Begulai enggau Aki Berubat agai Batang Skrang part 2.

Pansut aki keruai diak aku merati mua aki pucat kelat meda aku,alu ia bejako begadai ngasuh aku mansang agai ia.Alu pia mega ia ngepai aya tuai rumah ngasuh mansang tang dasuh ia belubah lubah sereta ngasuh nunjuk sida tadi ti nyandar ba dinding ketanju tadi berinsur mansang agai ia ba dinding kebilik.Aku ka enggai nitih asuh aki nya tadi tang dipelut ke aki mata,aku alu angkat alu belubah lubah tang ati aku baka ke ngasuh ke aku malik ke belakang tang dituku aki ngena leka pinang aku nyadi malik ke belakang.Seretai aku terengkah ngilah tiang tengah diak jejampat narit jari aku alu malik ke belakang.Akaiiiii...tak melut leka mata tudah aku meda ba endur aku tadi tak teritik darah,malik aku ke atap,peda atap nya senentang penuduk tuai rumah tadi bisi teteling alai darah neritik ari atap.Aku alu malik agai aya tuai rumah tadi diak aku meda mua ia pucat kelat sereta gegetik tubuh ia laban ke takut.Diak kami ninga utai baka ke meram ba atas atap dahnya laban ke menya agi bedau beratap ke tebelian pansap diak kami ninga beregup aja atas atap dahnya dinga orang nyabak ga.Enda lama dahnya dinga ga orang baka nyabak ba tisi setak bayar din,pelaba aku maioh kami ba diak enda berani kemik,maia bisi aya siku peda aku endang berani,ia bejalai kin kia aja nangkin ila,kingat aku penama aya nya apai Sulai ko sida besebut ba diak.Ia dipeda aku endang berani amai,tudah aki ngasuh ia damping aki kia alu aki berandau ngau baka betusi alu aki nempap tengan bahu tiga kali sapiak sapiak alu ketujuh tadi ba pungung ia.Dahnya aku meda aya nya alu bediri alu ia mega muka pintu ke tanju alu ngambi api perin alu dengkah ia ba unggun api ba tanju.Alu aya nya peda aku jejampat tama ke keruai alu nutup pintu,seretai dahnya diak antu koklir alu ngekok.Aki peda aku alu ngambi antu pala ba serangan antu pala ba tiang,alu muka muka pucau peda kami sabuat tak terebai antu pala musin ba ruai,alu aki muka lubang empelua(jendela papan) sereta antu pala nya terebai.Aki alu ngambi piring alu nyayat manok,darah manok alu dengkah ia ba mangkuk besai,sereta nya aki ngambi cabie dah ditutuk,alu ngambi ai tuak alu ditanjah ba mangkuk darah nya tadi.Alu digirau aki dahnya.Diak kami sabuat ninga utai baka ke cemerik aja atas atap.Aki alu nempap geregar tebelian,diak kami ninga utai bangat ngenyelai nyadi.Antu koklir enyau merung baka ke pedis dijamah antu pala tadi.Aki alu muka penemu ilmu putih ia,orang sekayu rumah panjai nadai meda penemu nya tang bisi ngenam iku ba diak bisi meda laban ia bisi ngembuan mata lansik.Sida tu pelaba aku udah nyadi manang kediato laban maia nya sida ia biak tang mata sida ia ulih meda utai nyelai baka penemu aki nya.Udah aki muka penemu ilmu putih ia diak aki alu muka pintu alu ia bejako agai kami,kitak anang meda anang nyeling ari tisi dinding ko aki.Enti kitak nyeling besut leka mata kitak kena rindas penemu aku negi ko aki.Diak sida kabukai nadai berani ngampir ke dinding ketanju.Sama duduk jenuh nganti penatai aki.

Bisi meniga jam kami duduk,enya meh ninga utai ni ke nyawa mensia ketawa engkakah meh ni ke nyabak meh,ni ke reraoh meh,ni munyi bedegum belah atap nya sigi suah didinga.Anak mit maia bisi ke nyabak dipampul ba mulut aja laban ngenangi ke ngumbai antu koklir nya ngiga sabak anak mit tadi.Maioh pelaba ku keduak ia takut kemik kediri gai jubilik laban ke takut.Jani meruik aja nebah pengingar nyawa takut,uduk majak nekus majak ensuruk belah belakang kami ke duduk.Aku kin kia merening ba ruai,diak kami ninga nyawa orang ngangau ngasuh kami nambah ke lampu maioh ba ruai enggau bilik.Nama agi deh alu beguai sida ke lelaki tadi nungkun nambah api lampu ba genap ruai enggau bilik.Udahnya duduk serekun berimbai enggau pangan diri baru.Sida ke indu enyau bisi meh ba ruai laban ba bilik tadi sida enyau takut ninga utai memunyi meram panjai sereta ketawa ti nyarihmDiak enda lama dahnya kami ninga ga bala orang baka ke memunyi berekak ga ba atas atap.Pemuas ninga utai kesetak memunyi diak kami sabuat ninga utai enyau sunyi sereta kami terkenyit meda pintu tuai rumah ba ruai tebuka diak kami meda,aki mejul kediri enyau bepeluh nerusan alu kami meda antu pala ke adu ia tadi terebai pulai agai serangan ia empu ba tiang tengah tadi.Udahnya aki tadi alu madah agai sida sarumah ia menang ngalah ke antu koklir nya tadi alu dah aki tama keruai diak ia minta ai amai dirup ia.Alu nusi jerita semoa indah malam nya diak ari sitek tumu aki dani diak ia magar menua nya tadi.Ketengahari kami duai aki pulai ke Kuching baru.Alu bisi takah setaun udahnya,kami duai aki bisi bepansa enggau Apai Sulai ba Kuching maianya diak kami sabuat bebai berandau ba kedai kopi ba waterfront diak Apai Sulai tu nusi,sida ia udah pindah ari menua nya laban pengudah 6 bulan aki berubat kia,diak laki indu ke nyadi koklir nya mati alu setat ari nya menua nya angat amai alu sida suah ngiga aki ka ngintu rumah panjai sida ia baru tang enda ga tetemu ke aki ko ia madah.Bisi manang dambi sida suba ngintu rumah panjai sida ia suba tang manang madah nyamai agi kitak mambut ari menua tu laban menua tu udah regau ko ia nusi.Diak sida tu mambut alu bepecah belah nitih penyamai diri ka dini alai endur diau.Apai Sulai agi mengkang ba Batang Skrang nampong rumah panjai bala ia ba din.

Ambis jerita tu.

Begulai enggau Aki berubat agai Batang Skrang.

Nyadi lemai nya kami duai aki dambi orang berubat ke Batang Skrang,enyau enda ingat aku penama menua ko aya Minggat..Agi rapas endar ku senentang menua nya suba.Nyadi maia kami duai dambi bala bakih madi aki ke Kuching maia laban ke aku cuti sekula dibai aki mega.Tucum meh ati aku deh,gaga nepan perau ngena motor sangkut enjin EVINRUDE kuasa kuda 9.Datai ba rumah panjai diak kami meda tak sunyi menua nya.Niki aku katas alu ka jejegak bemain batu,sepik enda berasai aku ditarit aki ba jari.Alu danuk ia..Ceyyyy ucu,enda nemu utai.uji diau diri neh,nma mua ka jangkam ngena bungai jerepang pia?"ko aki.Aku alu badu engkebut ati diri aja.Diak aku meda aki ngambi tanah alu ngunsut kening aku ngena tanah pengudah disepu ia.Aku sigi nemu utai nya kena muai mera tauka pedera agai menua orang.Niki kami ngenam iku katas ke rumah panjai diak aku meda uduk tak enggai bejalai,manok baka betugung aja tisi tiang baruh rumah alu pia mega babi.Lama aku merati utai nyelai bakanya.Tak baru ia meda utai tupi tak serekun amai nadai bejegau sipa sipa kin kia.Aku tu terubah ia meda utai bakanya pengudah suah enggau aki berubat ke Kapit,Sibu,enggau menua bukai ba menua Sarawak tu.Aku dulu ngelangkah kaki kiri ngica enda pedera duji orang ba penemu meh.Kami datai ba rumah panjai nya bisi pukul 2 lemai laban aku bisi jam lengan diberi Uncle Stelone laban ia rindu ke aku pass ujian suba.Tama ke ruai diak aku meda bala sekayu rumah panjai tak serekun amai,nadai siku didinga tacoh tauka ingar.Aku empai nemu tuju nama utai diperubat aki kitu maia nya laban aku baru pulai sekul alu dibai aki kitu kemari.Kami duai aki dalu duduk ba ruai tuai rumah mega maianya alu berandau pen baka ke betusi.Diak aku berasai nyelai agi ati nama kabuah randau bakanya ko ati aku din.Pemanjai rumah panjai sida tu bisi ngenam puluh pintu ari itung aku meh maianya.Endang panjai amai.Sereta aku meda jarang bisi mensia ba ruai.Ari lekaa randau sida tadi diak aku nemu.Utai baka tu nyadi ketegal sida semenua nya dikacau antu koklir pengudah siku indu tadi mati ngandung mekang amai.Aku alu gelesi sereta enda berasai bulu peguk niki katas.Kekimut asai burit ninga penyelai utai ditusi bala aya tuai rumah nya.Benung ka berandau baru diak bala aya tuai rumah nya ngemai makai dulu laban ngenangi ari petang alu kaduak ia ngadu ke piring kena aki belian negi.Alu semua utai dipinta aki kena berubat udah sida magang.Aki alu madah manah kitai makai dulu alu aku ka ngadu utai dulu negi ko niang aki.Sereta tembu makai diak aki beguai magar rumah panjai ngena penemu ia sereta genap sukut tisi setak dengkah aki duri limau enggau maioh agi utai.Udah nyedia magar rumah diak aki alu duduk diruai.Enyau ka pukul 5.15 lemat dinga utai chapuh aja atai ari pemendai alu didinga utai memunyi ngeKOKKKK KOKKK KOKKK LIRRRRRRRR...Sepik asai aku,bulu peguk aku berasai niki,pala asai ke berat,alu jampat aku muka sampi diajar aki kena ngering ke semengat diak aku maca pucau nya dahnya nempap pegu aku bisi meniga kali alu murus pala aku,sepik aku berasai lantang mimit ati tang maianya genap pintu ruai ditutup magang mina pintu aya tuai rumah dasuh aki dibuka.Ari jeling tisi dinding diak aku meda utai nya.Enti enda kering semengat sigi tekemik ba tancut.Aki alu merening agai aku alu melut ke mata baka signal enda ngasuh aku nyeling keluar.Aku jejampat duduk nyandar alu enda memunyi ngimbai aya tuai rumah enggau sida kelaki bukai.Aku meda aki majak ngilum sirih pinang.

Dinga udok enyau memunyi ngeceh alu duduk ngimbai aku alu ku meda iku ukoi nya bekilung alu nukung jenuh ngimbai aku.Aku pen berupai bebali mua,ukoi ngemesai nya sereta ngemaioh ukoi ba rumah panjai nadai siku dipeda bebitau ba tanju,semua sida ia tama keruai sereta ningkap enda memunyi sereta iku ia berupai dipeda bekilung laban enti iku ukoi bekilung sigi petanda ukoi nya takut.Ukoi sigi takut meda antu koklir laban ia takut antu nya ngambi igi ugai ia mega sereta ukoi indu ulih dempa sida ia.Diak aku ninga babi baruh rumah ngembus baka ketakut.Manok ceciap baka ke takut mega.Aku ninga bisi anak mit nyabak diak aki alu nutup pintu ruai tuai rumah alu nanya sapa ngempu anak mit nya diak sida madah anak mit nya anak indu sapiak tuai rumah alu jampat aki tama kebilik.Bisi enda dahnya dinga aku anak mit enda nyabak agi sereta utai sunyi baru mina berasai bulu pegu nyeringgi niki belama.Dahnya dinga ga antu indu koklir nya ketawa lelekai.Aku majak agi rapat serapat enggau aya tuai rumah nya.Sida kabukai pen peda aku kenya meh,pucat kelat mua kedua ia.Tang bisi apai tuai siku kediri aja duduk alu ku meda mua seruran labuh ai mata.Alu aku nawis aya tuai rumah nya alu nanya kabuah ia nyabak diak tuai rumah nya madah,nya bini ia meh ke ngacau kitai nya dom ko ia alu anak ke ada bini ia nya  dah ditaban ke orang ke menua bukai maia bini ia nya nadai sarinya.Laban sida nemu bini ia nya idup baru nyadi antu koklir enti maia parai beranak alu ka ngambi anak ia nya kaling ia ba sebayan ko ia nusi agai aku.Enyau dahnya peda aku aki pansut ari bilik sapiak sida aya tuai rumah nya alu ia madah ia udah magar anak mit ke baru bebulan dah ada ke dunya nya mega.

Leka Sampi Kitai Iban.

Ohaaaa ohaaaaa ohaaaa ohaaaaaa ohaaaa ohaaaa ohaaaa ohaaaaaaa...
Enda aku layu miau ka selanjau manok kelabu Enda aku tumbang miau ka ijau selanjau manok labang. Enda aku tumbang ngangkat ka orang lama midang Tinggang batang tebelian wi. Enda aku punggu ngangkat ka orang lama layu Tinggang tabu sangkutong tali. Enda aku sulai ngangkat ka orang lama nadai Tinggang rau rangkai keranjai indai imbok kedidi. Enda aku tumpat ngangkat ka orang lama lenyap Tinggang urat dandi lelaki. Laban kaki aku tu bediri di segi gam batu. Lengan kanan aku megai enteran sangkoh lunju Pala aku udah ditata enggau lala minyak gayu. Nyawa enggi aku nguyu leka pelaga ayu. Nya alai aku ga ukai muntang, Ukai nengkebang. Aku ga bisi utai ditunda, utai diselada. Aku ga baka wi nampong tali. Baka rutan nampong danan. Baka tenggang manpong tulang. Baka lemba nampong ira. Aku ga nunda pengawa tuai kitai kalia. Nampong jako tuai dulu. Nampong jalai orang kai tuai kitai. Laban sida aki, sida ini endang bakatu ga sida, Leboh sida bisi utai deka diambi, deka dikemisi, Bisi utai ajih, bisi utai diulih. Bisi utai deka disimpan, utai dikembuan. Nya alai baka aku udah meda kitai dayak Lama udah betampil, udah betangkir. Lama udah begulai, udah bedejai. Lama udah besulu, udah besatu. Lama udah bekunsi, udah jadi Tang dih kami dayak tu agi baroh baka piuh bingkai sintong. Agi kurang ari pengedang dachin nyelutong. Bedau nadai kantok nadai sumbok. Nadai anak dayak ulih nyadi dikarap ketegal mabo runding ngasuh ati gidan ngerenyam baka ke buyan,kami dayak tu agi ngembuan ati enda lantang Nya alai ke tu aku ngangau kai samoa kita Petara Aki, Petara Ini, Petara orang kai udah midang udah tumbang Petara orang kai udah sulai, udah parai. Minta kita merening, kita ngiching. Minta kita meda, kita nengkila. Minta kita nemu, kita ngintu. Nya alai diatu aku deka ngangau Ka kita Petara Ini Inda. Ngangau ka nuan Simpandai. Tau ngempok tanah perai, Ngaga kitai nyadi mensia. Aku ngangau ka nuan Sempeta tuai lama, Landik nempa darah mata ngaga idong antara mata, Ngaga dilah antara nyawa. Aku ngangau ka nuan Sempetoh Tau ngamboh ngaga tuboh sedia nyadi mensia. Nya mih kabuah aku tu ngangau, aku tu nesau. Aku tu ga minta kita meri kantok, meri sumbok. Meri telesak, meri pandang tuai dayak ke amaiAwak ka bisi nampong bisi nerujong Awak ka bisi nganti bisi nali. Nya alai dinga kai kangau, dinga kai tempalau. Dinga kai sada, dinga kai nyawa. Dinga kai padah dinga kai tungah. Nya alai ba pengabis kangau ujong tempalau, Aku meri tangkal jako siti. Bakatu munyi iya :- Enti kita Petara bisi kasih bisi ajih, Bisi tulong bisi sukong. Aku bulih mimpi bulih getah, Bulih pemandai anak dayak bulih telesak pagila lusa kedudi hari Aku enda tau enda makai selamat enti kami dayak angkat serakup kerapat amat ba baruh dunya ari.Ohhhhhaaaa....Sampi ke malam tu.Sinu meda gambar sida aki ba baruh nya.Andal meh ati bersampi tang enya meh bansa diri tusah ka di serakup.

By Baron.

Jerita Jeniah Berpangak Dilah part 45.

Pulai agai Jeniah ba dalam istana ti benung belaban enggau Raja Bugal.Udah saduai betitir titir alu engkechit Raja Bugal alu mungga ke pedang ia agai Jeniah.Alu diseliah ke Jeniah sereta ngentak ke rusuk Raja Bugal alu dipeda Raja Bugal baka ke sendat seput laban kena abie pemenat Raja Bugal.Diak Jeniah tetucum laban nemu pengering Raja Bugal bisi pengelemik ba rusuk ketapi belakang Raja Bugal empu.Ba penemu orang katuai menya,genap penemu diperajar ia bisi pengelemik mega.Tang kitai dayak ka tusah digiga pengelemik enti udah tinggi nuntut penemu.Nya meh Jeniah tetucum meda laban Jeniah nemu pengelemik Raja Bugal alu saduai ia betacah berekak kasak amai.Sama enggai alah sama enggai telih sama sikal,berdentum perenching bilik istana laban saduai bepantap,bepalu ngena utai maioh macham sereta enda nemu lemik tulang.Malik sida kabukai tadi alu meda utai perencing aja ba atas istana,nemu meh sida ia alu bisi kaduak ia enyau rerangap meda mensia ba baruh ari kering ari mensia bukai.Kaduak ia enyau duduk manah enyau duduk entap baka ke meda utai ba pentas.Semua rakyat ba diak pen bakanya meda utai bakanya diak sida duduk,menua enyau sunyi laban baka sama ngemata tacah dua iku mensia ti kering sereta sikal sereta ngembuan utai ti sakti.Kaduak ia enda engkebut meda utai bangat nyelai nya laban tu terubah sida ia meda mensia ti betacah bebunuh bakanya ba baruh dunya ari.Guntur pen bakanya meh,antu gerasi langit,sida ari panggau,gelong,enggau kabukai sama meda dua iku mensia ti sakti berekak bebunuh nadai nemu alah.Enyau malam ari,saduai bedau meh berekak bebunuh enyau perenching baka kilat nyambar tanah aja alai ilang enggau pedang besatup.Semua ke meda enyau majak agi terangap agi meda utai bakanya.Pama jamah anak mensia tu ko bala antu gerasi langit enti kktai ngelaban dua iku tu tau alah tau nganjung paong empa jani ja meh laban mensia dua iku tu ko sida ia berandau ati diri.Diak Guntur berumban nuju Keling alu madah ngasuh ia ngerubat nyuman ke Dayu enggau anak Dayu tadi ngica ulih idup baru ke dunya.Alu beseru meh Keling ngasuh Kumang datai ngemai inik manang enggau Lulong.Seretai sida tiga datai tadi diak Inik Manang alu mungkus tubuh Dayu ngena pua kumbu alu mega anak Dayu mega.Seretai nya diak tubuh saduai alu ditangkup ngena tikai bemban alu disimpan ba tanah pasir.Bala kaduak enda merati ulah nya laban majak merati Jeniah enggau Raja Bugal ti berekak.Seretai enya inek Manang alu nyeru alu bersampi nyeru semengat saduai ia pulai alu pala saduai ia dijantil inek Manang ngena tanah seretai tembu besampi nyeru semengat pulai diak pala enggau tubuh saduai alu bejantil enggau pala.Alu dambi apai Abang sirih ia alu dikunyah sereta disembur ia ba tubub Dayu enggau anak ia Dali diak alu engkebut tubuh mensia dua iku nya tadi.
Seretai engkebut diak alu angkat alu nanya nama kabuah ngerak saduai ari mimpi mega.Udah bala ia nerang ti saduai udah mati dibunuh bala pengayau Dayak baru saduai ia nemu nya ukai mimpi tang nuju ke sebayan maioh mua ari.Udah nya saduai alu terkenyit meda utai enyau perenching aja ba istana datas din.Diak Dayu nanya sapa bangat merani enya belaban enggau Bugal ko ia.Disaut sida ia enya katuai kayau ti benama Jeniah.Diak Dayu ngenong alu madah ia kala bermimpi Raja Bugal ka mati ba jari Jeniah ila,sereta ngasuh Jeniah tau ngadang ila laban Raja Malin ka malas pemati anak ia Raja Bugal jemah ila.Tang ko Guntur sida ia sigi ka ngemunas peturun Raja Malin enggau bini ia Melati.Nyadi peturun Dayu nya tau agi nyadi Raja ba menua tu ko ia laban sida enya manah ati enggau orang entabanyak.Maia tu Raja Malin benung bejalai ke menua bukai laban ngelantang ati ba menua jajah taluk ia mega.Nyadi sida Guntur sigi ka nganti penatai Raja Malin laban ka munuh Raja Malin enggau Melati mega.Diak udah sida berandau betusut baru Dayu nemu peturun dayak ti kala tulung ia nya endang bebasa amai ke ia ngujung ia ka nyabak meda pemanah bansa dayak ti ditulung ia suba ngujung ia benci agai bansa diri ti enda kala berasai tulung ia nya berega tang nasit orang ke jai ati baka nya udah mati magang dipunas ke bala pengayau dayak mega.Diak sida sama berati meda Jeniah enggau Raja Bugal ti bertempuh ari jauh aja.Diak enyau bisi seminggu Jeniah enggau Raja Bugal bertempuh tadi.Nyadi ila ku nyambung baru au wai madik.

Jerita Jeniah Bepangak Dilah part 44.

Pengudahnya diak sama ngetu magang diak,alu maioh bala munsuh nunduk taluk agai bansa pengayau dayak.Diak alu bala laskar maioh ngelengka ke terabai laban bebasa ke pemati indai tuai benama Dayu nya tadi.Alu sida ngampun nyerah alah agai bansa dayak laban sida nemu sida alah bulu alu maioh bala laskar Raja Bugal nyerah ngampun diri.Meda bakanya diak Guntur ngasuh sida laskar ke ngampun nya duduk ba tisi kuta Istana Raja Bugal enti sida enggai dipumpung bansa dayak.Malik tudah Guntur naka pemaioh meh bala laskar ke ngampun,ia ke enda dapat angkat enyau ngerayap nuju tisi kuta takut dipumpung pengayau dayak,ia ke putus kaki putus jari enyau tekelansat angkat alu ngelawa tisi kuta ngenangi diri dibunuh pengayau dayak ti ngampun ke sida ia.Malik Guntur ke tisi alu besatup mua enggau panglima Badin sereta panglima Badin ngemai ia bebunuh betempuh nguji pengering diri,alu nyaut au tudah Guntur peda pedang bisi meniga terebai nuju ia alu dipeda anak panah bisi bebelas iti terebai nuju Guntur,pama pengelancat Panglima  Badin nikau tauka nimbak senjata bakanya.Tang Guntur ngambi terabai besi laskar munsuh alu dentak ia ketanah alu ia belindung ba diak,seretai panah enggau pedang nya ngelebus ngilah terabai besi nya diak Guntur alu nempalong ilang nuju Panglima Badin alu dititih Guntur ga ilang ia tadi,seretai ilang ka datai ba tubuh panglima Badin,ilang nya ulih dijapai Guntur alu dipantap ia tudah Panglima Badin nya tadi peda tak begetar pedang ngelaban ilang nya tadi.Bala laskar Raja Bugal enyau nyerinding bulu peguk meda penyikal Guntur sereta pemerani Guntur,diak sida ia bejako.Nasit sida ia nyerah alah dulu enti enda pia udah meh nyawa lesi ko sida ia ba diak berandau.Enyau pulai agai jerita Guntur tadi,peda tak terenyak patung tudah Panglima Badin laban dentak pantap ilang Guntur.Sereta alu ditumpu ia tudah Guntur ba rusuk tang Guntur ulih nyilat tumpu kaki Panglima Badin nya tadi,seretai nya alu betempuh naka pemintar tang apin lama betempuh sama lemik tulang diak Panglima Badin tu enyau begulung kaping laban Guntur,seretai ia tetingkap kena bukut Guntur diak tudah Panglima Badin alu ka angkat tang sebedau ia niri kepala diak tudah Guntur ti ari jauh ari ia alu nyintak ilang sitek dak alu ditacar ia ilang nya maras lutut nuju panglima Badin ti benung angkat,sekali meda tak rumpung betis sapiak Panglima Badin alu berlanda Guntur alu nyintak ilang pendua ia alu dipungga ia ba rekung panglima Badin ti enda ngadang alu tekecing darah alu pala Panglima alu ditanjal Guntur ke tisi alu Guntur tang penyelai ia pala Panglima Badin enggau betis ke rumpung tadi alu bejantil baru alu idup Panglima Badin alu mantap belakang Guntur tang Guntur lancat alu nyilat alu nacah Panglima Badin enggau ilang.Belaban saduai nadai nemu alah nadai nemu parai ngujung Guntur enyau ka alah seput tang nya meh laban Guntur ingat ajar adek ia Jeniah enti pandak seput maia betempuh irup ai ambun ke beri ia.Diak jejampat Guntur nyirut ai ambun nya alu engkechit ke tisi alu ia ninga bisi orang tuai madah kena munuh panglima Badin nya uji unsut ai ambun ba mata ilang ia sigi ulih dipumpung ia ko orang tuai nya ngajar ia.

Nama agi deh tak jampat meh tudah Guntur nitih ke ajar orang tuai nya tadi,udah ngemasah ilang ngena ai ambun alu Guntur berlanda seretai engkechit alu mantap Panglima Badin,seretai panglima Badin alu nepis alu dirusuk ia Guntur ngena sangkoh peda tak disimpung Guntur ga sangkoh nya alu saduai sama ngetu,diak Guntur meda mua Panglima Badin enyau ka ngenangi meda ilang Guntur laban ia ngasai bisi penyelai ati lebuh ia meda ilang nya.Guntur alu tuchum lelegup meda mata panglima Badin enyau kuring meda ilang dipegai Guntur.Lama saduai betitir titir alu engkechit Guntur alu mantap peda tudah Panglima Badin alu teduduk laban entak pantap Guntur naka pemalat nya alu empai sedia tudah Panglima Badin alu ditendang Guntur ia peda alu tepelanting alu tetingkap seretai panglima tetingkap peda Guntur alu nacar ke ilang ila alu maia nya tudah tuai panglima Badin benung ka ngangkat kediri peda ia ilang udah terengkah ba rekung ia alu putus meh rekung tudah panglima Badin nadai bepadah lesie ditaban ke ari,pergi bado nguan menua agi.Kasih meh mensia lesie ketegal malas dendam enda dikira agi penyinu ke mensia ba baruh dunya ari,lesie meh sida ke diasie,lesi nadai ditaaban ari.Enyau pulai agai Jeniah ti benung belaban enggau Raja Bugal.Pagila ku nampung baru au madi.

Jerita Jeniah Berpangak Dilah part 43.

Bisi enda lama udahnya,diak Jeniah alu engkechit tetalang alu terengkah ba mua Raja Bugal,dipantap Raja Bugal tak alu diseliah ke Jeniah,seretai nya mega tudah Jeniah alu mantap rekung Raja Bugal peda Jeniah diak Raja Bugal ketawa engkakah.Raja Bugal ketawa laban ilang Jeniah enda tebunuh ke ia,tang ke amai enya ilang kena Jeniah munuh laskar munsuh aja,laban Jeniah empai mantai ilang chelum ia ke batang amai ia ka bertundi enggau Raja Bugal dulu laban Jeniah ka nemu penyauh ni penguat Raja Bugal.Diak malik Jeniah ke tisi diak ia meda ia meda laskar penyaga ti kekering endang landik bebunuh udah melulong tudah Jeniah.Tuchum aja Jeniah diak Jeniah mantai kuntau buah pasung mati,dibantai ia nya seraya nganti penatai sida nya nyerang ia,tak samoa sida nya alu engkechit alu besaup ngelaban Jeniah.Raja Bugal alu duduk ngesen kediri ba pandau Raja ia alu ketawa engkakah.Jeniah alu nyintak ilang mendua itek ditangkin ia,tak papar ia magang pala munsuh penyaga Raja,ia ke tumbang dambi Jeniah sangkoh tak dentak kasak mai sangkoh nya ba tubuh munsuh ke telentang,ni ke engkecit tak sempulang Jeniah ngena pedang munsuh ti ngapar aja ba lantai alu tembus ke rekong,rembus ke dada,ni rembus ba perut,ba kanda enda ibuh tusi sigi abi pemati ti merinsa ke mensia.Tak nadai ditatak nya,ia ke jejengap alu tembu ke Jeniah tudah seput munsuh nya tadi.Raja Bugal enyau ngetu ketawa meda jamah pengayau bansa ti nadai ati kasih enti dah dipungkal ditanjal.Mata Jeniah enyau burak dipeda Raja Bugal,ngasuh Raja Bugal gelesi ba ati laban mata nya baka bulan ti mansau ba punjung langit.

Pulai agai jerita sida Guntur sida kabukai ba baruh din.Tak besatup sida tadi alu sari sari meh sida nadai ngetu bepantap mina tak panjong tekaong mensia aja didinga,ni ke ulih lari sigi lari meh bala laskar bala Raja Bugal tang enya meh ni ke lari nya sigi dulu mati laban bala pengayau dayak kabukai agi ba tinting bukit,sigi nganti pengelari munsuh laban maianya kayau lus endang bakanya,siko nadai meh tau lepau bakanya sigi dikayau ambis sigi dipunas nyentuk nadai agi orang ba menua nya.Guntur pepanjong mumpong pala munsuh alu pia mega bala munsuh enyau pepanjong mansang nempuh sida ia tang utai ngasuh bala pengayau dayak majak semajak agi berani ngasuh sida ia ransing agi ati ka ngemunas bansa Raja Bugal.Ni laskar Raja Bugal ke takut enggai ngelaban sigi nukung ba tisi kuta alu ngelengka ke pedang ke tisi ketanda sida enggai ngelaban alu sida muka baju perang,semua ak mit,ke indu,orang tuai dilindung sida ba tengah.Meda bakanya bala pengayau enda ngacau sida ia tang munuh laskar ti datai ngelaban.Maia sera nyawa nyabak mensia endang berupai didinga.Bisi indu tuai siku ia pansut ari bulatan pengampunan ba tisi kuta laban ia ngambi anak ia ti udah telih bepantap enggau bala pengayau dayak.Laban enti dah kayau danji atai ba padang alai beperang sigi dipumpung,indai tuai nya mangku pala anak ia seretai nya pala ia putus keja tepas ilang sereta anak ke lelaki enya dibunuh terus nadai pengasih.Pengayau dayak bebalas ketegal Raja Bugal dulu ngepun munuh bala dayak menya dahnya dibalas sida Jeniah mega.Raja Bugal endang jai ati nadai milih kasih,anak mit dipanggang dempa ia suba lebuh ia menang ngayau menua bala dayak diato kenya meh sida dayak bebalas.Bebalas nadai pengasih nadai penyiru ba ati.Seretai pala indai tuai terengkah ba tanah,diak ari pen ujan baka tanda hari pen nemu sinu ke mensia tang mensia enda kala sinu ke mensia ketegal bebalas darah dibalas darah.Teraoh aja bala ia ba tisi kuta nyabak ke indai tuai nya.Enda nyangka enya meh indu tuai ti nyadi indai tiri Raja Bugal,Raja Bugal anak bini baru Raja Malin,bini Raja Malin ketuai tu meh ti cukup mentas sereta kala nulung ngelepas aki Jeniah menya suba ari rumah pasung Raja Malin.Pementas Dayu(penama indai tuai tu) endang ditemu orang entabanyak laban ia ngembuan ati penyinu enggau penyiru ke mensia ti enda milih bansa.Ari penyinu enggau pengasih ia nya meh Raja Malin muai ia ari istana ia laban Raja Malin begedi ke bini ia bakanya ti rindu begulai enggau rakyat ti merinsa.Tang diato Dayu dah dibai petara pulai ke langit alu bala rakyat ia ti ngampun mina ulih nyabak ari jauh meda utai bakanya tang bisi enda lama diak bisi anak biak ke indu mansang agai bangkai ia alu anakbiak nyabak enggau penyinu ngujung tudah Guntur ngetu enda lama laban ninga sada sabak ti ngeyinu ke ati nyinu ke mata nyentuk Guntur ngasuh manjung ngasuh sida ngetu magang bebunuh.Diak bala pengayau dayak sereta enggau bala Bunsu Gerasi Langit enyau ngetu magang alu ninga sabak anakbiak nya ti ngasuh semua sida enyau beterutu ai mata.Bakatu sabak anak mitnya alu aku ngarap kitak anang enda ingat leka sabak anak mit tu.

Aihhhhh indai tuci indai diasie,
Nuan ke ngembuan ati tuci ati beresi,
Nuan ga lesie pergi dulu ngejang ari kami,
Tu samoa laban kayau sida aki dulu menya agi,

Kasih penyayau enyau nadai agi,
Laban ati udah dipaut pembenci,
Suba nuan indai asie kekerah madah diri,
Nuan meh indu peturun raja ti tampun puji,
Nyabak  genap meda mensia lenyau lesie mati,
Nya diato nuan indai asie pergi,
Nadai meh kami meda ai mata pengasih penyinu nuan agi,
Diato kami ka meh munuh diri,
Sama enggau nuan lesi nitih kini nuan pergi,
Owhhh petara ti besai kuasa ti suah ngemata,
Dini nuan petara,bai meh kami enggau ia,
Diato bala nuan udah munuh orang tuci manah ati,
Kati petara tau bakanya ati,
Munuh mensia ti tuci penuh tampun puji,
Menya indai tu meh ngelepau tuai dayak ari dipasung dibunuh mati,
Diato orang ke kasih sereta bisi penyinu ba ati,
Dibunuh sida ia naka nadai pengasih ati,
Nama perang kayau ba baruh ari,
Sigi enda milih utai manah ba tisi,
Nama utai nya ka dipunas enggau pengeransing ati meda orang mati,
Enti baka dehnya petara besai ba langit enda bebingkai ba tisi,
Ku ngasuh nuan petara besai diasie,
Bunuh ambis meh kami mensia ba baruh dunya matahari,
Lak kami mensia enda berebut pemberani pengaya diri,
Kasih ke mensia tang mensia enda kala kasih ke pangan diri,
Laban udah datur nasit kami mensia ba baruh ari,
Berebut pengaya,kuasa,pemberani,berebut sapa ke betul agi,
Ngujung kami ti nadai nemu apa nemu nama deh asie,
Kami nyadi alai kuta kena orang jai ati ngetan diri,
Diato kami ke lesie nadai nemu utai nama penyalah diri,
Kitak ke jai ati nya meh kami sumpah dulu lesie,
Sapa dulu nanjal,ia meh bebadi lesie,

Empai ambis ia bejako alu ka dipumpong bala pengayau dayak kabukai tang ditagang Guntur,nya ko Guntur barang sapa negu tubuh anak biak enya enggau bangkai indu tuai nya enggau anak ia sigi Guntur bunuh laban ko Guntur ia ka nemu jerita amai ari mulut sida nya.Keno ke jerita tuai,Guntur tu meri indai tuai enggau anak indai tuai nya idup baru pengudah Guntur bendar minta tulung Keling enggau Kumang ngidup ka saduai menyanak pengudah nemu jerita ke amai ari mulut anak biak nya.Maia nya orang ke ngampun alu dilepau sida ia tang maioh sida ke lepau nya tadi enggai bejalai kabukai alu minta nyadi ulun tudah Guntur aja.Ila ku nampung jerita baru au.

Ensera Nabau Ngerangar Enggau Nabau Malie.

Kenang ku maia to lebuh kayau Rajah Brooke ti ke dulu agai Kota Liban ba Ulu Katibas.Jerita to tampung ku ari aki wai Kuling ku empu lebuh maia nya sida bisi datai ngesah kia.Ba kenang ia,jerita to baka to.Liban munuh bala Eropah ba Kuching laban sida mabuk nyubit tusu menyadik ia ke indu lebuh seduai ia ke pasar Kuching ka meli tajau enggau tawak lebuh ia agai Kuching kin.Bisi sepuloh iko bala ribai mati maia nya laban sida ribai ngacau madik ia ke indu bakanya.Lebuh Dingun ari Kanowit ke Sarikei diak ia ninga bisi bala Rajah ka ngayau Katibas kena tulat ari,ia ninga ari bala sida ba diak.Meda kenya Dingun enda  bemalam ba rumah panjai ba bala ia diak alu lemai nya ia ngelesap kediri alu naka pengelengkas gai bala aki wai Nating ba Tapang Lancham Katibas.Meda bakanya diak aki wai Nating to tak ngentak pun tapang peda tak begetar alu tumbang laban bisi penemu penumbang dilang.Aki wai Kuling maia bisi ngimbai ia ba tisi diak lebuh Dingun atai kelemai 2 hari ia bejalai ari Sarikei nadai nemu ngetu lama laban ka bepadah gai bala diri sekaban ngicha sedia ngelaban Rajah Brooke.Meda kenya  diak sida ke indu ke anak mit dasuh pindah agai Ulu Tekalit ba ari ili Lubuk Berenik kediato ba din.Pelaba ku maioh orang Tekalit nemu Lubuk Berenik to neh..Engau naka pengelengkas diak sida ke indu ke anembiak mambut mina bedau sida  ke lelaki ti berani.Alu sida Nating engau Liban ngaga Kuta ba Nanga Bangkit ti di kangau Kuta Liban laban Liban to iban ti berita agi menya tang enyau enda dingat ke orang agi laban orang ngempu asal menua Katibas kelia maioh udah pulai agai Batang Kapuas sepengudah Bantin ti ringat alu ngemai bala Iban ti asal datai ba diak kedulu menya pulai agai Batang Kapuas.Jerita to kala ditusi orang suba tang maioh fakta madah nama sida to enda sebaka enggi siko ti nyerita to ga.To meh cerita asal ti ditusi aki wai Kuling ke kami suba ti ku ingat ari niang inik aku ti asal peturun sida Liban Penepan Pala Antu Rengan.Tang nasib sida ba rumah panjai kebukai datai ke malam nya ba rumah panjai Nating nyau beribu ribu iko mensia atai ba diak laban ngesah bala ti tusah.Ni bagi Iban ari Julau,Sarikei,Kanowit enggau ari Bintangor datai magang kia ngesah Nating ngau Liban.Nyau enda ulih tekuk ke kaki alai pemaioh mensia ke datai.Nyau kekinyik ngeli Liban madah diri sigi pala Rajah nya ka dambi ia dulu.Ari Julau di ketuai Belikau,Ari Kanowit dketuai Inggu,ari Bintangor dketuai Jenat,ari Sarikei dketuai Linggie engau Kilat.Entara sida ia ti kering amai ia nya Inggu pegempu pemuput kudik..Kayau ulih enda nyadi enti Inggu muka lupong ti ngembuan Batu Kudik to.Laban sida Rajah udah datai ba Nanga Katibas diak sida enda ulih tama laban kudik naka pemalat nya..Tak semetak kayu baka ke tumbang,ai batang rajang nyau begulung mesai tibang laban penama Nanga Katibas udah di tabur enggau ai Batu Kudik.

Nyau kira mendua minggu Rajah James Brooke nganti ba Nanga Katibas diak ari nyau manah mai..Tang ai sungai Katibas naka pemesai nyau tuntun dan kayu  ensurai keno ko jerita.Enyau takut bala Rajah tama laban ai sungai kelalu besai sereta deras.Nyau ka sebulan Rajah Brooke ba Nanga Katibas diak pengawa rumah panjai ngaga Kuta Liban ba Tapang Lancham empai mujur lalu diak Liban engau Nating alu tusah ati alu Liban alu nabur berau kuning alu bersampi ngangau ke orang Panggau Libau sereta engau piring ading.Nyau udah tembu mangkong tawak diak tak ujan nyala maia ketengahari sereta nyau nyau lindap utai dipeda tak negung aki remaong alu bemunyi ketupung pemali,ada kekucai burung beragai,alu kesiap munyi utai nanda Sengalang Burung datai.Nyadi sida sebuat nyau rerangap mulut nya ka tama lalat ninga utai bangat ngenyelai nya enda kala didinga.Peda Liban tak pansut tubuh 28 iko pengayau tuai menua tadi sereta nuju aki wai Kuling ti duduk ba tanju berimbai engau Nating.Aki wai maia to sigi udah lama ba diak laban ia nulong ucu ia Liban.Nyadi udah atai tubuh 29 nyau balat gik ngeransing at bala kebukai laban sida nemu to petanda menang ngelaban Rajah.Diak udah datai magang diak Liban bejako alu ngeransang ati bala pengayau kebukai,lebuh Liban bejako diak tak semetum sereta rumah panjai  nyau terguyap laban aki tuai Ujai ngansar ke tubuh ia ke besai nya ba tiang tengah rumah panjai.Nyau capoh sida ke bukai ba diak nyau ka lari diak aki tuai Kuling nganu ungal ia aki tuai Ujai lalu bado meh ngansar belakang ba tiang rumah.Udah tembu Liban bejako sida alu mutus ke tembung malam nya engau madah nganti Rajah ke datai aja.Nyadi malam nya diak Liban bisi mimpi betemu engau Nabau ti bernama Kuwie.Nabau madah nama Kuwie alu ka nolong sida ba kayau nya ti ngetan menua sida ia ba Tapang Lancham lalu ia madah ngajar sida nebang pun tapang engau tebelian ti ba atas bukit alu di ukir engau gamal nabau tang kayu dukir alu dpiring sereta ia ngajar semua atas bukit dtebang alu dukir ngena bentuk nabau tadi.Nyadi kayu tapang dukir engau piring nya dudi dturun dkerantar ngelaban bala Rajah.Nyadi kayu tapang mesti ba atas bukit alu dtebang agai tunga matahari mati ngica ke munsuh ulih alah semengat maia beperang.Udah nabau Kuwie to meri jako ajar tadi diak Nabau Kuwie to ngasuh sida sedia utai dpadah ia.Diak Liban terdani alu nusi mimpi nya tadi agai sida kebukai ke pagi nya.Ninga baka nya diak aki wai Ujai dulu ngelawa ke atas bukit alu nebang pun tapang baka dipadah Liban tadi,tak sepuloh kali mantap nyau ke sebelas diak pun tapang mesai tibang biak nyau tumbang,meda kenya engkecit aki Berinang alu napat ke engkabang kira bisi 10 pemerap alu dtebang ia,Tebelian alu tumbang sereta udah dpiring diak aki wai Kuling ngujir tebelian engau tapang nya engau bentuk nabau,udah tembu alu dpiring,tak 4 hari tak pengawa ngukir nya laban tubuh 29 sama bela ngukir kayu tebelian engau tapang tadi,sigi sikal magang sida to ga,udah tembu pengawa ngaga kuta Liban sereta tapang engau tebelian tadi dberi Nabau Ngerantar engau Nabau Mali.Nyau maia atai ari Rajah ba Nanga Bangkit diak alu manjung deh Kicung alu nyeraoh deh Beraoh alu reradak deh Sandak madah munsuh datai naka pemaioh ari atas bukit.Diak sida Uncat alu tama ke dalam ai alu enseput ngena buluh,tubuh ditancang ngena wie alu bejaga sedia ngena sangkoh ba dalam ai kena ngentak nebuk perau bala munsuh,Bala sida Ingu udah berintai ba emperan,sida Belikau nyau kesiap niki kayu kayu nyedia ka nyumpit,bala Linggie nyau dedigi atas bukit,bala Kilat nya baka lalat ke ingap ba belah dan kayu ti baruh nganti munsuh,Sebedau sida nyerang diak Liban meri jako sempekat,bala maioh anang enda jampat nyeliah ari tebing ti bisi Nabau Ngerantar ba kiba alu ba kanan Nabau Malie  ti bisi ba atas bukit laban enti kayu besai dua iti to bebelat ari bukit sepiak sepiak ngujung maioh mensia mati dtujah kayu besai dua iti ti dekerantar.

Nya meh ti kitai bumai kelebih agi kediato enda tau betekup bukit enti bumai laban ulih ngemai penusah enti baka to,to meh pun pemali bumai enda senentang engau umai orang bukai.Meda bakanya bala maioh madah au magang.Nyau kira datai ba Lubuk ari ili Nanga Bangkit diak Rajah to tadi dberi nyambut penatai ari sida Belikau ti ngena sangkoh ti dtikau ari kiba kanan sereta sumpit ipoh nyau lindap mua ari laban pemaioh sangkoh enggau laja ipoh dsumpit bala kitai iban maia nya.Peda tak nembus tubuh bala munsuh ni ke benong empai sedia nyau sampai meniga sangkoh nyau bebelas iti laja sumpit nembus tubuh genap iko sida ke dulu,Alu setat meh beperang ari pagi nyentuk ke ngalih matahari bedau agi bebunyi bedil bala Rajah Brooke,meda sida Brooke engai alah diak Libam alu nyeraoh ngasuh bala lari katas bukit,bala Iban alu lari katas bukit alu manjong Liban ari sepiak kanan sungai Katibas alu madah ke Nating ba sepiak kiba sungai Katibas ngemai seretai mutus ke tali penancang Nabau Malie engau nabau ngerantar tadi,nyadi maia sida Rajah Brooke maioh nitih ke bala Iban ti lari katas bukit,Udah peda bala Iban udah datai datas magang diak Liban engau Nating alu ngetas tali penancang Nabau Ngerantar engau Nabau Malie,dinga tak tekauh dinga tak semetap bedindap munyi kayu tapang ti digelar Nabau Ngerantar alu kayu tebelian ti begelar Nabau Mali ti bebelat ari atas bukit,sayau meh dik utai jai,sayau meh nyawa sida to nangai rarat dtaban Nabau Ngerantar engau Nabau Malie nyadi nadai meda mua ari,diak kayu ke mesai sepemerap engau kayu kebukai nyau putus dua,putus meniga nyau rumpung baka drundung.Atai ba ai sungai Katibas diak Nabau Ngerantar engau Nabau Malie betekup nyau tekauh naka pengingar,Nyau labuh bala nyumbuh,nyau tekuak sida juak tulik ninga utai ragak..Bala Iban nyeraoh madah diri menang,meda siko nadai siko munsuh bedau agi idup,mina siko dua aja bala munsuh ti agi idup alu ngemai berita sida alah agai Rajah Brooke.Ari to nyau betaun taun Rajah Brooke engai ngacau menua Batang Rajang agi tang lebuh sida Linggir Mali Lebu nyadi askar ia diak ia ngasut Linggir Mali Lebu awak sida Linggir to ngayau kin,tang sayau orang kedulu agi udah mati magang nya meh kayau Linggir Mali Lebu to nyadi menang tang Iban ke datai ba diak rebak penatai Bantin ari Batang Kapuas.Linggir Mali Lebu kala besatup enggau Iban asal Katibas ba Nanga Tekalit diak seduai bebaik ngujung ke Linggir engai ngacau agi menua Tekalit,pulai agai jerita pun tadi keno jerita sida ke indu engau anembiak ke pindah agai ari ilik Lubuk Berenik to tadi nyau rembus ba sitik dunya ngujung sida to nyadi orang bunian ti nguan menua Lubuk Berenik to tadi.Aaaaa kaban Lubuk Berenik to enda tau di tan kitai pukat au nyentuk kediato laban enti nuan ngetan ba dito pukat nuan nya dah dibuat tauka udah dangkat alu dengkah orang ba tisi kerangan,sapa ngangkat pukat to ari lubuk nya mina petara ti nemu.Pulai agai jerita tadi.Maia to meh ai sungai katibas nyau ka sebulan engau but mensia ari bala munsuh.Maia nya Rajah Brooke to nadai askar bala dayak mina bala Gurkha aja ngau bangsa Baie ke nyadi bala army ia.Ari to meh Rajah ngena cara falsafah ia empu,**mina iban ulih munuh iban empu"pulai gai iban jako english ia to au.

Pulau Latit Enggau Tembawai Angus.

Menya bisi rumah panjai ti cukup panjai amai ba Tembawai Angus ti dikangau Tuai Rumah Nirong ba menua Sungai Tisa  kediato.Menya kelia ukai baka kediato semua utai dempa dulih ari bumai betaun,nupi manok,nupi jani nupi ukoi meh kena ngasu begiga ke dagin.Nyadi Nirong tu sigi kering sereta sikal sereta jelai rita tampak menua sungai Tisa tu kelia.Kenu ko orang tuai Nirong tu meh kitai iban tunga Kapit enti menya sigi chelap ati lebuh ninga nama ia aja.Menya ukai baka kediato,enti belauk ke telo manok sigi amai bebasa amai orang nya ke temuai kedatai.Nyadi maianya Nirong maioh enda dikerindu orang bukai laban Nirong tu orang tampak rita sereta sekayu rumah panjai nya endang bulih utai bulih limpah ari bumai betaun laban Nirong tu ngembuan Batu Padi ti bisa ngujung sida sarumah panjai enda pungkang bulih padi tak nadai siko orang ba menua Sungai Tisa enya enda bulih padi.Genap taun maioh bala iban ngentak nampung rumah panjai sida  Nirong,ari pandak nyadi panjai.Ari seberai ke seberai maioh rumah panjai baka pasar menua Tembawai Angus nya kelia ari tusi purih Nirong tu empu ba urung taun 1960an ari tusi niang aki sida peturun ucu Nirong tu suba.Meda bakanya diak siku katuai kitai dayak tadi enda nyamai ati laban maioh anak buah rumah panjai sida ia pindah ke sungai Tisa laban ka bumai ngulih padi maioh.Maianya siko nadai meh bala iban idup merinsa laban mimit aja bumai maioh meh padi dulih sida ia.Meda bakanya diak katuai dayak kabukai baum ngemai mecah ke rumah panjai sida Nirong lebuh sida Nirong enda ngadang ila.

Taun berganti taun,bulan beganti bulan.Orang Iban maioh semaioh pindah agai Sungai Tisa alu nyadi anakbuah tudah Nirong magang ngejung balat agi sida katuai dayak enggai meda Nirong tu tadi.Lebuh udah nasau,orang pen ngerekai ke reban,lebuh orang nunu umai bisi pengumbas pengerangkai reban diak maioh sekayu rumah panjai nya nunu tadi semina tudah Latit aja ke bedau nunu laban seminggu minggu nya bulih mimpi ti enda manah.Nyadi malamnya Latit alu tindok tumu ngiga mimpi tang mimpi enda baka ke udah ia meda mensia enda dipeda mua dibunuh alu bebali nyadi kijang burak.Ia diperecik darahnya ba dalam mimpi.Dani tumu ia nusi mimpi agai tudah Nirong laban Nirong tu aya ia ti berpetunggal enggau apai ia lebuh Nirong tu tumu amai ngabas bubu ke Ulu Sungai Paong.Meda kenya diak Nirong enda ngasuh guai nunu dulu tang laban Latit tu enda ninga jako ajar ia tak lak tudah Nirong aja meh ia penngudahnya.Nama agi deh tudah Latit mupuk kediri beguai nuju sungai Buluh Betong.Sigi maioh buluh betong diak menya.Nyau ka dini ari diak tudah Latit nyikap perengka diri ka nunu umai,sekali enyau pemuas nengkira baru ia nemu diri ia enda ingat ke batu tekik pengidup api ti tinggal ba rumah panjai.Diak Latit beguai guai pulai ke rumah panjai ba Tembawai Angus tadi nyentuk ba rantau ia terkenyit meda diri di ipa sida sarumah ba rantau jalai enggau naka pemedis ati tudah Latit alu direjang ngena sangkoh ba rusuk alu dirusuk baru ngena ilang ba dada.Diak tudah Latit bedau agi idup amai bakal bakanya.Diak Latit alu nanya bala kaban ia ti sanggup munuh ia bakanya diak sida nya mukut mua Latit alu nancang tubuh Latit ba kayu alu ngeludah mua Latit.Diak siko bakih Latit ti dikerindu ke ia ari alu nibar jako.Parai dik akih Latit ipak dik jai ati jai untak nunu rumah panjai laban dik kepapas ka nganti tuai rumah Nirong nya neh."pia ko sida ia agai tudah Latit ti seput seput ngetat pemedis rusuk sida nya tadi ngena sangkoh.Nyabak meh tudah Latit laban disalah bakanya alu ia nibar jako pengudah tu ko ia..."kitak enda bulih padi baka ke udah seagi kitak agi ba menua Tisa tu.Kitak kedulu munuh aku sigi nadai bulih padi nyentuk ke peturun kitak ila.Kitak salah munuh orang laban aku ukai orang baka ditebak kita nya."

Pengudahnya Latit alu mati nyadi maia bisi ga tudah Nirong nitih dudi alu meda tudah Latit udah mati alu Nirong nanya sapa munuh Latit diak sida kedulu tadi madah diri ti munuh Latit,meda bakanya diak Nirong alu nampar mua sida kedulu tadi.Diak Nirong alu nyabak naka pemuas ati alu nganu sida kedulu tadi ti nadai bertanya nadai madah kabuah sida nya bakanya agai Latit.Nya Nirong alu pedis ati ninga sida nadai mansik silik utai nyadi.Lebuh sida benung belaya diak Nirong ninga  orang engkasik ba emperan diak tudah bangkai Latit ditinggal pia aja,udah tubuh Latit disandih ba kayu sida tadi nitih pengelari orang ke nunu rumah panjai sida ia tadi ba Tembawai Angus ti nuju menua bukai kin.Pemulai ari ulu nyin tadi laban ati asa ngiga nitih pejalai sida kepapas tadi diak sida mansa baru ba senentang endur bangkai Latit tang penyelai ia.Sangkoh enggau ilang ti kena ngerejang tubuh Latit agi bedau ba diak tang tubuh sereta bekau darah Latit nadai agi dipeda.Nyadi maianya sigi amai angus ambis rumah panjai sida Nirong senentang Tembawai Angus nya sereta lebuh malam nya sekayu menua ba Tisa ti menya bisi ngambi mimpi meda Latit nyadi kijang putih alu ia mega suah ayan ba menua Tisa ba urung taun 1960an agai taun 1970an.Keno ko ari tusi nianng aki suba,Latit tu nyenguk Tembawai Angus laban nyangka aya ia Nirong agi bedau ba diak agi.Pengudah Latit mati,umai bukit enda maiioh nyadi,puas dunsut diunsai umai ngena ai Batu Padi enda meh ngasi laban udah kena sumpah Latit.Pengudahnya bala iban alu mepar semepar  agai menua bukai alu tudah Nirong pulai agai menua lama sida ba Engkarie din.Datai din,Nirong bulih mai padi laban endang peturun sida Munan Katuai Benih Padi.Orang ti kaya ari bumai betaun.Jerita tu endang amai nyadi menua Sungai Tisa lebuh menya.Tembawai Angus tu agi bedau alu Pulau Latit tu mega bedau agi nyimpan misteri dunya nyelai.

Jerita Jeniah Berpangak Dilah part 42.

Dinga sekayu menua chapuh ninga utai bekemung munyi gong dipalu bejurut jurut.Alu peda pangkalima Raja Bugal ari rumah penimpai alu malik ke langit sida alu nyikap diri laban penatai munsuh enda disadang balat ngeraya nya penatai.Dinga kauh munyi burung garuda kekalau ngeransing bala pengayau dayak penanda datai menua dkayau.Pemaioh laskar bala Raja Bugal endang maioh ukai anchi anchi.Berintai ba tebing pantai tasik.Nganti penuntung penatai bala pengayau Dayak ke tebing pantai.Sida nyikap diri ngena panah alu nimbak ke langit alu terengkah ba kapal sida pengayau dayak,tang sitik nadai meh tubuh bala pengayau dayak tak lesie bumbus laban panah nya.Meda sida majak baka diak Jeniah ngemai burung garuda terebai nuju tucung bukit ba senentang istana Raja Bugal,alu atai ba diak sida pengayau dayak kabukai ti nepan burung garuda alu nurun ari tucung bukit naka pengelaju nya kebaruh,alu Jeniah ngasuh burung garuda siko dak agi nganjung bala pengayau dayak kabukai agai sapiak cawit istana nya tadi.Ingap burung garuda nya tadi ba diak alu bala pengayau dayak alu terejun naka pengelengkas alu belanda napat ke laskar Raja Bugal ba sapiak cawit tadi ti nganti penatai bala pengayau dayak.Meda sida ba tebing tasik tadi empai niki ke tebing diak Jeniah ngasuh buurung garuda dua iku nya ngangkat batu ti besai sereta buai ba senentang munsuh ke maioh ba tebing pantai ti nganti penatai bansa dayak kabukai.Ba kenang ensera tuai,bala pengayau ke mati ke di idup burung garuda ngau Jeniah suba ba part 41 diak sida tu nurun ke dalam tasik kin alu sida ia enda merau ke tebing alu sida mega ti dulu mumpung pala munsuh lebuh atai ba tebing.Dicambah mega batu dibuai burung garuda tadi diak munsuh berupai rapas agi dipeda mata laban ambis mati dilaban batu dibuai burung garuda dua iku nya tadi.Diak bala pengayau dayak bukai ba kapal datai ba tebing alu mapar semapal ni bagi munsuh ke datai.Engkecit Guntur aku disundang berapa iku munsuh mati dentak sangkoh sekali.Ni utai dipeda mata danji munsuh ambis dilibas ke aja ilang peda pala munsuh besundang kali labuh telentang.Penajam ilang endang tajam,pedang dikena bala Raja Bugal ambis tebeleka laban penyampat rumban kayau bala dayak kelia.

Nyadi Jeniah tu kenu ke jerita,ia meda nengkila aja ari bukit tang pemgudah kuta istana empai ulih diroboh ke bala pengayau dayak diak ia alu engkecit bisi meniga kali baru terengkah ba dalam kuta alu mantap semantap,Jeniah cukup berani,ilang ia mendua igi kena bebunuh nyentuk ke mua pintu kuta munsuh tawas.Pama ga pintu muta Raja Bugal digaga ari kayu ti kering sereta tegap beserak tak enda tumpu Jeniah,meda baka nya diak alu metap genap mensia ba tisi kuta tadi diak bala kitai dayak ke landik niki nyau baka empeliau bejelangkit niki.Naka pengelaju nya alu sida muka pintu kuta menua Raja Bugal,ba ensera tuai Raja Bugal tu bisi ngembuan antu gerasi tasik alu suah mega munuh orang ti ngemai ajaran baru agai menua sida ia ba menua Indonesia din kelia menya.Raja Bugal tu penganut Hindu ti pecaya ke Tuhan Rama ngau Sita.Alu diseru Raja Bugal bala nyumbuh datai nulung tang lebuh meda bala dayak tekiting megai sumpit nyau tesepar sida lari laban nemu sumpit bala dayak aja ulih munuh sida ia ngau pedih ari ditusuk panah.Diseru Raja Bugal bala ular datai nulung ia,meda tubuh kitai dayak bekepan ke sarung ipoh nya buluh sereta bisi nyium buluh mali dipungkal ba sarung ilang kitai dayak alu tetabu sida ular lari.Meda baka nya diak Raja Bugal alu nyeru gajah atai,rerenjing gajah datai sekali nyium bau sarung ilang nya bau kayu tebelian alai ia alah bulu laban ambis kampung lendat alai sida gajah lari.Pemuas berunding diak Raja Bugal nyeru ke antu gerasi tasik nurun nulung ia.Peda sida pengayau dayak chapuh aja ngelara pemaioh antu gerasi tasik atai.Jeniah tucum aja udahnya Jeniah nyeru ambis genap menua ari dalam tanah,ba laut,ba batu,ba bukit ba langit ngesah ia ngelaban Antu gerasi tasik ti cukup maioh dipeda.Nurun bala Bunsu Tang Kedapang ari dalam tanah,nurun bala Bunsu Genali Pemuting Lesie,nurun bala Bunsu Luie aki Uncie,nurun bala Sengalang Burung,Simpulang Gana,orang panggau Libau enggau kabukai,nurun bala Bunsu Gerasi Langit,Kemping Padi,Bujang Setampang Bungai Rawa,alu sida ngemenuh tebing nyaga anak mensia begelar bansa dayak.Besatup berekak bejamah indah meh mensia ba dunya nyau rentung baka arong,nengali ari ngempu peruji ngasuh ati sinu berarie malik ketisi meda pangan diri lesi nadai penyadi,didinga duie sabak tusah ati tang mina enda lama dahnya lesie disimpung ba pala ngenjing dinihari.Kekalau ilau munyi burung papau tedinga aja jako mensia mucau ketegal alah dentak ngena pisau bala dayak makin majak kekuau ngerejang ni tisi jalai sigi dibiau balai ngena ilang dikamboh aki Sulai.Pengudahnya baru Jeniah terengkah ba endur Raja Bugal ti duduk ba kerusi Raja empu alu disumpit Jeniah peda tak ditepis ngena pedang ia ti dua itik.Jeniah tucum aja meda penyikal Raja Bugal.Raja Bugal tu endang amai sikal.Ambis menua ba menua nya takut ke ia laban Raja Bugal tu ngembuan ati jai enggau rakyat ia empu.Nya kabuah Raja Bugal maioh laskar laban semua laskar nya laskar ulun ia alu laskar dipaksa nyadi laskar.Pengudahnya diak Jeniah ngemai ia bertundi beruji penemu.Aaaa pagila lusa enti bisi ari ku nyambung baru jerita tu madi.

Ensera Penatai Asal Apai Saloi Ke Amai.

Nyadi cherita Apai Aloi bepun ari indu siko ke nama Rutih . Nyadi Rutih tu diau enggau sida apai indai iya di menoa sida di Nanga Engkaramoh, ari ili Gellong. Iya belaki Tunang Rebuam. Tunang Rebuam tu diau ba lobang batu, nadai rumah. Tunang Rebuam nya ke nyadi Antu Nguap . Nyau kalama ke begulai, dia deh Rutih nyau betuboh bisi, lalu beranak ka anak indu ke benama Sarai .
Leboh iya nyau dara dia iya deka turun ka temuda deka ngali bunga. Apin iya mupok dia indai iya berat-rat enda ngasoh iya ngambi bunga ke ba pun tapang, laban iya enda nemu penatai bunga nya. Tang leboh Sarai datai di temuda dia iya nemu panggal benih sida nadai agi, tak samina telesak bunga ke agi bisi dia. Ensepi diri enda bulih bunga ka di bai pulai, dia iya lalu mai bunga ke ba pun tapang, iya ti enda di asoh indai iya bai. Maioh bendar macham bunga dia baka bunga limau enggau bunga setangan. Udah iya mai bunga dia iya ninga utai tak ngenjing beguru, nadai utai ngemalat nya. Ka iya ngumbai nya ribut nadai ga iya meda kayu beguat; kumbai iya tanah berenyang ukai ga nya. Rari iya belanda-landa, dia deh bunga iya bisi berayan. Datai iya di rumah nadai ga iya ninga utai ke beguru nya agi.
Antara tiga malam udah nya dia iya bisi digayap orang. Orang ngayap nya nadai di kelala, meda pan nadai meh iya kala. Iya lalu nanya.
“Sapa nuan tu? Kukut nuan tu tak asai lungga, tunjok nuan asai laja, betis nuan tu asai belia?”
“Aku meh tu, nemuai ngagai nuan laban nuan udah ngambi bunga kami, udah megai taju aku. Aku tu datai tu deka bebini nuan,” ko orang nya.
“Sapa nama nuan tu deh?”, ko Sarai.
“Aku tu meh ke benama Gadu“, ko orang nya nyaut iya.
“Ari ni penatai nuan tu deh?”, ko Sarai.
“Jaoh, datai ari tisau langit kuning”, ko Gadu madah ngagai iya.
Gadu lalu madah ka diri deka jadi enggau Sarai enti apai indai iya satuju. Sarai lalu angkat nanya indai iya enti sida iya satuju enggau jako Gadu. Sida indai Sarai nadai maioh jako pasal seduai iya ke deka jadi amat ga seduai iya ka jadi manah enggau pangan diri. Lalu jadi melaki bini meh Sarai enggau Gadu tu tadi.
Nyau kelama ke begulai dia seduai lalu beranak, beranak ka anak lelaki nadai utai ngenyigat nya gamal, baka apai iya empu. Dia apai iya meri anak iya nama
Raja Beginda. Leboh Raja Beginda nyau besai, dia iya nyau rangka, bepakai ka macham-macham utai, baka ansang keli, kelupa baung nya ke ngujong ka iya nyadi lap. Meda iya bakanya iya lalu diberi orang nama Tambap . Leboh Tambap nyau besai dia apai iya Gadu madah ka diri deka pulai ngagai menoa sida di tisi langit, laban iya samina tau diau tujoh tahun enggau sida dia. Apin iya pulai dia iya ninggal ka benda Indai Ranai sigi, sirat luai selambar, badi andai sabilah, sumpit sapuchok enggau selapok marik siti, ka Tambap. Udah nya iya pan lalu mupok pulai ngagai menoa iya di Perenching Tisi Langit Kuning baka Siring Tangkong Burong, Selesa Ujan Nyala Baka Tangga Gempong Jabong.
Nyau kelama apai iya udah pulai ari menoa sida, Tambap pan nyau besai bendar. Ari siti dia iya madah ngagai indai iya, diri ti deka nemuai ngagai apai iya. Indai iya ngasoh, tang enda tau lama, ngambi ka sabulan pia, laban nadai orang enggau iya betupi. Hari iya ke mupok, dia iya lalu beradu. Pasok ka iya simpai kima iya enggau sirat luai. Ambi iya badi andai lalu tangkin iya, udah nya baru iya ngambi sumpit. Udah iya abis bekemas, baru iya mupok ari menoa sida di Nanga Engkaramoh, ari ili rumah sida Tutong kai di Gellong. Bejalai iya sehari-hari nya. Nyau lemai hari baru iya datai ba kaki Gunong Nyemugut. Iya pan lalu bemalam dia malam nya.
Nyau pagi hari siti baru iya mupok majak ka pejalai diri niki Gunong Nyemugut nya. Kira tengah hari, dia iya bisi ninga orang ngagau.
“Oh ngetu Tambap”, ko orang nya dinga iya.
“Enda aku ngetu, laban beguai bendar”, ko iya.
“Nya pan ngetu enda lama”, ko orang.
“Sapa kita nya deh?”, ko Tambap.
“Aku tu meh ke dikumbai orang Bunsu Ruai, Dara Bajik kelandik Kaban Temuai, Dara Bunsu Mandi Tumu Besepar Rangkai”, ko orang nya madah ka nama diri ngagai iya. “Lalu ngetu”, meh ko orang nya nan ka iya.
“Enggai aku ngetu”, ko iya.
“Enti nuan enggai ngetu nuan puni ila, puni tusu madu aku baka lua burong kenyalang, puni kuyu aku baka telu manok kepayang”, ko Bunsu Ruai.
“Enda”, ko iya, “Tusu nuan enda manah baka tampok kepayang padong, kuyu enda manah balut tai manok lintong”, ko iya. Iya pan lalu nyau mupok.
Bejalai iya sahari-hari nya, iya pan datai ba tuchong bukit sigi. Ba tuchong bukit nya iya meda maioh bendar orang berumah. Tang iya niki rumah orang ke sapintu salawang-lawang, siko sa-atap senukang. Leboh iya datai ba kaki tangga dia iya lalu nyapa nanya ka penyadi rumah?
“Jadi rumah kita ini?”, ko iya ngagau.
“Jadi uchu, niki meh, tang nadai orang enggau nuan di ruai dia, lalu ka bilek kitu”, ko orang nya nyaut iya.
Datai iya di bilek iya lalu nudok kai diri. Indai tuai orang nya lalu ngelalu kai iya sereta lalu nanya kai penatai iya.
“Ari ni penatai nuan tu deh uchu?”, ko indai tuai orang nya nanya iya.
“Aku tu datai, ari menoa kami di Nanga Engkaramoh ari ili Gellong”, ko iya.
“Nama main nuan deh?”, ko orang nya ga nanya.
“Aku tu ka nemuai ngagai apai aku kai benama Gadu”, ko iya.
“Oh Gadu nya anak menyadi aku”, ko ini orang nya.
“Oh sapa nuan tu deh?”, ko iya ga nanya.
“Aku tu meh Ini Jelebok. Ti nuan anak Gadu, uchu aku meh nuan tu”, ko ini orang nya bejako enggau Tambap. Ini Jelebok pen lalu ngangau kai anak iya kai betenun di sadau kai benama Nain Kai Bekain Mali Rimpi, Besandol Andol Kai Besanggol Lepi Sakali. Endu Nain pan nurun ga ari sadau.
“Oh bisi datai nuan anak!”, ko iya bejako enggau Tambap.
“Bisi meh ibu,” ko iya.
Nyadi Tambap lalu bemalam dia malam nya. Hari nyau jauh lemai tindok mega sida. Pagi siti apin iya mupok, dia iya lalu nanya ka nama menoa nya ngagai ini iya ke benama Ini Jelebok. Ini iya madahka menoa nya dikumbai orang Bukit Tandok Labong. Kejang iya deka mupok dia ini iya meri iya ubat sangga bunoh ke lalu di-unsut ini iya ba tuboh iya ka bekal iya bejalai. Lepas nya baru iya ngejang ka menoa sida ini iya. Bejalai meh tudah Tambap sahari-hari nya, nyau tengah hari engkarabak alai iya tak nyerungkong rebah tetanam tunsang. Rebah kanan saka enteran, rebah kiba sakal ulu tulang, rebah ka moa saka tanda paya lebang. Tak lalu luput meh nya dia.
Leboh iya ke luput, dia deh Bunsu Langau tak bira ba nyawa, ba pending, ba idong iya. Dia iya pan lalu tedani laban tai langau. Leboh iya dani, iya meda orang tak ketawa ka iya. Nyadi nama Bunsu Langau nya Dara Nyerida Tau Tepat, Kumang Tukang Tau Keramat. Lalu ka di sumpit iya Bunsu Langau.
“0h anang nuan nyumpit aku”, ko indu nya bejako. “Ila kami meri nuan ubat batu pending enggau ubat batu bidik ngambi ka nuan bidik baka kami”. Lalu di-unsut orang nya batu pending enggau batu bidik ba jari iya. Benong ngunsut ka batu ubat nya tadi, dia orang nya lalu bejako.
“Tu bakanya ga Tambap, nama agi didinga panjong, agi nuan ninga jako orang, baka kami ke nemu buot”, ko orang nya.
Udah nya baru Tambap ngejang ka menoa nya lalu mupok bejalai baru. Bejalai iya sahari-hari nya, alai iya tak rembus ba rumah orang di tuchong bukit nya. Iya lalu bejalai nuju kaki tangga orang nya. Datai iya dia iya lalu nyapa.
“Jadi rumah kita tu?”, ko iya ari tanah.
“Jadi meh uchu”, ko orang nya. “Lalu niki ka rumah kitu ka”. Ngenjing besalalut ga tudah indai tuai orang nya ngelalu ka iya.
“Ari ni penatai nuan tu deh uchu, lalu ka kini ka nuan tu deh?”, ko orang nya nanya iya.
“Aku tu datai ari Nanga Engkaramoh ari ili Gellong lalu ka nemuai ngagai apai aku Gadu ke diau di Perenching Tisi Langit Kuning baka Siring Tangkong Burong, Di Selesa Ujan Nyala Baka Tangga Gempong Jabong”,ko Tambap madah ke diri ngagai indai tuai nya.
“Oh uchu kami meh nuan tu. Gadu nya anak menyadi aku. Nyadi aku tu meh ke dikumbai orang Antu Ribam”, ko indai tuai orang nya. Iya lalu ngangau ka anak iya Dayang Ketupong Dayang Lingkau, Endu Berunu Pandau Ligau, ke betenun di sadau. Lalu nurun meh ga anak iya ari sadau lalu berandau enggau Tambap dia. Tambap lalu bemalam ba ini iya dia malam nya. Nyau keleju ke udah berandau, dia ini iya madah ka nama menoa nya ngagai iya. Nyadi menoa tu dikumbai orang Bukit Alun Tenun.
Pagi siti lalu mupok meh tudah Tambap nampong pejalai iya ke deka nemuai ngagai apai iya. Tang enda mukai mukai deh iya tak betemu enggau Antu Lembak Puki, apin tentu jauh ari rumah ini iya Antu Ribam. Dia antu Lembak Puki nya tak ka manching iya kemi. Takut bendar tudah Tambap meda utai bakanya. Iya pan lalu nikal ga ngagai rumah ini iya Antu Ribam. Datai iya dia, iya madah ngagai ibu iya pasal Antu Lembak Puki ke deka manching iya. Ibu iya lalu meri iya batu pukak.
“Enti nuan bidik, ai kemi antu nya lagi tau jadi batu, tang enti nuan enda bidik tak basah ngapa meh nuan lagi laban kesing iya”, ko ibu iya madah ngagai iya.
Udah nya iya nyau mupok mai batu puki nya tadi. Tang nasit bendar ga antu nya nadai agi ngachau iya.
Bejalai kenu tudah Tambap sahari-hari nya, nyau lemai hari iya datai ba kaki bukit. Agi jauh, dia iya meda maioh bendar rumah orang, ngenjing baka daun bukau empa pemaioh, tang meh nadai betampong panjai. Dia iya lalu nuju rumah ti betampong tiga pintu. Datai iya ba kaki tangga iya lalu ngangau.
“Jadi rumah kita?”, ko iya.
“Jadi meh Igat,” ko orang nyaut iya. “Lalu, niki meh”.
Nyau lama ke berandau, dia apai tuai lalu nanya ka penatai iya.
“Ari ni penatai nuan deh Igat? Lalu ka kini ka nuan tu deh?”, ko orang nya nanya iya.
“Aku tu datai ari Nanga Engkaramoh ari ili Gellong lalu ka nemuai ngagai apai aku Gadu”, ko iya nyaut orang nya.
“Oh petunggal aku Gadu nya. Kaban meh kitai tu. Nyadi aku tu Bunsu Kamba”, ko orang nya madah ka diri ngagai iya.
Nyau ka pemanjai randau dia iya nanya ke kabuah sida dia enda betam¬pong panjai.
“Ukai utai”, ko orang nya. “Agi menya kami tu bisi ka di-kayau orang, Nya alai kami enda betampong panjai. Enti sema kami ka sebuah rumah di tunu orang, sebuah ga agi tinggal, enti sebuah di tunu, sebuah ga agi”, ko orang nya madah.
“Kati alai orang deka ngayau kita deh?”, ko iya nanya.
“Kami menya bisi ngelalai ka utai baka tajau, chapak, mangkok, tekang mas bisi mesai tuboh kijang, ba pun kayu melebu. Kati nuan ngelala kayu melebu?”, ko orang nya nanya iya.
“Enda tentu ngelala”, ko iya. “Ngelala-ngelala ka bakanya meh. Batang iya ka burak-burak lalu bandir iya ka mipis-mipis, daun iya begalong. Pia ko orang ke nusoi ngagai aku”, ko iya nyaut.
Nyadi malam nya iya bemalam dia. Malam nya orang lalu ngumbok iya enggau sida iya ngiga kayu melebu pagi siti.
Nyau pagi siti tumu sida iya mupok ngagai puak kampong kin ka ngiga kayu melebu. Maioh ga kayu melebu ditemu sida, tang meh agi mit magang. Nyau kelama baru sida iya tetemu ka iya ke nyau dua pemerap pemesai batang. Datai dia sida lalu belaboh ngair-ngair pun kayu nya ngiga utai. Dia sida tetemu ka maioh macham chapak ke manah baka chapak kerugi, chapak kemuja, pinggai beturus, pinggai tebal enggau maioh utai bukai ke manah. Tang alah ngagai hari nyau lemai, tekang mas ke mesai tuboh kijang lalu nadai temu. Sida pan lalu pulai. Lemai nya udah badu makai dia iya madah ka diri enda ulih enggau sida iya agi ngiga pagi siti laban lalu ka nerus ke pejalai iya. Mina chapak enggau pinggai ulih iya dia.
Pagi siti iya lalu mupok. Apin iya ke mupok, dia Bunsu Kamba ngasoh anak dara iya ke benama Endu Temuku Tampok Lemba, Dayang Ketupang Bunga Taya nganjong Tambap. Bejalai seduai iya ngejang ka menoa Bunsu Kamba lalu rembus ba pun kara. Dia Tambap lalu nyumpit. Burong ke ulih iya nya diberi iya ngagai anak Bunsu Kamba. Nyau kelama seduai iya ke udah nyumpit dia anak Bunsu Kamba madah ka diri naka nya nganjong iya. Seduai iya lalu besarara dia. Manah ga anak Bunsu Kamba nya enda beduan iya mai iya tesat.
Bejalai iya ari pun kara nya, alai iya tak rembus ba danau siti. Ka iya nyemerai ka seberai, takut ga ati iya, laban ai nya ka dalam-dalam mimit. Dia iya lalu besampi munyi Menani Manang Chelong, mutap munyi kedadap telok kampong.
“Ni petara kai ngemata kai aku, Ke ngadu ka aku? Aku tu ka nemuai ngagai apai aku Gadu”, ko sampi tudah Tambap.
Enda lama udah nya alai datai burong undan ke madah ka diri deka nyangkai ka iya ka seberai. Iya lalu nepan ba belakang burong undan nya. Nying entachang burong undan nya mai iya terebai ka seberai nya ti ngasoh sapiak tuboh tudah Tambap nya basah. Datai di seberai iya lalu bejemboi. Leboh ka bejemboi, dia iya ninga orang tak reding-reding. Jauh ga orang nya ari iya, tang laban iya ke bisi batu pending ke diberi Bunsu Langau ulih ga iya ninga. Dia iya ninga orang bejako.
“Nama pengawa nuan dia wai?” ko orang nya dinga iya.
“Aku tu ngelalai ka telu aku sapuloh igi tu enggai ka di empa Ini Gumba, enggau Aki Gumba, enggai nyadi enda di-lalai ka”, ko orang nya nyaut didinga iya. Udah nya mansang Tambap ngagai tunga orang ka bejako nya. Datai iya dia iya meda Bunsu Beluku ke lalu nanya iya.
“Ka kini nuan Tambap?”, ko Bunsu Beluku nanya iya.
“Aku tu ka nemuai ngagai apai aku, lalu aku tu minta anjong nuan”, ko Tambap nyaut.
“Enggai aku”, ko Bunsu Beluku nyaut.
“Enti nuan enggai aku ka madah ka telu nuan sapuloh igi ke di-lalai ka nuan tadi ngagai Aki Gumba”, ko iya nyaut.
Nyadi tudah Bunsu Beluku tu tadi, laban sayau ka telu diri diambi Aki Gumba, deka mega iya nganjong Tambap. Iya lalu dianjong Bunsu Beluku alah nyau semak rumah Aki Gumba. Dia iya madah ka diri naka nya nganjong Tambap, laban takut ka diempa Gumba. Ninga redup tungkat Gumba bala Beluku lalu terejun ka ai.
Udah Bunsu Beluku mulai ka diri. Tambap pan gadai-gadai ga bejalai nuju rumah aki iya. Niki iya peda iya dugau-dugau aki iya ba ruai. Pala baka rintong, mata baka buah terong, ngeli iya baka lengki di kaki wong, nadai utai ngemesai nya, pala iya ga lalak. Sereta meda iya aki iya lalu ngelalu ka iya.
“Lalu uchu lalu”, ko iya. Iya lalu ngangau ka bini iya.
“Untong tua lemai tu baka beliong ulih ngamboh, betuah tua lemai tu baka peredah ulih ningkoh. Bisi datai uchu tua lemai tu”, ko Antu Sepapa nya gaga ka Tambap ke bisi datai lemai nya. Lalu pansut ga bini Antu Sepapa nya ari bilik lalu merap Tambap gaga ka iya ke bisi datai lemai nya.
“Kini ka nuan tu deh uchu?”, ko bini Antu Sepapa nanya Tambap.
“Aku tu ka nemuai ngagai apai kau Gadu”, ko iya nyaut.
“Enti Gadu nya anak petunggal kami”, ko ini iya nyaut.
Nyadi Tambap tu lalu asoh Antu Sepapa diau ba seduai iya dulu, apin asoh seduai melaki bini mupok. Diau dia meh tudah Tambap. Sekumbang iya ke diau dia, dia iya meda maioh bendar salai, kasam tang meh balat bendar gamal. Nambah ka nya mega, Antu dua iko nya tak nadai makai asi. Apin bangat lama iya udah diau dia, alai Antu Sepapa nya madah ka seduai melaki bini deka tindok. Seduai tu endang ka baka, tindok sapiak bulan lalu dani sapiak bulan ga. Apin seduai iya tindok, dia seduai iya madah ka kasam enggau salai ke empa Tambap sekumbang seduai iya tindok nya. Antu nya pan lalu meri iya alu siti kena ngerak seduai iya enti bisi tuntong penusah. Udah nya baru seduai iya lalu tindok.
Kira bisi tiga malam meh antu dua iko nya tindok alai tudah Tambap di tuntong penusah. Enda mukai-mukai ga iya tindok mai kasam enda jauh ari iya ke tindok. Ensium utai ke manah bendar bau, datai tikus belanda tak lalu ngigit tungkul idong iya ti ngasoh idong iya lalu rumpong. Nyau rauh-rauh tudah Tambap laban idong iya ke nyau nyengut. Dia iya lalu ngambi alu lalu di entong iya ngagai dada antu nya ngerak seduai iya. Dani seduai iya lalu diadu-adu seduai iya tungkul idong Tambap. Nyau ke lama jadi ga tungkul idong iya, tang meh lubong idong iya agi bedau siti aja, tak agi sedandang, nya ti ngasoh iya lalu idol jako selama iya. Kira dua tiga hari udah nya alai iya madah ka diri deka lalu nerus ka pejalai iya nemuai ngagai apai iya.
Pagi siti lalu mupok iya ngejang ka menoa Antu Sepapa nya ke alai idong iya sedandang. Bejalai iya sahari-hari nya ka diri-diri. Nyadi menoa nya tak entap baka padang tang meh kayu tak bebesai magang. Nyau ka lemai hari alai iya rembus ba sungai siti ke alai iya betemu enggau indu siko ke benong mandi. Indu nya tak ngena selong semua, bulu pala iya baru beselat uban. Indu nya lalu mai iya sama mandi. Tang iya enggai laban bulu iya chelap. Leboh indu nya ke mandi dia seduai iya berandau. Iya lalu madah ka diri datai ari Nanga Engkaramoh ari ili Gellong, mansang nemuai ngagai apai iya Gadu. Tekenyit indu nya ninga iya tak anak laki iya empu. Indu nya lalu madah ka diri bini Gadu. Udah iya tembu mandi, indu nya lalu mai iya niki ka rumah. Datai di rumah din gaga bendar apai iya Gadu meda anak iya nyau besai, ke lalu bisi datai nemuai ngagai iya. Iboh bendar apai iya enggau indai tiri iya ka iya ke nemuai nya, nyau baka ke endang anak iya empu. Pemakai pan manah ga enda baka ka ba rumah Antu Sepapa tang meh jako iya tak lalu idol.
Kira empat hari iya udah diau enggau apai seduai indai tiri, iya pan lalu madah ka diri deka pulai, laban nyau irau ka indai iya ke tinggal ke diri di Nanga Engkaramoh. Tang meh apai seduai indai tiri iya agi nan ka iya ngambi dua hari agi. Lemai iya ke madah ka diri deka pulai nya, dia deh enda mukai-mukai ga tak bemunyi ngingit. Ngingit tu Manang Mengayan gila ka ngerebok mata orang enti orang tindok. Leboh ngingit ke bemunyi, dia indai tiri iya lalu ngangau madah ka sida iya agi dani.
“Agi dani kami tu, agi dani”, ko iya.
Nyadi Tambap ninga ngingit deka bendar ngerebok mata orang ti tindok takut endar ati iya. Nya ke lalu mun ke iya ti takut endar ka ngingit.
Nyau kedua hari udah nya alai iya pan madah ka diri enda tau enda mulai ka diri. Apin iya pulai dia apai iya Gadu ngasoh iya milih ni duku ti dikerindu iya, laban iya empu endang tukang kamboh. Tang meh Tambap samina kamai keris sabilah aja, ka penguju ko iya, selapok ujok bok siti enggau baju kechepak salambar. Ari indai tiri iya samina minta siti sendok. Iya enggai empu ubat jedian. Nyadi sendok nya, ko indai tiri iya enti agi tujoh malam enda lapar enti udah nilat ujong sendok nya. Udah iya bekemas enggau beberi ka utai, nya baru apai enggau indai tiri iya nganjong iya ngagai pangkalan. Nyadi iya ke pulai tu nengah ai, merau ngena perau jong sebuah, kira panjai tiga enggau buka iya sedepa.
Udah nya lalu mupok meh tudah Tambap tu berarat kili. Apin lama endar udah nya, alai iya betemu enggau burong undan.
“Oh nuan Tambap, bisi pulau batu sigi nyin, anang nuan mansa nya enggai ka kudi. Pulau Kudi Mayau nya”, ko burong undan madah ngagai iya. Tang meh iya tak baka ke enda iboh. Lalu bepeling-peling dia meh iya. Keleju ke bakanya alai perau iya tak tepangka ba batu nya. Tak lalu kudi meh hari dia. Nyau baka ke deka tungkup perau Tambap laban gelumbang. Nyau udah pama agi hari, alai iya tak rembus ba Nengeri Ribai Dayak. Ba pangkalan nya bisi bandong sebuah. Perau iya lalu di sangkai ka iya ba tumpang bandong nya, laban hari ke agi jai enda ulih disangkai iya ka tebing.
Semalam nya dia meh tudah iya ninga Laut ke empu bandong nya bejako. Nyadi bala Laut nya datai ari menoa Raja Suran, ari baroh Gunong Mesuat. Sida iya mansang ka “belujum” ka buah lebih seratus sapuloh leka ngelaban orang di nengeri Ribai Dayak. Enti orang dia ulih nyangka penyampau buah nya, bandong sida Laut nya di empu orang nya. Tang enti sangka sida salah, sida laut bempu Kayu Sagu Alu, ia nya kayu pengajih siti ti bisi tumboh ba menoa sida dia. Tak nama utai deka di pinta kitai ulih magang laban kayu nya ngada ka semua utai nya. Angkat ninga deh Tambap jako Laut ke madah ka buah lebih sida iya seratus sapuloh leka nya. Pagi siti iya lalu tumu niki ngagai jembatan ke enda jauh ari nya ke alai orang deka belujum. Iya ke mupok ka tebing nya ngena selapok ujok bok enggau baju kechepak. Iya ga tinggi iya ga selapok ringka, iya ga besai iya ga bebaju taya. Sigat bendar gamal iya.
“Lalu meh tuan”, ko bala Laut ngelalu ka iya. “Aram lalu belujum kitai tu”, ko orang bejako enggau iya.
“Nama reti belujum”, ko iya ngaga diri enda nemu.
“Belujum meh, enti nuan nemu penyampau buah lebih dalam guni tu nuan empu bandong kami, enti nuan enda nemu kami empu kayu Sagu Alu”, ko orang.
Dia iya lalu bepusin-bepusin ngena keris ke diberi apai iya. Iya endang agi ingat ka penyampau buah lebih nya.
“Saratus sepuloh leka!”, ko iya.
“Alah meh kami tu”, ko orang nya. “Nya alai bandong tu lalu di empu nuan meh”.
“Aku enggai empu bandong nya nadai di kena kita pulai”, ko iya. Iya semina ngambi barang temaga, reta baka setawak, engkarumong, dumbak ke lalu di-bantai iya ngagai perau iya. Udah nya iya lalu mupok ga ngejang ka menoa Ribai Dayak, ke alai iya bulih reta enggau mudah.
Nyau kelama iya ke udah bedayong, dia iya lalu datai ba menoa Batu Titi ke Bepampang Tujoh Nanga, Saka Ulak Jawa, Ai Beranti Tujoh Nanga. Iya lalu nyangkai ka perau iya ba jematan lalu terus bejalai ka rumah orang. Datai iya ba rumah dia alai iya betemu enggau Simpulang Gana.
“Oh lama udah tua enda betemu”, ko Simpulang Gana ngelalu kai Tambap.
“Au, lama endar meh tua udah enda betemu”, ko Tambap ga nyaut. “Nama main nuan tu tak bisi di menoa orang deh?”, ko iya nanya Simpulang Gana.
“Bakatu”, ko Simpulang Gana. “Aku tu suba bebini ngambi Endu Serentum Tanah Tumboh. Udah nya leboh kami dua udah nyundang pinang kami dua lalu nemuai ngagai rumah aka aku empu, Dayang Putong Kempat. Nyadi leboh iya mandi, dia iya tak mandi ari ili bini aku. Di rara aku enda ulih. Udah bekau nya isi iya tak lalu murok. Kami enda nemu ngubat iya agi, nya alai iya lalu di perarat ka. Iya lalu di apong Ini Manang ke lalu nempa iya baru. Iya pen lalu pulai bajik baru. Udah nya iya lalu dibeli Pati Melayu Puteri Bunsu ke empu menoa tu ngena Batu Pengajih ari Ini Manang. Nya alai aku ke bisi di temu nuan ditu”, ko Simpulang Gana becherita ngagai iya. “Nya alai sida tu”, ko Simpulang Gana nampong cherita iya, beperang ngelaban Raja Kumbang, tang lalu enda ulih alah ka, laban sida ke enda ta-irup ka ai salabu ke selalu di binti bala Kumbang. Enti nuan tak bisi runding ni enda pama!”, ko Simpulang Gana madah ngagai Tambap.
“Enti kita beguna ka penemu enggau tulong aku, deka ga aku enggau”, ko Tambap bejako enggau Simpulang Gana.
Malam nya Tambap lalu ngasoh sida ngumpul buah entawa maioh bendar, lalu di tabur sida ngagai kuta Raja Kumbang. Pagi siti bala Raja Kumbang lalu begau berebut ka buah entawa nya tadi, ngumbai buah entawa nya mas. Laban sida ke balat bendar berebut nya ti ngujong ka kuta sida lalu terumpang. Udah kuta sida iya terumpang nyamai bendar bala Tambap, bala Simpulang Gana tama ke dalam. Nya ti ngujong ka Raja Kumbang lalu alah, sereta lalu kena tangkap. Tang iya minta kasih ngagai sida Simpulang Gana anang munoh iya enggau kaban iya. Ka ganti nyawa sida iya, Raja Kumbang laban iya ke tukang, semaia deka meri Simpulang Gana perau, laban iya ke bisi Gadin penyarin dandang umai, bisi Meliba nyala nanga sungai. Bisi Mawing ngiling enda nginsap, bisi Mambu bebaju ke udu balat gerenyap nya orang kaban Raja Kumbang magang ke nemu ngereja samua macham utai.
Nyadi Tambap udah nya nyau bipar ka Pati Melayu Puteri Bunsu, laban ka udah enggau iya ngalah ka Raja Kumbang.
Angkat Tambap ari menoa Pati Melayu nya, iya lalu mudik Batang Gellong. Simpulang Gana lalu masok Nanga Sungai Limau Janting. Datai iya ba Nanga Engkaramoh, orang begau meda iya ke datai mai utai ngamaioh nya. Udah nya orang pan lalu mantai ka utai ke ulih iya nya. Gaga bendar indai iya meda penatai iya mai perengka enggau reta.
Apin lama iya ke udah pulai nemuai ari apai iya, ke alai iya bulih reta, dia iya lalu di asoh indai iya bebini. Iya bebini ngambi Chelegit, indu orang Gellong. Laban iya ke kaya taja pan jako iya idol, sida Keling, sida Sempurai enggau Pungga nadai jako. Rumah bisi ga iya, tiang teras magang. Nya iya lalu beranak ka sida Kumang Begok, Aloi, Atop, Imba. Laban nya iya lalu dikumbai orang Apai Aloi. Tambah mega pengawa iya tak jauh endar lain ari pengawa enggau penemu orang bukai ke menyana.

Ensera Tugau Pau Papau Anak Bunsu Nabau.

Nyadi menya bisi dua iku melaki bini ti nadai anak nyau ka punas meh ko ensera tuai nusi.Nyadi pemuas nadai diak saduai ka nampuk agai Bukit Kub Kedaup tauka Bukit Aub kediato.Lebuh malam nya saduai bermimpi dipadah ke orang tuai ngasuh saduai nampok agai Bukit Kub Kedaup ianya Bukit Aub.Nyadi menya Bukit nya amai bisi Batu Kub Kedaup tang diatu udah nyadi batu bejantil pengudah pemarai Tugau tu menya.Sebedau bejurai panjai agi.Aku pen agi mit ditusi  niang aki ensera Tugau tu.Tugau tu kenu jerita tuai asal peturun nabau  Ansie enggau Kumang Bira Bidang Bunsu Nabau ti atai ari Bukit Tibang peturun iban ti dulu nyadi nabau.Tang meda pemendar dua iku melaki bini bangsa madik kitai Tanjung tu nadai purih diak Berindin tauka Tugau tu diberi ka saduai laban sinu ke saduai ia kin kia nampuk ba Bukit minta anak lelaki.Pengudah saduai minta diak bisi takah bulan diak saduai melaki bini nurun nyala agai tasik ba Pasai.Enda mukai mukai ai begelemang(berombak) balat maia tak nadai ribut tak tasik bergelemang tauka bisi lelanggan tauka lenggang ai tasik.Malik saduai ke tengah tasik nadai ga meda utai.Diak ati saduai alit alu enda mukai mukai ari ujan nyala ngujung saduai berkayuh ba pantai jejampat.Datai ba tebing pantai diak saduai alu ngenduh diri ba baruh kayu.Ngujung ujan nyala nyau badu.Pengudah badu diak saduai ka nyala ke tasik tang ia ke indu madah diri takut meda gelemang ai tasik balat agi nyadi ngujung saduai ia ba tebing pantai.Nyadi lebuh saduai ba tikuk(corner) tebing pantai diak saduai ninga anak mit nyabak alu saduai berumban ngiga anak mit nya ngujung saduai tetemu ke telo ti burak sereta telo nya besai pah kitai meh,diak saduai ninga penatai sabak anak mit nya ari telo nya tadi,meda utai nyelai diak saduai ia alu mungkus telo nya enggau kain sereta alu ditaban saduai pulai agai rumah panjai tadi.Datai dirumah panjai diak sekayu rumah alu begau ninga anak mit ti balat nyabak ngenyarih(inggar) nya.Alu puas sida sarumah ngintu telo nya tadi ngujung nyau ka malam ke tujuhnya diak telu nya netas ngemansut ke anak mit ti sigat.Diak ari pen kudik enda lama,kilat kapa pia berdegum ngujung sekayu rumah panjai nya minta tuah minta limpah lebuh pengada Tugau ke dunya.Tugau tu asal amai bunsu nabau Berindin tang diberi apai indai ngambu ia benama Tugau nitih penyelai pengawa digaga ia.Maia mit Tugau empai diberi nama laban puas diberi nama tang Tugau tu nyabak belama ngujung saduai ngaga piring kena begiga ke nama Tugau tu ngujung saduai ia bermimpi betemu ngau Bunsu Nabau ti madah ke nama ia benama Berindin tang saduai ia enggai,enti piak nitih ko saduai meh ka meri nama anak nya ko bunsu nabau tang ia ka parai ngelaban bala Iban ila ketegal saduai meri bukai nama ngujung saduai ia meri nama Tugau nitih mimpi nitih piring saduai.Agi mit Tugau tu diberi penama Berindin udah besai nemu mereti utai diak saduai majak ngangau ke nama Tugau nadai Berindin agi.Jerita tu ku tampung ari bala katuai KP suba laban jerita Tugau tu sigi kering sigi pintar sereta berkuasa ba menua pesisir tebing pantai enggau ia tu meh enti nyelam tasik ba pasai diak suba ulih berminggu ia dalam ai tasik.Pengudah Berindin bado dikanggau alu diganti ngena penama Tugau diak Bunsu Nabau nyau jauh ati ngujung ia ninggal ke rajut aja dikena Tugau udah besai ila.Ba kenang Nirau enggau Encharang suba diak Tugau tu maia biak puas ngayau bala orang Ulu sereta suah betekup enggau bala Ukit belah Kanowit belah Katibas,pengering Tugau tu lebuh ia nyerauh ka dini menua sigi didinga.Lebuh ia batuk,begelemang(berombak) ai tasik ngalun besai,enti ia nempap tanah sigi berenyang bergoncang.Nya meh orang tuai suba ka amai nusi enti batuk balat didinga dikumbai BAKA BATUK AKI TUGAU ENTI BATUK BERGELEMANG AI TASIK ko orang tuai bersema kelia.Tugau tu siku katuai bansa Tanjung ti kering sereta pintar enda ulih dikerakar tang pemati ia ba anak ia empu ketegal ia ka munuh menantu ia.Nya sigi sumpah ia ari peturun apai ia Nabau Ansie enti ia agi ngena nama Berindin angka ia enda mati ngapa.Pemarai Tugau tu nyelai amai ia nyadi nelunsur ari pendam alu nyadi nabau ti ngemai diri ke tasik besai.Nyadi menya suah mega nabau Tugau tu nulung bansa Iban lebuh bekayau lebuh mulau,pengambis ia ayan pengudah jeman dunya bebaik.Nabau Tugau tu suah nulung Kana enggau Munan agi menya suba.Nabau Tugau tu kala  dipeda Nirau ngayan kediri ba Pasai Siong alu keno ko orang tuai nusi ia ngabas purih pantih ia.Nabau Tugau bisi dipeda ayan ba jambatan Lanang kediato alu nabau ia kala ngaram ke kapal Rajah Brooke lebuh Brooke ka  ngemunas bansa Tanjung enngau Iban ba Bintangor enggau Durin.Nabau Tugau tu bisi tisik mirah ba belakang ia alu ba peguk ia bechurak mansau tauka mirah.Nya jerita Tugau ditemu aku ke malam tu ku nusi utai ditusi bala tuai KP suba.Enti nyelai ari ditusi ba pengingat tuai suba ku enda nemu ga laban jerita tu ditusi ujung ujung nyau nyelai ensera nya tadi laban menya maioh dilangkung jerita nya tang aku enggai bakanya nusi laban aku nitih info ari katuai bala KP ke dulu suba ti nusi ti aku tulis ba bup story empu.

Adat basa kediato enggau kediato.

Anak biak penatai ari rumah panjai tau temegah ati enti nemu merau,besual,enggau maioh agi penemu nya.Kemeran meh penemu nya ba ucu icit kitak jemah ila ngica penemu asal kitai enda tebuai jauh ari kitai.Diatu maioh ku meda bansa aku kelalu ngasi ke anak diri ngujung anak diato nyau niki pala apai indai lebuh bejako enda baka kami kelia.Kelia...nadai salah ti maioh penemu tang anang jai enggau apai indai,bejako pen bebasa ke orang tuai.Diato kitai ulih meda ulah nembiak rebak baru,bejako sebubu enda sebulu enggau apai indai.Bisi keduak ia balat enjoy ngujung apai indai nyadi tusah laban ulah bakanya.Laban aku sigi enggai meda anak nyau seredah sigi style menya sida bala anak aku dajar aku.Diato,nyahhh sapa nyamai enda sida bala anak ga.Bala anak dah besai dah bulih ijazah bulih master ari apai indai ti enda kelalu manja ke anak.Kingat madik semua,makin kitak manja ke anak makin tusah sida ia beridup kediri jemah ila ba dunya tu pengudah kitai dibai petara jemah ila.Diato kitai senang tang ba ucu ila angka tusah nya alai kitai anang sesekali bejai pangan diri.Aku ngajar bansa diri laban bansa diri suah nyadi pak turut bala anak nyau tanah dijual ketegal senurut jako anak,baka anak aku suba tak ku anjung agai Ulu Skrang kin kaling bala petunggal ia ngumpul buah engkabang awak nyepi asai ka amai maioh utai pinta,nya lapa deh udah besai pulai ari Auckland kediato ia nemu nyau beterima kasih laban ngajar ia merinsa.Diato aku baru ga nyadi perintis bala ucu.Ahkaiiii...Diato ku nesau bala anak aku enti anak kitak maioh utai pinta anjung agai aku awak ku ngasak ngajar sida idup merinsa tang bala ucu aku nyau gaga pulai laban rindu makai rindu bergumpul ke buah engkabang.Buah engkabang digaga nyadi tapik engkabang selalu dijual aku ba Kuching enggau bisi keduak ia dibeli restoran ga kediato.Bala ucu aku  mereti laban cara dispilin aku ngajar agai anak ku suba dipraktis gai bala ucu.Tau enda salah ka manja ke anak tang belebuh ga,tau meli utai dikingin ia tang nma utai perlu nya dulu dibeli anang sampai berambis duit nyau bejual tanah ketegal senurut jako anak nya kira kelalu.Gidan ati meda nembiak kediato maioh utai pinta.Nasib bala ucu enda bakanya ketegal bala anak nitih dispilin apai sida tu ngajar.Diato bala anak temera aja ba luar negeri bekuli,bersyukur tudah aku laban semua anak genap setaun bisi meniga kali pulai nganjung bala ucu lebuh maia cuti panjai.Lebuh cuti semua bala ucu ngenyapuh ke kebun lada kami duai inek ia ba Kuching.Gaga ati laban bisii ucu bakanya.

Jerita Sulai Penganchau Giling Bidai.

Maia munya kelia ba Sungai Engkarie sebedau pemindah bala Iban kabukai kia suba bisi siku orang bujang ti kering sereta berani.Penama Sulai tu sigi dikelala bala dayak bukai maianya.Suah sida ka ngayau rumah panjai sida Sulai tang sida ambis lenyau pala laban bulu Sulai ninggang sida belama.Nyadi bisi sekali tudah Sulai ngemai nyerang ngayau mulau agai Sungai Skrang kediato.Nyadi kabuah Sulai ngemai ngayau kia laban madi ia ke indu ditaban bansa Ukit ke ulu sungai nya menya.Diak tudah Sulai nyau pedis ati diak ia nyikap kediri alu ngemai ngayau kin.Pemulai sida ngayau naka pemulih nya antu pala ngujung sida berami meniga ari ngempat malam labaan pengaga ati madi ia ke indu ulih dibai pulai ari rumah panjai munsuh.

Nyau berapa minggu udahnya sida sarumah alu bepun bumai alu pia mega Sulai tu tadi tang enda mukai mukai tudah Sulai kena pisa(bisul) ba pah,ba betis enggau ba ciak ngujung tudah tuai enda dapat enggau orang turun kumai maianya.Nyadi orang ke pungka lelaki sigi ambis lengis nurun ke umai alu nembiak redak sereta ke tuai ke enda dapat aja tinggal maia nya.Nyau ka tengahari diak Sulai dipadah siku anembiak  ia bisi meda bala munsuh ba sapiak bukit ari rumah panjai tadi laban ia ngabas panjok apai ia tadi ko ia nusi agai Sulai.Diak Sulai ngenung alu ngasuh sida katuai enggau nembiak belalai ba kampung puang ba belakang rumah panjai.Nama agi deh sida kabukai terudus nurun belalai agai kampung puang mina Sulai enggau nembiak mit siku ti benama Mering.Dasuh Sulai lari tudah Mering tang Mering enggai ka ngetan meenua ka nulung dik aya ko ia madah ke Sulai.Nama agi saduai alu nyikap diri.Ambis sangkoh diperantar saduai genap ruai genap tanju rumah panjai laban kena ngerejang munsuh.Lebuh ka tengahari diak munsuh alu niki alu  manjung kekalau nyerang rumah panjai sida Sulai,seretai nya Mering enggau Sulai nikau ke sangkoh,sekali nikau peda tekesepur buluh enggau sangkoh terengkah ba tubuh munsuh,laban keno jerita tuai Sulai tu enti ngereja pengawa ngena jari sigi jampat nya kabuah buluh enggau sangkoh ulih ditikau bisi bepuluh iti ba seminit ko tusi asal niang Mering agai Encharang alu diripih kami kediato ngena jako minit.Sebedau menya tanju sigi maioh geregar buluh lebuh orang rumah panjai ka nganti geregar buluh nya kabuah buluh maioh diengkah ba tanju ko jerita ditusi sida katuai.Diak Sulai majak nikau,ni kena tumbuk sangkoh enggau buluh sigi mati enti nadai kebal.Tudah Mering pen bakanya meh,lebuh munsuh ngampir ke rumah panjai diak saduai alu bepun numbuk munsuh ngena sangkoh,amai kena sakit laban pisa tang Sulai majak semajak agi ngelaban munsuh tudah Mering nadai dipeda ia tang maioh orang ngelumu Mering tang nya meh,peda Sulai ari jauh peda ia kaki munsuh ambis putus pantap Mering dahnya disimpung Mering nadai kekakang ati.Sulai enggau panjung panjung ngelaban munsuh,ni ka ngampir sigi putus pala,sumpit bala munsuh enda ga sumpit nya tama agai tubuh saduai ia.Ngujung kira ngalih mua panas ke lemai kira pukul 3 bakanya meh kediato ngujung munsuh ambis mati.Udahnya saduai sama bejalai mumpung pala munsuh alu tubuh bala munsuh dengkah Sulai ba Giling Bidai ngujung tubuh mensia nyau bedunjung bisi sembilan itek giling bidai penuh enggau tubuh munsuh.Sulai meda Mering tak nadai rusek ba tubub mina ia meda Mering baka nembiak ti bisi penemu ti bisa.Mering megai pala katuai munsuh ti ulih ia tadi.Mering ngambi pala tuai bala munsuh aja alu Mering enggau Sulai alu mandi alu makai.Nyadi kira ka lelemai ari dinga bala pungka lelaki enggau sida ke indu pulai ari umai.Datai di ba laman rumah panjai sida terkenyit meda bangkai mensia nadai pala enyau betugung ba mua rumah panjai.Nyau tacoh sida tadi alu niki jejampat ke rumah panjai dinga orang rumah panjai benung richah betusi pengering Mering enggau Sulai munuh munsuh nya tadi.Nyau rerangap sida ia laban ngelamatu tudah Mering dikumbai bisi ngembuan sakit ampus tau terulih munuh munsuh ngemaioh nya.Nyadi selemai lemai nya meh sida bekenang jeriita nya ngujung Sulai diberi penjuluk Sulai Pengancau Kayau Giling Bidai.Pengudahnya Sulai ngemai bala Iban pindah agai Skrang,ngujung bala Iban kabukai nitih pindah kia.Sulai meh perumpang menua Skrang agi munya suba.Ba pengingat tuai lain ga jerita ia.Nya meh aku enda nemu laban ketemu aku tu meh ia.Baka kitai Iban ba Johor meh,maioh madah diri diau lama ba Johor din.Ngujung orang asal ke ngempu nama nyau nadai ditemu agi.Kekadang jako ditampung salah info ari tulisan.Nya aku bantai ditu.

Ensera Munan Orang Kaya Padi.

Ba Sungai Kapuas,menua nya penuh ngau kitai iban enggau memaloh agi menya suba.Nyadi bisi siku indai tuai orang benama Nanti ti beridup merinsa enggau ucu ia ba langkau umai alu kediri ari orang rumah panjai.Nyadi ucu Nanti bisi ngempat iku alu ucu ia ke tuai benama Munan.Nyadi Munan tu sigi manah ati sereta rurus pendiau.Nyadi sari sitik lebuh sida sebilik nadai berau agi diak inik Nanti ngasuh Munan nyanda berau besilih ke pua kumbu enggau beras.Nama agi deh,nurun meh tudah Munan ngemai pua kumbu nuju rumah panjai agai tuai rumah.Lebuh datai pemendai rumah panjai diak Munan tepeda ke tuai rumah benung ka nating ukoi ia ti kaka,siku indu siku lelaki ukoi ka ditating ia.Laban ke sinu ke jelu tupi diak Munan ngemai tuai rumah besilik,nyadi dua iku nya dempu ia alu pua kumbu nya dempu tuai rumah nya tadi.Naka meh pengaga ati tuai rumah nya tadi alu Munan ngemai ukoi nya pulai tadi ngujung datai ba langkau sida meinik diak inik ia  nanya ni berau disanda ia tadi ngena pua kumbu ngujung Munan nunjuk ukoi dua iku nya  tadi.Tak ngilik pala aja meh inik ia tadi,alu inik ia nurun ke tanah alu numbak ngiga buah ubi ke diipakai kelemai nya.Pagi sitik diak inik ia ngasuh Munan baru agai rumah panjai bala memaloh kulu ngasuh ia nyanda berau disilik ngena pua kumbu baru.Nurun ga  Munan kulu ngemai pua kumbu,datai ba pemendai rumah panjai tadi diak ia meda tuai rumah bansa memaloh tadi ka nating anak mayau  dua iku,siku indu siko lelaki laban anak mayau nya maioh ko tuai rumah nusi agai Munan.Diak laban Munan ke kasih jelu tupi alu ngemai tuai rumah nya besilik mayau enggau pua kumbu mega ngujung tuai rumah nya gaga ati besilik bakanya.Udah besilik tadi diakk Munan ngemai anak mayau nya pulai gai langkau sida ia tadi ngujung inik ia nanya diak Munan nunjuk ke anak mayau nya disilik ia enggau pua kumbu.Laban inik ia ke mentas diak inik ia berumban nurun kediri empu nyanda beras agai rumah panjai sereta pulai ngemai  beras kelemainya.Nyadi lebuh ukoi enggau mayau nya  dintu Munan enggau manah ngujung ukoi nya badu kaka agi alu mayau nya mega makin ari makin besai alu pia mega tudah Munan.Nyadi lebuh maia musim bumai diak inik ia pen bumai,alu Munan suuah ngemai uduk bejalai alu suah mega bulih jelu kediri Munan enggau ukoi ia mega ti ngasuh sida sebilik belauk belama maia makai sereta maioh minyak inyak jani dikena ngoreng kue empasa agi menya.Lebuh musim ngetau maioh siida sarumah sebana,padi ammbis diempa jelu enggau cit tang enda nyadi ba sida Munan sebilik,jelu enggau cit enda berani negu palan umai inik ia Nanti laban mayau enggau uko enda pulai ke langkau tembu bemain ba umai enti enda dikanggau makai sigi enda pulai ke langkau.

Inik ia Nanti tak alit ati meda ukoi enggau mayau nya baka ke ngibun umai sida nyentuk ukoi ke indu beranak pen ukoi nya tak sebaka magang nitih ke jako Munan sereta mayau nya pen bakanya.Nyadi taunnya padi sida sarumah panjai enggau bala memaloh ba ulu din nyau mimit aja diketau tang enggi sida Munan tak penuh langkau laban pemulih padi.Enyau begaga  ke langkau baru Munan enggau inik ia laban padi enda cukup ba tibang.Ba taun kabukai bakanya  ga asil padi diketau Munan enggau inik ia ngujung Munan berangkat bujang amai alu madik Munan pen bujang alu ke indu pen dara.Munan enggau inik ia nyau nyadi kaya padi kaya bulih utai ari penyinu Munan ke jelu tupi.Manok naka pemaioh,jani enggau itit naka pemaioh,ukoi ia suah diasu ke Munan alu mayau nyaga tibang nyaga umai ia lebuh Munan bisi pejalai.Nyentuk inik ia lesi diak inik ia meri jako agai Munan sebeedau inik ia Nanti lesi,pemanah penyinu nuan ucu ke mensia ti merinsa enggau penyinu agai jelu tu meh ngasuh nuan bulih utai ba dunya tu,berterima kasih kitai agai orang ngenyai ke kitai laban antu badas nasit sida ke manah ila pulai agai kitai ba jemah ila,anang malas pengenyai orang enggau pengenyai kitai.Entii kitai jai ka bakani pen badas sigi kitai dikumbai jai belama,ka bakani kitai badas enti kitai jai ba ati petara sigi enda ngemana ke pengidup kitai jemah ila,anang kitai kekakang ati lebuh nulung orang ti merinsa,kitai makin disumpah dipejai enti kitai enda jai enggau orang utai nya tepulai  baru gai ia laban nasit tauka antu badas ari ia sigi ka nulung kitai jemah ila.

Pengudah inik ia Nanti dibai petara pulai diak Munan makin ari makin tampak rita ari pengaya bulih padi naka pemaiohnya genap taun.Nyentuk tuai rumah panjai iban enggau tuai rumah memalohnya suah nyanda beras enggau ia sereta pia mega sekayu menua Kapuas ti ukai munsuh sida sigi bekuli ngetau padi sida Munan sebilik.Munan mega siku katuai kitai Iban ti berani,kempang ati enggau munsuh sereta Munan tu meh bisi batu penau jelu.Enti jelu ninga munyi kensung ia sigi nunduk ke ia pengudah Munan pindah agai Batang Engkarie agi menya suba.Bilik Munan dibun madi ia ba Kapuas din alu rita madi Munan benama Antau tu sigi beberita bulih padi agi menya suba.Munan pindah nitih madi indu belaki nguai ke Engkarie menya suba.Munan tu meh kitai iban ti kaya enggau padi menya suba.Keno ko jerita tuai bisi seratus pintu langkau padi ia aja ba kapuas menya suba alu bakanya ba Batang Engkarie.Ambis jerita aku tak naka tu aja au madi.