pun tapang alu jari berenyak ba tanah damping mua Jeniah alu pala ia alu bersatup enggau pala Jeniah,pemesai pala antu gerasi nya bisi ngemesai bebelas pemerap.Jeniah enda takut laban sigi ka besatup enggau mensia antu baka antu gerasi nya.Diak Jeniah ngelanyai ke antu gerasi nya tadi.Enti bangat kering uji anti gerasi nya bebali ngemesai mensia baka Jeniah nya baru ia amai kering bebunuh belaban besai sama besai.Ninga jako Jeniah baka nya diak antu gerasi nya alu bebali nyadi mensia sebaka pemesai Jeniah.Diak Kumang Bunsu Nandang ngemai Jeniah betaban lari tang Jeniah madah diri enggai laban Jeniah ka nguji berekak enggau antu gerasi ti bebali nyadi mensia tadi.Diak antu gerasi nya alu nerajang rusuk Jeniah alu dibukut Jeniah ba betis antu gerasi nya tadi peda antu gerasi lelaki alu ia bediri gegetik ngetat ke betis ia kena bukut Jeniah ti kena abi pemenat ba betis ia.Diak nyepi diri digaga bakanya diak antu gerasi nya mabut pun kayu tebelian alu dipalu ia agai Jeniah alu Jeniah engkecit ke tisi alu berlanda nuju antu gerasi naka pengelaju ngujung antu gerasi enda tepalu ke tubuh Jeniah nya tadi.Datai damping tubuh antu gerasi diak Jeniah mukut rusuk antu gerasi peda alu tebeleka pun kayu tebelian dipegai ia.Nyau berjamah bepadan kasak amai meh saduai ia sari sari nya.Nyadi Kumang Bunsu Nandang mina nyabak aja ba langkau meda Jeniah enggau antu gerasi nya majak berjamah nadai nemu ngetu.Ambis batu anchau pambor nyau ngeruang alai bepangka.Nyau kira ngalih lemai ari diak antu gerasi nyau ka alah diak lebuh Jeniah nyintak ilang ia tadi diak guntur alu manchar ke tanah peda Kumang Bunsu Nandang alu merap antu gerasi ti gegaring semina nganti Jeniah mumpung pala ia.Meda utai bakanya diak Jeniah alu tegenung meda utai nyadi alu nanya nama kabuah Kumang Bunsu Nandang merap antu gerasi lelaki nya tadi.Diak Kumang Bunsu Nandang alu bejako madah nya apai ia ba langit din.Ti bejuluk Jingang Bunsu Gerasi Nandang.

Lama tudah Jeniah matak seput ia tadi laban enyau ngeleda enyau nemu kabuah Kumang Bunsu Nandang merap antu gerasi lelaki nya tadi.Diak deduie nyabak Kumang Bunsu Nandang minta kasih ari Jeniah anang munuh apai ia Jinggang.Baru Jeniah nemu diri besulu beambai enggau anak dara antu gerasi langit ngujung Jeniah enda memunyi agi alu nyarung ilang ia baru.Enyau enda lama udahnya diak Jingang Bunsu Gerasi Nandang angkat ari gali luput lalat diak alu ngenuduk kediri ngimbai Jeniah ti duduk tetunging ti agi ngenung meda Kumang Bunsu Nandang nya anak dara Raja Gerasi Langit.Diak Jinggang madah ke Jeniah,mensia enggau antu gerasi enda tau jadi laban dunya sida nyelai ari mensia.Nya kabuah atai nagang saduai ia betemu tang penatai ia laun laban baru nemu saduai ia udah beleman ngujung Kumang Bunsu Nandang nyau ngandung ke anak Jeniah.Nya alai ia minta kasih ari Jeniah ngasuh Jeniah ngemendar ke ia ngemai Kumang Bunsu Nandang pulai ke langit laban enti enda menua baruh ari ka regau enti anak Jeniah ada ke dunya jemah ila sereta Kumang Bunsu Nandang enda tau jadi enggau mensia laban peturun sida Raja Gerasi Langit enda tau jadi enggau mensia takut ila dunya beperang.Pengudah nya endu Kumang Bunsu Nandang enyau nyabak senyabak ngujung ia ka munuh diri meda adat dunya sida ia enggau dunya mensia bakanya tang ditagang Jeniah.Alu Jeniah merap Kumang Bunsu Nandang enggau leka sabak beserara.
Ooohhh asie,
Pengeran tua semampai nyadi,
Tang lesi nda datai ke lemai ari,
Berujan ai mata ngeruntuh ke ati,
Nyabak deduie nagang utai disagie,
Ko jako enggai meda ia pergi,
Tang udah selatan Petara ti magi,
Tua beserara ngetat ke ati,
Danji semaia sigi dikingat nyentuk lesi,
Ka bejuta taun nuan asie pergi,
Enti umur aku agi bisi,
Sigi aku tan nganti datai ke tisi,
Tang mal amai asie,
Tua diserara ketegal dunya bebelah bagi,
Aku mensia nn dara tuci Raja Gerasi,
Alu nimbal meh Kumang Bunsu Nandang ngena leka sabak ngerusik ati.
Ohhh bujang ku sayau,
Dambi mimpi ngasuh ku ngigau merampau,
Sema baka dunya tu sebaka batu anchau,
Sigi enggai aku jauh ari nuan sayau,
Tang dunya tua enda sama pendiau,
Ka pen enda nitih bagi petara meri pendiau,
Beserara tua sayau ukai ketegal bula tang ketegal pengidup pendiau tua enda sebaka.

Ninga sada sebana seduai bakanya diak Jinggang Bunsu Gerasi Langit enyau sinu meda penyayau mensia enggau anak ia.Ngujung ia matak sitik besi geraji alu nyua again Jeniah alu ngasuh Jeniah nelan besi geraji tiga iti nya tadi.Pun ia ka enggai tudah Jeniah tang udah dipadah Kumang Bunsu Nandang enya besi ti ulih meri Jeniah tu kering sereta enda nemu parai ngapa alu ulih ngasuh Jeniah tu beridup biak belama enyau berjuta taun ila.Tang Jeniah enggai laban ia ka agi parai baka mensia pia aja.Tang pengudah Jeniah bepikir baru diak Jeniah alu nelan besi geraji nya tadi.Sepik Jeniah tak berangat isik ia alu udah nya ia alu luput.Enyau lemai amai ari baru Jeniah ngeleda ari luput diak Jeniah meda Kumang Bunsu Nandang agi meruan mangku pala ia.Pengudah dani diak Jeniah gauk dulu enggau Kumang Bunsu Nandang.Diak seretai nya alu meda emperaja ba langit diak Jinggang Bunsu Gerasi Nandang alu ngangau ke Kumang Bunsu Nandang ngemai pulai laban tangga langit udah di ulur ke bumi.Sebedau seduai berangkat niki ke langit diak Kumang Bunsu Nandang mekat Jeniah,semua mensia peturun dayak enda nunjuk tangga emperaja laban Emperaja Langit enggai dituduh kitai mensia nyerara pengerindu seduai ia.Alu pia mega Jinggang Bunsu Gerasi Nandang mekat Jeniah,penemu ia tadi ti diberi ia agai Jeniah nya enda tau sesekali dipadah agai mensia laban besi geraji nya tadi ka pulai agai langit baru enti Jeniah mantai besi geraji nya ba depan mua orang banyak alu Jeniah ka parai nitih umur mensia biasa.Pengudah Kumang Bunsu Nandang enggau apai is Jinggang Bunsu Gerasi Nandang pulai ke langit diak Jeniah pen mupuk pulai ke Batang Mandai kin.Tang serak tu Jeniah enda bejalai kaki agi alu engkecit ari tucung bukit ke tucung bukit nyentuk terengkah pemendai sida ia ba Batang Mandai.Bersambung enti bisi ku nampung baru au.

Jerita Jeniah Bercabang Lidah part 31.

Memunyi tuie madah ari ka dini ari,empekak manuk baruh sangkar nyau richak,melandai burung ruai naka pemandai madah ke ari pagi ka datai,bekericau burung semalau madah ari ka gagau ngau penerang ari bekebitau.Nyadi tumu pagi sitek diak Jeniah nurun kediri napat palan alai betemu ngau indu dara kemari,alu atai ba atai Sungai Salin diak Jeniah alu ngenuduk kediri nganti penatai indu dara ti bajik ngeraya ngeruntuh ke pemajik sida dara ba menua sida ia.Jeniah empai ka ngabas bubu ia agi ngenangi utai dulih bubu negi nyau but ti dah mati ti bubu dangkat tumu.Jejenguk tudah Jeniah duduk kediri enyau bisi ka nyengala mata panas diak Jeniah alu ensium bau rengut baka bungai ngerembai diak Jeniah terdinga cebor kaki orang atai ari ulu Malik Jeniah kulu diak ia meda indu dara bejalai lundai gegendai ngemai uyut bilak wie tuai.Tak tuchum Jeniah tadi meda indu dara ti datai  nya endang sigi danti ia,alu indu dara nya pen tuchum pengudah meda Jeniah bujang sigat sigi ngamat ke danji nganti ia ba diak sarinya.Diak Sindun Kumang Bunsu Nandang alu ngenuduk kediri ngimbai Jeniah,alu berandau meh saduai ia,udah berandau seduai pen begagai bertundi ba diak ngujung Jeniah ngaga sitik langkau ba Sungai Salin kena saduai mado pengerindu.Nyau ka nurun mata ari ari tuntung dada disk Jeniah madah diri pulai laban ngenangi ke ari malam alu ngabas bubu is dulu alu ngetan bubu nya baru.Udah saduai gauk ba langkau disk Jeniah alu mupuk pulai kediri agai menua  Batang Mandai,alu bersemaia pagila saduai ia bertemu baru.

Nyau berbulan bulan saduai ia bakanya belama ngujung saduai beleman ngujung Sindun Kumang Bunsu Nandang enyau betubuh bisi,diak gaga meh ati Jeniah tadi laban bisi ke tanda penyayau saduai ia begulai alu Jeniah ngemai Sindun jadi tang Sindun enda memunyi. Meda bakanya diak Jeniah enyau tusah ati,maia saduai is betemu baru suah ga Jeniah ngemai Sindun jadi tang Sindun enggai memunyi ngujung pagi sitik diak benung saduai nanggam pengerindu dial saduai terkenyit ninga kayu ba kampung puang baka dipatah baka dibabut alu Jeniah ngasai tanah berenyang.Malik Jeniah me tisi bukit seberai saduai tadi peda Jeniah tetalang batu enggau pun kayu nuju langkau saduai tadi,alu dipegai Jeniah jari Sindun alu engkecit ari langkau tadi,talk benasit saduai ia ulih ngelari kediri ari langkau tadi ti enda tadi sigi mati sigi lesi saduai laban ukai sekali dua batu enggau pun kayu ditempalong agai saduai ia endang suah terengkah ba langkau nya.Dinga Jeniah nyawa mensia besai bejako madah anak mensia enda nemu malu.Semua burung ketepar lari ninga raoh orang besai nya tadi.Sapa bagi ke datainya kaban?Sabar nganti,pagila Ku nusi baru jerita tu.

Jerita Jeniah Bercabang Lidah part 30.

Datai ba Sungai Salin diak Jeniah ngaga langkau pengipa ba atas kayu enda jauh ari takat bubu detan ia tadi.Tembu ngaga langkau diak Jeniah nurun alu ngiga utai kelauk dulu lemai nya.Nasib ga panjok detan ia ba emperan bukit baru bulih pelanduk alu dah dibunuh ia pelanduk alu dintu alu dilulun ia,seretai asi mansau diak Jeniah makai.Udah makai ia alu madam ke api tadi alu dilangum tauka dilamun enggau tanah ngica nadai bekau ia berapi ba diak ngica enda ulih temu munsuh ti terpejuh kia.Diak Jeniah ngali kediri ba atas langkau ba pucuk kayu seraya nganti ari pagila.Lebuh matapanas nurun tindok ke padung ia empu diak Jeniah semampai bejaga enggai tindok jenak enda alah orang ke nyatik utai ia enda didinga datai enda ditemu ari ni pejalai.Malik kiba kanan kebelakang keluan tudah Jeniah ba dalam pemetang malam dipancar bulan bertengan nadai ga utai ddinga penatai ngasuh ati rawan.
Mina ribut majak berpuput,bubut kederut memunyi rerebut,munyi sumpi pinang baka ke bekenang inggap sebelah batang,tudah Jeniah nyandih ba pun kayu alu enda kekebut seraya nganti ni utai bangat ka ngenakut sigi ia bukut enggau ati pedis ngau ati ringat.Nyau kira tumu pagi diak cecuwit kesulit memunyi madah ari pagi,diak burung ruai baka melandai nanda matapanas ka nemuai datai nimpai menua Batang Mandai,memunyi sida tetuwie nanda ka muka pintu langit ngalih ke mua ari nyau kira dinihari ka pagi diak Jeniah terdinga ai cebur cebur ari ulu baka orang benung bejalai ba ai sungai.Malik Jeniah kulu diak ia terpeda ke indu dara naka pemajik ngemai sintung bejalai kaki bejalai nuju takat bubu detan tudah Jeniah.Diak Jeniah enggai mantai diri dulu laban ka meda ulah indu dara bajik nya tadi ngau bubu ia.Datai indu dara bajik ba takat bubu ia diak indu dara nya alu muka tali bubu alu ngabas bubu Jeniah.Udah ngambi ikan dalam bubu detan Jeniah tadi diak indu alu nyimpan ikan,terkuyung enggau lelabi ulih bubu tadi ba sintong dibai ia dahnya ditukar indu dara bajik nya enggau tulang ikan,kerubung lelabi enggau kerubung tekuyung ari uyut dema indu nya tadi.Dah nya indu dara nya alu ngerumpang takat bubu nya tadi.Seretai indu dara bajik nya udah ngerumpang takat nya diak Jeniah alu engkecit ari atas kayu dinga alu meregum tubuh Jeniah terengkah ba ai sungai.Diak indu dara bajik nya tadi nyau gegetar tubuh ia meda orang bangat kering merejuk baka nya.Diak indu dara nya nyau lemik patung ka lari meda penyigat orang bujang baka labuh ari langit nyengala ba mua tudah ia.Diak Jeniah pen baka nya meh meda indu dara nya naka pemajik ngilah pemajik bala indu dara bansa dayak ba menua sida din.

Diak Jeniah alu nanya sapa penama indu dara nya,indu dara nya nyau malu malu madah nama diri ti bernama Kumang Bunsu Nandang.Alu indu dara nya pen nanya penama Jeniah mega alu Jeniah madah kediri penama ia ga.
Pengudah berkelala diak Jeniah nanya ari ni penatai,nama kabuah indu dara nya ngerumpang takat bubu sereta nama ga indu dara nya ngabas bubu ia ko Jeniah nanya Indu dara bajik nya tadi.Diak indu dara bajik madah kabuah ia kenya laban Jeniah ngetan bubu ba menua sida ia sereta takat bubu Jeniah nya nyadi tuga tajam ti ulih nebak bala nembiak ke bemain ba ai sungai.
Diak tudah Jeniah nyau rerangap laban ketemu Jeniah ba menua Sungai Salin Ulu Batang Mandai sigi nadai mensia sigi kampung jerung kampung puang.Meda tudah Jeniah rerangap diak indu dara nya majak nambah jako ia,Jeniah ka kena ukum laban ngambi keresa senentang ba menua sida ia ko indu daranya ti meri Jeniah nyau alit ati agi.Tudah Jeniah alit ati ketegal ngelamato menua nya sigi kampung puang ko ia bejako kediri ba ati ia din.Nyadi laban nemu diri salah diak Jeniah nyanggup aja mayar ukum ti sida ia ngukum ko Jeniah madah agai indu dara nya.Nyadi indu dara madah ukum Jeniah nya ulih dipelalai ko ia enti Jeniah sanggup nyadi sulu ati indu dara bajik nya.Genap ari Jeniah mesti bertemu ngau ia enti enda ia nusi jerita Jeniah tu encuri keresa menua sida ia agai semua orang ila ko indu dara nya mejal Jeniah.Nama agi deh laban Jeniah tu bisi ngembuan ati ka ke indu dara bajik nya dambi ke bini tak senurut aja Jeniah utai dipadah indu dara nya.Udah saduai bersemaia alu nanggam janji diak indu dara nya tadi nyua ke ia sintong utai dulih bubu detan Jeniah agai Jeniah.Pengudah gauk enda lama saduai ia alu beserara ba diak alu bedanji saduai pagila ka betemu ba batu karangan ba diak baru.Nyadi mupuk Jeniah pulai kili alu indu dara bajik nya alu pulai kulu baru.Pagila ku nampung baru au madik kaban uwai bajik selalu.Mupuk aku.

Jerita Jeniah Bercabang Lidah part 29.

Bisi bertaun udahnya Jeniah nyau nyadi bujang amai.Gamal ia sigat, tubuh ia bisi ngemesai papan pintu kitai kediato,pengering ia enda ibuh tunda sigi amai kering tulang kering isek,nadai enda indu dara tepawah runding tepejuh ati ka dambi ia bini. Tudah Jeniah cukup beberita agi kelia nyentuk enti ninga penama is sigi gegetar ati munsuh ninga penama ia.Jeniah enda baka katuai dayak agi kelia ti ngembuan pengerengkar ba tubuh.Jeniah dikenakut ari pemanah basa sereta enti di indik sigi cukup rengkar alu sigi dipunas ia sitik menua nya enti bisi ngacau peturun bansa dayak. Pemanah enggau penyayau Jeniah ba bansa dayak enyau meri bala dayak kabukai rindu ke ia.Nyadi enyau maioh semaioh bala dayak kabukai ti empai serakup enggau sida ia enyau majak pindah agai Batang Mandai laban rindu agi bertampung sama menua enggau Jeniah laban mina Jeniah diperbasa sida munsuh dayak kabukai.

Nyadi tumu pagi sitik disk Jeniah kediri ngabas bubu ba sungai Salin ba Ulu Batang Mandai din.Ia ngemai ukoi inang ia empu lebuh ngabas bubu detan ia din.Penyampau pejalai kin bisi menakah bejam enti dikira ari kemayang kayu dipancar mata panas.Nyadi Jeniah ngemai bekal asi sereta dibungkus ba daun biro.Nurun Jeniah ari rumah diak Jeniah bejalai nengah kampung puang kediri aha sereta bala ukoi ia sigi dulu beari ari.Datai ba takat bubu ia diak Jeniah meda takat bubu ia terumpang bubu tadi dengkah ba batu kerangan.Alu kerebak ke Jeniah ga penutup bubu tadi peda bubu tak nadai utai ke ulih.Puang aja,alu bisi tulang lelabi,tulang ikan enggau kerubung tekuyung aja ke bedau.Meda kenya detan ke Jeniah baru ga bubu ia tadi pengudah takat bubu digaga baru.Udah tembu ngetan bubu diak Jeniah alu ngabas bubu ia kabukai tang sabaka nya magang.Ngujung Jeniah ringat alu nempalong ke batu kira bisi lapan pemerap agai lubuk menakah tujuh rantau tujuh lubuk.Diak Jeniah berniat ka ngipa orang ke ngayah ia bakanya,nyau bebelas itek bubu detan ia ambis dangkat orang.Pemedis ati Jeniah enyau majak agi pengudah panjok detan ia bulih jani tang iko jani ke tinggal ba panjok nya tadi. Meda baka nya diak alu mukut pun tapang damping panjok ia tadi peda kerebai daun tapang labuh.Berguyap ja pun tapang,enda ga ati Jeniah tu terpantup laban pegeringat,alu dicabut ia pun tapang nya tadi alu tempalong ia agai bukit peda pun tapang bedegi kediri ba tuchung bukit.Agi taun 1900 agi bedau tapang tu idup ba Bukit Tilong kediato ko aki Kuling nusui agai kami suba,amai ke enda kitai sama enda nemu meh.Nya alai lebuh pemindah orang kelia ka amai mansa tapang tu suba laban enti ati bisi beniat utai nya nyadi amai jemah ila.Pun tapang tu tumbang keno ke jerita ketegal udah tuai amai sereta suah alai orang nampuk ngiga penemu.

Pulai agai jerita Jeniah tadi diak Jeniah alu pulai ari Ulu Batang Mandai.Datai dirumah ia alu engkira ka bemalam ba Sungai Salin ulu Batang Mandai.Alu engkira ia tadi,sida sarumah enda memunyi aja meda gamal Jeniah bangat rerugum.Tembu engkira ke lemai nya diak Jeniah nurun kediri aja enda ngemai ukoi ia.Pagila nampung baru jerita tu uwai madik.Serakup kitai mesti dikemeran ngica bansa bukai ngerik ke penyerakup kitai dayak.