Jerita Jeniah Bercabang Lidah part 9.

Berkericau burung semalau,cecuie burung tuie nanda ari ka pagi,berengit munyi gerengit,cecuai bunyi burung ruai di kampung puang tuai.Jeniah alu encelak mata ninga munyi pengerak pagi nyau ngeregau dinihari alu ia nilik ke pemendai langkau meda ai sungai agi bah.Diak Jeniah alu ngidup ke api tempara kena berkindu kena ngangat ke esik laban pagi nya naka penyelap sereta naing pansuh jani kemari.Nyadi sida kebukai bedau agi tindok laban pagi nya naka penyelap ketegal semalam malam ujan,enggi tudah Guntur bendar melukuk ke tubuh berpua ngapus ke tubuh laban celap.Semina Jeniah ke dani tumu maia pagi nya alu bala penyaga agi tindok ketegal celap mai ke malam tadi.Udah Jeniah ngidup api tempara enggi ia,diak ia alu ngidup tempara bala pengayau kebukai,udah kena daing pengangat api nyau majak agi keduak ka tindok.Nyepi bisi kena daing pengangat diak Kisuh terdani alu malik ke tempara diak ia meda anak ia Jeniah benung kiruh ngalih ke pansuh lauk jani,malik ia ke tisi diak ia meda tudah Guntur dani alu duduk ngimbai Jeniah ti benung duduk berkindu ba api tempara.Seduai ia enda bejako dipeda Kisuh ari jauh lalu meda jari Guntur murus pala madik ia Jeniah.Lebuh meda pemanah Guntur enggau Jeniah,diak Kisuh nyau belai ai mata laban ngenang diri jai enggau Jeniah ari mit nyentuk ka berangkat bujang.Agi Kisuh ingat ia kala ngurung Jeniah ba tibang padi lebuh Jeniah agi mit ka mai ringat ketegal ia berat sapiak beciping magi kasih sayau enggau bala anak.Kisuh mejam ke mata ka tindok baru.Ko Jeniah laban lemai negi bisi pengabang atai agai rumah panjai bala munsuh laban bisi gawai lelabi nyadi ke malam negi ti ba Rumah Panjai Dillai laban siko orang bujang ngambi anak dara Dillai ngena pala ti ulih ia mumpung pala bansa dayak.Jeniah bulih berita nya ari Bunsu Antu Indu demalam lebuh sida nurun ka ngabas ka meda rumah munsuh diak ia bersampi ngasuh Bunsu Antu Indu nya nulung ia nyidik sereta meda rumah panjai bala munsuh.Lebuh Jeniah tindok diak bermimpi Bunsu Antu Indu nya madah utai baka nya enggau ia demalam tadi.Nyadi akak ia Guntur madah ka enggau ia kin negi enti bakanya ko Guntur madah ke Jeniah.Jeniah ka aja ngemai akak ia Guntur kin ngica madik ia Guntur tampak rita jemah ila baka nama ia ila.Lebuh sida bukai terdani magang diak sida sama bertusi mimpi nya magang enggau pangan diri ngujung lebuh meda Jeniah sida ia meri tabi basa agai ia,sereta rindu ka berbakih enggau Jeniah,alu pia mega Dumbang nyau rindu ati meda Jeniah bisi enggau sida ngayau baka dajih Jeniah nya enggau sida ngayau bala Dillai.Nyadi maioh meh kaban sebakih enggau Jeniah pengudahnya laban Jeniah to pengangkat kayau jemah ila ba kenang mimpi sida tadi.Nyadi lemai diak Jeniah madah diri enggau akak ia Guntur aja ka nyidik rumah panjai munsuh sereta lebuh sida ninga palu tawak 8 kali bergemong panjai nya tanda sida tau nyerang munsuh ari pintu kuta,tisi bayar rumah panjai alu ari belakang rumah panjai.Ninga sempekat Jeniah bakanya diak Dumbang enggau sida kabukai sama bela setuju.

Lebuh Kisuh tindok diak bisi bermimpi bertemu enggau Sengalang Burung enggau Sempulang Gana ti madah ke Kisuh,nyadi sida Kisuh enda tau dulu ari Jeniah lebuh sida pengayau Dayak nuntung ba rumah pagila laban enti sida dulu sida ia ka menang ngayau tang maioh bala pengayau mati,mina Jeniah ja ke idup.Nyadi ba mimpi Kisuh ia meda kayau sida endang amai menang tang ia maioh sida pengayau dayak ambis lesi peda ia.Penyelai ia meda diri kena tetak ba lengan enggau kaki,sebedau ia malik ke belakang meda Jeniah berlanda tang Kisuh ngasai diri dipumpung munsuh.Lebuh ia terdani baru ba dalam mimpi ia diak meda Jeniah dulu tang penyelai ba diak sida meda rumah panjai munsuh ambis angus sereta ia meda Jeniah megai pala Dillai ti besai sereta antu pala naka pemaioh ulih sida.Lebuh nya alu temejul baru Sempulang Gana enggau Sengalang Burung,nyadi ko saduai ia,ni pilih kitak bala maioh,ka mati maioh tang menang tauka kitak menang tang nadai pemati bala kitak enti Jeniah dulu.Ukai Kisuh aja bermimpi nya tang sida pengayau enggau ketuai bansa bukai sama bermimpi bakanya magang.Guntur dulu agi bermimpi lebuh sida nurun ari rumah panjai Guntur udah bermimpi bakanya,nya meh ia selalu berdamping enggau Jeniah laban ia nemu mina Jeniah aja ulih meri sida ia menang nadai pemati pengayau bala dayak.Ngenang Jeniah lebuh dipayuk akak ia Guntur diak ia ketawa aja alu saduai bertundi.Lebuh bertundi diak Jeniah madah agai akak ia,lemai negi ia ka mansik ka nyidik rumah panjai munsuh ke lemai negi. Nyadi lemai nya saduai menyadik alu ngunsut diri ngena arang alu ngecok mua diri ngena tanah ladu burak alu ngukir diri baka bansa Tanah nya tadi laban ka nyaruk diri bakanya.Nyadi kelia menya kitai enggau bansa dayak kabukai sebaka jako enggau bansa Tanah sebedau tangga batu Bejie pambar ninggang mua ari.Nyadi saduai menyadik mupuk nuju rumah panjai munsuh alu saduai ba rantau jalai diak saduai maioh terpeda bala pengabang bansa Tanah nyau bertawing tawing laban ke mabuk ngirup lebuh ba rantau jalai.Ni keduak bala bujang enggau sida ke dara bansa Tanah benung gauk meh belah pemendai,bisi keduak melampin belah rantau jalai.Naka pengerami sida Dillai tadi maia nya,lebuh Jeniah enggau Guntur mansa diak tadi maioh meh sida ngemai saduai ngirup tang Jeniah enggau Guntur madah diri udah mabuk alu ngaga diri baka orang ke mabuk nya meh seduai menyadik ia tadi.Atai saduai ba senentang pintu kuta munsuh,malik Guntur ke pintu kuta munsuh peda pintu kuta munsuh naka peninggi sereta tebal diapit kayu terbelian ngemesai lima pemerap,tak alit ati Guntur meda pemintar bansa Tanah ngaga pintu kuta bangat ngeningi nya.Jeniah alu narit jari akak ia Guntur tama ke dalam kin.Datai din saduai alu niki rumah panjai sida Dillai.Alu didinga ketawa lelekai,munyi gerunung munyi tawong munyi gong ditebah sida ba ruai.Tama saduai menyadik keruai diak saduai meda orang naka pemaioh nya mensia ti benung ngajat benung bibat benung berpantun benung beramban benung ngirup betapat  jalung.

To be continue.

Jerita Jeniah Bercabang Lidah part 8.

Nyadi udah nurun ari bukit diak bala pengayau alu ngaga langkau pengayau ba emperan sungai tadi.Diak sida enggai ngansak semak kira mendua bukit baruh takah ari ulu rumah munsuh diak sida alu ngaga langkau sereta bala penyaga alu bertiki pun kayu ngemata ke munsuh angka bisi damping enggau sida ia.Nyadi Jeniah enggai berlangkau damping sida apai ia Kisuh laban ia ngenangi ka nyaga apai ia Kisuh,diak ia ngaga langkau kediri enda entu jauh ari ngimbai langkau apai ia Kisuh.Diak Jeniah alu ngaga langkau pia aja kena nyaga apai ia Kisuh enggau akak ia Guntur.Daun senggang alu dibap aja atas langkau laban enda nemu ngaga atap langkau ke manah baka enggi orang.Apai ia Kisuh enda kibuh ke ia ngaga langkau kediri laban apai ia Kisuh kiruh nyaga Dumbang alu Guntur mega benung berajar nyadi penyaga langkau pengayau ari orang ke pandai nyidik munsuh.Udah Jeniah ngaga langkau kediri empu diak ia alu madah agai apai ia Kisuh laban ka birak ko ia.Udahnya Jeniah alu nikal ke bukit katas nganjung diri birak,lebuh atai ba tuchung bukit diak ia alu birak,diak ia ninga munyi orang berandau ba tisi pun wie sega.Diak randau orangnya madah tak nadai geguna mensia ko orang nya bejako,alu ditimbal siko dak agi orang tadi madah enti bakanya nyamai sida munuh mensia aja enti sida betemu enggau mensia ko ia.Diak puas Jeniah nyeling ari bandir kayu diak ia terpeda kedua iko mensia,tubuh ia semut tang pala ia mensia,alu siko dak agi tak antu bandir dipeda mata Jeniah.Jeniah sigi enda takut laban ia ngerunding samoa antu enda ulih munuh ia mina antu gerasi aja enggai meda Jeniah.Alu beguai Jeniah angkat ari birak alu nuju agai seduai nya berandau,ensepi nyium bau mensia diak antu dua iko alu ngadang penatai Jeniah.Lebuh seduai ia meda Jeniah datai kia megai kapak diak saduai ia nemu nya meh ucu ambu Sempulang Gana.Seduai alu merap Jeniah laban pengaga ati bertemu enggau ucu dasie Sempulang Gana ia nya Jeniah Bercabang Lidah.Lebuh seduai berandau enggau Jeniah diak Jeniah alu nanya nama kabuah seduai ia ringat amai agai mensia.Diak seduai madah tadi bisi bala pengayau enyau kemik sebarang alai mancing pun bandir kayu alu birak peneka ati ti ngujung rumah aki Bunsu Semut Engkeranjang bau tai sereta bau but ko aki Bunsu Semut nya madah.Alu aki Antu Rerengir Bandir madah anak mensia kemik ba pun bandir nyau terkena ke ai irup ia ti ia simpan ba tisi bandir sereta meri rumah ia bau kesing ngujung indu manyi maioh nutu rumah ia.Meda kenya diak Jeniah nanya keni enti mensia enda sengaja terkemik enggau terbirak ngapa keni kena nyeliah chara jalai awak sida ia mindah dulu ari kena penusah ari ulah mensia bakanya.Diak Bunsu Semut madah enti ia enggai ngampun mensia ti mensia nya enda nyedia kayu rangkai maia birak,ti enda sida ia sigi diketup ia ti ngujung mensia nya mati.Ba jerita orang ketuai Bunsu Semut Engkeranjang to amai bisi,enya meh enti birak ba kampung puang nadai ai sungai diak orang ketuai bersengkilo ngena rangkang kayu ti udah mati alu bisi nyedia kayu ba tisi lebuh birak ngica kayu nya tadi kena anakbiak Bunsu Semut nunu tai nya tadi awak enda bau but agi.Enti enda disedia kayu enya diak mensia nya ka bulih penusah ti Bunsu Semut empu datai ngukum mensia ti ngujung mensia nya sakit.

Udah nya diak Aki Antu Rerengir Bandir madah ga agai Jeniah enti sida mensia ka kemik ba bandir,sida tau kemik tang minta pemendar dulu bejako madah diri ka kemik numpang rumah ia,udah kemik nya diak mensia mesti ngeludah ba senentang ai kemik nya ngica Antu Rerengir Bandir nemu nya kemik mensia ti minta pemendar ari ia,enti mensia nya kemik enda ngeludah kemik nya diak Antu Rerengir Bandir tadi ka meri utai mensia nya kembai,lusung(kurap),gatal merah sereta kabukai.Udahnya seduai ia mekat ba Jeniah seagi dunya bedau pantang nya sigi tau dikena lalu seduai ia enda ngacau mensia enti udah nitih atur baka dipadah seduai ia nya lebuh kemik enggau birak ba kampung puang.Udah sida tiga berandau diak ari pen enyau ka sesilau dipeda diak sabuat alu berserara,seduai alu merap Jeniah.Jeniah pen alu nurun ari bukit tang lebuh nurun ari tuchung ari bukit diak Jeniah meda bala jani benung belalai ba resam laban ninga derap kaki mensia tadi,diak Jeniah alu megai sangkoh ia,nama agi deh tak Jeniah rejang ngapa sangkoh dinga alu terkuik ja bala janik mati,udah nya Jeniah ngumpul janik dibunuh ia ngena sangkoh tadi,peda berdunjung ninggi tempara tuai pemaioh nya.Nama agi deh tak pantap Jeniah kayu mesai betis kena ngesan janik nya tadi.Udah ditanchang manah ia ke ulih bai ia mina 6 iko aja janik ti mesai sepemerap alu Jeniah pen nurun agai langkau pengayau tadi. Datai ba langkau pengayau diak madik ia Guntur alu ngapo meda utai desan Jeniah enda ngipak tubuh ia ke mit nya.Sida pengayau pen baka nya meh,diak Jeniah madah agi nubah janik ulih ia tadi ba tengan bukit ko ia madah,ninga utai bakanya nyau besepur bala ke bujang pengayau niki ke bukit laban ka napat ngemai ngesan janik ti maioh lebih ari Jeniah.Nama agi deh janik ti dibai Jeniah tadi alu di intu sida ketuai magang alu nganti penatai sida ke bujang pengayau ari bukit ngemai janik dengah Jeniah tadi diak ketuai makai tunu janik.Ngenang sida nya tadi,datai ba tuchung bukit diak madik ia Guntur nyau rerangap meda pemaioh janik udah dibunuh Jeniah tadi.Alu ia tadi ngiga kayu mesai betis alu dipantap ia udahnya kena nanchang ngemai janik ti dah mati nya tadi,sida kabukai pen ngaga bakanya magang.Ngai enda luba luba ga kaduak sida tadi alu nanchang nyau ngelapan iko janik ba kayu pengemai nya tadi lebuh sida ia ngangkat kayu pengemai nya tadi nyau ambis terkentut kentut sida ngangkat kayu pengemai ti bisi janik ditancang ba kayu nya.Meda enda alah magang diak sida tadi mina ulih ngemai dua iko janik ti mati nya tadi tang enggi Guntur tak ngesan ngempat iko janik nya tadi.Alu nurun sida ari tengan bukit datai ba langkau sida alu nyau engkecit ke ai sungai laban aus ngemai janik nya ari tengan bukit,peda sida ia katas meda Guntur enyau gegaring narit seput laban eikak enggau lelak ngesan janik nya tadi.Jeniah tuchum aja meda ulah akak ia Guntur ti ka mekit ia,enggi Jilum anak Dumbang nyau ngecit ba tancut ngemai tiga iko janik aja.

Keno ko napat pengering pangan diri laban ia ka mantai diri kering ba mua orang entabanyak diak.Udah sida ketuai ngintu janik tadi diak Jeniah nukung kediri ba langkau ia nganti orang ngangau makai aja,lebuh ia nukung kediri diak madik ia Guntur ti baru tembu begari pulai ari mandi alu duduk ngimbai ia.Guntur nanya ia,nama utai kena Jeniah ngangkat janik ti bangat ngemerat nya sereta enti ulih magi ia mimit meh pengering nya ko Guntur minta ba madik ia Jeniah enggau ati andal.Laban Jeniah ngembuan ati sinu ke madik ia Guntur diak ia alu murus tengan bahu Guntur udahnya ia alu netak tengan bahu Guntur ngena jari bisi menujuh kali diak Guntur berasai tubuh ia kering agi sereta seput ia enyau lantang agi asai ia.Guntur alu merap madik ia Jeniah,alu bedanji enggau Jeniah ia sigi nyagu madik ia nyadi tuai kayau ila enti Jeniah nyadi orang beberita ila.Alu dedinga aya Berinau ngangau makai ba tengah ruang langkau pengayau,bala maioh entabanyak alu makai magang tang sida enda inggar makai laban pakai orang kelia sigi enda inggar sereta jampat makai laban makai kenya kena nyeliah diri lepie lebuh munsuh atai nyerang tauka maia lari ari digagai munsuh.Udah makai lemai diak sida sama ngali kediri empu mina bala penyaga ti pucuk kayu enggau ba tanah ti agi makai laban besilih nyaga langkau pengayau.Pemaioh pengayau maia nya sigi maioh nyau penuh emperan alai sida berlangkau.Nyadi Jeniah pen gali duduk meda unggun api ba mua langkau ia.Tak enda mukai mukai ari ke lemai nya enyau kemesek nanda ari ka ujan balat nyadi alu nitar bermunyi bedegum ba langit mancar pemetang malam alu besereta ngau nya ujan enggau angin bersiuh bermunyi nanda ari ka kudik enda lama dak agi.Empai ambis sebatang insap daun ukam diak ari alu ujan naka pemalat nya,nyau tacoh bala pengayau ngadu ke atap daun senggang tadi laban tudoh enda rapit di adu sida tadi,malik Guntur agai langkau madik Jeniah peda ia madik ia tembu ngemata ke api ba luar langkau ia empu.Lebuh Jeniah malik ke tisi baru Jeniah nemu ari ujan balat diak alu reraoh ngangau ke apai ia Kisuh enggau Guntur ngalu ke langkau ia ti nadai ditinggang ujan.Meda baka nya diak Kisuh enggau Guntur pen ngalu ke langkau Jeniah,Dumbang pen nitih alu sida ketuai pengayau pen bela ngalu agai langkau Jeniah.Lebuh sida ngenduh diak Dumbang kasih meda bala pengayau kabukai berlanda kin kia ngiga alai ngenduh diri ari kena tinggang ujan sereta ribut,nitar enggau ujan balat laban ari maianya kudik.Diak Dumbang minta kasih agai Jeniah enti Jeniah ulih ngaga endur sida pengayau bukai baka enggi langkau Jeniah ti nadai ditinggang ujan setitik pen.Diak Jeniah nadai maioh jako alu ambi ia kapak ia empu alu dujak ia ba tanah peda tak sengenyap senentang emperan nya nadai ujan enggau ribut,tak alit ati magang sida ia meda leka ujan baka ngelari kediri ari ninggang emperan nya ari peda pancar unggun api Jeniah.Udah nya sida pengayau alu mulai kediri ke langkau diri empu tang penyelai baru ga nyadi,tak semua ai ujan ti ngemasah langkau,perengka senentang emperan langkau pengayau tak niki magang katas alu terebai ketisi nitih leka ujan kabukai.Nyadi malam nya Dumbang ngasuh bala pengayau peyidik nuju agai rumah munsuh laban dasuh nyidik bakani gaya rumah panjai munsuh maia nya.Nyadi Kisuh pen enggau sida nya,sereta meda apai ia enggau Jeniah alu angkat ari penindok alu madah diri ka enggau nyidik rumah munsuh.Tang Kisuh enda nyagi ia enggau tang majak Jeniah minta kasih ke apai ia ka enggau.Meda bakanya diak Dumbang ngasuh Jeniah enggau aja tang Kisuh majak nganu Jeniah tang ditimbal Dumbang,bisi pemanah enti Jeniah enggau sida ia nyidik kin ko Dumbang laban Jeniah ulih besadong jerita enti sida bisi penusah ba rantau jalai.Meda baka diak Kisuh bado memunyi agi alu ngemai Jeniah.Datai sida ba pemendai diak sida nyau terkenyit meda ai bah nyau ngilah pucuk ensurai pemesai ai bah tang sida benasib laban langkau sida pengayau ba emperan ke tinggi ari ampuh bah.Meda baka nya diak Kisuh ngemai bala penyidik nikal pulai baru alu madah agai Dumbang ti sungai bah naka pemesai.Tudah Dumbang alu ngasuh sida tindok aja laban pagila sida ia ulih nyidik menua rumah panjai munsuh.Nyadi malam nya sida pen tindok alu Jeniah pen tindok ngimbai akak ia Guntur ti tindok ba langkau digaga Jeniah.

To be continue..

Jerita Jeniah Bercabang Lidah part 7.

Nyadi pengudah tembu makai,diak bala pengayau alu ngali kediri ngetat pengelelak bejalai seari ari tadi.Lebuh gali diak sida berkenang to meh terubah ia sida nyepi pengelelak, jampat lepie,aus,enggau tubuh berasai berat baka ditating batu kaki ko keduak ia bekenang nusi jerita ba lebuh bejalai maia siang tadi.Tudah Jeniah enda entu lelap mata laban berasai enda nyamai isik.Lebuh sida berkenang tadi,enda mukai mukai sida pengayau bala dayak enyau tersium bau renggut mansa ari ulu,naka pemau rengut baka bungai malam ari sereta wangi. Diak sida ketuai ngasuh nembiak anang richah anang inggar nyepi nyium bau utai bakanya.Makin sida enda bermunyi makin ga bau renggut nya balat agi ngesuh nepuk.Enda mukai mukai bisi anembiak siko ti enda tan ati laban bau renggut nya majak ngesuh tadi sereta ia baru terubah enggau bejalai nurun jauh ngayau diak alu terpansut ke leka jako madah naka pemau renggut nya tadi.Lebuh ia ka ngambis ke leka jako tak semetap mulut ia ditampar alu dipampul apai tuai siko ti ngimbai ia diak sereta sida kabukai pen alu nyau melut ke leka mata magang agai anembiak nya tadi.Tang Jeniah nyium bau nua tak bau but mensia disium ia baka bau bangkai mensia.Nyau bisi bisi dua kali nginsap sempama ko orang tuai,alu enda mukai mukai diak ketuai dayak bansa Kenyah nawih tubuh Dumbang alu mulut ia ngasuh Dumbang meda kulu.Nyau sama malik kulu magang sida pengayau tadi,peda tak penuh karangan ulu enggau api lampu buluh ti berintai datai ari ulu.Diak sida ke diak sama ngerak pangan diri ni bagi ke tindok,sida alu ngepan gari kayau alu sedia ngetan. Dumbang alu narit tubuh anembiak nya tadi alu sida ia alu ngunsut tubuh nembiak nya ngena tanah ladu alu ia dilalai ba pun buluh,alu dijagaa sida kabukai din magang.Dinga ari ulu nyau kedumu aja nyawa orang bejako berandau baka orang indu.Diak Kisuh jampat narit jari Jeniah ngampir tisi ia,alu Dumbang ngasuh bala kabukai nyedia diri laban utai datai nya ukai mensia ko Dumbang madah.Bisi kaduak gegetar kaki tang Jeniah duduk aja ba tisi apai ia Kisuh.Lebuh orang nya datai tadi,dipeda ari senaya pancar api tak berupai bala sida indu dara naka pemaioh nya ga.Diak sida indu dara alu nanya,nyadi ke enda langkau sida ia ditiki bala pengabang indu dara tang Dumbang madah enti sida niki sigi dipumpung sida ambis indu dara nya negi ko Dumbang madah udahnya.Alu reraoh ga indu bukai minta kasih meh ko sida ia laban sida ia ka gauk enggau sida bujang berani ko nala indu nya madah.Tang Dumbang madah enda tau buya kami mensia kitak nya ko Dumbang madah.Ninga Dumbang majak bejako kenya ti ngujung sida indu to alu ketawa lelekai alu terebai kin kia ngacau alu ngeregau bala pengayau.Ni bisi penemu naka ulih meh muka leka sampi bisa tang enda meh antu indu nya lari ari ngacau sida,nyau balat sebalat gik antu indu nya ngacau sida ia.Ni ke ulih alu dempa sida antu indu tu ba ucu ugai meh sida ia tadi,meda utai bangat ngeraya nya ngacau sida pengayau kabukai.Diak Jeniah alu mantai kapak ia alu didaing ia ba api buluh sereta alu dipancar ia ke langit.Seretai nya ari senentang sida ia ba diak alu tawas baka bisi matahari ba malam ari senentang urung nya tadi.Peda alu temepak bala antu indu tadi ari pucuk kayu.Ambis keduak ia belalai belah nisi bandir,ni enda sempat belalai alu angus alu ancur meh antu indu nya tadi.

Meda bakanya diak Dumbang alu nyekak rekung ketuai antu indu siko sereta alu ka munuh sida antu indu nya tadi.Tang Kisuh madah anang munuh sida ia ko Kisuh.Diak Dumbang alu nanya bakani chara pucau tau meri sida antu indu tu lari enti sida antu indu tu ngacau anak mensia agi.Diak tuai antu indu nya ka enggai madah tang udah meda ketuai dayak bansa Penan majak mumpung pala antu indu kabukai tadi laban tuai antu indu enggai madah leka pucau nya tadi ngujung ketuai antu indu madah leka pucau nya tadi.Meda udah leka pucau nya tadi ditemu, diak sida sama ngingat magang leka pucau nya tadi tang ti kabukai sebut sida ia sigi enda ngasi leka pucau nya.Nyadi maia nya Dumbang ngaga sitik pagar ari leka pucau ketuai antu indu nya tadi.Ko antu indu nya madah,barang sapa mensia nemu leka pucau nya sigi dikacau sida ia laban sida ia ka nguji ngasi ke enda leka pucau enya ba sida antu indu. Pengudah antu indu nya dilepau Dumbang diak ia ngasuh Jeniah bado naing kapak ia ngimbai api buluh.Diak semalam malam nya sida pengayau berkenang penemu Jeniah ti bakanya. Nyau enda berasai sida pengayau pen tindok,Jeniah pen tindok tang Jeniah bisi bermimpi bertemu enggau Bunsu Antu Indu ti madah agai Jeniah,ti Jeniah nadai ngembuan Kapak Mua Ari ti ditempa Sempulang Gana udah lesi udah bebadi magang sida ia tadi laban bisi antu indu kabukai ka ngesah sida tadi tang benasip endar Jeniah bisi ngembuan nya.Bunsu Antu indu alu madah ke Jeniah ia minta ampun laban sida salah kacau salah regau enda ngelala ucu ambu Sempulang Gana ti megai dunya sebayan enggau dunya nyata.Bunsu Antu indu tadi alu meri Jeniah leka pucau ngangau bala antu indu enti Jeniah beguna ke sida ia lebuh berkayau jemah ila.Pengudah nya Jeniah alu terdani tindok sereta alu angkat nyau agi kabus ari pagi diak Jeniah malik ke tisi sereta ia meda bala pengayau dayak agi tindok magang laban buntau gagau diregau antu indu demalam.Nurun Jeniah ari langkau alu birak ba sungai,udah birak diak Jeniah terpeda ke akar tubai ba tebing.Jeniah alu mantap akar tubai nya tadi alu ia berjalai kulu,seretai nya ia alu nubai lubuk panjai nya ari ulu,udah dikirah alu dipalu ia tubai tadi nebing lubuk.Bisi mendua insap ukam bertampung dinsap tadi,diak meh ikan ke mesai capan mesai pah nyau terpejul mabuk ari dalam lubuk.Makin lama gik tudah Jeniah nganti makin maioh agi ikan mabuk.Meda bakanya diak Jeniah alu angkat alu ngumpul ikan kebesai aja ia ke mit mesai betis delak ke ia aja. Dangkut Jeniah ikan ke tebing pemendai langkau,udah diperuti alu ditetak Jeniah nya tadi.Alu ia ngiga buluh kena mansuh ikan nya tadi.

Pemanjai rintai pansuh bergembar mendua dintu Jeniah bisi pemanjai seratus pintu,agi nubah meh ikan maioh ba karangan ulih Jeniah nubai tadi.Meda utai berembun berasap tepok pansuh Jeniah diak bala jaga alu dani alu seretai nya kaduak pengayau nyau terdani magang laban ensium utai berasap balat.Nyau ngapo sida bala pengayau meda pemanjai rintai pansuh ikan ulih Jeniah.Diak sida pengayau sama angkat magang sama ngintu ikan kabukai ti ulih Jeniah nubai tadi.Udah makai,laluh pansuh alu disimpan,diak bala pengayau berkena ngepan gari ngayau.Jeniah alu nawing apai ia Kisuh belama sereta Guntur dudi.Serak to Jeniah dulu ti ngujung Jeniah bejalai naka peneras naka pengelaju,alu pia mega bala pengayau kabukai tak ngasai tubuh lempung,enda eikak,enda aus sereta ngasai pejalai sida laju belama.Enda berasai udah ngilah tiga itek tuchung bukit pengudah Jeniah dulu ari sida ia.Kisuh pen ngasai bakanya,ba temilah Jeniah bisi ditepuk aki Remaung Gana petunggal Sempulang Gana ti bisi ngembuan pengaruh bisa ba dunya ia nya Pemintas Jalai Pemandak Menua. Pengaruh tu kala dikena orang ketuai kelia pengudah pemati Jeniah, bepun ari Banyan,Gindam, Sandom, Ukau, Ekau, Dinggun, Rantai, enggau pengambis jeman nadai ditemu agi dipegai Balang maia taun 1888.

Keno ko jerita tuai pengaruh to agi ngiga orang ti bidik ngibun utai laban to asal pengaruh tuai kitai Dayak kelia.Pulai agai kenang Jeniah tadi,lebuh niki bukit sigi semampai dulu belama tudah Jeniah laban ia kasih meda apai ia Kisuh dasuh matau pejalai sida pengayau belama.Nyadi Kisuh puas ngelara Jeniah enda nyagi ia dulu belama bejalai tang ditagang Dumbang laban Dumbang ngasai ti Kisuh dulu, tubuh sida ia berasai berat belama alu jampat lelak.Diak Dumbang ngasai Jeniah tu bisi utai nulung tang Dumbang enggai bermunyi alu pia mega ketuai dayak kabukai pen ngasai bakanya magang. Lebuh sida datai tinting bukit Jeniah meruan tindok nganti penatai sida niki katas bukit.Datai tuchung bukit ke lapan diak sida alu ngetu makai magang.Ari tuchung bukit sida nimpai ari jauh alu terpeda ke rembun asap ba tuchung bukit baruh ari sida ia.Nya meh tanda rumah munsuh bisi ba din ko ati sida ke bujang berandau belahnya pengudah penembu ngintu diri makai.

To be continue.

Jerita Jeniah Bercabang Lidah part 6.

Memunyi burung ruai di pulau Kedimpai,memunyi cecuwit madah ka muka pintu tisi langit,memunyi cuai madah pagi ka datai,engkukuk manuk ngangkat ke mensia dani tindok,reruik janik minta ditengkanik,kekerus ukoi diruai nanda ari pagi celap amai.Dinga mensia ba Batang Mandai terdani ngejung pagi alu ngintu diri nurun ngayau ka malas kesulau niki jejuau ke langit lingkau.Kisuh alu terdani ninga bini ia Sulie ngerak ia dani tindok ngasuh ia engkira nurun ngayau ke Menua Berandah Mesai Nibung Nipah,ninga indai ia Sulie bisi inggar ba dapur diak Jeniah terdani alu engkira jampat ka enggau sida ketuai ngayau.Dinga ia akak ia mega engkira nurun enggau ngayau.Nama agi deh,udah Sulie berenah makai pagi,diak Kisuh enggau Guntur tadi alu keruai ngemai keresa nurun ngayau pengudah udah nyikap nurun pergi agai mata ari mati ka ngayau sida Dilai ensumbar Tuai Kayau Tanah Bukit Besai.Lebuh bala ketuai dayak bela atai diak magang diak Dumbang alu nanya keni mimpi bala anak buah dayak kebukai,diak ari punjung bukit alu nyeraoh manah manah magang,enti kitai maia to bisi diak tak naka kitai ngeransing ke ati meda pemaioh mensia bansa dayak bergerempuru ari tinting bukit nyentuk tinting seberai nyemerai penuh enggau pungka lelaki berani bansa dayak,reraoh sida kelaki madah berpantun bejako danjan bejako bertipan bermunyi baka tu,

Kesut kesut tali belibut,
Kesut kesai ngetan terabai,
Sapa mansang sapa datai,
Sigi parai dipumpung ba pala dikelempai,
Ga anang mungkal ga anang nanjal, Laban kami purih enggai pulai nikal,
Enti di ulu di sual kami udah nyadi lemayar,
Nama kabuah kami ka nikal,
Enti pala bala Dilai empai kami tu papal,

Berundang malam kami sigi enda gidan, Enggai madah alah ka ia pala ditaban sida Putan,
Ka tubuh dibinsai tang kami sigi ngenan, Ba dunya alah ba sebayan kami entah meh kaban,

Kederut insap ukam dinsap sida Munan, Ti lesi bebadi puntan meh lelangan ngenyan perau langkan,
Enggai meh pulai gegendai ngesan daun pengan,
Ka agi ngemai lengan munsuh enti pala ia enda ulih ditangan..

Kenya meh jako ansak bala dayak ti bisi diak agai pangan diri,udah Dumbang ngangkat kejari baru sida dayak kabukai bado betimang berpantun leka jako nya agi laban ka ninga jako lalau ari ia.Udah ngetu enda inggar diak Dumbang alu bejako lalau ti ngelalau bala sida ke bujang ti baru enggau nurun ngayau.Pengudah bejako lalau diak meh manang Senipoh ensumbar Pemali Nyepuh alu bejako maca leka sampi ngica kayau besai tu nyadi pulai ke menang.Udah bersampi,alu teraoh bala mensia sama nyebut Sempulang Gana,Sengalang Burung,orang Panggau Libau sida Gemuring Gading,orang Gelong Nyaing Negung sida Apai Tutong Bujang Rengayong enggau sida kabukai.Aram kitai nurun ngayau ngiga pala kitai negung nisi langit ngilong puchuk perabung.Ohhh haaaaa  ohhh haaa ohhh haaaa ohhhh haaaa.

Seretai udah nyebut nya tak dinga burung lang merengik musin langit beripih ari kanan pulai ke kiba nyau bisi tujuh kali alu dipeda burung kenyalang musin langit ngengang nitih pusin burung lang alu udah alu lesap alu midang,meda utai bangat ngemana nya diak samoa bala Dayak alu manjung kekuau ngilau nyentuk tanah berenyang ai sungai beralun besai ninga panjung mensia tak meradak ke nyawa laban gaga meda burung nurun ngayau naka ngemanahnya.Kekaoh alu beruah menua kampung jerung alai sida bala dayak reroah.Pulai agai Jeniah tadi,Jeniah alu beguai makai kediri ba bilik sida ia laban ia ngelaun kediri laban ngenangi sida apai ia Kisuh enda nyagi ia nurun ngayau.Keno ko jerita Jeniah dunsut Bunsu Ular ngena ai mata ular ngica ke Jeniah enda mejam ke mata lebuh tindok laban kenya ngica Jeniah semampai dani merati madik ia Guntur enggau apai ia Kisuh.Udah makai diak Jeniah alu nurun ke tanah alu belalai nyelepak orang entabanyak ti nurun ngayau tadi.Udah sida sarumah terkaoh manjung diak sida bala dayak alu nurun,nyadi kedulu magang tadi sigi manuk sabung bala ketuai bangsa dayak,laban Kisuh to manuk sabung Dumbang ia sigi semampai dulu enggau anak ia Guntur ti baru berajar ari ia penemu nurun ngayau.Seretai sida nurun,bisi keduak tinggal mega laban bisi ngembuan mimpi enda manah alu sida ia dasuh nyaga menua bansa dayak maianya.

Ba jerita tuai aki tuai Kuling,palan menua bansa dayak to bedau bisi tinggal kayu tebelian ti kala nyadi tiang rumah sida ia suba tang kemaioh udah dilamun tanah laban menua nya tusur laban tanah,alu pia mega bisi pun batu berdiri alai Bejie nangga mua ari agi bedau ba menua Batang Mandai Mati nyentuk kediato tang kitai mensia kediato enda ulih kin agi laban menua to bisi ngembuan buluh perindu ti paling bisa ti ulih munuh kitai mensia.Enti kitai ninga munyi muzik buluh perindu to,kitai mensia alu sinu ati alu ngujung kitai lemik tulang alu ka ngantuk,udah ngantuk kitai enda ingat ke dunya agi ti ngujung kitai berasai enda lepi enda aus tang tubuh kitai kurus laban enda makai ngujung kitai parai ketegal lepi tauka lapar.Agi kelia lebuh aki tuai Kuling datai ba madang buluh perindu to,agi maioh rangka mensia,jelu,burung enggau rangka antu gerasi bisi dipeda ba dito.To meh kabuah ia ba ulu Batang Mandai to dikanggau Batang Mandai Mati laban ba dito meh buluh perindu,Jematan Titi Rawan,Pun Semengat,Kayu Biau Balai enggau maioh agi bedau ba dito,alu ngilah keatas agi bisi terpeda pun kayu Kelimpai ti besai nyentuk kediato pun kayu to bedau agi tang ti dipeda mata kasar kayu nya baka ke mit tang enti ba pun kayu to nya baru dipeda pemesai ia kira sari musin ngelilingi pun kayu to ti mensia baka kitai to ko aki tuai Kuling nusi agai kami suba kena taun 2002.Enggi aki tuai Kuling mina 4 jam aja musin pun kayu Kelimpai to.Agi menya kabuah Batang Mandai Mati dipansa leja sabak laban ba dito meh kitai mensia pengarap lama niki ke langit ari Titi Rawan Titi Emparaja bepun ari Pun Tangga Bejie ti ka niki ke langit laban enda puas ati ketegal petenah Indu Dara Peragi Dara Tuchie ti ngumbai Bejie butang enggau ia ti ngujung Bejie enda liat ati nyau nangga mua ari laban ka ngiga petara ngica orang petenah nya malu magang ketegal ia digaga bakanya.Pulai agai jerita Jeniah tadi,udah sida nurun ngayau diak Jeniah alu nitih ari dudi laban ia ngenangi ia ditemu orang enggau nurun pergi.Udah ia madah ke indai ia enggau orang ngayau diak ia alu jejampat nurun laban ia nemu indai ia sigi nagang ia enggau nurun ngayau. Kapak ia ditangkin ba belakang,kapak nya naka pemesai dipeda mata tang tak lempung aja desan ia ba belakang,bejalai ia nitih ari dudi diak Jeniah meda bekau kaki bansa dayak enyau ambis kelupak kulit kayu kena tanjal kena indik pemaioh mensia dayak ti nurun ngayau maia nya,ni kayu purang besai pah mesai betis nya sigi patah kena paut kena tujo bala ke ngayau tadi,ambis lendat menua kena pansa bala maioh maianya.Terguyap aja pun kayu kena pansa bala pengayau kitai dayak,bedau agi enti nilik pun atas kayu,nyau baka nyumboh bala keduak ia bertiki pun kayu ninjau menua ti ka dipansa,ni keduak ke ka ngeransing ati ambis pun kayu mesai sepemerap dipandam ditanjal alu dibukut kena nguji pengering diri lebuh bejalai ngayau.Nyau kira ka lemai diak bala pengayau alu ngetu ba ulu sungai alu begaga ke langkau alai bermalam,bisi keduak tadi enyau ngasu alu bulih jani nyadi kelauk maia malam nya.Berdunjung ja jelu baka rusa,janik,kijang,sempidan,pelanduk,ika n,paku tubo,enggau maioh agi meh utai kedempa maia lemai nya.Udah ngaga unggun api,diak bala ke nyadi nyaga penindok tadi alu bejaga alu keduak ia ngintu penakai,enggi Jeniah alu bulih pelanduk tang ia jauh agi nunu utai dulih ia ari sida nyin tadi laban ngenangi ditemu orang ia nitih ke apai ia Kisuh tadi,enda mukai mukai ia ditegah orang tak tekala,malik ia ketisi meda madik ia Guntur enggau Sandah rerising ketawa meda ia terkenyit tadi,akak ia Guntur sigi nemu ia nitih sida ia laban ari mimpi Guntur empu,ia dipadah ke apai tuai siko ti madah bisi madik ia Jeniah ka nitih sida nurun ngayau.Diak ia alu dibai Guntur agai bala maioh ba langkau pengayau tadi,ti ngujung Kisuh nganu Jeniah kasak amai,tang Guntur nanah ke tudah Jeniah alu madah agai bala maioh ke bisi diak,enti Jeniah enda enggau kayau sida ka alah ko Guntur madah ke mimpi ia ba rumah panjai din sarinya ko ia nusi mimpi ia.Tak ngenung magang bala entabanyak tadi ninga mimpi Guntur bakanya,udah ga Jeniah nya baru berumur ka ngangkat diri bujang ko keduak ia ba diak tadi bejako enggau pangan diri, keni tau ia meri kayau nya menang deh ko keduak nanya Guntur,tang Dumbang alu narit jari Jeniah alu ditilik ba jari,udahnya Dumbang alu tucum,udahnya Dumbang alu madah baka tu "Tu meh mensia baruh dunya ti ka datai nyadi Raja Iban Raja Dayak,Tuai Kayau Tuai Ari Tuai Pergerusek,ia ulih ngidup bansa kitai dayak alu ia mega ulih munuh kitai dayak jemah ila,ia enda munuh kitai dayak ari jari ari runding tang ari ulah kitai dayak empu ti ka nemu utai ari ia ila",..(jako to semampai dikingat ke aku belama nyentuk kediato)

Udah ninga Dumbang bejako bakanya tak ngenung magang bala mensia dayak maia nya.Tak alit ati ninga jako Dumbang nyelai ari ke udah laban lebuh Dumbang megai jari Jeniah tak begetar ati Dumbang meda jari Jeniah alu lidah Jeniah sereta mua Jeniah.Nyau mansau utai dipanduk kelemai nya diak sida alu makai magang,lebuh ngayau orang kelia sigi enda bejako makai alu makai semakai,udah tembu makai alu duduk ba langkau,nyadi Kisuh nyau tusah ati laban 2 anak lelaki ia enggau ngayau,sereta tusah ati ninga jako Dumbang laban Jeniah ila ngerumpang peyerakup bansa Dayak ila ko Dumbang nusi ke ia aja lebuh seduai ia bertungga makai tadi.Dahnya Dumbang nusi Jeniah besai ila sigi Tuai Kayau,Pematak Kayau Menua ti munuh maioh mensia jemah ila ko Dumbang nusi ke ia,nyadi ba kenang orang tuai Dumbang to sigi bisi penemu nilik nasib mensia laban ia ditulong Bunsu Kemaya Ari Bunsu Penguji enggau kabukai meh.Udah tembu makai diak sida dayak sama jenuh nadai inggar laban kampung puang ukai baka ba rumah panjai ba menua din.

To be continue...

Jerita Jeniah Bercabang Lidah part 5.

Tumu pagi diak Jeniah tedani lebuh ninga ba ruai enyau inggar laban orang ngintu gawai pengaruh gawai bertempuh.Nyadi pagi nya Jeniah enda ngabas bubu ti di tan ngelamato laban udah dibuat ia kemari.Nama agi deh udah nya alu mandi ke ai sungai alu udah mandi ia alu ngepan diri baka enggi orang enya meh begangong,ngena baju burung,bertopi lelanjang ngena bulu lang,pansut Jeniah keruai peda ia ruai naka pemaioh temuai bangsa dayak kabukai duduk bertimpai,sida Chaong dipeda ia ukai agi anchi anchi pengepan dikena,tak genap tubuh dibalut ganggong berukir bersimpai nisik melit.Naka pemaioh bangsa dayak maianya ke datai ngabang agai rumah Dumbang laban ka begawai pengaruh besai ti dikangau Pengaruh Tuai Pun.

Lebuh orang rumah panjai kisuk ka mancak ulun benung berangkat dara,diak Jeniah sinu at meda mensia ulun(mensia dulih orang ari kayau enggau munsuh).Kelia bangsa kitai Dayak maioh ulun ti dulih ari kayau menya.Sida ia nangkap purih pantih orang dikayau nyadi ulun.Pun kitai dayak bado ngulun bangsa bukai pengudah Rajah Brooke nyerang kitai Iban kelia,enti enda pia sampai kediato bedau meh kitai Iban agi ngulun bangsa bukai.Diato kitai dulun orang ga.Nyau tunsang dunya.Penyinu Jeniah meda ulun dara nya dibunuh nyau keberai ai mata ia tang nama daya nya leka jako ari Tuai kitai dayak kelia.Udah ulun dibancak alu pala ia disintong alu ati dambi Tuai kena nilik nasib diri jemah ila alu seretai Tuai alu manjung,nanda ke ati ulun ti dulih ia tadi manah.Meda baka nya alu nyeraoh ga Dumbang ngenulu ke Tuai nya tadi.Awak sama ngembing ngambi ba ati ulun ti manah nya.Samoa bansa dayak alu sama magang munuh ulun(bansa tanah) sida ia tadi alu manjung magang madah kayau serak to cukup manah ko sida ketuai diak bepadah enggau pangan diri,nyadi Jeniah munuh jani aja kena meda ati nasib diri,laban ia sinu meda mensia dibunuh bakanya.Apai ia Kisuh pen nyeraoh madah ati ulun sida Kemenyam manah.Kelia kitai dayak sigi baka to adat ia tang diginsit Senggalang Burung pengudah beratus taun pemati Jeniah laban Senggalang Burung ninga sada wit Jeniah ti bernama Lawai ti kasih ke anak ulun digaga kitai entabanyak bakanya.Ari tu meh bala ulun enda dibunuh agi laban ngenang jako ajar Senggalang Burung ti madah anang agi kitai Dayak ngaga mensia baka nyentuk ke sarito Senggalang Burung jarang nulung kitai mensia laban ia malu salah ajar agai kitai kelia.

Nyadi pulai agai jerita Jeniah tadi,lebuh Jeniah duduk diak ia terkenyit meda Senggalang Burung ngerimbai ia alu sapiak ia diperimbai Langga,orang bukai nadai meda penatai seduai,bejako meh sida tiga tadi alu enda udahnya didinga Jeniah,bisi lelaki sigat enggau indu bajik nyapa sida tiga ia,malik Jeniah ke tisi terkenyit meda Gemuring Gading enggau bini ia nungga sida tiga tadi.Orang kediak nadai kiruh meda Jeniah bejako kediri,bisi sida mensia kabukai ti mabuk ngumbai Jeniah enyau gila laban bejako kediri dipeda sida ia.Jeniah tucum aja.Udah datai Gemuring Gading diak Jeniah terkenyit meda Bunsu Ular atai ngabang alu duduk nunga sida kabukai tadi.Nyadi sepagi pagi enggau selemainya orang naka pengerami berpiring laban lusa bala dayak nurun ngayau bansa Tanah.Nyadi malam nya bala bujang enggau dara sama nganta berkepan manah magang laban ka ngiga tuju ati nyadi sekunsi pengidup melaki bini.Alu pia mega madik Jeniah ke dara ke bujang nyau sama nitih nya tadi,sama ngepan nyikap diri bebajik enggau sesigat magang menyadik Jeniah.Nyadi pia mega tudah akak ia Lulie ti nganta naka pemajik ari ngena minyak wangi ti digaga ari limau berangan,minyak engkabang,ngau maioh agi herba kabukai.Kelia orang indu dara ka amai nyimpan buah limau rangan ba penindok laban bau limau nya bau rengut sereta daun bungai kabukai.

Api sempun alu ditucur alu penuh terkilap naka penerang ruai dipeda leka mata,pedilang ba ruai alu dunggun api batu kabait,peda tampak terang agi rumah panjai,tengah laman nyentuk ke seberai,tinting bukit,emperan enggau ba sungai laban maia to kitai dayak empai agi belaya enggau pangan diri.Pemaioh kitai nguan sungai Batang Mandai Mati kelia naka pemaioh ari tinting nyentuk ke emperan,ari emperan nyentuk je tinting seberai.Nya meh kelia kitai bisi ninga ensera tuai,kitai dayak sitik rumpun sitik pun sitik penatai sitik rumah panjai laban maia jeman Jeniah to meh kitai dayak bergerumpuru idup sama nyukung bansa dayak.Udah orang tembu bebuti begagai malam nya,diak maioh macham main di adu sida ia ke malam nya nyentuk maioh sida ke mabuk tang Jeniah meda ari jauh aja,merati Apai ia Kisuh enggau madik tuai ia tadi ti enggau sida kabukai bebuti,nyadi sida kebujang betemu enggau sida kedara lebuh maia ngirup alu berpantil ai tuak alu bepun meh berpantun,beramban enda gidan,sereta maioh agi ulah kitai dayak sama udah palau.Agi kelia enti kitai sarumah belaya enggau kaban diri maia palau,ukum ia naka pemesai.

Udah sida terliok liok palau,ari pen ka tawas,diak maioh sida temuai pulai ngabang alu sida sarumah pen alu tindok magang,nyadi Jeniah enggai tindok maia to,mata ia majak ka bejaga diri sebilik laban ngenangi munsuh datai enda bepadah.Lebuh lemai ari,baka selama meh mensia maioh alu betembung ba ruai Dumbang magang sida ketuai bansa dayak ti nurun ngayau pagila.Udah pemutus jako,sida ketuai bansa dayak alu mupuk ke rumah panjai diri empu alu madah atur disetuju sida tadi ba aum ruai ba Tuai Kayau enggau Tuai Rumah Dumbang tadi.Nyadi malam nya sida ke pungka lelaki tindok ba ruai magang laban penti pemali enda tau buya nego tubuh orang indu ti lebuh nurun ngayau laban penti kenya laban takut bala pengayau nyadi lungau nyadi jugau lebuh bertempuh enggau munsuh.Jeniah alu tindok ba ruai nisi pintu,nyadi malam nya sida dayak alu tindok magang enggau jenak bekau ari pala tetengut alu pia mega ka ngiga mimpi manah.Barang sapa jai mimpi dasuh tinggal takut nasib ia ngeregau ari ke menang lebuh maua ngayau.Malam makin malam,bulan majak ngemansut kediri ba tengan,enda lama agi keleman meh bulan.Sida dayak tindok magang.

To be Continue.

Jerita Jeniah Bercabang Lidah part 4.

Udah tembu berlelak berekak enggau antu nyumbuh diak Jeniah alu mulai kediri kerumah panjai ba Batang Mandai Mati,datai dirumah alu disua ia utai ulih bubu ti di tan ia kemari agai indai ia.Meda gamal Jeniah tak berlitan baka keramak utai,diak indai ia nanya Jeniah tang ia enda nyaut alu mandi ke ai sungai.Datai ba pemendai diak ia meda orang maioh benung tergeley palau lebuh ngelulun pulut pansuh.Agi kelia,lulun kitai dayak ditepu sida ia ngena lauk daging baka janik tauka manok laban ka ngulih pemanis sumai dempa bakanya enti pansuh digaga ke dempa temuai alu ti pulut pansuh digaga ke piring tauka ai tuak diak pansuh pulut enda dicampur enggau utai bukai.Jeniah alu mandi aja laban sida sarumah ti ba pemendai diak enda kiruh ke ia,agi pen sida takut utai dempa Jeniah negi nyau bisa tau ngasuh sida naban ke ari.

Udah mandi diak Jeniah pulai kerumah panjai baru,udah ia makai kediri diak Jeniah alu tindok maia tengahari,seretai ia tindok diak ia bermimpi,bertemu enggau Sempulang Gana Emparaja Menua enggau Langga Matak Pengeraja Puting Aji Bujang Pungka Lelaki.Diak ia bermimpi bertemu enggau petara dunya(dewa) diak seduai ia ngasuh Jeniah enggau ngayau sida dayak ngayau ila laban enti Jeniah enda enggau sida ngayau tak naka pemaioh mensia bansa dayak mati jamah bansa tanah to ila ko seduai ia madah ke Jeniah,alu nyegenda Sengalang Burung ngemansut kediri ke ruai alu madah ke Jeniah enti Jeniah enda enggau ngayau,apai ia Kisuh enggau madik ia Guntur ka mati tumu lebuh bertempuh enggau munsuh ko Senggalang Burung nambah jako Sempulang Gana enggau Langga.

Nyadi Langga to enda kala sebut kitai ba genap leka sampi kitai dayak laban Langga to ati ari,lebuh ia ka meri pengaya ia alu meri,barang maia ia enggai meda orang diberi ia pengaya tadi alu dambi ia pengaya orang nya nyentuk orang mati rapal enda makai(ia dikumbai dewa harta,ti meri kuasa agai Ngelai(orang Panggau Libau) meri reta agai anak mensia).Nyadi Langga enda kala disebut laban kelia kitai dayak kelebih agi ngandal ke Senggalang Burung,orang panggau alu petara aki inik kitai sereta ketuai bumai betaun Kinaharagan tauka Kinoharingan ba bangsa dayak kabukai.Nyadi kelia menua Borneo to kelia menya mega diuan bangsa tanah ti dikumbai bangsa celum(negrito pyhtheasian) asal purih pantih inek Lelipai(ulun Kumang Kemayang Sengenang) enggau karung penguji ti bernama Ejie Berani Nuntung Arie ti dikena Keling alu dipadung jadi ti pengudah nya seduai ia ngiga pulau alai endur ngelalai diri laban malu ke purih seduai ia celum memagang.Tang laban seduai nitih ari dudi penatai dayak kabukai diak purih pantih inek Lelipai ti bernama Dilai to cukup maioh amai ba serata menua kitai menya ngujung sida berani ngelaban kitai dayak.Sida ia dulu mungkal dulu ngepun mumpung pala mensia bansa kitai dayak ba Bukit Penanda Ari,(aku enda nemu dini bukit to tang to jerita ari aki tuai suba) ti ngujung kayau berpumpung pala nyadi udahnya laban kelia kemaioh agi mensia enda ulih parai ngapa ti enda dipumpung ba pala laban kitai Iban kelebih agi ditulong Luwang Penampung Midang Penampung Nyawa Pemampul Lubang enggau Biyoh Penampung Tubuh Penampung Seput Ngesuh.

Pulai agai Jeniah ti bermimpi tadi,diak Jeniah alu ngenung ninga sempekat sida petara dunya(dewa) nya tadi alu merening kebaruh alu nanya,bakani umur ia agi baru ngelalau jagung tau ulih ngayau maia nya deh ko ia nanya tadi.Diak sida madah anang kiruh utai bakanya janji ati ia berani enggau ngayau sida ia sigi ngembing Jeniah ko sida sabuat ia madah udahnya,alu Jeniah dasuh nitih dudi alu atai ba Tanjung Pemutus diak sida ngasuh Jeniah dulu agi ari sida ngayau ila.Pengudah nya Jeniah alu ditempap ba belakang alu entanjar tudah Jeniah tedani tindok peda nyau sesilau mata panas kelemai dipeda ia,malik ia ke tisi meda indai ia reranggau ngasuh ia nurun ke tanah ngasuh ia engkanik manuk enggau engkanik ukoi.Angkat tudah Jeniah ari penindok alu engkani utai di inang sida sebilik,malik ia ke setak bayar peda ia sida sarumah agi kisok ngaga perengka kena ngayau.

Bisi menakah medua ari dak agi sida sarumah ka nurun ngayau bansa tanah,diak Jeniah pen mandi ke ai sungai seretai enggau madik ia ke indu ti bernama Lulie Indu Dara Tampun Puji Sekali merening Ngasuh ati Beraie enyau ka medua kali merening ngasuh ati gidan ka ngambi ia ke bini.Tang maioh orang bujang ngenangi ka ngayap Lulie laban Lulie to bisi penemu bisa dajar inek ia Kinta ti lelaki nadai kuat penemu sigi tesat ba ruang bilik meligai ia laban nadai tetemu ke penindok Lulie to tadi.Datai pemendai diak Lulie ngasuh madik ia Jeniah ngiga batu pengunsut baru ba dalam lubuk din,laban kasih ke madik diri diak Jeniah alu terejun ke lubuk alu enserul dalam lubuk tadi,ambis batu mit ti ulih nyadi batu pengunsut madik ia ba dalam lubuk tadi digiga ia tang nadai ga dipeda ia manah ga.Meda Jeniah lama nyelam dalam ai,diak Lulie reraoh ngasuh ia pansut ngujung ke Lulie nyabak ke madik ia Jeniah tadi,pemuas ia nyabak diak ia terkenyit meda Jeniah ngemejul kediri pansut ari lubuk ti ngujung Lulie merap madik ia Jeniah.Mina Lulie enggau indai ia aja manah enggau Jeniah,nyadi menyadik ia kabukai enggai ngambu Jeniah madik laban geli ke lidah Jeniah bercadang sereta jejeral lebuh maia Jeniah tindok.Diak Lulie bado ngasuh Jeniah ngiga batu pengunsut ke ia agi tang Jeniah bisi bulih batu nya tadi alu disua Jeniah agai akak ia Lulie.

Udah seduai mandi alu mupuk meh seduai pulai kerumah panjai alu udahnya Lulie ngintu pemakai Jeniah aja laban indai seduai ngintu pemakai madik ia kabukai sereta bilik pemakai dipisah laban sida takut ke riur Jeniah ti dikumbai suda ia bisa nyau merecik agai pinggai sda ia,Lulie enggau indai seduai Sulie tadi enda kiruh kenya laban seduai ia nemu riur Jeniah nya nadai pemisa tang ti Jeniah ngetup sigi amai bisa.Udah makai,apai ia Kisuh keruai alu bertungga enggau sida kebukai alu nusi ensera meh sida ketuai,tudah Jeniah duduk melekuk ke patung ba tisi pintu bilik ruai sida ia laban ka ninga jerita tuai orang kelia,lebuh jauh malam,sida sarumah alu mupuk mulai diri ke bilik magang,alu pia meh tudah Jeniah tadi alu mulai kediri agai penindok ia tadi.Lebuh mejam ke mata diak Jeniah bertemu enggau Gemuring Gading alu dajar Gemuring Gading ia tadi chara berpantap,berkuntau,nempalong ke sangkoh enggau chara nyumpit ti ngujung Jeniah jampat amai berajar utai nya ari Gemuring Gading.Ngenang orang tindok ba diak,tak nadai didinga kedumu jako mensia,mina lampu buluh besumbuh ke dipeda,mina munyi ngingit malam ke memunyi alu kuruh sida ketuai didinga ba menua Batang Mandai Tuai lebuh maia malam amai.

To be continue...

Jerita Jeniah Bercabang Lidah part 3.

Nyadi malam nya Jeniah bermimpi bertemu enggau bunsu ular belalang Bunsu Alang Sebintang enggau Bunsu Nabau ti enda chamang chamang alu nangkap Jeniah ba dalam mimpi.Seretai dah nangkap tubuh Jeniah alu dikambuh seduai ba pedilang berapi alu disepu Bunsu Nabau meh kapak ia tadi peda tak perenching berkilat nadai agai bekarat. Tembu Jeniah dikambuh diak tak sepik Jeniah tulang ia kering sereta tegal.Tak terkenyit tudah Jeniah ba dalam mimpi laban ditompu Bunsu Alang Sebintang (bunsu ular) alu ngeranjur Jeniah terdani tinduk alu terkenyit tak nyengala meh kapak ia ba tisi ia tadi tak perenching lelechek indah baka kapak ke baru dibeli tang penyelai kapak nya ba ulu pemegai ia tak dibelit ular belalang siko,tang ular nya nyadi besi engkilong ba ulu kapak nya tadi.

Udah Jeniah meda utai ngenyelai nya diak ia alu ngelalai kapak nya alu dibungkus ia ngena kain sirat ia ti enda di kena ia agi.Ari pen enyau kerebak tawas,dulu burung pipit berkedecit ngiga pemakai,dedinga sada burung ruai ke pagi ari,jani enggau manok nyau richah serichah,sida ketuai dulu agi nungga pedilang ngangat ke isik laban pagi nya enyau naka penyelap.Bisi keduak sida tuai enyau nganjung diri ngabas bubu ngabas ginti tan alu bisi ga keduak ia nganjung diri birak ke ai sungai laban perut pedis angka laban malam tadi enggai bado bado ujan labuh nanjah tanah menua Batang Mandai Mati.Nyadi tudah Kisuh pen dani alu berumban angkat nganjung diri ke ai sungai laban pedis perut ka birak,tak naka naka meh tudah tuai berlandaa nurun tangga.Datai ba ai sungai malik ia seberai terpeda sida kabukai sama baka ia magang sama pedis perut,maia birak sida berandau bakani mimpi demalam tadi,kemaioh agi madah mimpi ngigau aja.Tudah Jeniah alu nurun ngabas bubu ia meda ai sungai Batang Mandai Mati enda bah.Seretai ia nurun ia terpeda maioh bala sida ke anembiak nya serambau ia sama bela ngabas bubu diri empu.Jeniah alu ngelaju ke pejalai enggai seretai enggau sida Chaong anak tuai rumah Dumbang laban Jeniah ngenangi diri negi belaya enggau Chaong.Datai ia ba Nanga Sungai,tak ka luput Jeniah meda pemesai antu benung duduk ba Nanga Sungai,seretai antu nyumbuh nya angkat diak antu nyumbuh nya alu ngemai Jeniah berinsah,tak alu berinsah sari sari meh saduai ia ngujung ka atai tengahari diak antu nyumbuh ,sama kebal sama bisi akal.Lebuh antu nyumbuh nya nganit ka makai Jeniah diak Jeniah alu bulih pala antu nyumbuh nya tadi,seretai Jeniah bulih megai pala antu nya diak Jeniah alu mangka ke antu nya ba bandir tebelian,tak pambar semepar meh pala antu nyumbuh nya laban Jeniah tadi.Nama agi deh mati meh tudah antu nyumbuh nya tadi.Pengudah nya diak Jeniah berlelak laban lelak berekak enggau antu nyumbuh nya tadi.Lebuh ia berlelak diak mata ia enda berasai ka tindok.Sereta mata ia tutup laban ka tindok,diak ia bermimpi bertemu enggau Bunsu Nyumbuh diak Bunsu Nyumbuh nya tadi alu nyumpah peturun Jeniah seagi ia idup ba dunya semua peturun ia nemu niki pun kayu magang baka nyumbuh.

To be continue.

Jerita Jeniah Bercabang Lidah part 2.

Penyelai menawa Jeniah ngembuan lidah bercabang ditemu Dumbang ti ngujung Dumbang ngajar bala rakyat dayak kabukai anang enda ngelari kediri ari Jeniah enti Jeniah enyau ringat lebuh bebuti takut ke Jeniah ngetup sebarang orang ti ngujung orang nya lesi.Meda diri dikejauh ari bala anakbiak serambau enggau Jeniah,diak ia makin ari makin berani sejauh jauh bermain ba kampung puang,Jeniah berajar kediri beridup laban apai ia Kisuh enda kiruh ke ia idup tauka enda laban Jeniah dikumbai anak sial ari peturun ia.Lebuh Jeniah nyau ka berangkat bujang diak sida Dumbang bebai ngayau kulu Kapuas ti di uan bansa tanah ti udah berdengah ke madik kitai bansa Tanjung lebuh nurun bumai.Nyadi tak naka pemaioh bala kitai dayak nurun berkayau,nyau penuh bukit tak penuh ai sungai alai sida ninga jako sempekat Dumbang ti ngemai ngayau bebalas.Ruai pemanjai 200 pintu nyau petang tergayam laban insap ukam kitai bangsa dayak.Tanju pen penuh laban endur entabanyak sida ke dayak bansa bukai.Dumbang enda ulih bejako ari tengah ruai laban pemaioh mensia ti duduk ba belah tanah jauh maioh agi ba ruai enggau ba tanju,diak Dumbang ka pen enda bejako ari tanju.Sebedau Dumbang bejako diak sida sama ngenung meda ke langit meda burung lang 7 iko tak musin ngaga bulatan beripih ari kanan berpusin bisi 7 kali burung berpusin diak burung lang alu pambar alu mepar,seretai burung lang temepar terebai diak tuai bansa Bidayuh ti bernama Kedang Sebiuh alu nyerais nyerauh alu disambung Dumbang sereta sida kabukai,dinga panjung kekalau tak meri kayu beguyap tanah berenyang laban pengaga ati meda burung ka ngayau naka pemanah.Petanda burung kenya dikumbai manah laban sida ngayau gerenti bulih enti pusin burung tadi ngerawai ari kanan nya tanda sida menang ba kayau tang enti ari kiri(encawit) nya tanda enda manah burung kenya ka ngemai alah ba kayau..

Nyadi pemutus kayau bisi seminggu,diak sida sama nyintal wie(rotan) bisi tujuh kali nitih ari seminggu ba kalendar kitai iban,orang munya dulu niap ari kitai kediato uwai,enda niru bangsa orang bukai.Sida niap sa,wa,ga,pat,ma,nam,juh,pan,lan enggau luh,sida bisi jam kediri empu.Kayu tebelian pengingat diacuk ba tengah tanju tuai rumah ti diancau tikai bemban ti ditanjah susu tekalong ngica jam dikira ari bayang pancar mata panas.Malam dikira ari pancar bulan tauka dikelai ari munyi ngingit sereta bulan dikira ari bintang ari bulan ari matapanas,nyadi kitai dayak nyentuk kediato agi ngena cara bakanya enti orang ketuai agi idup sida ia madah,sida ia ngira taun ari pengudah ngetau padi.Nyadi taun kitai dayak mina kurang sebulan lebih aja ari taun kediato.

Pulai agai pun jerita,diak Jeniah ninga orang ka ngayau diak ia alu jejampat nyimpul tali ari ia nunda ari ka ngayau nya tadi.Maia nya Jeniah agi baru ka berangkat bujang,baru tembu disunat aki manang,diak malam nya Jeniah encuri kapak apai ia laban duku enggau ilang sigi ditaruh apai tegut ba peti takut ke madik Jeniah ti bernama Senin nya bayam utai tajam alu nyayat diri laban menyadi ia Senin nya menawa ka munuh diri ketegal ditunang antu telanjing.Pengudah Jeniah encuri kapak ti berkarat ti enda diguna apai ia diak selalu meh Jeniah ngansah kapak nya alu ngaga ulu kapak nya panjai agi alu dukir ia ngau manah.Nyadi malam nya Jeniah bermimpi bertemu siko apai tuai ti nyua ke ia baju karung baju tisik perenching,nyadi disambut Jeniah pia aja dalam mimpi nya alu apai tuai nya nadai jako mina madah nya sigi baju karung Jeniah ari ada ke dunya.Alu ia megai kapak Jeniah alu disepu alu dipurus apai tuai nya tak perenching lelecek kapak Jeniah dipeda.Tak berukir nabau jenaong menara,diak Jeniah tak terdani dinga indai Sulie ngasuh ia dani ngabas bubu tumu pagi,nama deh tak dani ensugau tudah Jeniah nyau terlantak ba tiang bilik peda tak berenyang sekayu rumah panjai 200 pintu tadi,dinga tak begau sekayu rumah panjai meda asai rumah panjai berenyang,ni keduak empai dani nyau ensugau ngemansut diri ari bilik agai tanju ka meda nama meri rumah panjai nya tak berenyang,ia ke indu nyau betekaoh ngangau ke anak diri angka kena serang munsuh ulih ngelalai anak diri dulu.Ni pungka ke laki tak lancat nyengkau terabai enggau duku ilang maia tumu pagi.Atai ditanjau kekaoh sida rumah panjai bansa dayak kabukai nama main sida baka nya tak bersintak ke ilang tak bepegai terabai nyau capoh ke pagi ari.Diak sida nusi rumah panjai sida berenyang baka ke bisi bala munsuh ka datai nyerang.Ninga utai bakanya diak sida kabukai alu bela angkat magang sama bejapai ke ilang ngau terabai,dinga katas kin,ke seberai kin tak bekesiap bala kitai dayak ngadang angka munsuh atai,sari suntuk meh sida ngadang tang nadai ga munsuh datai.Nadai sida nemu ti Jeniah ti tepantup ba tiang bilik meri rumah panjai nya berenyang.Nyadi pengudah pemulai bala sabuat penyidik kayau pulai nyidik utai ke nyadi ke sari nya diak sida baru tawas ati ninga utai nadai apa apa nyadi.Pulai agai jerita ti tepantup ba tiang tadi,pengudah terpantup ba tiang ia alu belanda nurun ke ai sungai alu mudik kili ngabas takat bubu ia ba Nanga Sungai dili..Nadai meh ia nemu ia bisi pengering bakanya,pemuas besual diak alu atai ba takat bubu,alu dabas ia,naka meh pengaga ati ia deh meda bubu ia bulih amai ikan,gerama enggau lelabi siko.Pengudah ngabas bubu diak Jeniah ngintu utai dulih bubu alu dilulun tauka dipansuh ia dulu sebedau ia bermain baru ba kampung puang.Pengudah lemai ia pulai,alu sida sebilik berlauk ke utai ulih bubu ia meh kelemainya..

To be continue...

Jerita Jeniah Bercabang Lidah part 1.

Batang Mandai Mati..berjuta taun ti dulu kelia.

Nyadi kelia sebedau kitai iban pindah ke menua bukai baka ba Kapuas,Batang Engkarie,skrang,saribas,Batang Ai enggau kabukai.Nyadi kelia ba Tembawai Lama kitai Iban enggau bangsa dayak kabukai bisi bertampung beridup sebaka kediato ti dikumbai kitai Tembawai Besai Berintai Tembawai Dandai Tembawai Bersua Tembawai Pemulai.Pemindah kitai dayak bepun ari dunya ampuh bah pengudah Tembawai Bajuah Tembawai Pemindah udah tengelam nadai agi dipeda.Pemindah kitai dayak bertitih ari pemindah ketuai kitai Iban ia nya Dumbang Pematak Serang Pengetan Balai Kelang,(jerita to ari aki tuai Kuling) alu dititih menyadik kitai bansa Penan ti diketuai bernama Selangan.Alu dititih bansa Punan ti diketuai Darua Mata Meniga(ensumbar ia to diberi Dumbang lebuh begulai enggau sida ba Batang Mandai Mati)..Alu bangsa dayak bukai sama bebai nitih alu diau ba Batang Mandai Mati.Nyadi keno jerita aki tuai Kuling maia nya naka pemaioh bangsa kitai dayak begulai baka diri menyadik baka diri sebilik ngujung nyau berkawin campur ngujung sida betukar leka jako kena bejako ngica ke nemu reti jako pangan diri.Ba senentang Batang Mandai Mati to agi bedau Tembawai lama kitai dayak agi suba maia taun 1970 an kenya.Nyadi kelia ba Batang mandai mati to ditanam kayu semengat kayu peniki pulai ke langit mingkai alu ditanam ke buluh pengerindu ti liuk balai ba Tinting mengandai Tinting Penimpai.Buluh to agi bedau ba din.Nadai siko ulih neresa alai to enti ukai orang purih tan ati.Laban buluh to buluh pemerindang buluh pemati buluh ngasuh Deduie tau ngasuh lesi ngasuh enda berasai lepi.Nyadi asal buluh to ditanam bangsa madik kitai ia nya penan ti dikanggau "seruling ribut",nya meh kabuah bangsa Penan pandai amai niup seruling alu dicambah bangsa kitai ninting bukit ngica munsuh bangsa Tanah (purih bangsa celum baka ba Papua,sida ia dikangau bangsa Beketan,nyadi bangsa Baketan ba menua kitai bulih penama Beketan to ketegal ka amai nyaru nyadi bangsa Baketan ti asal lebuh bebuti maia gawai ti ngukir gari celum nyadi topeng kena ngerau bala anak mit.Nyadi bangsa Baketan ti ba menua kitai nya penama asal suku sida ia nya Nayyan,arap peturun sida bisi maca asal penama suku ia ba page aku to,suku kitak nya penama ia dipadah aki tuai Kuling ti idup bisi sejuta taun ti udah.Ia musin dunya ngena pengepan iban alu ia nemu nyaruk nyadi orang biak enggau tuai,ia bedau agi idup tang enda ditemu alai ketegal disumpah Attala,29 iko sida bedau idup nyentuk kediato,benasib ti kitak ditulong sida to tang kitak mesti ngeyauh diri ari sida ia lebuh bulan kembung laban sida nda ngelala kitak maia nya)..

Pulai pun jerita,nyadi kelia rumah panjai kitai iban sereta dayak kebukai to beringkat nyadi ringkat nya tadi 8 ringkat nya meh kabuah kelia indu dara sigi ba meligai pucuk ringkat ke 8 laban maia nya kitai dayak sigi bergempung ati sebedau pemati Jeniah Bercabang Lidah sebedau Bejie nangga mua ari.Nya meh kabuah kitai iban kelebih agi dasuh sida Sengalang Burung miring kali 8 nitih ringkat bilik tuai asal kitai menya ti dibai ari Tembawai Bajuah Tembawai Pemindah.Nyadi kelia kitai dayak kemaioh agi bisi begaga ke titi rawan titi lanjan titi ngerenyam kena besundang kena ngabang ti ngujung dikumbai titi penguji.Tang lebuh pengada Jeniah ke dunya ari petang tegayam bulan keleman matahari disilup awan remang nyadi dunya maia nya petang tegayam ti ngujung anak mensia kitai ke dayak nyau berpiring ading danjung ke tanju danjung ke pucuk meligai alu siko indu dara ari bala munsuh disayat ka dikena nyengkelan mua ari.Lebuh sida ka nyengkelan indu dara munsuh nya tadi diak dunya tawas tak dipeda siko mensia nurun ari langit enyau bersayap,sapa agi enda petara kitai Sengalang Burung ti muai diri ari langit alu dititih bala pengikut ia sida petara Gemuring Gading ti terengkah ba tinting mengandai tinting pernimpai,lebuh Attala nemu sida to tadi muai diri ari langit diak Attala to nawas ke ari ngica nemu alai dini sida Senggalang Burung enggau Gemuring Gading diau,diak Senggalang diau ba tuchung bukit alu sida Gemuring Gading diau ba belah tinting pengudah Senggalang Burung ngemai sida kediri magang beridup ba dunya Attala.Nyadi bedau agi kelia penama Attala sigi dikena bersampi alu udah nya alu ngangau ke sida petara kabukai.Attala to besai kuasa ba dunya.

Pulai agai pun jerita,lebuh Jeniah ada ke dunya,lidah ia becabang sereta lebuh ia besai lebuh inik ia nyapi ia makai bubur,jari inik ia kena ketup ngeli ia baru tumbuh ti ngujung inik ia bebadi lesi naban ke ari.Pengudah inik ia mati,Jeniah di anak tiri apai ia Kisuh enggau menyadik ia kabukai.Nyadi menyadik Jeniah to bisi sebelas iko,3 iko indu 8 iko lelaki ngaum Jeniah empu,Nyadi Jeniah to anak kebiak amai ba sida menyadi ia.Indai ia Sulie ja meh ti ka ngibun ia maia agi mit alu pengudah ia besai diak maioh anakbiak enggai begulai enggau Jeniah laban Jeniah to antu ko bala anakbiak ti meda tudah tuai ia ka begagai enggau sida ia.Gamal Jeniah to sigi sigat sereta kering lebuh agi mit.Nyadi maia Jeniah ka amai bermain ba kampung puang kediri ia aja meda maioh orang kejik ke lidah ia bercabang baka lidah ular,agi pen ketup Jeniah bisa ko orang ketuai nusi.Nyau nyentuk kebesai Jeniah agi bermain ba kampung puang din tak kediri ia aja meh maia nya.

To be continue....