Perjanjian Pakatan Malaysia 4.

Bagi Berita Semasa sendiri, sepatutnya wilayah yang dipisahkan dengan laut perlu lebih banyak hubungan nasional yang jitu Borneo juga merupakan aset tetap politik kerajaan berbanding semenanjung, kita perlu berbalik kepada perjanjian dahulu. Tanah Malaya yang memohon untuk kepada borneo untuk menjadikan Malaysia. Jadi, apabila berjanji mestilah ditunaikan. Mana-mana pemimpin borneo yang rasuah dan salah guna kuasa harus ditumbangkan.Cuma Berita Semasa berharap kerajaan Malaysia sedia mendengar suara NGO Borneo ini melalui dialog contohnya. Mereka hanya perjuangkan apa yang termaktub dalam perjanjian dahulu, itu sahaja. Berita Semasa pun tidak mahu perpisahan antara Semenanjung Malaysia dengan Sabah, Sarawak berlaku kerana ia melibatkan martabat kedaulatan anak bangsa Malaysia.

Perjanjian Pakatan Malaysia 3.

Bagi Berita Semasa sendiri, sepatutnya wilayah yang dipisahkan dengan laut perlu lebih banyak hubungan nasional yang jitu Borneo juga merupakan aset tetap politik kerajaan berbanding semenanjung, kita perlu berbalik kepada perjanjian dahulu. Tanah Malaya yang memohon untuk kepada borneo untuk menjadikan Malaysia. Jadi, apabila berjanji mestilah ditunaikan. Mana-mana pemimpin borneo yang rasuah dan salah guna kuasa harus ditumbangkan.Cuma Berita Semasa berharap kerajaan Malaysia sedia mendengar suara NGO Borneo ini melalui dialog contohnya. Mereka hanya perjuangkan apa yang termaktub dalam perjanjian dahulu, itu sahaja. Berita Semasa pun tidak mahu perpisahan antara Semenanjung Malaysia dengan Sabah, Sarawak berlaku kerana ia melibatkan martabat kedaulatan anak bangsa Malaysia.

Perjanjian Pakatan Malaysia.

Bagi Berita wilayah yang dipisahkan dengan laut perlu lebih banyak hubungan nasional yang jitu Borneo juga merupakan aset tetap politik kerajaan perlu berbalik kepada perjanjian dahulu Tanah Malaya kepada borneo untuk menjadikan Malaysia. Jadi, apabila berjanji mestilah ditunaikan. Mana-mana pemimpin Borneo yang rasuah salah dan akan ditumbangkan.Cuma berharap mendengar suara NGO Borneo ini melalui dialog perjuangkan perjanjian.Semasa pun tidak mahu perpisahan antara Semenanjung dan Sarawak martabat Malaysia.

Perjanjian Pakatan Malaysia Antara Sarawak,Sabah,Brunei,Singapore dan Malaya.

Bagi Berita Semasa sendiri, sepatutnya wilayah yang dipisahkan dengan laut perlu lebih banyak hubungan nasional yang jitu Borneo juga merupakan aset tetap politik kerajaan berbanding semenanjung, kita perlu berbalik kepada perjanjian dahulu. Tanah Malaya yang memohon untuk kepada borneo untuk menjadikan Malaysia. Jadi, apabila berjanji mestilah ditunaikan. Mana-mana pemimpin borneo yang rasuah dan salah guna kuasa harus ditumbangkan.Cuma Berita Semasa berharap kerajaan Malaysia sedia mendengar suara NGO Borneo ini melalui dialog contohnya. Mereka hanya perjuangkan apa yang termaktub dalam perjanjian dahulu, itu sahaja. Berita Semasa pun tidak mahu perpisahan antara Semenanjung Malaysia dengan Sabah, Sarawak berlaku kerana ia melibatkan martabat kedaulatan anak bangsa Malaysia.

Jerita Jeniah Bercabang Lidah part 21.

Ngica bala sida ke ba rumah panjai alu nyedia perengka nyambut penatai bala pengayau ti datai ngemai antu pala alu ngeniki antu pala ke rumah panjai.Ninga panjung Dumbang bisi menujuh kali diak bala ke indu alu mangkong tawak alu nyedia perengka tengkira nyambut bujang berani lelaki kempang muting besi.Sida pengayau alu nurun ari bukit datai ba emperan alu ngaga langkau ba pemendai seberai pemendai rumah panjai sida ia laban sida sigi bermalam laban orang ngeniki antu pala nitih mata ari idup ngica antu pala ila ulih nyaga umai betaun sereta nyadi penyelap menua.Nama agi deh rami meh orang ba rumah panjai nengkira keresa nyambut penatai bala pengayau.Ambis pua kumbu nyadi ke penyelap dinding,bungai jarau kedinjing belah tanju belah ruai.Chapuh sereta inggar bala ba rumah panjai sereta ba langkau pengayau bala pengayau nyau richah begagai betundi lebuh ngirup ai tuak ti danjung orang ketuai ari rumah panjai.Nama agi deh inggar meh menua Batang Mandai Tuai Ulu.Tudah Jeniah duduk ngetat diri meda akak ia Guntur ngajat enggau sida Jara ti  benung betundi ba langkau pengayau,ni keduak nyau manjung meh laban pengaga ati nyepi diri dah atai ba menua diri empu.Lebuh Dumbang geginau ngiga Jeniah ti enda enggau orang bebuti ba diak,alu terpeda ke Jeniah ti gali.Diak Dumbang alu angkat ari penuduk alu nuju langkau alai Jeniah ti gali tadi alu ngerandau Jeniah,bisi ambis sitik derukuk insap daun ukam ambis diak Kisuh ngampir saduai ia ti benung berandau.Ba randau Jeniah ngau saduai ia diak Dumbang ulih nelai mimpi Jeniah ti madah Jeniah tu meh penentu mensia bansa dayak jemah ila.Ia bisi dua iti,sitik pulai ke manah alu sitik pulai pengejai.Laban kelia menya kitai agi begulai agi begerempung gempuru begulai sejalai tang pambar ketegal acuk pangan diri.

Pengudahnya diak Jeniah alu nusi mimpi ia ke baru agi alu madah semua mimpi ia agai Dumbang enggau Kisuh,diak Dumbang ngau Kisuh nyau sama ngenung ngenang mimpi Jeniah suba.Saduai ia pen enda bemunyi nyau rerangap aja udahnya Dumbang alu angkat alu bejako ngasuh sida pengayau kabukai bado chapuh dulu.Meda bakanya sida pengayau alu bado engkeretik siko memunyi.Udah sida bado memunyi diak Dumbang alu nusi mimpi Jeniah tadi,udah bala pengayau ninga mimpi Jeniah suba diak kabukai alu sama ngenung magang alu bado memunyi agi.Sama beperening enggau pangan diri alu ngerunding nama reti mimpi Jeniah nya ila ba ucu icit sida ke jemah ila.Nyadi Kucai alu bejako,enti mimpi Jeniah amai nyadi ila,ka pen enda ni ko bala ucu icit wit purih pantih sida kedudi ila meh ngatur amai sida jeman tu udah serakup ko Kucai madah.Kitai dah ngaga jalai ke manah ni ko bala kedudi meh ngatur pemanah ila ko keduak bala pengayau bejako ngau pangan diri.Tudah Jeniah enda memunyi aja ninga kedumu randau bala pengayau bukai laban ia nemu tu meh penyadi dayak bepecah jemah ila.Kasih ke purih pantih ila nyau keberai ai mata Dumbang laban ia enda meda keni mimpi Jeniah nya ila nyadi amai ngujung diri sebala sigi bebunuh ketegal mantai pengering enggau bala diri sereta munuh diri sebansa dayak empu jemah ila.Pia mega tudah Kucai nyau nadai ati gaga agi ngenang mimpi Jeniah nya laban ia nemu mimpi Jeniah nya bisi jai bisi ga pemanah jemah ila.Ari pen nyau malam agi diak sida dayak kabukai alu bepun ngirup baru tang sida agi bekenang ke mimpi Jeniah nya tadi.

Jerita Jeniah Bercabang Lidah part 20.

Pulai agai pun jerita Jeniah tadi,lebuh Jeniah terdani diak ia lama ngenung ngenang mimpi ti naka penyelai nya.Ngenung ia ke pagi nya diak meda langit ka senawah bebalik pagi.Panjai tenung Jeniah ngenang mimpi diri ti naka ngenyelai nya.Enda berasai peda diak Jeniah malik ke belakang ipengudah Guntur nempap tengan bahu ia,alu Guntur nanya nama utai dirunding madik ia ngemanjai nya ngenung kediri.Meda bakanya diak ia alu nusi mimpi ia agai akak ia Guntur.Udah ninga mimpi madik ia Jeniah diak Guntur pen sama ngenung nyau temati runding ninga penyelai mimpi madik ia nya tadi.Laban ari pagi diak Guntur angkat alu ngekai antu pala dulih ia ba tempara alu ngekai antu pala Dillai ulih madik ia Jeniah.Jeniah nurun ke ai alu meda siku indu dara ngepai jari ba dan kayu ensurai alu indu nya tadi nurun ari nya alu ngerandau Jeniah.Diak ia madah ke Jeniah,mimpi Jeniah nya sigi amai nyadi jemah ila.Meda mata ari nyau ka pansut diak indu nya madah mupuk agai Jeniah alu ia ngasuh Jeniah ngambi ikan ba lubuk ari ulu langkau pengayau laban malam tadi sida bala indu antu kabukai nyau gaga ati meda Jeniah agi idup sereta tanda pengaga ati meda orang dikerindu sida ia idup diak bala indu antu nyau nubai ngau mansai ba ai sungai ngica pemulai Jeniah ti ngetu ba diak nyau bisi utai dikelauk.Udah indu antu nya madah ke ia baka nya diak ketuai indu antu nya tadi alu lesap nadai dipeda agi laban enda lama dak agi mata ari pansut.Ari pen nyau pagi amai alu Jeniah reraoh ngangau ke akak ia Guntur ngemai akak ia Guntur kulu agai lubuk baka dipadah ketuai indu antu tadi.Nama deh tak alu beguai meh Guntur angkat ari gali alu entudi tudah Jeniah ke dulu bejalai ti gejah gejah kulu.

Kira dahnya Guntur alu engkecit ke pemendai alu nanya nama kabuah madik ia Jeniah nyau reraoh maia pagi ari.Diak Jeniah madah ia ka ngemai akak ia ngambi ikan enggau udang pansai ba lubuk ari langkau pengayau sida ia.Meda kenya saduai ia alu ka mupuk agai lubuk kulu kia tang bala Dindang nyau teraoh minta antik seduai ia.Nyau bisi sepuloh iku sida kulu kia.Datai ba lubuk baka dipadah indu antu tadi diak sida meda pemaioh pansuh udang pansai udah dirintai ba karangan.Ikan semah,tapah,enggau ikan kabukai nyau bedunjung tinggi ngilah pala maia berdiri.Alu ngapu magang sida sabuat tadi meda pemaioh ikan sereta udang pansai tadi.Bisi keduak enggai negu pansuh enggau ikan laban ngenangi Tajo Bunsu Genali tang Jeniah alu madah utai ke amai agai sida ia,nya baru sida nyau berani ngintu ikan,mela udang alu mela daun riang alu dipansuh sida ba api ti di idup tadi.Nama deh tumu meh sida sabuat ba ulu tadi makai ikan ti ditunu sida Guntur udahnya.Udah makai tunu ikan sida sabuat alu ngemai pansuh udang enggau ngangkut ikan agai penendai langkau pengayau tadi.Nyau capuh meh sida kabukai tadi meda ikan maioh sereta pansuh udang pansai naka pemaioh dangkut sida Dindang ari ulu.Jeniah meda aja ulah bala dayak ke baru dani tindok nyau beridup ke api alu nunu ikan ni ka dempa alu keduak ikan alu dipansuh.Guntur alu ngembing indu dara bajik ulun Dillai suba alu Jeniah tucum meda pemancal akak ia Guntur nguntik indu dara nya tadi.Keno ko orang tuai nusi,akak ia Guntur alu jadi enggau indu dara tu ila.

Nyadi indu dara tu penama ia Jara Kumang Sebara Endu Bintal Peraja ia nya anak Emperaja Gira ti ngempu dunya langit peringkat kelapan.Tang Jara labuh ari tisi langit alu ditemu sida Dillai alu dambi sida Dillai nyadi ulun laban ngumbai ia anak bala dayak ti tesat.Nyadi Jara pen rindu ke Guntur laban Guntur tu nelap sereta enda ngeninggi kediri maia bejako enggau ia.Jeniah nemu sapa Jara nya laban ia kala dipadah ari mimpi ia empu ti madah Jara nya peturun Dewa Emperaja Gira nyaga pintu kuta petara Attala.Ba kenang orang tuai pengudah Jara beranak lima iku anak mit diak ia dambi apai ia Emperaja ke langit ngujung Guntur enda kala bebini agi.Semadi tuai diak Guntur diak Guntur dambi bini ia Jara ke langit ngujung Guntur nyau idup nyadi biak baru alu ngujung ia idup biak belama ba dunya lelangit.Nyelai Jeniah ti beridup beratus ratus taun alu lesi bebadi ketegal ulah mensia ti ka nemu kabuah ia ulih idup lama sereta idup agi biak belama.Pulai agai Jeniah tadi,pengudah sida makai ke pagi nya diak sida alu mupuk baru ngemulai kediri agai Batang Mandai Tuai.Diak Jeniah alu dulu belama lebuh sida bejalai pulai ngayau.Enggi Jeniah tak kerubung antu pala Dillai aja ke dipikul ia ba belakang nyelai sida kabukai nyau beringkuh ringkuh ngemai antu pala munsuh nyau penuh selabit.Pejalai sida ia majak agi deras sederas enda baka sida kemansang dulu ngayau suba.Lebuh nuntung ba bukit seberai rumah panjai diak Dumbang alu manjung kekalau nanda bala pengayau ka datai.Aku pun manjung meh alu madah pagila ku nampung jerita tu baru ga madik.

Jerita Jeniah Bercabang Lidah part 19.

Tudah Jeniah mina sigi pala aja tang pala nya sigi besai laban pala Dillai bulih sepemerap jari enda datai.Duduk merening kebaruh tudah Jeniah meda bala bala pengayau dayak udah atai ba tengah tucung bukit alu tudah Jeniah alu gali nganti sida ia ke nuntung datai ba pucuk bukit.Udah sida atai ba tucung bukit diak Jeniah alu nurun bukit diak bala pengayau kitai dayak meda peneras pengelaju tubuh Jeniah  nurun melunggang bukit nyau nadai apas leka mata meda sekali meda Jeniah dah datai ba sungai baruh bukit.Alu sida pen nurun melunggang bukit laban Kucai tu sigi pama gik,alu engkecit bisi ngenujuh kali ia engkecit alu terengkah meregum datai ba karangan sungai alai Jeniah sida kabukai.Gaga meh ati Kucai tadi laban ulih dulu ari orang alu ngimbai Jeniah ti benung duduk tadi.Saduai alu main selingkut nganti bala ke datai ari atas sereta Jeniah nemu akak ia Guntur tembu rindang bejalai enggau indu dara bajik nya meh akak ia Guntur dudi ari ia bejalai.Datai ba ai sungai diak bala pengayau belelak ari eikak alu bisi kaduak alu engkecit agai lubuk mit ba sungai laban ka mandi,udah tembu berlelak sida alu bejalai baru ngujung sida datai ba langkau pengayau sida ti maia nya diregau antu indu koklir suba,diak alu bermalam ba diak baru,kaduak bala pengayau enyau terebas ngiga utai ke lauk ke malam negi.Tudah Jeniah gali ba langkau aja meda maioh bala ke bujang sida kedara ngiga lauk.Diak Kucai nawih tudah Jeniah ngemai ia ngasu ke bukit alai Jeniah bulih jani ke maioh suba ba diak.Alu mupuk meh saduai ia ngiga janik tadi,alu ngipa menasan nanan saduai ia.Lebuh saduai mansa resam alu Jeniah ngeregau resam nya dinga tak sebabus jani lari alu kekaong rusa engkecit lari,laban Kucai besai sereta tinggi tak peneka ia numbuk janik enggau rusa peneka ati.Pulai saduai ari ngasu ngiga jani diak sida pengayau alu mela jelu ti dulih saduai tadi,nyau berenjung aja api kayu laban kena nunu dagin janik enggau rusa tadi.Saduai pen alu mandi alu begari sereta ngetat  belelak ba langkau pengayau.

Nyau berkenang jerita bukai dulu.Agi kelia bedau Bejie nangga mua ari,kitai dayak baka diri menyadi lebuh begulai.Naka penyinu naka penyiru tang pengudah Bejie nanga mua ari,diak petara Attala ngasuh kitai beserara laban ngenangi kitai niki ke langit alu ngayau antu gerasi ti nguan kaki tangga petara Attala.Antu gerasi tu ulun petara Attala ti baruh amai sereta Attala enda rindu meda sida tu ti ka amai ngelanggar perintah jako ia.Tang lebuh antu gerasi ka dipunas sida Sulang Bunsu Gundang diak petara Attala nyau ngenangi mensia niki ke langit.Nya meh ba jerita tuai kelia kitai dayak kelebih agi ngumbai diri peturun ti atai ari langit laban diburu petara Attala ari belangkau ngayau bala antu gerasi ba langit kesembilan baruh.Agi menya suba kitai dayak kelebih agi sigi mumpung pala munsuh laban munya orang ketuai kelia maioh macam penemu,nyadi kabuah kitai mumpung paka ari ketegal kitai dayak sama bemunsuh alu berkayau pangan diri tang ti sida berbunuh enda nemu mati laban semengat kitai dayak ditampung Apai Abang ngena tali seput ari orang sebayan ti diberi Sempulang Gana agai ia.Pun terubah kitai dayak bepun mumpung pala ba Bukit Tilong ti dikumbai Bukit Megong agi munya suba kelia.Terubah kitai mensia bangsa dayak mumpung pala alu pala nya ditaban laban ngenangi tubuh ti udah putus pala nya tadi ngiga pala ia baru.Ari ketegal Bandan enggau Angkie belaya ti ngujung bepumpung pala ba tuchung bukit ngujung Angkie lelak alu pala ia dipumpung Bandan.Tang pala enggau tubuh Angkie bejantil baru,ari tu meh kabuah orang kelia ti udah mumpung pala alu jampat pala nya dililit ngena duri kemudang ngica pala enggau tubuh ti dipumpung ba  pala tadi enda besambung baru alu ia ke dipumpung nya tau idup baru.Nya meh kabuah antu pala alu disalai jejempat ba atas tempara ngica tubuh ti ngiga pala ia tadi enggai bejantil agi enggau pala ti udah tepok asap.Pagila ku nampung baru jerita to kaban.

Jerita Jeniah Bercabang Lidah part 18.

Ari mimpi nya meh Jeniah nemu reti dunya ti ka datai ila,alu Jeniah nanya ulih ke enda Sempulang Gana enggau Senggalang Burung meri ia panjai umur ngica ia ulih meda utai nyadi jemah ila baka dambi ia bemimpi tadi.Tang petara Dewa dua iku nya madah saduai ia nadai ngembuan pengaruh meri panjai umur laban udah dempu sida Majeng Raja Gerasi Serua ba atas langit din.Nyau lama Jeniah ngenung ngenang nasib bansa dayak jemah ila laban ia nemu ukai ia ulih niki ke langit ngambi pengaruh bisa nya.Udah nya alu tudah terdani ngenyit laban dejo Senggalang Burung ke tisi laban madah ke ari udah pagi.Terdani Jeniah alu duduk dedugau ba langkau pengayau ia empu alu malik ke tisi ia meda akak ia Guntur enggau Jegai anak Dumbang ketuai amai bela ngimbai ia maia tindok demalam.Bala pengayau empai dani agi alu Jeniah angkat ari penindok diri alu nuju ai sungai alu meda sida ke indu dara ti kala nyadi ulun sengkelan Dillai tang dilepau Guntur maia malam seduai ia ke mabuk lebuh nyaruk diri niki rumah sida Dillai.Sida ke indu nya tadi nyau beterima kasih agai ia alu ngunsai tudah Jeniah ngena ai.Bertundi ja sida karangan laban rindu bebutik enggau Jeniah ti tucum tucum malu,udah tembu ngintu alu bebela utai dipakai diak sida ke indu alu ngasuh Jeniah ngidup ke api kena manduk utai dempa,sekali Jeniah nekih aja batu tekih ia diak alu mau naka pengemau api tadi alu sida ke indu alu ngengkah sampau kena manduk utai ke lauk ba tungku batu ti udah digaga sida ia tadi. Udahnya sida alu manduk asi pulut kedempa bala pengayau dayak ti sida dani negik ari penindok.

Malik Jeniah ke tisi diak meda akak ia Guntur ti udah dani duduk ngimbai api berkindu alu ngimbai indu dara ulun Dillai ti ke bajik ti dipeda saduai dikurung ba sangkar tanju sida Dillai.Enggi Jegai alu duduk bejagang ngimbai indu dara ti benung berandau nunga api tadi,mina sida tiga ke dani tumu alu orang kabukai agi tindok magang.Kira ari nampuk dipucuk kayu baru pengayau kabukai dani alu capuh meh pagi enya baka burung mandi ngiga pemakai alai bansa dayak kedumu berandau enggau pangan diri.Dumbang alu duduk ngerimbai Jeniah alu Kisuh pen bakanya,tudah Kucai tadi duduk ba tungga belakang Jeniah alu sida sama makai alu berkenang ke pengudah pemulai kayau nya ila.Diak Dumbang alu nanya sida ke indu dara ti ka nyadi sengkelan bala Dillai tadi,nama sida ka ngiga pejalai ngidup kediri tauka sida ia nitih bala dayak pulai ke menua Batang Mandai.Diak bala indu dara enggau sida ke nyadi ulun bala Dillai tadi madah sida ka nitih pemulai bala pengayau dayak pulai kin magang laban sida agi takut ke bala Dillai baka sida Gerinjang ti lari ari dikayau sida dayak ti ka ngiga sida agi.Meda bakanya alu bah meh ko Dumbang aram nyeretai kami pulai ke Batang Mandai kin.Nama agi gaga meh ati sida tadi,udah tembu makai alu mupuk engkira bala pengayau tadi alu mupuk bejalai pulai nitih jalai mansang alu Jeniah dasuh Dumbang dulu ngica pejalai sida ia serekat alu pandak agi.Langkau pengayau alu ditunu alu sida pengayau kebukai pengudahnya sida pengayau alu mupuk bejalai nitih ke Jeniah ti dulu kekebu niki bukit.Tudah Jeniah sigi dulu agi atai ba tucung bukit alu sida agi ba baruh din bejalai niki bukit.

Jerita Jeniah Bercabang Lidah part 17.

Pengudah saduai pansut ari nya diak Sempulang Gana ngajar ia reti semengat ba sebayan din.Pengudah nya saduai alu mupuk baru terebai alu datai ba tucung bukit ti tinggi amai alu ia meda Sengalang Burung benung duduk nganti penatai saduai ia.Malik Jeniah kebaruh ba luan mua ia alu peda ia menua nya tak sunyi mina asap aja dipeda,malik ia ke kiba baka nya menua nya berasap naka pemalat,alu malik ia ke kanan ia meda batu ti tinggi tang ia meda bisi mensia ba genap ringkat batu nya tadi alu malik belakang ia meda rumah panjai sida ia ba menua din,tak berlubah peda ia rumah panjai sida bebalek nyadi nyelai ari digaga kayu geriting kayu tebelian alu bebalek nyadi buluh ke dinding ke pelantar duduk alu atap bebalek nyadi berdaun pinggan berdaun upa nibung.Alu nanya Jeniah nama ucuk utai dipeda ia baka nya.Diak Senggalang Burung alu madah tu meh penyadi dunya jemah ila pengudah Jeniah udah lesi ila.Alu Jeniah nanya baru,nama kabuah mensia ba sapiak kanan ia nyau barumah batu nyau naka peninggi nya,diak Senggalang Burung madah nya meh pengidup bansa kitai dayak ila ti diau ba rumah bakanya.Alu Jeniah nanya baru nama menua ba luan mua ia sunyi,diak Sempulang Gana madah baka nya meh dunya bansa dayak ila enti udah pecah.Alu Jeniah nanya baru nama kabuah sapiak kiba ia nya balat amai berasap diak Sengalang Burung madah enti dayak serakup baru ila dunya ka ancur ketegal bansa dayak udah diperinsa orang bukai jemah ila.Ba kenang aki tuai Kuling,bisi reti magang mimpi Jeniah maia nya.

Ba kenang orang ketuai mimpi nyadi amai nyentuk kediato.Nyadi bepun ari nya kitai dayak alu pambar ngelengka ke ajar Senggalang Burung enggau Sempulang Gana ngujung kitai dayak nadai bebasa ke pangan diri agi menya nyentuk kediato.Ari laya Gemuring Gading enggau Jenang Apai Sabit Berkait Ngerakit Bulan Genap Malam diak kitai mensia enyau nitih pengawa orang Panggau Libau sereta ari Gelong pengudah Senggalang Burung nyerah kuasa agai bala menantu ia baka sida Embuas,Ketupong enggau maioh agi.Bepun ari tu meh Senggalang Burung enggai kiruh ke kitai dayak laban ketegal pemati Jeniah ari ulah kitai dayak empu ti bingking ati meda Jeniah tu idup lama sereta agi biak belama dipeda nyentuk ke wit enggau emboh purih ia tuai lukai laban Jeniah bebini kali penggal ba pemanjai jeman nya diak purih baru ia nya ari purih peturun ke-4 ari asil ia jadi ng Jawai diak ia bulih anak ucu sereta icit ti benama Sulang Bunsu Gundang ti ngepun ngasu antu gerasi baruh mua ari ketegal pengudah mati aki tuai ia Jeniah.Jeniah tu maioh purih bepun jadi enggau Layam nyentuk Layam mati tuai alu enyau bisi icit wit. Bedau meh Jeniah agi biak baka ke bujang belama pengudah bepuluh taun Layam mati diak Jeniah bebini baru jadi enggau Menti indu dara tampun puji,nyau tuai amai tudah Menti alu bedau ga Jeniah tu enggai tuai agi biak belama.Ngujung Menti mati tuai alu kira bepuluh taun pemati Menti baru ia jadi enggau Serangan,alu baka nya Serangan udah tuai alu mati nyentuk Jeniah bebini baru bepuluh taun udah pemati bini ia Serangan bepuluh udahnya ia bebini baru jadi enggau Jawai.Ba kenang orang tuai pengepun ulah ari Jawai tu meh ngasuh Jeniah lesi.Ila ku nusi au ti dah atai ba part nya ila.Jerita tu ku sambung baru pagila.

Jerita Jeniah Bercabang Lidah part 16.

Diak apai ia Kisuh alu merap ia udah meda ia datai ba langkau pengayau.Enggi tudah Kisuh ngau enggau Guntur nyau berdinjing antu pala ba tempara unggun api alu pia mega enggau bala bansa dayak kabukai.Enggi Dumbang nyau penuh tempara unggun api di isik enggau pala manuk sabung sida Dillai.Diak Jeniah alu mandi nuchi diri alu pengudah nya makai berlauk ke jani berlauk ke kasam ti dambi sida pengayau ari rumah panjai sida Dillai maia ari ensanus.Jeniah alu duduk ba langkau ia empu tang maioh sida pengayau dayak datai nunga ia alu merap ia sebedau berandau indah manah enggau ia.Tudah Guntur enggau apai ia Kisuh meda ari jauh aja alu tucum meda madik enggau diri dipebasa bala maioh.Tudah Kisuh temegah ati laban ngembuan anak ti kering sereta beberita alu Guntur naka pengagit ati ngempu menyadik ti cukup meri ia penemu sereta ba ati ia din,idup mati ia mina bepanggai ba jari madik ia Jeniah jemah ila alu ia besampi ngajih Jeniah nyadi ketuai kayau nganti Dumbang jemah ila.Alu pia mega tudah Dumbang ba ati ia din Jeniah tu meh ketuai pematak kayau ba baruh mua ari jemah ila.Pia mega Dumbang nemu Jeniah tu anak ambu Petara Dewa Sempulang Gana enggau Senggalang Burung alu dikarung sida Gemuring Gading enggau Apai Tutong ia nya Rengayong Menoa Gelong.Nyadi malam nya bala pengayau dayak ngetat pengelelak alu buntau laban bela ngemata Jeniah enggau Dillai ti ka berekak bejamah nyau berhari hari semalam malam.Lebuh sida bela tindok diak Jeniah pen tindok mega alu Jeniah bermimpi bertemu enggau apai ambu ia Sempulang Gana.

Sereta ia tindok diak ia bermimpi nyelai amai tak dibai Sempulang Gana niki ke langit alu ia dibai Sempulang Gana agai dunya sebayan.Ko Sempulang Gana enti mensia dibaruh mua ari mati ba sebayan tengkelap enggau sebayan tawas alai mensia dipindah nitih semengat ti ba dunya.Diak Sempulang Gana ngemai Jeniah agai sebayan tengkelap tu alai semengat ti jai alu sebayan tawas alai semengat ti manah.Diak Jeniah dibai tama agai sebayan tengkelap alu Jeniah terkenyit meda semengat Megum enggau orang niti titi rawan dunya sebayan tengkelap alu Jeniah enda memunyi aja maia saduai ia Sempulang Gana atai ba diak,datai ba sebayan tengkelap diak Jeniah meda pemaioh mensia ba diak nyau tergama gama bejalai alu ba dito meh meda pemaioh mensia ti baka jugau baka ke belik tang diperinsa antu Kedu ti nyadi ketuai pemegai dunya sebayan tengkelap.Udah saduai pansut ari dunya sebayan tengkelap tadi diak saduai nuju sebayan tawas alu Jeniah naka terkenyit amai meda semenggat Dillai ti berbaju indah bebaju manah bejalai ngerindang ati ba ai terejun alu dipeda Jeniah tadi Dillai tadi tak nadai ngelala ia ti udah munuh Dillai ba dunya amai.Diak Jeniah nanya ba Sempulang Gana,nama kabuah Dillai tau tama sebayan tawas alu enda nitih Megum agai dunya tengkelap,diak Sempulang Gana alu madah Dillai enda kala dulu ngepun munuh mensia ba baruh dunya alu ia manah enggau rakyat ia alu enda sebaka enggi Megum ti dulu munuh mensia alu ngasut mensia ba dunya.Nya baru Jeniah nemu reti sebayan bisi dua itek menua sitik sebayan pemanah sitik sebayan pengejai.Nyadi ka pen enda ku nampung jerita tu baru pagila au.

Jerita Jeniah Bercabang Lidah part 15.

Pengudah penembu nginsap diak saduai alu bepun nyedia diri ka bejamah maia ari nyau sesilau lemai.Alu berekak indah saduai ia Dillai tadi tang penyikal Jeniah naka penyikal,ba dito meh kitai bansa Dayak meda siku mensia ti dibaruh ari ti cukup pama berekak enggau orang ti besai tubuh ari ia.Jeniah nadai nemu lelak nadai eikak mina majak mansang semansang ngelaban Dillai.Ba runding Dillai tu meh mensia ti ulih ngemedis tubuh ia alu ia tu meh ulih ngemunas bansa ia.Diak Dillai aku ngetan diri alu naka ulih ia ka munuh Jeniah laban sepik ia ayu bansa ia ila ambis dibunuh Jeniah jemah ila.Diak Dillai alu nyekak rekung Jeniah alu dambi ia ilang ia empu alu dipantap alu disimpung ia pala Jeniah tak putus dipeda tang betampung baru ga.Diak Dillai nyau alit ati meda utai naka penyelai nya.Alu dibukut Jeniah dagu ia peda alu temepak ngeli Dillai labuh.Alu berekak berpangka ke pangan diri saduai tadi nyau damping tiga ari 4 malam saduai berekak diak maia ke empat ari matahari nyumbuk diak Dillai nadai daya agi laban majak saduai berekak majak agi tulang Jeniah tu tadi kering agi sereta balat agi jamah Jeniah ti betubuh mit ari ia.Lebuh Dillai berdiri meda mua matapanas diak Jeniah alu engkecit alu dambi Jeniah buluh bemban nisi paya alu ngacuk senentang dada Dilai ngujung darah tuci darah lesi ngujung mensia bebadi enda nyengai muahari kebukai ari,diak Dillai nyepi tu meh pengambis seput ia ba dunya ti dibunuh anak mensia bansa Iban bansa dayak ti ka datai ngemunas muru peturun ia ila.

Meda dada Dillai ulih dacuk ngena buluh bemban diak Jeniah alu narit kapak ia alu nukup dada Dillai alu terkecing darah alu terumpang dada Dillai ngujung ke Dillai nyau ka tumbang ke tanah tang jari Dillai berpaut ba kayu ti ngujung Jeniah alu engkecit alu terengkah ba Dillai alu naka pengelancat naka penyikal ia alu narit jantung Dillai ari dada Dillai ti udah carik sedandang ditukup kapak Jeniah.Diak Dillai alu nyeraoh kekuie ngujung dinihari mua ari ba tucung bukit dipeda Dillai nyau ngerabur agi.Lebuh Jeniah ka mumpung pala ia diak Dillai entepa ke jari ia ke langit alu tucum naka pengambis ati alu zuppp,pala Dillai alu dipumpung enggau panjung ari Jeniah.Burung cecuie enda memunyi,burung ruai baka  berdinggai,burung semalau bado kekicau,alu beserara meh tubuh enggau pala tudah Dillai pengudah disimpung dipumpung tudah Jeniah.Alu keberai ai ujan labuh ke tanah baka ke nyabak pemati tudah Dillai.Meda Dillai lesi bebadi alu nyeraoh bala bansa dayak kabukai madah diri menang alu naka pengaga ati sida ia laban bansa dayak nadai lesi bebadi semina telih enggau bakal aja.Tu meh kayau ti manah ti nadai munuh bansa dayak ko keduak ia berkenang enggau pangan diri.Nyadi udah Dillai mati,rumah panjai Dillai alu ditunu sida kabukai ngica sida ke lari nya tadi enda pulai kia agi.Diak Jeniah alu ngemai pala Dillai agai tempara ti udah digaga ia empu ba langkau pengayau.Diak ia ngemai sitik aja pala ti besai amai,nyelai sida kabukai naka ulih ngemai pala munsuh alu disalai sida ia laban dikena jemah ila.Nyadi bepun ngumpul pala Dillai diak Jeniah beniat ba ati ia mina ngumpul pala ketuai munsuh aja pengudah tu ila.Nyadi jerita tu ditampung aku baru pagila.

Jerita Jeniah Bercabang Lidah part 14.

Seduai berekak ari rumah panjai alu nyentuk ke tucung bukit bedau meh saduai kering belama.Atai ba tucung bukit saduai alu berpangka ba belah batu bukit nyau temepur pecah meniga pecah ngempat batu,agi meh angkat.Meda kenya alu empikap pangan diri saduai alu bebelat ari tucung bukit saduai bebelat bebukut bejamah indah,ni kayu mesai pah mesai lengan sigi  patah sigi rumpung kena tujo saduai ti bebelat berekak.Terengkah saduai ba karangan ai sungai diak saduai alu bersungga berendam ke pangan diri.Diak saduai sama bela eikak alu sama ngenuduk kediri ba batu laban eikak berekak berendam ba ai sungai.Diak Dumbang nyepi  sereta ngasai ia ulih alah ti majak saduai berendam ba ai sungai tang ia benasit laban Dillai tu tadi enda nemu seput Dumbang ulih alah ba ai sungai.Ti Dillai nemu sigi mati Dumbang jamah ia ba ai sungai.Jeniah alu ngeredut tubuh aja meda saduai bejamah alu engkecit Kisuh alu nanjar Dillai,kaki Kisuh alu dikunci Dillai peda alu merengik tudah Kisuh.Alu Kisuh ka dipangka ke Dillai ba batu tang benasit Kisuh tu tadi alu ditumpu Jeniah ba rusuk tudah Dillai sepik Dillai tak berangat tubuh ia,alu kaki Kisuh tebelengka dipegai Dillai.Diak Dillai ngasai pengemit Jeniah nya dipeda ba mata tang ia nyepi ia nyau pedis isik kena tumpu kaki Jeniah,pama ga saduai ia Dumbang bejamah nyau ka lemai ari tang tubuh ia enda pedis baka ditumpu Jeniah tadi.Amai Jeniah tu agi anembiak dipeda ia tang pemedis ditumpu Jeniah asai kena ba jantung pemedis ia,enti mensia enda pama baka ia sigi enda ulih ngemedis ke ia bakanya.Enda nyema Dumbang ke kering sereta tegal enda ulih meri ia pedis isik tang enggi  nembiak tu ko ati ia din asai ka luput ditumpu orang ngemit kelikit baka nya.

Diak Jeniah alu ngambi apai ia Kisuh ti melukuk ba reban kayu,diak bansa dayak deka mansang melulung Dillai diak Dumbang alu madah anang ngacau rekak jamah saduai ia,diak sama ngapir ari tisi alu tetegie berdiri ka meda dua iku mensia ti kering sereta beberita ka bebunuh.Nyadi Jeniah tu nemu Dumbang tu ulih mati ba ai diak Jeniah ngasuh Dumbang duduk dulu.Udahnya Jeniah ngasuh raban dayak manduk asi manduk lauk laban Jeniah ka ngemai Dillai makai dulu sebedau berjamah indah.Alu lelekai ketawa sida raban dayak kabukai ti ketawa pengemit tubuh Jeniah ka ngelaban Dillai nya tadi.Tang sida alu ngetu ketawa pengudah Dumbang merak ngena jako besai ngasuh sida bado ketawa.Udah nya bala raban dayak alu nitih enda memunyi agi alu Dumbang ngasuh sida ia nitih jako Jeniah aja.Diak ia alu ngangau ke Dillai ngasuh Dillai makai dulu.Asi alu dipanduk alu lauk pen mansau sereta Dumbang ngasuh saduai ia Jeniah sama bela makai laban saduai ia udah tu ka bejamah.Ba pun ia Dillai enggai makai tang pengudah meda Jeniah nyengkau ba asi diengkah ba daun pisang sama ba endur nya diak saduai alu makai semakai.Empai ambis asi ba daun pisang dempa dulu agi tudah Dillai maluk tubuh Jeniah ngena batu tang Jeniah agi ga makai.Jeniah ngasuh ia makai dulu anang begetil getil ngena batu ko Jeniah enggau ia.Tak rerangap tudah Dillai meda tubuh Jeniah tak nadai rusik tak nadai engkebut duduk mina ke makai aja tudah Jeniah,meda baka nya diak Dillai alu makai baru.Penembu saduai makai diak Jeniah alu minta insap ba Dumbang ngasuh ia nikau ke insap agai Dillai ti ngujung insap nya ditikau alu disambut Dillai,udah nya alu ngulung insap derokok semakau ukam alu ditekih alu dinsap ia tadi.Pagila ku nampung jerita tu baru au madik.

Jerita Jeniah Bercabang Lidah part 13.

Alu bersatup mua Guntur enggau Megum alu Megum numpu tubuh Guntur tang Guntur udah nanam diri ngena bungai dam dam.Guntur terkinsit ke belakang alu seretai nya Megum alu ka mapal pala Guntur tadi tang disilat Guntur enggau jampat seretai ilang Megum ka dirua ia baju sepi Megum ba rusuk asai diacuk peda ia ilang Guntur udah ba terengkah ba rusuk ia.Tang laban Megum tu kebal tak ketawa lelekik ia gelesi laban ilang Guntur baka ke nicik ia.Alu dipantap Guntur baru ga ba Megum alu enda tubuh Megum putus tauka bisi telih.Megum ngasuh Guntur mantap ia aja laban Megum enda ingat leka jako ari mimpi ia empu.Meda kenya diak Guntur ngambi buluh kena maluk tubuh Megum,tak sekali maluk alu didinga raoh tudah Megum engkakai madah diri pedih alu angkat tudah Megum ari melukuk alu nacak Guntur ngena ilang tang Guntur sikal alu nepis ilang ngena terabai.Ilang Guntur alu disarung ia alu ia ngelaban Megum ngena buluh kuning aja.Enti Megum kena paluk buluh kuning tubuh ia berlitan berdarah berari ngujung ia lelak eikak mabuk darah diri empu.Guntur alu ngambi ilang Megum empu kena ia mumpung pala Megum,seretai ia mumpung pala Megum diak nitar kesetap ba langit madah anak Petara Dewa Nabau Demong udah lesi naban ari.Nabau Demong meda aja laban udah nasib anak ia dibunuh mensia bansa dayak ketegal anak ia jai ulah enggau bansa dayak.Kekalau panjung Guntur nyeraoh megai pala Megum,diak bisi bala munsuh bisi ngelari kediri tang agi maioh ngetan ke menua diri sereta Dillai majak pedis ati meda mandal ti dikerindu dikandal ia mati ba tubuh anakbiak ti agi biak ari sida ketuai pengayau bukai diak Dillai alu nyeraoh naka pemedis ati meda Megum udah mati.

Orang ti dikesayau ia ngelamatu nemu nya dulu agi lesi bebadi ti ngujung Dillai nyau kasak mai berpadan sereta jamah tudah Kucai tang Kucai majak gak mukut semukut Dillai.Kenu ke jerita tuai seduai ia bamuk nadai berduku nadai ngena ilang mina ngena jari,ambis kayu dicabut seduai kena berpaluk,ngujung Kucai nyau ka alah seput tang nasib ia manah,maia nya Dumbang narit kaki Kucai alu Dumbang bersatup enggau Dillai.Diak Dumbang alu ngeleka ilang alu engkecit numpu dada Dillai tang Dillai enda terkinsit mimit.Nyadi tubuh Dumbang tu mit mimit ari Dillai tang Dumbang tu kering isik sereta tubuh ia licin enda ulih ditangkap enda ulih dipasung ngena jari.Alu berekak seduai nadai ngira orang ke benung berpantap alu seduai berjamah naka pemendar alu berpambuk pambuk ngena batu besai,berpaluk paluk ngena pun kayu,datai ba anak sungai,sungai nyau keruh naka pemalat.Pemalat seduai berekak naka pengingar ngujung tanah berasai berenyang,kampung puang nyau tawas alai seduai berekak.Nyadi Jeniah meda aja ari jauh alu ngembing Kisuh enggau Guntur alu sida majak semajak ngansak berbunuh ngelaban munsuh,pemaioh munsuh mati enda ulih disema agi.Diak sida alu manjung nyeraoh menang meda munsuh nyau lari laban ke tubuh udah mimit,ni munsuh ke jejengap alu disimpung bala bansa dayak ba pala.Malik Jeniah rampa bangkai mensia terkapa pia aja bertimpan berdunjung.Nyadi bala pen alu bepun mumpung pala munsuh ke udah mati,alu niki rumah panjai alu ngiga utai kebukai.Pulai jerita agai Dumbang enggau Dillai ti berekak nendak ngusung berkerintong.

Jerita Jeniah Bercabang Lidah part 12.

Seretai pala caok ke empat putus bilak dua diak Jeniah alu terengkah ba tanah alu berlanda sereta engkecit tinggi ngilah pinang tuai alu terengkah ba tubuh caok ketiga tadi sereta nukup pala caok ketiga.Peda rumpung pala caok besai ketiga,sereta dah parai caok besai empat iko nya tadi diak Jeniah alu mantap sereta nukup pintu kuta ari belakang alu temepur umbang kayu tebian ditukup Jeniah,tiga kali ia nukup pengadang pintu  kuta mesai 3 pemerap  diak pengadang pintu kuta alu putus dua  sereta pintu kuta alu dibuka ia.Bala dayak sigi udah nganti ba luar kuta ari belakang,seretai pintu kuta dikuta alu ditumpu ketuai bansa Punan peda alu sedandang indang pintu kuta munsuh,alu nyeraoh bala dayak alu tama ari pintu kuta ari belakang alu mantap belaban enggau munsuh.Jeniah nama agi deh,perawai kiba peda temepur pala munsuh ngelima,perawai kanan alu encawit peda pala munsuh nyau serampit ngepit putus.Engkecit Dindang alu nerejang peda dada munsuh terumpang sedandang,engkecit Sulai mantap ilang ngerejang peda  munsuh besapit nglima alu midang lelang,kawis kiba kanan peda mua ke luan nyau majak munsuh bertangkan tangkan.Engkecit Megik alu ngentak ke sangkoh ke pala munsuh peda meniga gegejuh putus tubuh.Berlanda sida Semada alu nyintak ilang Sepu Ngundang alu diperawai peda pala munsuh alu terebai midang,kekecing darah ari pala munsuh ambis masah tubuh,majak semajak balat agi munsuh nempuh majak agi bala dayak nyimpung pala munsuh,udah tubuh dirasuk darah munsuh bala dayak majak semajak berani nadai utai dikenakut agi laban ka ngetan purih diri ari ke mati dipunas bansa bukai jemah ila.Ukai nya aja tang reti jako darah dibayar enggau darah,enti empai berdengah sigi enggai madah diri alah.

Bala pengayau dayak enyau majak semajak nyepuh ke mata ilang enggau sangkoh ba tubuh enggau pala munsuh.Jeniah semampai dulu belama nempuh peda sida dayak kabukai ti Jeniah dulu sigi  maioh munsuh besepur alu maioh gegejuh lesi ditaban ari ngemai nyawa nyengai mua ari tungga pemati dinihari.Terengkah ba pintu kuta kiba diak Jeniah alu nukup pintu ngena kapak sekali meniga peda pengadang pintu kuta terumpang putus mendua.Berlanda Megik alu nyeraoh laban mabuk darah munsuh peda bala munsuh alu nekup tubuh Megik sekali tang Megik agi idup agi alu miau kiba kanan ilang peda munsuh parai midang ia ke enda tan alu nyurut ke belakang.Dindang alu megai sangkoh alu ngerejang peda meniga ngempat munsuh beserak midang.Peda munsuh majak sedandang ari pintu kuta kiba diak Dillai ngasuh bala ia kabukai ngetan ba puting rumah panjai ujung kiba ngica munsuh enda ulih muka pintu kuta ba luan.Terengkah ba ujung puting rumah panjai diak Megik enggau Sulai alu besatup enggau manok sabung Dillai ia nya Guning enggau Suning diri menyadik ti beberita munuh munsuh enggau nekup pemuput digaga ari tikai bilak wie besi.Alu bertempuh sida empat naka pemalat alu Jeniah engkecit ke tanju puting setak kiba alu mepat semetap alu nukup senukup bala munsuh,peda temepur temepak munsuh labuh ari tanju.Bala munsuh majak semajak datai diak Jeniah meda munsuh atai ari tinting bukit nulung sida Dillai.Jeniah ngasuh bala ngadang bala munsuh bisi nulung sida Dillai.Meda bakanya diak Dindang alu ngemai bala kabukai nyatup munsuh ti datai nulung sida Dillai,alu ngenan alu ngetan sida ba pintu kuta munsuh nganti penatai munsuh nurun ari bukit,enggau ati ransing bala pengayau dayak nyeraoh ohaaa ohaaaa.Sah kami ari kita petara ngica kami ulih mumpung pala sida,ko sida bala pengayau dayak nyeraoh.

Peda pemaioh munsuh atai nulung baka semut nurun ari bukit.Terengkah munsuh ba baruh alu disambut bala pengayau dayak kabukai alu betekup nyau terkaoh panjung mensia naka pengingar.Ari pen ujan nanda ke ari nyabak meda mensia bebunuh ke mensia nadai pengasih ati.Jeniah enggau dayak kabukai mansang ke luan agi ngujung datai ba pintu kuta ba luan rumah panjai alu ditukup Jeniah enggau kapak peda pengadang kuta terputus dua.Seretai pengadang pintu ba luan putus diak bala pengayau dayak ngerempuh pintu kuta peda Dumbang alu mantap kiba bulih ngelima pala munsuh putus sekali merawai,pantap kanan peda besepur pala munsuh nya sembilan sigi ditangan.Engkecit Kisuh alu ngerujak ke luan ngena sangkoh bisi sepuluh munsuh terumpang dada berdiri gegejuh parai meragam baka nyumbuh.Engkecit Guntur ke tengah peda tak berdengah naka ke bisi ka ngampir indah,berlanda Kucai alu engkecit terengkah ba Dillai ti benung mantap bala dayak ke bukai alu besatup enggau Kucai Burik Makai Salang Lemai alu ditanjar tudah Dillai peda besepai dagu Dillai pansut darah.Laban Kucai tu sama besai tubuh enggau Dillai,nyadi anak Kucai tu ti peturun bansa Rajang enggau Tanjung.Bersatup sama besai tubuh alu seduai ia Dillai berpantap sama enggai telih,Jeniah majak munuh munsuh ke bukai alu pia mega sida Dumbang enggau Kisuh laban ukai Dillai aja ke pama,baka sida Ningka sida Kilum,sigi beberita munsuh mumpung bansa dayak.Nyadi pemuas bamuk berpantap diak Guntur alu bersatup Megum,lama tudah Megum engkining Guntur laban ba mimpi ia anak dayak tu meh munuh ia ba tanju sida ia,diak Megum ka lari ari bersatup enggau Guntur tang Guntur majak ngelampat mua ia laban Guntur ka ngulih pala Megum ti bisi buk beremas ti ulih nyadi ditenun nyadi pua kumbu sitik.Opss naka tu dulu madik.Pagila ku nampung baru au jerita tu au madik.

Jerita Jeniah Bercabang Lidah part 11.

Alu nyeraoh Dillai peda tak senaung munyi atap perabung baka remaung negung ngasuh bala dayak datai mansang.Alu meda pemesai Dillai nyau jejuau ninggi pun pinang ari luar pintu kuta diak maioh kitai dayak enyau rerangap sereta ngapoo meda pemesai mensia enyau baka antu ranggau.Nyadi Jeniah meda ari tanju,ka meda pemaioh bala munsuh ngau damping,sekali malik Jeniah alu terpeda ke mandal Dillai ti bernama Megum ti beberita ulih nyadi nabau langit ti dikumbai Nabau Ngilau Langit Mingkai peturun Nabau Demong tang dibuai Demong ke dunya amai pengudah Nabau Demong nemu ati Megum tu jai ketegal munuh rakyat Demong empu.Nyadi Megum alu nitih betuai ke Dillai laban ia enda ulih matak kayau agai anak mensia ketegal disumpah Demong ti Megum nyadi tuai ia sigi mati dibunuh Demong jemah ila.Tang Megum bisi bermimpi sebedau nya,ia meda ia mati ba jari mensia ti bernama Guntur menyadik Jeniah ti udah dirasuk Jeniah enggau karung ti ninggang bulu ia lebuh Guntur tindok ngimbai Jeniah tindok ba langkau pengayau sebedau seduai ia nurun nyaruk diri nyadi temuai.Malik Dillai ke sangkar ulun peda ia samoa sangkar ulun udah terlengga magang ti meri Dillai pedis ati alu nanjal batu pengasah ilang ti ngemesai sepemerap ti ngujung batu nya terebai nujah langit mingkai laban ditanjal Dillai enggau naka pegeringat ketegal dayah munsuh bakanya.Jeniah enda bermunyi nyau ngunsut diri ngena aruk baru ngica Dillai enda ngelala ni bagi munsuh ti nyaruk nyadi bala ia.

Laban tubuh mit agi ari sida kediak,nyamai endur Jeniah ngelalai diri ari Dillai.Nyadi udah Dillai nyusun bala pengayau ia nyaga kuta diak Dillai alu sida nganti bansa dayak tama.Berlanda Jeniah ke atas perabung rumah Dillai diak ia meda sida Dumbang enggau dayak kabukai melulung rumah panjai Dillai.Udahnya Jeniah nurun ari perabung alu duduk belalai ba tibang padi sadau bilik Genyam nganti bala apai ia Kisuh nyerang.Nyeling Jeniah ari tibang ba sadau diak ari senawah atap diak ia meda langit nyau baka ke malam laban laja sumpit ti disumpit enggau sangkoh ditikau tetalang terebai nuju rumah panjai Dillai.Jeniah enggai pansut ari tibang laban agi ka meda kayau sida apai Kisuh ari dalam tibang.Peda teraoh mensia bansa tanah madah diri mati kena sumpit enggau sangkoh buluh ditikau bala dayak.Ni ke nadai terabai nyau beserak tubuh kena tusuk sangkoh ti ditikau.Malik Jeniah meda Dillai tak berkuta enggau dada,ni sangkoh enggau laja nadai ulih nembus tubuh ia.Kiba kanan jari nepas sangkoh enggau laja ti ditempalong bala kitai dayak.Udah ambis sangkoh ditikau diak sida bala dayak alu setat ngerumpang kuta Dillai.Jeniah alu pansut ari tibang sadau alu engkecit ke baruh alu napat ke pintu kuta ari belakang laban kuta ari belakang enda dijaga bala bansa tanah.Mina dijaga caok(ukoi) Dillai ti ke besai amai nyau ninggi pun asam jawa.Malik Jeniah ke pintu belakang diak meda caok nya benung nyalak keruar ari pintu kuta.Bisi 4 iku caok besai tadi nyau tinggi tinggi memagang sereta bertaring tajam perenching.

Kenu ke jerita tuai nyadi Dillai tu  suah ngasu antu gerasi ba nisi langit alu bulih caok antu gerasi dempu ia.Ba kenang orang kelia Dillai tu mensia ti tampak rita sereta suah munuh bansa dayak alu suah ngasu bala antu gerasi laban Dillai ringat ke antu gerasi ti enggai nulung ia lebuh ngayau.Pulai agai pun jerita diak Jeniah berlanda alu megai kapak ia alu niti tubuh caok besai ti ba tisi kuta,seretai terengkah ba pala caok ke besai Jeniah alu nukup pala caok nya enggau naka pengambis pengering alu dipeda pala caok besai enyau tebelah putus atai dibaruh.Terengkah Jeniah ba tanah alu ka diketup caok besai ngimbai caok ke mati tadi tang Jeniah lancat sereta sikal alu engkecit sereta terengkah ba pala caok besai nya tadi alu ia nukup pala caok nya tadi.Sereta ia udah nukup pala caok besai tadi diak Jeniah berasai tubuh terpelanting ke tisi laban kena keramak caok besai ketiga ari tisi ti ngujung Jeniah enyau seseput sendat dada.Ti mensia nadai pengering sereta pandak seput sigi carik tubuh sereta mati tekala nya.Tubuh Jeniah alu terpangka ba kayu kuta alu labuh,seretai kaki terengkah ba tanah,diak Jeniah alu merung sereta berlanda ke baruh tubuh caok besai ketiga alu mantap kaki caok nya tadi peda caok nya alu tumbang laban kaki caok ketiga putus,terkenyit Jeniah meda caok ke empat alu nerekam ia.Jeniah alu nyilat sereta alu niki tubuh caok ke empat tadi ari iko caok besai keempat tadi alu berlanda agai pala caok nya alu nukup pala caok ke empat tadi alu teputus bilak dua alu alu Jeniah engkechit ke tanah alu berlanda napat puting setak rumah panjai.Bersambung pagila ku nampung jerita tu agi.

Jerita Jeniah Bercabang Lidah part 10.

Nyadi kelemai nya seduai alu niki ke rumah munsuh.Lebuh meda ulun di sayat diak seduai tak terkenyit meda pemajik ulun indu dara ti ka disayat nyadi sengkelan sida bansa Tanah ke pagila.Nyau nelan riur tudah Guntur meda pemajik indu dara nya.Diak Jeniah narit jari akak ia Guntur ngemai niki kerumah panjai munsuh.Datai diruai seduai alu duduk ba ruai puting setak ba bilik menyadik Dillai ti bernama Genyam.Genyam tu ka bangka bangka pendiau tau dikumbai setengah tiang nya meh ia suah nyadi utai diketawa ke orang.Nyadi Genyam tu empai berbini alu ia kedirik pengudah Dillai malu begulai enggau ia ke setengah tiang.Meda temuai bisi duduk ba ruai ia diak meh Genyam mantai semantai utai dempa agai Jeniah enggau Guntur laban ngelamato jarang temuai ka duduk ba ruai Genyam laban sida enggai damping enggau Genyam ketegal ia tu setengah tiang.Amai Genyam tu setengah tiang tang ia tu meh mensia bansa Tanah ti kering sereta sikal.Jeniah nemu mina ari Genyam ja meh seduai ia ulih nemu genap pintu kuta munsuh.Lebuh sida tiga berandau diak Genyam ambis utai tusi agai seduai ia.Ni bagi penguat kuta enggau pengelemik kuta dipadah Genyam magang laban Guntur enggau Jeniah pandai ngasut Genyam nusi jerita,makin disagu alu dilagu jerita Genyam makin ka agi Genyam nusi maioh utai.Dah meh Jeniah enggau Guntur nemu utai ke ulih ngalah rumah panjai nya ari Genyam empu.Nyadi udah sida makai kelemai nya diak Genyam ngemai seduai ngampir ke tengah ruai laban enda lama dak agi Dillai ka pansut ke ruai.

Nyadi keno ka jerita tuai Dillai tu enda kala pansut bejalai sesitau ba ruai laban ia mina dipeda bejalai lebuh ngayau aja.Alu ia tu dikumbai bansa Tanah tu peturun Raja Langit.Nya alai semua pemakai digiga segenap pelusuk menua sida tu mesti dibagi enggau Dillai laban ti enda sida ka dirampas barang pemakai alu sida ia ulih nyadi ulun Dillai.Utai tu meri Genyam kala belaya enggau Dillai tang Dillai maluk pala Genyam ngujung Genyam nyadi setengah tiang.Taja Genyam setengah tiang tang Genyam agi bedendam enggau madik ia Dillai.Lebuh Dillai pansut malam nya diak Jeniah enggau Guntur nyepi asai rumah panjai beguyap alu seduai sama merati pintu bilik Dillai cukup peninggi bisi bertampung bediri mensia dua iku bediri ba tengan bahu.Maia pintu dibuka diak Jeniah meda mensia siku tak naka pemesai,tubuh ia bisi ngemesai sedepa kitai kediato ruang dada ia,alu seduai meda pala Dillai tu besai sepemerap tuai.Diak Jeniah alu berunding naka penguntung bulih pala Dillai nya enti udah dipumpung ko ia ba ati din.Nyadi Guntur bisi berasai berangat isik ka nguji mumpung pala Dillai ti ia ulih ko ia ba ati din.Alu Genyam bisi madah ke seduai ia,nya meh Dillai ti dikumbai Raja Besai Raja Peturun ari Langit Mingkai.Jeniah bisi pejuluk ati ka napat ke Dillai enti ngayau pagila.Udah Dillai duduk diak ia meri jako tangkan nyadi pagila sida ka munuh ulun 7 iku mensia alu isik sida ulun enya mesti dempa ko Dillai laban ari mimpi ia ngasuh baka nya enti sida sarumah parai sakit lengit ila.

Udah Dillai bejako tadi diak sida kabukai alu nyeraoh madah gayu Dillai.Diak udah tembu nyeraoh tujuh kali diak sida alu muka pengerami ngepun ke malam ari.Alu dambi genuk labo ke takal mungkal alu di isek ai tuak naka pemisa alu disadung genap iko mensia ke malam nya.Atai ba Jeniah diak sida meri tang Jeniah minta setajau ai tuak dirup ia laban ko Jeniah ti segenuk selabo aja enda cukup dirup ia.Meda kenya diak sida alu ngambi setajau tuak laban ka dirup Jeniah deh.Atai setajau tadi diak alu dirup Jeniah peda baka ai wong gegurung dirup Jeniah.Peda sida ke bisi meda alu manjung gaga meda Jeniah nyau terambis penyampau ai tuak setajau nya tadi.Ba kenang orang ketuai,tajau orang munya digaga ari tanah ladu empu tang enda dukir alu mudah pecah enti salah tunu.Tang ba taun 1750m baru kitai dayak bisi bulih tajau ari meli tajau menua China lebuh bala cina atai berdagang agai Borneo pengudah Laksamana Deng He mansa menua Borneo kelia.Nyadi perairan menua Sarawak sigi dempu bala Dayak laban kemaioh ba jerita tuai kitai dayak suah ngelaban pendudukan kuasa China ba Mukah,Miri,enggau Kuching ba lautan.Ketegal tu penama kitai Iban diberi Sea Dayak ba British Council maia nya laban ketuai pengayau lautan baka sida Saging enggau Kandau bepun ari tu meh kitai bulih tajau ari menua China.Pengujung ia Laksamana Deng He ngemai bebaik maia nya.Ari nya kena tanda bebaik diak Laksamana Deng He meri hadiah tajau seribu itek agai bala Iban ari Saribas,Skrang,enggau Iban ari Simunjan.

Pulai agai jerita Jeniah tadi,lebuh sida balat sebalat nyadi ngirup mabuk diak Guntur madah ngaga diri mabuk agai sida ke nunga seduai tadi.Alu ia madah ka nyadi jaga ulun ba tanju ko ia madah angka bisi diberi petara dewa pengaruh bisa ko ia madah tadi.Meda kenya diak mandal Dillai ti bernama Semuau ngasuh Guntur ke tanju kin tindok ko ia madah laban manah ga ti bisi orang ka nyaga ulun ke malam nya ngica ulun enda lari ko ia madah agai sida tadi.Dillai tu majak ngirup aja nyau meniga tajau dirup ia sekali laban tubuh ia besai.Udah nya alu ngemulai diri kebilik ia tadi laban ia tembu ka gauk enggau bini baru ia ti bisi sebulan baru jadi.Nyadi bini Dillai tu ko orang tuai nusi bisi 30 iku indu dara laban ti udah begulai enggau bini ia siku,bini ia nya sigi pedis alu ngeyuman kediri bisi sebulan ti dah begulai tindok enggau Dillai.Meda kenya diak Jeniah majak ja ngirup sengirup alu meda akak ia Guntur nyau pansut ke tanju alu napat ke indu dara ti bajik tadi ti nyadi ulun Dillai alu ka disayat nyadi sengkelan orang pagila.Diak Jeniah nemu akak ia Guntur bisi ati ka ngambi indu dara ulun ti bajik nya nyadi ke bini.Nyadi malam nya diak ketegal indu dara bansa tanah rindu ati begulai enggau Jeniah laban meda Jeniah tu balat ka ngirup alu sida bertundi enggau ia ti ngujung bala ke lelaki bansa tanah tu tadi bisi pedis ati meda Jeniah ditutu indu dara bansa sida ia.Ngujung Jeniah dibai sida betapat bepencha berkuntau.Tang sida ia alah magang laban Jeniah tu sikal sereta kering ngalah ke sida berpekit ba main dibai sida kemalam nya.

Pengudah bertapat bepencha diak Jeniah alu ngenuduk kediri ngerimbai Genyam.Ba kenang orang tuai Genyam tu naka penyiru enggau Jeniah laban Jeniah manah ba ati ia.Seduai sebakih amai ke malam nya taja Genyam tuai agi ari Jeniah tang Genyam rindu begulai ngau Jeniah laban Jeniah bebasa ke ia.Ba ati Jeniah,Jeniah nemu Genyam tu bisi ngembuan ati rurus sereta manah basa enggau orang.Nyadi lebuh ari ka pagi diak Jeniah kena tanjah ai tuak indu dara bansa tanah ti ngujung arok celum dunsut ba tubuh tadi nyau pudar alu dipeda sida ia tubuh Jeniah nyau bisi burak kulit ngujung sida nyau tergepang ati alu berandau nya meh munsuh sida ia tang Jeniah empelah madah ketegal baka nya laban ai tuak nya bisi racun ngasuh tubuh ia bebali nyadi burak ko Jeniah madah.Meda baka nya alu nanjah diri sida ke indu dara tadi ngica burak baka Jeniah tang bedau meh sida ia celum ga.Alu nanya sida kabukai nama tubuh kulit sida enda burak baka  enggi Jeniah deh.Diak Jeniah madah angka racun nya mina ngasu ba tubuh ia ngujung sida pecaya tang Genyam nemu Jeniah nya munsuh sida ia laban Genyam bisi meda ukir kapak Jeniah ti dikait Jeniah ba tanduk rusa ba ruai ia tadi.Lebuh pagi diak Jeniah ngemai Genyam pulai ke ruai ia kin,atai ba ruai Genyam diak Jeniah alu madah agai Genyam ia ka ngayau sekayu rumah panjai tu ko ia madah ke Genyam alu ia ngasuh Genyam ngelari kediri alu ngemai sida ke mit enggau sida ke tuai lari dulu ko Jeniah madah ke Genyam alu Jeniah minta ampun agai Genyam laban sida ka bebalas ke pemarai bansa dayak ti kala dikayau sida Dillai.

Diak Genyam tusah ati laban nemu Jeniah nya munsuh bansa ia alu Genyam madah ke ia enti ia idup baru ila lebuh ada ke dunya ia ka nyadi madik Jeniah ko ia merap Jeniah.Jeniah alu minta tawak ba Genyam alu ngasuh Genyam ngelari kediri enggau orang ti ka pecaya ke Genyam.Diak Genyam alu berumban ngemai bala ke sida bansa Tanah ke dikerindu ia aja lari.Bisi Genyam madah agai sida kabukai tang sida enda pecaya laban sida nemu Genyam nya setengah tiang.Pemaioh ka nitih Genyam lari mina 20 pintu aja ari pemanjai beratus pintu ba rumah panjai nya tadi.Bala pengabang enggau sida sarumah ketawa lelekik meda pemelik sida 20 pintu nya nitih penemu setengah tiang Genyam.Lebuh sida Genyam ngelebus ari pintu kuta alu nadai dipeda kemayang sida ia,nyau kira ka nyumbuk matahari diak Jeniah mangkong tawak bisi menujuh kali enggau naka pengingar ti ngujung didinga sida sarumah panjai Dillai tadi kumbai sida begawai sengkelan tang nyau begau ninga nyawa munsuh naka pengingar nya melulung rumah panjai Dillai.Dinga terkaoh bala dayak merung beraoh nanda sida atai nyerang.Naka pengingar nyau berenyang tanah.Malik Jeniah ke tanduk rusa ba ruai Genyam peda ia ilang akak ia Guntur alu bisi tanda akak ia udah pansut ari kuta rumah panjai munsuh.Ia nemu akak ia ngelepau ke ulun ka nyadi sengkelan sida Dillai ke pagi nya.Diak Jeniah meda munsuh begau kulu kili reraoh bepadah munsuh atai ngayau rumah panjai sida.Jeniah mina ngenuduk kediri ba ruai Genyam alu ia meda Dillai pansut ke tanju alu nyeraoh ngasuh munsuh ngampir ti sida bangat berani ko Dillai.Meda baka nya,

To be continue.

Jerita Jeniah Bercabang Lidah part 9.

Berkericau burung semalau,cecuie burung tuie nanda ari ka pagi,berengit munyi gerengit,cecuai bunyi burung ruai di kampung puang tuai.Jeniah alu encelak mata ninga munyi pengerak pagi nyau ngeregau dinihari alu ia nilik ke pemendai langkau meda ai sungai agi bah.Diak Jeniah alu ngidup ke api tempara kena berkindu kena ngangat ke esik laban pagi nya naka penyelap sereta naing pansuh jani kemari.Nyadi sida kebukai bedau agi tindok laban pagi nya naka penyelap ketegal semalam malam ujan,enggi tudah Guntur bendar melukuk ke tubuh berpua ngapus ke tubuh laban celap.Semina Jeniah ke dani tumu maia pagi nya alu bala penyaga agi tindok ketegal celap mai ke malam tadi.Udah Jeniah ngidup api tempara enggi ia,diak ia alu ngidup tempara bala pengayau kebukai,udah kena daing pengangat api nyau majak agi keduak ka tindok.Nyepi bisi kena daing pengangat diak Kisuh terdani alu malik ke tempara diak ia meda anak ia Jeniah benung kiruh ngalih ke pansuh lauk jani,malik ia ke tisi diak ia meda tudah Guntur dani alu duduk ngimbai Jeniah ti benung duduk berkindu ba api tempara.Seduai ia enda bejako dipeda Kisuh ari jauh lalu meda jari Guntur murus pala madik ia Jeniah.Lebuh meda pemanah Guntur enggau Jeniah,diak Kisuh nyau belai ai mata laban ngenang diri jai enggau Jeniah ari mit nyentuk ka berangkat bujang.Agi Kisuh ingat ia kala ngurung Jeniah ba tibang padi lebuh Jeniah agi mit ka mai ringat ketegal ia berat sapiak beciping magi kasih sayau enggau bala anak.Kisuh mejam ke mata ka tindok baru.Ko Jeniah laban lemai negi bisi pengabang atai agai rumah panjai bala munsuh laban bisi gawai lelabi nyadi ke malam negi ti ba Rumah Panjai Dillai laban siko orang bujang ngambi anak dara Dillai ngena pala ti ulih ia mumpung pala bansa dayak.Jeniah bulih berita nya ari Bunsu Antu Indu demalam lebuh sida nurun ka ngabas ka meda rumah munsuh diak ia bersampi ngasuh Bunsu Antu Indu nya nulung ia nyidik sereta meda rumah panjai bala munsuh.Lebuh Jeniah tindok diak bermimpi Bunsu Antu Indu nya madah utai baka nya enggau ia demalam tadi.Nyadi akak ia Guntur madah ka enggau ia kin negi enti bakanya ko Guntur madah ke Jeniah.Jeniah ka aja ngemai akak ia Guntur kin ngica madik ia Guntur tampak rita jemah ila baka nama ia ila.Lebuh sida bukai terdani magang diak sida sama bertusi mimpi nya magang enggau pangan diri ngujung lebuh meda Jeniah sida ia meri tabi basa agai ia,sereta rindu ka berbakih enggau Jeniah,alu pia mega Dumbang nyau rindu ati meda Jeniah bisi enggau sida ngayau baka dajih Jeniah nya enggau sida ngayau bala Dillai.Nyadi maioh meh kaban sebakih enggau Jeniah pengudahnya laban Jeniah to pengangkat kayau jemah ila ba kenang mimpi sida tadi.Nyadi lemai diak Jeniah madah diri enggau akak ia Guntur aja ka nyidik rumah panjai munsuh sereta lebuh sida ninga palu tawak 8 kali bergemong panjai nya tanda sida tau nyerang munsuh ari pintu kuta,tisi bayar rumah panjai alu ari belakang rumah panjai.Ninga sempekat Jeniah bakanya diak Dumbang enggau sida kabukai sama bela setuju.

Lebuh Kisuh tindok diak bisi bermimpi bertemu enggau Sengalang Burung enggau Sempulang Gana ti madah ke Kisuh,nyadi sida Kisuh enda tau dulu ari Jeniah lebuh sida pengayau Dayak nuntung ba rumah pagila laban enti sida dulu sida ia ka menang ngayau tang maioh bala pengayau mati,mina Jeniah ja ke idup.Nyadi ba mimpi Kisuh ia meda kayau sida endang amai menang tang ia maioh sida pengayau dayak ambis lesi peda ia.Penyelai ia meda diri kena tetak ba lengan enggau kaki,sebedau ia malik ke belakang meda Jeniah berlanda tang Kisuh ngasai diri dipumpung munsuh.Lebuh ia terdani baru ba dalam mimpi ia diak meda Jeniah dulu tang penyelai ba diak sida meda rumah panjai munsuh ambis angus sereta ia meda Jeniah megai pala Dillai ti besai sereta antu pala naka pemaioh ulih sida.Lebuh nya alu temejul baru Sempulang Gana enggau Sengalang Burung,nyadi ko saduai ia,ni pilih kitak bala maioh,ka mati maioh tang menang tauka kitak menang tang nadai pemati bala kitak enti Jeniah dulu.Ukai Kisuh aja bermimpi nya tang sida pengayau enggau ketuai bansa bukai sama bermimpi bakanya magang.Guntur dulu agi bermimpi lebuh sida nurun ari rumah panjai Guntur udah bermimpi bakanya,nya meh ia selalu berdamping enggau Jeniah laban ia nemu mina Jeniah aja ulih meri sida ia menang nadai pemati pengayau bala dayak.Ngenang Jeniah lebuh dipayuk akak ia Guntur diak ia ketawa aja alu saduai bertundi.Lebuh bertundi diak Jeniah madah agai akak ia,lemai negi ia ka mansik ka nyidik rumah panjai munsuh ke lemai negi. Nyadi lemai nya saduai menyadik alu ngunsut diri ngena arang alu ngecok mua diri ngena tanah ladu burak alu ngukir diri baka bansa Tanah nya tadi laban ka nyaruk diri bakanya.Nyadi kelia menya kitai enggau bansa dayak kabukai sebaka jako enggau bansa Tanah sebedau tangga batu Bejie pambar ninggang mua ari.Nyadi saduai menyadik mupuk nuju rumah panjai munsuh alu saduai ba rantau jalai diak saduai maioh terpeda bala pengabang bansa Tanah nyau bertawing tawing laban ke mabuk ngirup lebuh ba rantau jalai.Ni keduak bala bujang enggau sida ke dara bansa Tanah benung gauk meh belah pemendai,bisi keduak melampin belah rantau jalai.Naka pengerami sida Dillai tadi maia nya,lebuh Jeniah enggau Guntur mansa diak tadi maioh meh sida ngemai saduai ngirup tang Jeniah enggau Guntur madah diri udah mabuk alu ngaga diri baka orang ke mabuk nya meh seduai menyadik ia tadi.Atai saduai ba senentang pintu kuta munsuh,malik Guntur ke pintu kuta munsuh peda pintu kuta munsuh naka peninggi sereta tebal diapit kayu terbelian ngemesai lima pemerap,tak alit ati Guntur meda pemintar bansa Tanah ngaga pintu kuta bangat ngeningi nya.Jeniah alu narit jari akak ia Guntur tama ke dalam kin.Datai din saduai alu niki rumah panjai sida Dillai.Alu didinga ketawa lelekai,munyi gerunung munyi tawong munyi gong ditebah sida ba ruai.Tama saduai menyadik keruai diak saduai meda orang naka pemaioh nya mensia ti benung ngajat benung bibat benung berpantun benung beramban benung ngirup betapat  jalung.

To be continue.

Jerita Jeniah Bercabang Lidah part 8.

Nyadi udah nurun ari bukit diak bala pengayau alu ngaga langkau pengayau ba emperan sungai tadi.Diak sida enggai ngansak semak kira mendua bukit baruh takah ari ulu rumah munsuh diak sida alu ngaga langkau sereta bala penyaga alu bertiki pun kayu ngemata ke munsuh angka bisi damping enggau sida ia.Nyadi Jeniah enggai berlangkau damping sida apai ia Kisuh laban ia ngenangi ka nyaga apai ia Kisuh,diak ia ngaga langkau kediri enda entu jauh ari ngimbai langkau apai ia Kisuh.Diak Jeniah alu ngaga langkau pia aja kena nyaga apai ia Kisuh enggau akak ia Guntur.Daun senggang alu dibap aja atas langkau laban enda nemu ngaga atap langkau ke manah baka enggi orang.Apai ia Kisuh enda kibuh ke ia ngaga langkau kediri laban apai ia Kisuh kiruh nyaga Dumbang alu Guntur mega benung berajar nyadi penyaga langkau pengayau ari orang ke pandai nyidik munsuh.Udah Jeniah ngaga langkau kediri empu diak ia alu madah agai apai ia Kisuh laban ka birak ko ia.Udahnya Jeniah alu nikal ke bukit katas nganjung diri birak,lebuh atai ba tuchung bukit diak ia alu birak,diak ia ninga munyi orang berandau ba tisi pun wie sega.Diak randau orangnya madah tak nadai geguna mensia ko orang nya bejako,alu ditimbal siko dak agi orang tadi madah enti bakanya nyamai sida munuh mensia aja enti sida betemu enggau mensia ko ia.Diak puas Jeniah nyeling ari bandir kayu diak ia terpeda kedua iko mensia,tubuh ia semut tang pala ia mensia,alu siko dak agi tak antu bandir dipeda mata Jeniah.Jeniah sigi enda takut laban ia ngerunding samoa antu enda ulih munuh ia mina antu gerasi aja enggai meda Jeniah.Alu beguai Jeniah angkat ari birak alu nuju agai seduai nya berandau,ensepi nyium bau mensia diak antu dua iko alu ngadang penatai Jeniah.Lebuh seduai ia meda Jeniah datai kia megai kapak diak saduai ia nemu nya meh ucu ambu Sempulang Gana.Seduai alu merap Jeniah laban pengaga ati bertemu enggau ucu dasie Sempulang Gana ia nya Jeniah Bercabang Lidah.Lebuh seduai berandau enggau Jeniah diak Jeniah alu nanya nama kabuah seduai ia ringat amai agai mensia.Diak seduai madah tadi bisi bala pengayau enyau kemik sebarang alai mancing pun bandir kayu alu birak peneka ati ti ngujung rumah aki Bunsu Semut Engkeranjang bau tai sereta bau but ko aki Bunsu Semut nya madah.Alu aki Antu Rerengir Bandir madah anak mensia kemik ba pun bandir nyau terkena ke ai irup ia ti ia simpan ba tisi bandir sereta meri rumah ia bau kesing ngujung indu manyi maioh nutu rumah ia.Meda kenya diak Jeniah nanya keni enti mensia enda sengaja terkemik enggau terbirak ngapa keni kena nyeliah chara jalai awak sida ia mindah dulu ari kena penusah ari ulah mensia bakanya.Diak Bunsu Semut madah enti ia enggai ngampun mensia ti mensia nya enda nyedia kayu rangkai maia birak,ti enda sida ia sigi diketup ia ti ngujung mensia nya mati.Ba jerita orang ketuai Bunsu Semut Engkeranjang to amai bisi,enya meh enti birak ba kampung puang nadai ai sungai diak orang ketuai bersengkilo ngena rangkang kayu ti udah mati alu bisi nyedia kayu ba tisi lebuh birak ngica kayu nya tadi kena anakbiak Bunsu Semut nunu tai nya tadi awak enda bau but agi.Enti enda disedia kayu enya diak mensia nya ka bulih penusah ti Bunsu Semut empu datai ngukum mensia ti ngujung mensia nya sakit.

Udah nya diak Aki Antu Rerengir Bandir madah ga agai Jeniah enti sida mensia ka kemik ba bandir,sida tau kemik tang minta pemendar dulu bejako madah diri ka kemik numpang rumah ia,udah kemik nya diak mensia mesti ngeludah ba senentang ai kemik nya ngica Antu Rerengir Bandir nemu nya kemik mensia ti minta pemendar ari ia,enti mensia nya kemik enda ngeludah kemik nya diak Antu Rerengir Bandir tadi ka meri utai mensia nya kembai,lusung(kurap),gatal merah sereta kabukai.Udahnya seduai ia mekat ba Jeniah seagi dunya bedau pantang nya sigi tau dikena lalu seduai ia enda ngacau mensia enti udah nitih atur baka dipadah seduai ia nya lebuh kemik enggau birak ba kampung puang.Udah sida tiga berandau diak ari pen enyau ka sesilau dipeda diak sabuat alu berserara,seduai alu merap Jeniah.Jeniah pen alu nurun ari bukit tang lebuh nurun ari tuchung ari bukit diak Jeniah meda bala jani benung belalai ba resam laban ninga derap kaki mensia tadi,diak Jeniah alu megai sangkoh ia,nama agi deh tak Jeniah rejang ngapa sangkoh dinga alu terkuik ja bala janik mati,udah nya Jeniah ngumpul janik dibunuh ia ngena sangkoh tadi,peda berdunjung ninggi tempara tuai pemaioh nya.Nama agi deh tak pantap Jeniah kayu mesai betis kena ngesan janik nya tadi.Udah ditanchang manah ia ke ulih bai ia mina 6 iko aja janik ti mesai sepemerap alu Jeniah pen nurun agai langkau pengayau tadi. Datai ba langkau pengayau diak madik ia Guntur alu ngapo meda utai desan Jeniah enda ngipak tubuh ia ke mit nya.Sida pengayau pen baka nya meh,diak Jeniah madah agi nubah janik ulih ia tadi ba tengan bukit ko ia madah,ninga utai bakanya nyau besepur bala ke bujang pengayau niki ke bukit laban ka napat ngemai ngesan janik ti maioh lebih ari Jeniah.Nama agi deh janik ti dibai Jeniah tadi alu di intu sida ketuai magang alu nganti penatai sida ke bujang pengayau ari bukit ngemai janik dengah Jeniah tadi diak ketuai makai tunu janik.Ngenang sida nya tadi,datai ba tuchung bukit diak madik ia Guntur nyau rerangap meda pemaioh janik udah dibunuh Jeniah tadi.Alu ia tadi ngiga kayu mesai betis alu dipantap ia udahnya kena nanchang ngemai janik ti dah mati nya tadi,sida kabukai pen ngaga bakanya magang.Ngai enda luba luba ga kaduak sida tadi alu nanchang nyau ngelapan iko janik ba kayu pengemai nya tadi lebuh sida ia ngangkat kayu pengemai nya tadi nyau ambis terkentut kentut sida ngangkat kayu pengemai ti bisi janik ditancang ba kayu nya.Meda enda alah magang diak sida tadi mina ulih ngemai dua iko janik ti mati nya tadi tang enggi Guntur tak ngesan ngempat iko janik nya tadi.Alu nurun sida ari tengan bukit datai ba langkau sida alu nyau engkecit ke ai sungai laban aus ngemai janik nya ari tengan bukit,peda sida ia katas meda Guntur enyau gegaring narit seput laban eikak enggau lelak ngesan janik nya tadi.Jeniah tuchum aja meda ulah akak ia Guntur ti ka mekit ia,enggi Jilum anak Dumbang nyau ngecit ba tancut ngemai tiga iko janik aja.

Keno ko napat pengering pangan diri laban ia ka mantai diri kering ba mua orang entabanyak diak.Udah sida ketuai ngintu janik tadi diak Jeniah nukung kediri ba langkau ia nganti orang ngangau makai aja,lebuh ia nukung kediri diak madik ia Guntur ti baru tembu begari pulai ari mandi alu duduk ngimbai ia.Guntur nanya ia,nama utai kena Jeniah ngangkat janik ti bangat ngemerat nya sereta enti ulih magi ia mimit meh pengering nya ko Guntur minta ba madik ia Jeniah enggau ati andal.Laban Jeniah ngembuan ati sinu ke madik ia Guntur diak ia alu murus tengan bahu Guntur udahnya ia alu netak tengan bahu Guntur ngena jari bisi menujuh kali diak Guntur berasai tubuh ia kering agi sereta seput ia enyau lantang agi asai ia.Guntur alu merap madik ia Jeniah,alu bedanji enggau Jeniah ia sigi nyagu madik ia nyadi tuai kayau ila enti Jeniah nyadi orang beberita ila.Alu dedinga aya Berinau ngangau makai ba tengah ruang langkau pengayau,bala maioh entabanyak alu makai magang tang sida enda inggar makai laban pakai orang kelia sigi enda inggar sereta jampat makai laban makai kenya kena nyeliah diri lepie lebuh munsuh atai nyerang tauka maia lari ari digagai munsuh.Udah makai lemai diak sida sama ngali kediri empu mina bala penyaga ti pucuk kayu enggau ba tanah ti agi makai laban besilih nyaga langkau pengayau.Pemaioh pengayau maia nya sigi maioh nyau penuh emperan alai sida berlangkau.Nyadi Jeniah pen gali duduk meda unggun api ba mua langkau ia.Tak enda mukai mukai ari ke lemai nya enyau kemesek nanda ari ka ujan balat nyadi alu nitar bermunyi bedegum ba langit mancar pemetang malam alu besereta ngau nya ujan enggau angin bersiuh bermunyi nanda ari ka kudik enda lama dak agi.Empai ambis sebatang insap daun ukam diak ari alu ujan naka pemalat nya,nyau tacoh bala pengayau ngadu ke atap daun senggang tadi laban tudoh enda rapit di adu sida tadi,malik Guntur agai langkau madik Jeniah peda ia madik ia tembu ngemata ke api ba luar langkau ia empu.Lebuh Jeniah malik ke tisi baru Jeniah nemu ari ujan balat diak alu reraoh ngangau ke apai ia Kisuh enggau Guntur ngalu ke langkau ia ti nadai ditinggang ujan.Meda baka nya diak Kisuh enggau Guntur pen ngalu ke langkau Jeniah,Dumbang pen nitih alu sida ketuai pengayau pen bela ngalu agai langkau Jeniah.Lebuh sida ngenduh diak Dumbang kasih meda bala pengayau kabukai berlanda kin kia ngiga alai ngenduh diri ari kena tinggang ujan sereta ribut,nitar enggau ujan balat laban ari maianya kudik.Diak Dumbang minta kasih agai Jeniah enti Jeniah ulih ngaga endur sida pengayau bukai baka enggi langkau Jeniah ti nadai ditinggang ujan setitik pen.Diak Jeniah nadai maioh jako alu ambi ia kapak ia empu alu dujak ia ba tanah peda tak sengenyap senentang emperan nya nadai ujan enggau ribut,tak alit ati magang sida ia meda leka ujan baka ngelari kediri ari ninggang emperan nya ari peda pancar unggun api Jeniah.Udah nya sida pengayau alu mulai kediri ke langkau diri empu tang penyelai baru ga nyadi,tak semua ai ujan ti ngemasah langkau,perengka senentang emperan langkau pengayau tak niki magang katas alu terebai ketisi nitih leka ujan kabukai.Nyadi malam nya Dumbang ngasuh bala pengayau peyidik nuju agai rumah munsuh laban dasuh nyidik bakani gaya rumah panjai munsuh maia nya.Nyadi Kisuh pen enggau sida nya,sereta meda apai ia enggau Jeniah alu angkat ari penindok alu madah diri ka enggau nyidik rumah munsuh.Tang Kisuh enda nyagi ia enggau tang majak Jeniah minta kasih ke apai ia ka enggau.Meda bakanya diak Dumbang ngasuh Jeniah enggau aja tang Kisuh majak nganu Jeniah tang ditimbal Dumbang,bisi pemanah enti Jeniah enggau sida ia nyidik kin ko Dumbang laban Jeniah ulih besadong jerita enti sida bisi penusah ba rantau jalai.Meda baka diak Kisuh bado memunyi agi alu ngemai Jeniah.Datai sida ba pemendai diak sida nyau terkenyit meda ai bah nyau ngilah pucuk ensurai pemesai ai bah tang sida benasib laban langkau sida pengayau ba emperan ke tinggi ari ampuh bah.Meda baka nya diak Kisuh ngemai bala penyidik nikal pulai baru alu madah agai Dumbang ti sungai bah naka pemesai.Tudah Dumbang alu ngasuh sida tindok aja laban pagila sida ia ulih nyidik menua rumah panjai munsuh.Nyadi malam nya sida pen tindok alu Jeniah pen tindok ngimbai akak ia Guntur ti tindok ba langkau digaga Jeniah.

To be continue..

Jerita Jeniah Bercabang Lidah part 7.

Nyadi pengudah tembu makai,diak bala pengayau alu ngali kediri ngetat pengelelak bejalai seari ari tadi.Lebuh gali diak sida berkenang to meh terubah ia sida nyepi pengelelak, jampat lepie,aus,enggau tubuh berasai berat baka ditating batu kaki ko keduak ia bekenang nusi jerita ba lebuh bejalai maia siang tadi.Tudah Jeniah enda entu lelap mata laban berasai enda nyamai isik.Lebuh sida berkenang tadi,enda mukai mukai sida pengayau bala dayak enyau tersium bau renggut mansa ari ulu,naka pemau rengut baka bungai malam ari sereta wangi. Diak sida ketuai ngasuh nembiak anang richah anang inggar nyepi nyium bau utai bakanya.Makin sida enda bermunyi makin ga bau renggut nya balat agi ngesuh nepuk.Enda mukai mukai bisi anembiak siko ti enda tan ati laban bau renggut nya majak ngesuh tadi sereta ia baru terubah enggau bejalai nurun jauh ngayau diak alu terpansut ke leka jako madah naka pemau renggut nya tadi.Lebuh ia ka ngambis ke leka jako tak semetap mulut ia ditampar alu dipampul apai tuai siko ti ngimbai ia diak sereta sida kabukai pen alu nyau melut ke leka mata magang agai anembiak nya tadi.Tang Jeniah nyium bau nua tak bau but mensia disium ia baka bau bangkai mensia.Nyau bisi bisi dua kali nginsap sempama ko orang tuai,alu enda mukai mukai diak ketuai dayak bansa Kenyah nawih tubuh Dumbang alu mulut ia ngasuh Dumbang meda kulu.Nyau sama malik kulu magang sida pengayau tadi,peda tak penuh karangan ulu enggau api lampu buluh ti berintai datai ari ulu.Diak sida ke diak sama ngerak pangan diri ni bagi ke tindok,sida alu ngepan gari kayau alu sedia ngetan. Dumbang alu narit tubuh anembiak nya tadi alu sida ia alu ngunsut tubuh nembiak nya ngena tanah ladu alu ia dilalai ba pun buluh,alu dijagaa sida kabukai din magang.Dinga ari ulu nyau kedumu aja nyawa orang bejako berandau baka orang indu.Diak Kisuh jampat narit jari Jeniah ngampir tisi ia,alu Dumbang ngasuh bala kabukai nyedia diri laban utai datai nya ukai mensia ko Dumbang madah.Bisi kaduak gegetar kaki tang Jeniah duduk aja ba tisi apai ia Kisuh.Lebuh orang nya datai tadi,dipeda ari senaya pancar api tak berupai bala sida indu dara naka pemaioh nya ga.Diak sida indu dara alu nanya,nyadi ke enda langkau sida ia ditiki bala pengabang indu dara tang Dumbang madah enti sida niki sigi dipumpung sida ambis indu dara nya negi ko Dumbang madah udahnya.Alu reraoh ga indu bukai minta kasih meh ko sida ia laban sida ia ka gauk enggau sida bujang berani ko nala indu nya madah.Tang Dumbang madah enda tau buya kami mensia kitak nya ko Dumbang madah.Ninga Dumbang majak bejako kenya ti ngujung sida indu to alu ketawa lelekai alu terebai kin kia ngacau alu ngeregau bala pengayau.Ni bisi penemu naka ulih meh muka leka sampi bisa tang enda meh antu indu nya lari ari ngacau sida,nyau balat sebalat gik antu indu nya ngacau sida ia.Ni ke ulih alu dempa sida antu indu tu ba ucu ugai meh sida ia tadi,meda utai bangat ngeraya nya ngacau sida pengayau kabukai.Diak Jeniah alu mantai kapak ia alu didaing ia ba api buluh sereta alu dipancar ia ke langit.Seretai nya ari senentang sida ia ba diak alu tawas baka bisi matahari ba malam ari senentang urung nya tadi.Peda alu temepak bala antu indu tadi ari pucuk kayu.Ambis keduak ia belalai belah nisi bandir,ni enda sempat belalai alu angus alu ancur meh antu indu nya tadi.

Meda bakanya diak Dumbang alu nyekak rekung ketuai antu indu siko sereta alu ka munuh sida antu indu nya tadi.Tang Kisuh madah anang munuh sida ia ko Kisuh.Diak Dumbang alu nanya bakani chara pucau tau meri sida antu indu tu lari enti sida antu indu tu ngacau anak mensia agi.Diak tuai antu indu nya ka enggai madah tang udah meda ketuai dayak bansa Penan majak mumpung pala antu indu kabukai tadi laban tuai antu indu enggai madah leka pucau nya tadi ngujung ketuai antu indu madah leka pucau nya tadi.Meda udah leka pucau nya tadi ditemu, diak sida sama ngingat magang leka pucau nya tadi tang ti kabukai sebut sida ia sigi enda ngasi leka pucau nya.Nyadi maia nya Dumbang ngaga sitik pagar ari leka pucau ketuai antu indu nya tadi.Ko antu indu nya madah,barang sapa mensia nemu leka pucau nya sigi dikacau sida ia laban sida ia ka nguji ngasi ke enda leka pucau enya ba sida antu indu. Pengudah antu indu nya dilepau Dumbang diak ia ngasuh Jeniah bado naing kapak ia ngimbai api buluh.Diak semalam malam nya sida pengayau berkenang penemu Jeniah ti bakanya. Nyau enda berasai sida pengayau pen tindok,Jeniah pen tindok tang Jeniah bisi bermimpi bertemu enggau Bunsu Antu Indu ti madah agai Jeniah,ti Jeniah nadai ngembuan Kapak Mua Ari ti ditempa Sempulang Gana udah lesi udah bebadi magang sida ia tadi laban bisi antu indu kabukai ka ngesah sida tadi tang benasip endar Jeniah bisi ngembuan nya.Bunsu Antu indu alu madah ke Jeniah ia minta ampun laban sida salah kacau salah regau enda ngelala ucu ambu Sempulang Gana ti megai dunya sebayan enggau dunya nyata.Bunsu Antu indu tadi alu meri Jeniah leka pucau ngangau bala antu indu enti Jeniah beguna ke sida ia lebuh berkayau jemah ila.Pengudah nya Jeniah alu terdani tindok sereta alu angkat nyau agi kabus ari pagi diak Jeniah malik ke tisi sereta ia meda bala pengayau dayak agi tindok magang laban buntau gagau diregau antu indu demalam.Nurun Jeniah ari langkau alu birak ba sungai,udah birak diak Jeniah terpeda ke akar tubai ba tebing.Jeniah alu mantap akar tubai nya tadi alu ia berjalai kulu,seretai nya ia alu nubai lubuk panjai nya ari ulu,udah dikirah alu dipalu ia tubai tadi nebing lubuk.Bisi mendua insap ukam bertampung dinsap tadi,diak meh ikan ke mesai capan mesai pah nyau terpejul mabuk ari dalam lubuk.Makin lama gik tudah Jeniah nganti makin maioh agi ikan mabuk.Meda bakanya diak Jeniah alu angkat alu ngumpul ikan kebesai aja ia ke mit mesai betis delak ke ia aja. Dangkut Jeniah ikan ke tebing pemendai langkau,udah diperuti alu ditetak Jeniah nya tadi.Alu ia ngiga buluh kena mansuh ikan nya tadi.

Pemanjai rintai pansuh bergembar mendua dintu Jeniah bisi pemanjai seratus pintu,agi nubah meh ikan maioh ba karangan ulih Jeniah nubai tadi.Meda utai berembun berasap tepok pansuh Jeniah diak bala jaga alu dani alu seretai nya kaduak pengayau nyau terdani magang laban ensium utai berasap balat.Nyau ngapo sida bala pengayau meda pemanjai rintai pansuh ikan ulih Jeniah.Diak sida pengayau sama angkat magang sama ngintu ikan kabukai ti ulih Jeniah nubai tadi.Udah makai,laluh pansuh alu disimpan,diak bala pengayau berkena ngepan gari ngayau.Jeniah alu nawing apai ia Kisuh belama sereta Guntur dudi.Serak to Jeniah dulu ti ngujung Jeniah bejalai naka peneras naka pengelaju,alu pia mega bala pengayau kabukai tak ngasai tubuh lempung,enda eikak,enda aus sereta ngasai pejalai sida laju belama.Enda berasai udah ngilah tiga itek tuchung bukit pengudah Jeniah dulu ari sida ia.Kisuh pen ngasai bakanya,ba temilah Jeniah bisi ditepuk aki Remaung Gana petunggal Sempulang Gana ti bisi ngembuan pengaruh bisa ba dunya ia nya Pemintas Jalai Pemandak Menua. Pengaruh tu kala dikena orang ketuai kelia pengudah pemati Jeniah, bepun ari Banyan,Gindam, Sandom, Ukau, Ekau, Dinggun, Rantai, enggau pengambis jeman nadai ditemu agi dipegai Balang maia taun 1888.

Keno ko jerita tuai pengaruh to agi ngiga orang ti bidik ngibun utai laban to asal pengaruh tuai kitai Dayak kelia.Pulai agai kenang Jeniah tadi,lebuh niki bukit sigi semampai dulu belama tudah Jeniah laban ia kasih meda apai ia Kisuh dasuh matau pejalai sida pengayau belama.Nyadi Kisuh puas ngelara Jeniah enda nyagi ia dulu belama bejalai tang ditagang Dumbang laban Dumbang ngasai ti Kisuh dulu, tubuh sida ia berasai berat belama alu jampat lelak.Diak Dumbang ngasai Jeniah tu bisi utai nulung tang Dumbang enggai bermunyi alu pia mega ketuai dayak kabukai pen ngasai bakanya magang. Lebuh sida datai tinting bukit Jeniah meruan tindok nganti penatai sida niki katas bukit.Datai tuchung bukit ke lapan diak sida alu ngetu makai magang.Ari tuchung bukit sida nimpai ari jauh alu terpeda ke rembun asap ba tuchung bukit baruh ari sida ia.Nya meh tanda rumah munsuh bisi ba din ko ati sida ke bujang berandau belahnya pengudah penembu ngintu diri makai.

To be continue.

Jerita Jeniah Bercabang Lidah part 6.

Memunyi burung ruai di pulau Kedimpai,memunyi cecuwit madah ka muka pintu tisi langit,memunyi cuai madah pagi ka datai,engkukuk manuk ngangkat ke mensia dani tindok,reruik janik minta ditengkanik,kekerus ukoi diruai nanda ari pagi celap amai.Dinga mensia ba Batang Mandai terdani ngejung pagi alu ngintu diri nurun ngayau ka malas kesulau niki jejuau ke langit lingkau.Kisuh alu terdani ninga bini ia Sulie ngerak ia dani tindok ngasuh ia engkira nurun ngayau ke Menua Berandah Mesai Nibung Nipah,ninga indai ia Sulie bisi inggar ba dapur diak Jeniah terdani alu engkira jampat ka enggau sida ketuai ngayau.Dinga ia akak ia mega engkira nurun enggau ngayau.Nama agi deh,udah Sulie berenah makai pagi,diak Kisuh enggau Guntur tadi alu keruai ngemai keresa nurun ngayau pengudah udah nyikap nurun pergi agai mata ari mati ka ngayau sida Dilai ensumbar Tuai Kayau Tanah Bukit Besai.Lebuh bala ketuai dayak bela atai diak magang diak Dumbang alu nanya keni mimpi bala anak buah dayak kebukai,diak ari punjung bukit alu nyeraoh manah manah magang,enti kitai maia to bisi diak tak naka kitai ngeransing ke ati meda pemaioh mensia bansa dayak bergerempuru ari tinting bukit nyentuk tinting seberai nyemerai penuh enggau pungka lelaki berani bansa dayak,reraoh sida kelaki madah berpantun bejako danjan bejako bertipan bermunyi baka tu,

Kesut kesut tali belibut,
Kesut kesai ngetan terabai,
Sapa mansang sapa datai,
Sigi parai dipumpung ba pala dikelempai,
Ga anang mungkal ga anang nanjal, Laban kami purih enggai pulai nikal,
Enti di ulu di sual kami udah nyadi lemayar,
Nama kabuah kami ka nikal,
Enti pala bala Dilai empai kami tu papal,

Berundang malam kami sigi enda gidan, Enggai madah alah ka ia pala ditaban sida Putan,
Ka tubuh dibinsai tang kami sigi ngenan, Ba dunya alah ba sebayan kami entah meh kaban,

Kederut insap ukam dinsap sida Munan, Ti lesi bebadi puntan meh lelangan ngenyan perau langkan,
Enggai meh pulai gegendai ngesan daun pengan,
Ka agi ngemai lengan munsuh enti pala ia enda ulih ditangan..

Kenya meh jako ansak bala dayak ti bisi diak agai pangan diri,udah Dumbang ngangkat kejari baru sida dayak kabukai bado betimang berpantun leka jako nya agi laban ka ninga jako lalau ari ia.Udah ngetu enda inggar diak Dumbang alu bejako lalau ti ngelalau bala sida ke bujang ti baru enggau nurun ngayau.Pengudah bejako lalau diak meh manang Senipoh ensumbar Pemali Nyepuh alu bejako maca leka sampi ngica kayau besai tu nyadi pulai ke menang.Udah bersampi,alu teraoh bala mensia sama nyebut Sempulang Gana,Sengalang Burung,orang Panggau Libau sida Gemuring Gading,orang Gelong Nyaing Negung sida Apai Tutong Bujang Rengayong enggau sida kabukai.Aram kitai nurun ngayau ngiga pala kitai negung nisi langit ngilong puchuk perabung.Ohhh haaaaa  ohhh haaa ohhh haaaa ohhhh haaaa.

Seretai udah nyebut nya tak dinga burung lang merengik musin langit beripih ari kanan pulai ke kiba nyau bisi tujuh kali alu dipeda burung kenyalang musin langit ngengang nitih pusin burung lang alu udah alu lesap alu midang,meda utai bangat ngemana nya diak samoa bala Dayak alu manjung kekuau ngilau nyentuk tanah berenyang ai sungai beralun besai ninga panjung mensia tak meradak ke nyawa laban gaga meda burung nurun ngayau naka ngemanahnya.Kekaoh alu beruah menua kampung jerung alai sida bala dayak reroah.Pulai agai Jeniah tadi,Jeniah alu beguai makai kediri ba bilik sida ia laban ia ngelaun kediri laban ngenangi sida apai ia Kisuh enda nyagi ia nurun ngayau.Keno ko jerita Jeniah dunsut Bunsu Ular ngena ai mata ular ngica ke Jeniah enda mejam ke mata lebuh tindok laban kenya ngica Jeniah semampai dani merati madik ia Guntur enggau apai ia Kisuh.Udah makai diak Jeniah alu nurun ke tanah alu belalai nyelepak orang entabanyak ti nurun ngayau tadi.Udah sida sarumah terkaoh manjung diak sida bala dayak alu nurun,nyadi kedulu magang tadi sigi manuk sabung bala ketuai bangsa dayak,laban Kisuh to manuk sabung Dumbang ia sigi semampai dulu enggau anak ia Guntur ti baru berajar ari ia penemu nurun ngayau.Seretai sida nurun,bisi keduak tinggal mega laban bisi ngembuan mimpi enda manah alu sida ia dasuh nyaga menua bansa dayak maianya.

Ba jerita tuai aki tuai Kuling,palan menua bansa dayak to bedau bisi tinggal kayu tebelian ti kala nyadi tiang rumah sida ia suba tang kemaioh udah dilamun tanah laban menua nya tusur laban tanah,alu pia mega bisi pun batu berdiri alai Bejie nangga mua ari agi bedau ba menua Batang Mandai Mati nyentuk kediato tang kitai mensia kediato enda ulih kin agi laban menua to bisi ngembuan buluh perindu ti paling bisa ti ulih munuh kitai mensia.Enti kitai ninga munyi muzik buluh perindu to,kitai mensia alu sinu ati alu ngujung kitai lemik tulang alu ka ngantuk,udah ngantuk kitai enda ingat ke dunya agi ti ngujung kitai berasai enda lepi enda aus tang tubuh kitai kurus laban enda makai ngujung kitai parai ketegal lepi tauka lapar.Agi kelia lebuh aki tuai Kuling datai ba madang buluh perindu to,agi maioh rangka mensia,jelu,burung enggau rangka antu gerasi bisi dipeda ba dito.To meh kabuah ia ba ulu Batang Mandai to dikanggau Batang Mandai Mati laban ba dito meh buluh perindu,Jematan Titi Rawan,Pun Semengat,Kayu Biau Balai enggau maioh agi bedau ba dito,alu ngilah keatas agi bisi terpeda pun kayu Kelimpai ti besai nyentuk kediato pun kayu to bedau agi tang ti dipeda mata kasar kayu nya baka ke mit tang enti ba pun kayu to nya baru dipeda pemesai ia kira sari musin ngelilingi pun kayu to ti mensia baka kitai to ko aki tuai Kuling nusi agai kami suba kena taun 2002.Enggi aki tuai Kuling mina 4 jam aja musin pun kayu Kelimpai to.Agi menya kabuah Batang Mandai Mati dipansa leja sabak laban ba dito meh kitai mensia pengarap lama niki ke langit ari Titi Rawan Titi Emparaja bepun ari Pun Tangga Bejie ti ka niki ke langit laban enda puas ati ketegal petenah Indu Dara Peragi Dara Tuchie ti ngumbai Bejie butang enggau ia ti ngujung Bejie enda liat ati nyau nangga mua ari laban ka ngiga petara ngica orang petenah nya malu magang ketegal ia digaga bakanya.Pulai agai jerita Jeniah tadi,udah sida nurun ngayau diak Jeniah alu nitih ari dudi laban ia ngenangi ia ditemu orang enggau nurun pergi.Udah ia madah ke indai ia enggau orang ngayau diak ia alu jejampat nurun laban ia nemu indai ia sigi nagang ia enggau nurun ngayau. Kapak ia ditangkin ba belakang,kapak nya naka pemesai dipeda mata tang tak lempung aja desan ia ba belakang,bejalai ia nitih ari dudi diak Jeniah meda bekau kaki bansa dayak enyau ambis kelupak kulit kayu kena tanjal kena indik pemaioh mensia dayak ti nurun ngayau maia nya,ni kayu purang besai pah mesai betis nya sigi patah kena paut kena tujo bala ke ngayau tadi,ambis lendat menua kena pansa bala maioh maianya.Terguyap aja pun kayu kena pansa bala pengayau kitai dayak,bedau agi enti nilik pun atas kayu,nyau baka nyumboh bala keduak ia bertiki pun kayu ninjau menua ti ka dipansa,ni keduak ke ka ngeransing ati ambis pun kayu mesai sepemerap dipandam ditanjal alu dibukut kena nguji pengering diri lebuh bejalai ngayau.Nyau kira ka lemai diak bala pengayau alu ngetu ba ulu sungai alu begaga ke langkau alai bermalam,bisi keduak tadi enyau ngasu alu bulih jani nyadi kelauk maia malam nya.Berdunjung ja jelu baka rusa,janik,kijang,sempidan,pelanduk,ika n,paku tubo,enggau maioh agi meh utai kedempa maia lemai nya.Udah ngaga unggun api,diak bala ke nyadi nyaga penindok tadi alu bejaga alu keduak ia ngintu penakai,enggi Jeniah alu bulih pelanduk tang ia jauh agi nunu utai dulih ia ari sida nyin tadi laban ngenangi ditemu orang ia nitih ke apai ia Kisuh tadi,enda mukai mukai ia ditegah orang tak tekala,malik ia ketisi meda madik ia Guntur enggau Sandah rerising ketawa meda ia terkenyit tadi,akak ia Guntur sigi nemu ia nitih sida ia laban ari mimpi Guntur empu,ia dipadah ke apai tuai siko ti madah bisi madik ia Jeniah ka nitih sida nurun ngayau.Diak ia alu dibai Guntur agai bala maioh ba langkau pengayau tadi,ti ngujung Kisuh nganu Jeniah kasak amai,tang Guntur nanah ke tudah Jeniah alu madah agai bala maioh ke bisi diak,enti Jeniah enda enggau kayau sida ka alah ko Guntur madah ke mimpi ia ba rumah panjai din sarinya ko ia nusi mimpi ia.Tak ngenung magang bala entabanyak tadi ninga mimpi Guntur bakanya,udah ga Jeniah nya baru berumur ka ngangkat diri bujang ko keduak ia ba diak tadi bejako enggau pangan diri, keni tau ia meri kayau nya menang deh ko keduak nanya Guntur,tang Dumbang alu narit jari Jeniah alu ditilik ba jari,udahnya Dumbang alu tucum,udahnya Dumbang alu madah baka tu "Tu meh mensia baruh dunya ti ka datai nyadi Raja Iban Raja Dayak,Tuai Kayau Tuai Ari Tuai Pergerusek,ia ulih ngidup bansa kitai dayak alu ia mega ulih munuh kitai dayak jemah ila,ia enda munuh kitai dayak ari jari ari runding tang ari ulah kitai dayak empu ti ka nemu utai ari ia ila",..(jako to semampai dikingat ke aku belama nyentuk kediato)

Udah ninga Dumbang bejako bakanya tak ngenung magang bala mensia dayak maia nya.Tak alit ati ninga jako Dumbang nyelai ari ke udah laban lebuh Dumbang megai jari Jeniah tak begetar ati Dumbang meda jari Jeniah alu lidah Jeniah sereta mua Jeniah.Nyau mansau utai dipanduk kelemai nya diak sida alu makai magang,lebuh ngayau orang kelia sigi enda bejako makai alu makai semakai,udah tembu makai alu duduk ba langkau,nyadi Kisuh nyau tusah ati laban 2 anak lelaki ia enggau ngayau,sereta tusah ati ninga jako Dumbang laban Jeniah ila ngerumpang peyerakup bansa Dayak ila ko Dumbang nusi ke ia aja lebuh seduai ia bertungga makai tadi.Dahnya Dumbang nusi Jeniah besai ila sigi Tuai Kayau,Pematak Kayau Menua ti munuh maioh mensia jemah ila ko Dumbang nusi ke ia,nyadi ba kenang orang tuai Dumbang to sigi bisi penemu nilik nasib mensia laban ia ditulong Bunsu Kemaya Ari Bunsu Penguji enggau kabukai meh.Udah tembu makai diak sida dayak sama jenuh nadai inggar laban kampung puang ukai baka ba rumah panjai ba menua din.

To be continue...